Ko e Ngaahi Fatongia Toputapu ʻo e Ngaahi Tamaí mo e Ngaahi Faʻeé

ʻOku ʻi ai ha ngaahi konga ʻo e faʻu ʻa Vikitā Hiukó ʻoku pehē:

“Naʻá ne pakiua ʻa e maá ʻo ne ʻoange ki he fānaú, ʻo na kai fiekaia ia. Naʻe pehē ʻe he sātiní, ‘Naʻe ʻikai tuku haʻane meʻa.’

“Ka ne pehē ʻe ha sōtiá, ‘Koeʻuhí he ʻoku ʻikai fiekaia ia.’

“Pea tali ʻe he sātiní, ‘ʻIkai [ka] koeʻuhí he ko e faʻē ia.’”

Te tau fakamanatu ʻi ha taʻu ʻe taha, ʻa e tui mo e toʻa ʻa kinautolu ne nau fai e fononga faingataʻa ʻo kolosi ʻi ʻAiouā, Nepulasikā, pea mo Uaiomingí, pea ʻoku ou fie fakalāngilangiʻi ai ʻa kinautolu ʻoku tatau mo e kau faʻē paionia ne nau tokangaʻi, lotua, mo faʻa faifonua pē siʻenau ngaahi pēpeé ʻi he halanga lōloá ni. Pea ʻi heʻeku fai ʻení, ʻoku ʻi ai mo ha kakai fefine ʻoku nau fanongoa hoku leʻó, ʻoku loto moʻoni ke ʻi ai siʻanau fānau ka ʻoku ʻikai. ʻOku ou lea atu fekauʻaki mo e meʻá ni, ʻe hanga ʻe he ʻOtuá ʻo ʻomai ha “ʻamanaki lelei [ki he] loto tō noᔹ ʻi ha ngaahi ʻaho ʻoku toka mei muʻa, tuʻunga ʻi hotau ngaahi loʻimata kuo tō he meʻá ni.² Hangē ko ia kuo toutou akonaki ʻaki ʻe he kau palōfitá mei he tuʻunga malangá ni, ʻe “ʻikai taʻofi ha tāpuaki” miate kinautolu ʻoku faivelengá, ʻio, neongo ʻe ʻikai maʻu ʻa e ngaahi tāpuaki ko iá he taimi pē ko iá.² Ka ʻi he taimí ni, ʻoku tau fiefia he ko e ui ko ia ke ohí, ʻoku ʻikai fakangatangata ia ki haʻatau fānau totonu pē.

ʻI heʻeku lea atu ko ʻení ʻo kau ki he ngaahi faʻeé ʻoku ʻikai ngalo ai ʻiate au ʻa e ngaahi fatongia mahuʻinga mo pelepelengesi ʻo e ngaahi tamaí, ʻo tautautefito ʻi hono lau ko ia ʻo e taʻe ʻi ai ha tamai ʻi he ngaahi fāmili ʻo onopōní, ko e “tefitoʻi palōpalema fakasōsiale ia ʻo hotau taimí.”³ ʻOku moʻoni ʻe lava ke hoko ʻa e taʻe tamaí ko ha palōpalema pea aʻu pē ki he ngaahi ʻapi ʻoku ʻi ai ha tamai, ʻoku kai pē mo mohe “taʻe fai ha ngāue.” Ka ko ha pōpoaki ia ki he kau taulaʻeikí ke fai ʻi ha taimi kehe. ʻOku ou fie fakahikihikiʻi he ʻahó ni ʻa e nima ʻo e ngaahi faʻē ne nau luelue ʻa e mohenga pēpeé, mo akoʻi ʻi he angatonu ki heʻenau fānaú, he ko e ʻelito kinautolu ʻo e ngaahi taumuʻa ʻa e ʻEiki kiate kitautolu ʻi he moʻui fakamatelié.

