Fulihi ʻo e Tohi Lēsoní ke Fakaʻaongaʻi ʻi he Nēsilí

ʻOku totonu ke ʻoua naʻa toe siʻi hifo he faiako ʻe toko ua ʻoku uiuiʻi ki he kalasi nesilī kotoa pē. Kapau ko e kau faiakó ʻoku ʻikai ko ha husepāniti mo ha uaifi, pea ʻoku totonu pē ko ha ongo fefine pe ongo tangata fakatouʻosi kinaua. ʻOku totonu ke fakatou nofo e ongo faiakó mo e kalasí ki he ʻosi kakato ʻa e taimi Palaimelí.

Ko e taumuʻa ʻo e kalasi nēsilí ke ʻi ai ha feituʻu fonu he ʻofá, malú pea maau ke lava e longaʻi fānaú ʻo fakatupulaki ai ʻenau mahino mo ʻenau ʻofa ki he Tamai Hēvaní mo Sīsū Kalaisí, pea nau aʻusia ha ngaahi meʻa lelei ʻi he ʻapi Siasí mo tupulaki ʻi heʻenau ongoʻi ʻoku nau mahuʻingá. Ko e kalasi nēsilí ko e fuofua meʻa faka-Siasi ia ʻoku aʻusia ʻe he fānaú ʻa ia ʻoku akoʻi ai ki he longaʻi fānaú ʻa e ongoongoleleí pea nau feohi ai mo e fānau kehé pea mo e kakai lalahí.

ʻOku totonu ke maʻa ʻa e loki nēsilí, fakafiefia mo fakalata foki pea ke tuʻu ia ʻi ha feituʻu ʻoku ofi atu ki he fale mālōloó ʻo ka lava. ʻE lava ke vahevahe ʻa e loki nēsilí ki ha ngaahi feituʻu mavahevahe ki he vaʻingá (ʻi ha kāpeti pe fala, ʻo ka lava), laukongá pe ngaahi ʻekitivitií pea mo hono fakahoko ʻo e lēsoní. ʻOku totonu ke maʻa, malu mo lelei ʻa e ʻū meʻa vaʻingá. ʻOku ʻikai totonu ke fakaʻaon-gaʻi ha meʻa ʻe fai ai ha kaka.

Ko e anga-mahení, ʻoku feʻunga e kalasi nēsilí mo ha miniti ʻe 40. ʻOku totonu ke vahevahe ʻa e taimi ko ʻení ki ha ngaahi konga kehekehe, ʻo takitaha poupouʻi ʻe he konga takitaha ʻa e taumuʻa ʻo e lēsoní.

Feinga ke palani fakauike ʻa e ngaahi lēsoni ʻoku meimei sīpinga tataú. ʻOku ongoʻi malu ange ʻa e fānaú he taimi ʻoku ʻi ai ha sīpinga paú pea nau maheni mo e ngaahi fetongitongi ʻi he ngaahi ʻekitivitií. ʻE lava ke fulihi e founga ko ʻeni ʻoku fokotuʻu atú ʻo fakatatau mo e ngaahi fie maʻu fakalotofonuá:

ʻOku ʻikai ʻalu e fānau nēsilí ki he taimi feʻinasiʻakí pe ki he ongo polokalama kamata mo tāpuní.

Talitali lelei mai kinautolú: ʻI he omi e fānaú ki he kalasi nēsilí, fakafeʻiloaki ki he tokotaha kotoa pē ʻaki hono hingoá.

Tokoni ke ongoʻi ʻe he kiʻi taʻahine mo e kiʻi tamasiʻi kotoa pē ʻa hoʻo ʻofá pea mo e ʻofa ʻa e Tamai Hēvaní. ʻE lava ʻe he ngaahi hiva fakalaumālié ʻo fakatupu ha ʻātakai ʻoku ʻapasia mo fakalata. ʻE lava ke maʻu ha tatau ʻo hono hiki ʻo e Tohi Hiva ʻa e Fānaú ʻi he kāseté(52428) mo e cd (50428).

Taimi vaʻingá: Tuku e fānaú ke nau vaʻinga tauʻatāina ʻaki e ʻū meʻa-vaʻingá, ngaahi fakatātaá pe ngaahi tohí. Poupouʻi e kiʻi tamasiʻi mo e taʻahine takitaha ke ne fili ha meʻa pē ʻe taha ke ne vaʻinga ʻaki ʻi he taimi takitaha pea fakafoki ia ki hono tukuʻanga totonú ki muʻa peá ne toki fili ha meʻa ʻe taha ke ne vaʻinga ʻaki. ʻOua naʻá ke fakamālohiʻi ha kiʻi tamasiʻi pe kiʻi taʻahine ke vahevahe ʻa e meʻa ʻokú ne maʻú ʻo kapau ʻoku ʻikai loto ia ki ai. Ko e fānau tokolahi ʻi he taʻu ko ʻení ʻoku teʻeki ai ke nau mateuteu fakaeloto mo fakasōsiale kinautolu ke vahe-vahe mo e niʻihi kehé. ʻAi ke ke ʻatā maʻu pē ki he fānaú, kae ʻoua te ke kau noaʻia ʻi heʻenau vaʻingá. ʻI he ʻosi ʻa e taimi vaʻingá, tokoni ki he fānaú ke fakamāʻopoʻopo ʻa e ʻū meʻa vaʻingá.

ʻE lava ke fakahoko ha ngaahi ʻekitivitī makehe lolotonga e taimi ko ʻení (vakai ki he konga “Ngaahi ʻEkitivitī mo e Ngaahi Vaʻinga maʻá e Nēsilí,” p. xviii–xxiv), ka ʻoku ʻikai totonu ke fakakau pau ki ai e fānaú.

Taimi Fakatahá: Fakatahaʻi mai e fānaú ke nau hivaʻi ha foʻi hiva pe teuteu ke lotu. ʻE lava ke maʻu ha lisi ʻo e ngaahi hiva lotú ʻi he peesi 310 ʻo e Tohi Hiva ʻa e Fānaú. Fakaafeʻi ha taha ʻo e fānaú ke ne fai ha lotu. Akoʻi e fānaú ke nau fai ha lotu nounou mo faingofua. Tokoniʻi kinautolu ʻo ka fie maʻu. Hili e lotú, fakaafeʻi e fānaú ke nau talanoa mo fevahevaheʻaki mo e kau faiakó pea mo e niʻihi kehé ʻi ha tōʻonga fakafaingofua. Fakahaaʻi ha ʻofa, ongo māfana mo fakaʻapaʻapa ʻi hoʻo ngaahi leá mo hoʻo ngaahi tōʻongá. ʻAi ke ke ongoʻingofua mo anga fakafaingofua. Mou aleaʻi e ngaahi fie maʻu mo e ngaahi meʻa ʻoku mahuʻingaʻia ai e fānaú. ʻE lava ke kau he ngaahi taumuʻa lelei ke aleaʻí ʻa e:• Ngaahi meʻa ne toki hokó ni ʻi he moʻui ʻa e fānaú, ʻo hangē ko ha pēpē foʻou ʻi honau ʻapí pe ko ha kaimeʻakai pe ʻeva ʻa e fāmilí.

• Ngaahi meʻa ne toki hoko ʻi he moʻui ʻa e fānaú, hangē ko ha ʻi ai ha pēpē foʻou ʻi honau ʻapí pe ko ha ʻeva fakafāmili.

• Ngaahi ʻaho mālōlō makehe.

• Ko e ʻeá.

• Vakavakaiʻi ʻo natulá.

• Ngaahi taukei fakasōsiale hangē ko e fakafanongó, vahevahé pe fakaʻaongaʻi ha ngaahi ʻulungāanga leleí.

• Ngaahi tōʻonga anga-ʻofa. ʻE lava ke fakaʻaongaʻi ʻa e fanga kiʻi vaʻinga ʻoku ngāueʻaki ki ai ʻa e louhiʻinimá, fakamālohisino punou mo faofaó, pea mo ha ngaahi hiva, ʻi he taimi ko ʻení ke tokoni ki he fānaú ke tuku ʻenau makaka takaí.