ʻI heʻeku leá ni, ʻoku ou fakaongo atu ai ʻa e meʻa ne tohi ʻe Paula ʻi heʻene fakahīkihikiʻi ʻa e “tui taʻe loi” ʻa Tīmoté, ʻa ia ne muʻaki nofoʻia hoʻo kui ko Loisí, [mo] hoʻo faʻē ko ʻIunisí.“⁴ Naʻe pehē ʻe Paula, ”Talu hoʻo kei siʻi [mo hoʻo] ʻiloʻi ʻa e ngaahi tohi māʻoniʻoní.“⁵ ʻOku tau fakamālōʻia heni ʻa e faʻē mo e kui fefine kotoa pē kuo tau ako mei ai ʻa e faʻahinga moʻoni peheé ni kuo tau ʻiloʻi ʻi heʻetau kei īkí.

ʻI heʻeku lea fakalūkufua ki he ngaahi faʻeé, ʻoku ou loto ke u fakahīkihikiʻi mo fakalotolahiʻi ʻa e ngaahi faʻē kei talavoú. Ko e ngāue ʻa e faʻeé ʻoku faingataʻa, mo ʻikai faʻa fakatokangaʻi. Ko e taʻu ʻo e kei iiki ʻa e fānaú ʻoku faʻa hoko ia ʻi he kei ako ʻa e husepānití pe uaifí pe ʻokú na ako fakatouʻosi—ko e ngaahi taimi ia ʻoku kei fakaangaanga ai ʻa e husepā- nití ke ngāueʻi ha moʻuí. Fetōʻaki fakaʻaho ʻa e meʻa fakapaʻangá ʻi he siʻisiʻí mo e hala ʻaupitó. ʻOku faʻa teuteuʻi ʻaki pē ʻa e falé ha sīpinga ʻe ua—ko ha ngaahi nāunau fale motuʻa me he Kautaha Teseletí pe ko e hala ʻatā. Ka ʻoku ʻi ai ha kā, ʻoku leleʻaki pē e leta molemolé pea mei maha mo e penisiní. Ka ko e faingataʻa lahi taha hono fafanga poʻuli mo e nifo ʻa e fānaú ki he ngaahi faʻē kei talavoú, ʻa ʻenau ongosiá. ʻOku ou ʻiloʻi ko e ngaahi taʻu ko ʻení, ʻoku touʻanga lahi siʻi ngaahi faʻeé kae siʻi ʻenau mohé, pea foaki lahi ange ki he niʻihi kehé kae siʻi pē kiate kinautolu, ʻo laka hake ʻi ha toe kulupu kuó u ʻiloʻi ʻi ha faʻahinga taimi. ʻOku ʻikai ai ha ofo ʻi he ʻuliʻuli ange siʻonau lalo fofongá ʻo faʻa ʻasi lahi.

Ko hono fakaolí he ʻoku meimei ko e kau fefine pē ʻeni ʻoku tau faʻa fie ui—pe fie maʻu ke ui—ke nau ngāue ʻi he uōti mo e ngaahi houalotu ʻa e siteikí. ʻOku mahino pē ia. He ko hai te ne taʻe fie maʻu e ngaahi ivi faʻifaʻitakiʻanga ʻo e kau Loisi mo e Kau ʻIunisi ko ʻení? Ke fakapotopoto muʻa ʻa e taha kotoa. Manatuʻi ko e fāmilí ʻoku muʻomuʻa tahá, ʻo tautautefito ʻi he ngaahi taʻu toki kamatá. Ka fai ia ʻe maʻu ʻe he ngaahi faʻeé ha ngaahi founga lelei ke nau ngā- ue fai velenga ai he Siasí, pea aʻu pē ʻo tokoniʻi mo fakamālohia koe—mo ho fāmilí ʻe ha niʻihi kehe—ʻi he founga tatau.