ʻE lava ke fakaʻaongaʻi ha ngaahi veesi ʻekitivitī, ngaahi fakamālohi-sino faofaó, pea mo ha ngaahi hiva lolotonga e taimi ko ʻení ke tokoni ke ʻoua ʻe hohaʻa ʻa e fānaú.

Taimi Hivá: ʻE lava foki ke fakaʻaongaʻi ʻa e mūsiká pe hivá ʻi he kotoa ʻo e taimi nēsilí ke fakatupu ha ʻātakai ʻoku fakafiefia mo fakalatá; akoʻi e pōpoaki ʻo e ongoongoleleí; mo tuku ke tauʻatāina e fānaú (vakai, “Ko e Hīvá ʻi he Lokiako Nēsilí,” xxiii–xxiv). ʻOku fiefia ʻa e fānaú ʻi hono hivaʻi ʻo e foʻi hiva tatau he uike takitaha. ʻOku totonu ke maʻu ʻe he kau taki mo e kau faiako ʻo e kalasi nēsilí ha tatau ʻo e Tohi Hiva ʻa e Fānaú. ʻE lava ke fakaafeʻi ha niʻihi kehe ke tokoni ki he hiva ʻi he kalasi nēsilí.

Taimi Sapá: Taimi tēpileʻi e sapá ke feau e ngaahi fie maʻu ʻa e fānaú. ʻOku totonu ke maʻu e paʻanga ki he fanga kiʻi sapa maʻamaʻa ʻa e fānaú mei he patiseti ʻa e Palaimelí. Koeʻuhí ʻoku sapa maʻamaʻa ʻa e fānaú he uike takitaha ʻi he kalasi nēsilí, ʻoku totonu ke fehuʻi ʻe he kau faiakó ki he ngaahi mātuʻá pe ʻoku ʻi ai ha faʻahinga meʻatokoni ʻoku ʻikai ke nau loto ke kai ʻe heʻenau fānaú (vakai, ki he Tohi Tuʻutuʻuni ʻo e Siasí, Tohi Fika 2: Kau Taki ʻo e Lakanga Fakataulaʻeikí mo e Ngaahi Houalotú [1998], 239). Ki muʻa pea tufa ʻa e sapá, tokoniʻi ha kiʻi tamasiʻi pe kiʻi taʻahine ke ne fai ha lotu ʻo tāpuakiʻi ʻa e meʻatokoní.

Taimi Lēsoní: ʻOku hiki e ngaahi lēsoni he tohi lēsoni ko ʻení ʻi he tūkunga ʻo e fānau taʻu tolú, ka ʻoku lahi ha ngaahi ʻekitivitī ʻi he ngaahi lēsoní pea mo e ngaahi konga ki he ngaahi ʻekitivitī fakatupulakí, ʻoku feʻunga mo e fānau iiki angé. ʻOku ʻi he lēsoni takitaha foki ha “Ngaahi ʻEkitivitī Fakalahi Maʻá e Fānau Iiki Angé.” (Fakatokangaʻi ange ʻoku ʻikai hiki atu ʻa e ngaahi nāunau mo e ngaahi teuteu ia ʻoku fie maʻu ki he ngaahi ʻekitivitī fakalahí ʻi he konga ko e “Teuteú” ʻo e lēsoni takitaha. Lau fakalelei ʻa e fakamatala ki he ʻekitivitī takitaha ʻokú ke fie fakaʻaongaʻí, ke fakapapauʻi ʻokú ke maʻu e meʻa kotoa pē ʻoku fiemaʻú.)