Fai hoʻomou lelei tahá ʻi he lolotonga ʻo e ngaahi taʻu ko ʻení, tatau pe ko e hā ha toe meʻa te ke fai, tokangaʻi ʻa e ngafa ko ʻeni ʻoku ʻaʻaú pea mo ia ʻoku tuku mai ai ʻe he langí ha kau ʻāngelo ke nau leʻohi koe mo hoʻo fānau īkí. Ngaahi husepāniti—ʻa e husepānití pē—pea pehē mo e kau taki faka-siasi mo e kaungāmeʻa ʻi he tapa kotoa, mou faʻa tokoni, mo ongoʻingofua, pea mo fakapotopoto. Manatuʻi, “ʻoku ʻi ai hono kuonga ʻo e meʻa kotoa pē mo e ʻaho ki he ngāue kotoa pē ʻi he lalo langí.”⁶

Siʻi ngaahi faʻē, ʻoku mau ʻiloʻi mo fakamālōʻia hoʻomou “tui ʻi he foʻi laka kotoa peé.” Mou ʻiloʻi muʻa naʻe mahuʻinga, pea ʻoku kei mahuʻinga, pea ʻe mahuʻinga ia ʻo taʻengata. Kapau kuo aʻu ki ha tuʻunga ʻo ke fuesia toko taha ai pē ʻa e fatongiá ni, ʻo ʻikai hao hoa ʻi ho tafaʻakí, tatau pe ko e hā, ʻe toe lahi ange ʻemau lotua koé pea mo fakamātoato ange homau loto ke tokoniʻi koé.

Naʻe tohi mai kimuí ni kiate au siʻa faʻē kei talavou, ko ʻene hohaʻá ne hangē ne tupu ia mei ha meʻa ʻe tolu. ʻUluakí, ko ʻene fanongo pē ki he ngaahi lea he Siasí fekauʻaki mo e tuʻunga fakafaʻeé, ʻoku faʻa tangi ai ʻi heʻene ongoʻi naʻe ʻikai feʻunga pe ʻoku ngalingali he ʻikai feʻunga mo e fatongiá ni. Uá, naʻe hangē ki ai ʻoku fie maʻu ia ʻe he māmani ke ne akoʻi ʻene fānaú ʻi he laukongá, tohi nimá, teuteu falé, lea faka-Latiná, fiká, mo e ʻilo ki he ʻinitanetí— ki muʻa pea toki lava ʻa e kiʻi pēpeé ke ne puʻaki ha faʻahinga foʻi lea. Tolú, ʻokú ne faʻa ongoʻi ʻoku sio lalo ange ʻa e kakaí, naʻe ʻi ai ha faʻahinga ʻuhinga, he ko e faleʻi pe ngaahi fakahikihikiʻi naʻá ne maʻú, naʻe hangē ko ha ngeʻesi peé—ko e ongosia ʻo e lotó mo e laumālié, ʻa e fiemaʻu ʻoku aʻu ʻo ʻaho kakato mo pō kakató, ʻoku ʻosi ai ʻa e kātakí, ʻo faʻa hoko ia ʻi he feinga mo e loto ke aʻusia ʻa e tuʻunga fakafaʻē ʻoku ʻamanaki ʻa e ʻOtuá te ne aʻusiá.

Ka naʻá ne pehē ne ʻi ai ha meʻa naʻá ne kei fakalotolahiʻi ia. Te u lau atu: “ʻI hono kotoa ʻo e meʻá ni, pea mo e loʻimata ne faʻa toó, ʻoku ou ʻiloʻi loto ʻoku ou fai e ngāue ʻa e ʻOtuá. ʻOku ou ʻiloʻi ʻokú ma kaungā ngāue mo Ia ʻi hoku tuʻunga fakafaʻeé. ʻOku ongo kiate au ʻa hono maʻu ʻe he ʻOtuá ʻEne taumuʻa māʻolunga tahá mo hono ʻuhingá, ʻi heʻene hoko ko ha mātuʻa, neongo ʻoku faʻa ʻai ia ʻe Haʻane fānau ʻe niʻihi ke Ne tutulu.