ʻE lava ke maʻu ʻi he peesi xxvi–xxix ʻa e ngaahi sīpinga ʻo e ngaahi founga te ke lava ʻo fulihi ʻaki e ngaahi lēsoni he tohí ni maʻá e kalasi nēsilí. ʻI hoʻo hanga ko ia ʻo fulihi ʻa e ngaahi lēsoní, manatuʻi ke ke fakakaukauʻi ʻi he faʻa lotu ʻa e mahino mo e meʻa ʻoku manako ai ʻa e fānaú. ʻOku totonu ke nounou mo kehekehe ʻa e ngaahi ʻekitivitií koeʻuhí ko e fānau ʻi he toʻu ko ʻení, ʻoku nounou pē ʻenau taimi tokangá. ʻOku ako ʻa e fānaú ʻi hono toutou fakahoko ha meʻa, ko ia te ke lava ʻo toe fakahoko ha ʻekitivitī tatau ʻi he lēsoni hono hokó pe ʻi ha ngaahi lēsoni he kahaʻú. Ke maʻu ha tokoni lahi ange ʻi hono akoʻi ʻo e fānau iiki angé, vakai ki he konga “Teuteuʻi ʻo e Ngaahi Lēsoní,” “Akoʻi ʻo e Ngaahi Lēsoní,” “Hivá ʻi he Lokiakó,” pea mo e “Ngaahi Nāunau Tokoni Fakafaiakó,” ʻi he peesi vii–ix.

Taimi ʻEkitivitií: Fili ha ngaahi ʻekitivitī hangē ko e valivalí, faʻu ha fanga kiʻi meʻa ʻaki e toú, fakatātaaʻi ha fanga kiʻi talanoá, fanga kiʻi vaʻinga mo e alā meʻa pehē (vakai, “Ngaahi ʻEkitivitī mo e Fanga Kiʻi Vaʻinga maʻá e Kalasi Nēsilí,” xix–xx) ʻa ia te nau poupouʻi ʻa e pōpoaki ʻo e ongoongoleleí, fakafaingofuaʻi hano fai ʻo ha fevahevaheʻaki, pe ʻomi ha ngaahi meʻa lelei ke nau aʻusia. ʻOua te ke hohaʻa ʻo kapau ʻe fie foki pē ʻa e fānau īkí ia ʻo vaʻinga.

Taimi Tāpuní: Tokoni ki he fānaú ke faʻo kotoa e ngaahi meʻa vaʻingá mo e ngaahi nāunaú ki he feituʻu totonu; pea mou vakaiʻi nounou pea toʻo kongokon-ga lalahi ʻa e pōpoaki ʻo e ongoongoleleí ne akoʻi ʻi he lēsoní. Tokoniʻi ha kiʻi tamasiʻi pe taʻahine ke ne fai e lotu tukú.

• ʻOkú ne fakakaukau faingofua mo totonu. ʻIkai mahino kiate ia ʻa e ngaahi fakakaukau fihí.

• ʻIkai fuʻu lōloa e taimi ʻoku tokanga aí (miniti ʻe taha ki he miniti ʻe tolu).

• Faʻa ʻeke pe fai ha ngaahi lea ʻoku ʻikai tatau mo e taumuʻá.

• Fuʻu fie ʻiloʻilo mo kaunoaʻia.

• ʻOku vēkeveke ke ako mo ʻahiʻahiʻi ha ngaahi meʻa foʻou.

• Fiefia ke toutou fai ha meʻa tatau pē.

• Lava ke ne fai ha fanga kiʻi fili faingofua.

• Longomoʻui ʻaupito.

• Fakautuutu ai pē ʻene lava ʻo lue, puna mo pasipasí.

• Hohaʻa, ʻiteʻita mo helaʻia ngofua.

• ʻOku faingofua kiate ia ke vete mo holoki ha meʻa ʻi hano toe fakafoki.

• Falala ngofua.

• Fiefia pē ke vaʻinga tokotaha.

• Faʻa siokita.

• Faingataʻa kiate ia ke vahevahe mo taufetongi.

• Faʻa kē ʻi he meʻa vaʻingá.

• Faʻa vēkeveke ke ʻofa pea mo ʻofaʻi foki.

• Faʻa lea ʻaki hono lotó.

• Faʻa tangi.

• ʻIkai fetongitongi e tuʻunga fakaeloto ʻoku ʻi aí.

• Fie lotu ka ʻe fie maʻu ha tokoni ke ne fai ia.

• Lava ke ne kamata ako e ʻuhinga ʻo e ʻapasiá.

• Ongoʻingofua ʻa e Laumālié.

• Mahino kiate ia ʻoku ʻofa mai kia kitautolu ʻa e Tamai Hēvaní mo Sīsū.