Naʻá ne fakaʻosi ʻo pehē, “ʻI he ʻiló ni, ʻoku ou feinga ai ke u manatuʻi ʻa e ngaahi ʻaho faingataʻá ʻi he taimi ʻoku faʻa taulōfuʻu aí. Mahalo ko hono ʻuhinga moʻoní ko ʻetau taʻe malavá mo ʻetau hohaʻá, ʻokú ne ueʻi ke tau kakapa atu kiate Ia mo fakafaingamālieʻi ai Hono ivi ke aʻu mai kiate kitautolú. Mahalo ʻoku fakaʻamu fakapulipuli pē kuo pau ke tau hohaʻa pea kuo pau ke tau kole ange ʻi he loto fakatō- kilalo ke Ne tokoni mai. ʻOku ou tui, te Ne toki lava ʻo akoʻi fakahangatonu leva ʻa e fānaú ni, ʻo fakafou ʻia kitautolu, ʻo ʻikai hatau toe loto. ʻOku ou saiʻia he fakakaukau ko iá pea ʻokú ne ʻomi kiate au ha ʻamanaki lelei. Kapau te u lava ʻo anga-tonu ʻi he ʻao ʻo ʻeku Tamai Hēvaní, mahalo ko ʻene fakahinohino ki heʻema fānaú he ʻikai lava ke toe toʻo. Mahalo ko e taimi ia ʻe toki hoko ai ko ʻEne ngāue mo Hono nāunau ʻi he tafaʻaki kotoa pē.”⁷

ʻOku mahino mei he faʻahinga ʻuhinga ko iá, ko e niʻihi ʻo e ngaahi ʻuliʻuli ko ia he lalo matá, ʻoku ʻikai tupu ia mei he fetongi napikení mo e fetuku meʻalele ʻo e fānaú ki he akó, ka ʻoku mei ha ngaahi pō ʻo e taʻe mamohe ʻi he fakakaukauʻi hoto lotó, mo e holi vale ke ohi hake ʻa e fānaú ni ke nau aʻusia e tuʻunga ʻoku finangalo ki ai e ʻOtuá. Tuku muʻa ke u pehē fakalūkufua ki he ngaahi faʻeé ʻi he huafa ʻo e ʻEikí, ʻi hono ueʻi au ʻe he faʻahinga līʻoa mo e loto ko iá, ʻoku mou tōtō atu. ʻOku fuʻu sai moʻoni hoʻomou ngāué. Ko e foʻi moʻoni ko ia kuo ʻoatu kiate kimoutolu ʻa e faʻahinga fatongia peheé, ko ha fakamoʻoni taʻengata ia ʻo e falala atu ʻa e Tamai Hēvaní kiate kimoutolú. Kuo mou tokoni. ʻOku ʻikai tonu ke ke fai toko taha pē ia. ʻOkú ne ʻafioʻi ko hoʻo fanauʻi ha tamá ʻoku ʻikai te ne ʻai ke ke ʻilo kānokato ai. Kapau te ke feinga mo ho husepānití ke ʻofa he ʻOtuá mo moʻuiʻaki ʻa e ongoongoleleí; kapau te mo kole ʻa e fakahinohino mo e fakafiemālie ko ia ʻa e Laumālie Māʻoniʻoní kuo talaʻofa ki he kau mateakí, kapau te mou ō ki he temipalé ke fakahoko mo maʻu ʻa e ngaahi talaʻofa ʻo e ngaahi fuakava toputapu taha ʻoku fai ʻe ha fefine pe tangata ʻi he māmaní; kapau te ke fakahā ki he niʻihi kehé, kau ai hoʻomo fānaú, ʻa e tokanga tatau, mo e ʻofa, mo e loto faʻa fakamolemole ʻokú ke loto ke fai atu ʻe he langí; kapau ʻe fai ho lelei tahá ke ke hoko ko e mātuʻa lelei taha te ke lavá, kuó ke fakahoko ai ʻa e meʻa kotoa ʻoku malava ʻe ha tangata ko ia ʻoku finangalo ʻa e ʻOtuá ke ke faí.

ʻE fakamamahiʻi ho lotó he taimi niʻihi, ʻe ha fili ʻo haʻo tama pe mokopuna. He ʻikai faʻa hoko vave he taimi niʻihi ʻa e ngaahi ʻamanakí. Pea ʻoku hohaʻa ki ai ʻa e tamai mo e faʻē kotoa. Ka ʻi he fakaʻamu mo e lotu ʻa e Palōfita ʻofeina ko Siosefa Sāmitá, ʻi hono tuʻunga fakamātuʻá, naʻá ne pehē, “ʻE ʻOtua, ʻoua muʻa naʻa tuku ke mole ʻeku fānaú.”⁸ Ko e fakaʻamu ia mo e tailiili ʻa e mātuʻa kotoa pē. Ka ʻoku ʻikai ha taha kuo taʻe lava ʻo ka ne feinga maʻu pē mo lotu taʻe tuku. ʻOkú ke maʻu ʻa e totonu kotoa he māmaní ke ke maʻu ha poupou pea mo ʻiloʻi ʻamui ʻe ui ʻe hoʻo fānaú ho hingoá ko e monūʻia, ʻo hangē tofu pē ko e ngaahi toʻu tangata ʻo e ngaahi faʻē ki muʻa ʻiate koé, ne nau fakaʻamua hoʻo ngaahi fakaʻamú mo ongoʻi hoʻo ngaahi tailiilí.

ʻOkú ke maʻu ʻa e anga motuʻa ʻo ʻIví, ʻa e faʻē ʻa e fāmili kotoa ʻo e tangatá, ʻa ē naʻe mahino ki ai kuo pau ke ne hinga mo ʻĀtama kae “ʻi ai ʻa e tangatá [mo e fefiné]”⁹ pea maʻu mo e fiefiá. ʻOkú ke maʻu ʻa e anga motuʻa ʻo Sela mo Lepeka mo Lēsielí, ka ne taʻe ʻoua kinautolu ne ʻikai maʻu e ngaahi tāpuaki fakapēteliake kia ʻĒpalahame, ʻAisake, mo Sēkopé, ʻa ia ʻokú ne tāpuakiʻi kotoa kitautolú. ʻOkú ke maʻu ʻa e ngaahi anga ʻo Loisi mo ʻIunisí, pea mo e ngaahi faʻē ʻa e kau tau ʻe toko ua afé. ʻOkú ke maʻu ʻa e anga ʻo Melé, ʻa ē ne fili mo tomuʻa fakanofo ki muʻa ʻi he māmaní te ne tuʻituʻia, mo fanauʻi ʻa e ʻAlo moʻoni ʻo e ʻOtuá. ʻOku mau fakamālō kiate kimoutolu hono kātoa, kau ai mo ʻemau ngaahi faʻeé, mo fakahā atu ʻoku ʻikai ha meʻa ʻe mahuʻinga hake ʻi he māmaní ka ko e kau hangatonu ʻi he ngāue mo e nāunau ʻo e ʻOtuá, ʻo fakahoko ʻa e moʻui fakamatelie mo e moʻui fakaemāmani ʻo Hono ngaahi ʻofefiné mo Hono ngaahi fohá, koeʻuhí ke hoko mai ʻa e moʻui taʻe maté mo e moʻui taʻengatá mei he puleʻanga fakasilesitialé mei ʻolunga.