• Mahino kiate ia ʻa e ngaahi tefitoʻi akonaki fakalaumālié.

ʻE lava ke fakafiefia e ngaahi meʻa fakaʻātí pea te nau lava ʻo tokoni ki he fānaú ʻi hono fakatupulaki ʻenau ongoʻi falala kia kinautolú, mohu foungá, taukei fakaek-inautolú, fengāueʻaki lelei honau matá mo honau nimá, pea mo ʻenau ʻiloʻi ʻa e ngaahi ongo ʻoku nau maʻú. ʻE lava foki ke hoko ʻa e ʻātí ko ha founga fakafiefia ia ke fakahaaʻi ʻaki kita. Fakaʻaongaʻi haʻo ngaahi fakakaukau pe te ke mohu founga ʻi hono palani ʻa e ngaahi ngāue fakaʻaati ʻoku feʻunga mo hoʻo kalasí.

ʻE lava ke tokoni atu e ngaahi fakahinohino ko ʻení ʻi hono palani ha ngaahi ngāue fakaʻaati ʻoku foʻoú:

• Tauhi ke faingofua ʻa e fanga kiʻi ngāué.

• Mateuteu. ʻAi ke maʻu kotoa e ngaahi nāunau ʻoku fie maʻú peá ke ʻiloʻi e foki e anga hono fai ʻo e ngāué.

• Anga fakafaingofua. Kapau ʻokú ke anga fakafaingofua, he ʻikai leva ke ke ʻita he taimi ʻoku ʻikai ʻalu ai e ngāué ʻo hangē ko ia ne palaní. Manatuʻi ʻoku faʻa tokanga ange ʻa e fānaú ia ki hono ʻahiʻahiʻi ʻo ha meʻa ʻaki e nāunau ne ke ʻoangé kae ʻikai ko hano ʻai ke ʻosi ʻo ha ngāue.

• Saiʻia peá ke mahuʻingaʻia ʻi he meʻa ʻoku fai ʻe he fānaú, peá ke fai foki ha fakamālō fakamātoato.

• Mohu founga. Palani ha ngaahi ngāue ʻe fakaʻaongaʻi ai ʻe he fānaú ha ngaahi nāunau mo ha ngaahi founga kehekehe ʻi he uike takitaha.

• Anga fakapotopoto. ʻOku ʻikai feinga maʻu pē ʻa e fānaú ke fakafofongaʻi mai ʻe heʻenau ʻātí pe tā fakatātaá ha meʻa. ʻOku nau fiefia pē kinautolu ʻi hono ʻahiʻahiʻi e nāunau ʻoku ʻoatú. Kapau ʻokú ke fie fakamālō ki ha ngāue ʻa ha taha ʻo e fānaú, peá ke pehē ange, “Fakamatalaʻi mai angé hoʻo fakatātaá,” kae ʻoua te ke fehuʻi ange, “Ko e hā ia?”

• ʻOange pē ha tokoni siʻisiʻi. Tokoni pē he taimi ʻe fie maʻu aí ka ke tuku ʻa e fānaú ke nau takitaha fai ʻene ngāue.

ʻOku manako ʻa e fānaú ke fai ha ngaahi meʻa ʻoku kau ai ʻa e ngaungaue holó, hangē ko ha fanga kiʻi vaʻinga pe fakatātaaʻi ʻo ha meʻa ki ha ngaahi foʻi maau pe hiva. ʻOku lahi ha ngaahi foʻi maau ʻoku fakakau ʻi he ngaahi lēsoní pea ʻoku fakamatalaʻi atu ʻi lalo ha fanga kiʻi vaʻinga faingofua. ʻI he taimi ʻoku fiefia ai e fānaú ʻi ha ʻekitivitī, ʻe lava ke fakaʻaongaʻi tuʻo lahi ia ʻi he toenga ʻo e taʻú, kae ʻikai ʻi he ngaahi lēsoni pē ʻoku lave ki aí.

ʻE lava ke tokoni atu e ngaahi fakahinohino ko ʻení ke ke akoʻi ʻaki ha ngaahi foʻi maau pe hiva foʻou ki he fānaú:

• Ako maʻuloto ʻe koe ʻa e foʻi veesi pe hiva ko ia ki muʻa pea toki ako ia ʻe he kalasí.