ʻI hoʻo haʻu ki he ʻEikí ʻi he anga-malū mo e loto fakatōkilaló, pea hangē ko e lea ʻa ha faʻē ʻe taha, “ʻo tuki ʻi he matapā ʻo e langí ke kole, mo tautapa, pea mo fie maʻu ha fakahinohino mo ha poto mo ha tokoni ke fakahoko ʻene ngāue fakaofó,” ʻe fakaava ʻa e matapā ko iá ke ʻoatu ʻa e ivi mo e tokoni ʻo ʻitā- nití. Maʻu muʻa ʻa e ngaahi talaʻofa ʻa e Fakamoʻui ʻo e māmaní. Kole ʻa e lolo faitoʻo ʻo e Fakaleleí ki ha meʻa pē ʻokú ne uesia koe pe ko hoʻo fānaú. ʻIloʻi ʻe fakatonutonu ʻa e ngaahi meʻa lahi tuʻunga he tuí, koeʻuhí pē ko koe.

He ʻikai ke ke lavaʻi toko taha pē ʻeni, ka ʻoku ʻi ai ho tokoni. ʻOku ʻi heni ʻa e ʻEiki ʻo e Langí mo e Māmaní ke ne tokoniʻi koe. ʻA ē ʻokú ne kumi moʻoni ki he sipi heé, mo tafi fakamaʻa ke ne ʻilo ʻa e paʻanga ne molé, pea mo tali taʻe tuku ki he foki mai hono foha maumau koloá. Ko hoʻo ngāué ke fakahoko ʻa e fakamoʻuí, ko ia ʻe fakamaamaʻi koe, pea ʻoatu mo hoʻo totongi, pea hiki hake koe ki he tuʻunga ʻoku māʻolunga ange pea lelei ange ʻi he tuʻunga naʻá ke ʻi aí ʻi hoʻo feinga ke fai ho tūkuingatá, neongo pe ko e hā hano lahi ʻo haʻo ongoʻi ho vaivaí ʻi he taimi ʻe niʻihi.

Manatu, manatu ki he ngaahi ʻaho kotoa ʻo hoʻo hoko ko e faʻeé: “Kuo ʻikai te mou aʻusia ki he potu ko iá kā ne taʻeʻoua ʻa e folofola ʻa Kalaisí mo e tui taʻe-fakaʻaloʻalongaua kiate ia, ʻo falala kakato ki he ngaahi lelei ʻaʻana ʻa ia ʻokú ne māfimafi ke fakamoʻuí.”¹⁰

Falala kiate Ia. Falala moʻoni kiate Ia. Falala kiate Ia ʻo taʻengata. Pea “vivili atu ki muʻa ʻi he tui mā- lohi kia Kalaisi, pea maʻu ʻa e ʻamanaki ʻoku mālohi haohaoa.”¹¹ ʻOku mou fai ʻa e ngāue ʻa e ʻOtuá. ʻOku fakaofo moʻoni hoʻomou fakahoko iá. ʻOkú Ne lolotonga tāpuakiʻi ʻa kimoutolu pea te Ne tāpuakiʻi ʻa kimoutolu, kae tautautefito ki he ngaahi ʻaho ʻoku faingataʻa taha ai homou ngaahi ʻahó mo e ngaahi poó. Pea mou hangē ai ko e fefine taʻeʻiloa ko ia, naʻá ne feinga mai ʻi he angavaivai, pea ʻi he loto-veiveiua mo ʻe mā, naʻe tutui mai ʻi he fuʻu kakaí ke ne ala ki he tapa ʻo e kofu ʻo e ʻEikí, ko ia ʻe folofola mai ai ʻa Kalaisi ki he kakai fefine ko ia ʻoku hohaʻa mo fifili pea nau tangi he taimi ʻe niʻihi koeʻuhi ko honau fatongia ʻi heʻenau hoko ko e ngaahi faʻeé, “ʻOfefine, ke ke fiemālie; kuo fakamoʻui koe ʻe hoʻo tuí.”¹² Pea ʻe fakamoʻui ai foki mo hoʻomou fānaú.

Mei ha malanga naʻe fai ʻe ʻEletā Hōlani ʻi he konifelenisi lahi ʻa e Siasí ʻi ʻEpeleli 1997 (vakai ki he Conference Report, Apr. 1997, 46–49p pe Ensign, May 1997, 35–37; pe Tūhulu, Siulai 1997, 38–41).