• Tomuʻa lea ʻaki e fakaleá mo fai hono fakatātaaʻí ki he fānaú, peá ke ʻai ke fakaoli ange ʻa hono fakatātaaʻí. Fakaafeʻi leva ʻa e fānaú ke kau fakataha mo koe.

• Fakahoko māmālie ia kae lava ke mahino ki he fānaú ʻa e fakaleá mo hono fakatātaaʻí.

• Faʻa fakaʻaongaʻi ʻa e ngaahi nāunau tokoni fakafaiako ʻoku lava ke mamataʻí, ke tokoni ki hono fakahoko ʻo e veesi ʻekitivitií. ʻOku tokanga mo ako lelei ange ʻa e fānaú ʻo kapau ʻe ʻi ai ha meʻa ke nau mamata ki ai.

• Fakanounouʻi ʻa e veesi ʻekitivitií ʻo kapau ʻe hohaʻa ʻa e fānaú. Kapau ʻoku lōloa ha veesi ʻekitivitī, te ke lava ʻo tokoniʻi ʻa e fānaú ke nau fai hono fakatātaaʻí lolotonga hoʻo lau ʻa hono fakaleá.

ʻMahalo pē he ʻikai fie hiva ʻa e fānau ākí ia mo koe (he ʻikai foki lava ke hiva e longaʻi fānau iiki angé ia mo koe), ka ʻoku nau fiefia ke fakafanongo ki hoʻo hivá pea nau faʻa ako ʻa e ngaahi tefitoʻi moʻoni mahuʻinga ʻo e ongoongoleleí ʻo fakafou ʻi he hivá. Poupouʻi ʻa e fānaú ke nau hiva, kae ʻoua te ke hohaʻa ʻo kapau he ʻikai ke nau fai ia. Ko e fānau ko ia he ʻikai ke nau lava ʻo hiva mo koé te nau fiefia kinautolu ʻi hano fakatātaaʻi faingofua e foʻi hivá lolotonga hoʻo hivá.

Te ke lava ʻo fakaʻaongaʻi ʻa e ngaahi foʻi hiva tatau pē he uike takitaha ʻi hoʻo kamata ʻa e ʻekitivitī kehekehe kotoa pē. ʻI he taimi ʻoku fanongo ai e fānau ki ha foʻi hiva ʻoku nau maheni mo iá, te nau ʻiloʻi leva ʻa e ʻekitivitī ʻoku kamatá. Te ke lava ʻo liliu e fakaleá ki ha foʻi hiva ʻoku feʻunga mo e ngaahi tūkunga pe ngaahi ʻekitivitī ʻa e fānaú. Hivaʻi tuʻo lahi e ngaahi foʻi hiva ʻoku manako taha ai e fānaú ʻi he lolotonga ʻo e taʻú.

Ko e ngaahi foʻi hiva ʻeni mei he Tohi Hiva ʻa e Fānaú ʻoku feʻunga ʻaupito ke fakaʻaongaʻi ʻi he kalasi nēsilí. ʻOku fakakau atu ai mo ha ngaahi fokotuʻu ki ha ngaahi founga te ke lava ke fulihi ai e fakaleá. ʻE lava pē ke ʻi ai haʻo ngaahi fakakaukau kehe ki ha ngaahi founga ke fulihi ʻaki ʻeni pe ko ha ngaahi hiva kehe ʻi he Tohi Hiva ʻa e Fānaú ke feʻunga mo e kalasi nēsilí.

• “Ko ha Fāmili Fiefia” (p. 104) (© 1975 Pioneer Music Press, Inc.). Faʻu ha foʻi veesi fekauʻaki mo hoʻomou kalasi nēsilí pe Palaimeli fiefiá. Fakaʻaongaʻi ʻeni ke kamata: “ʻOku ou sio kia Susi; ʻokú ne sio kiate au…. ”

• “Fai ʻa ia ʻOku ou Faí” (p. 276). Fakaʻaongaʻi ke fai ʻaki ha fakahinohino: “Fakamaʻa ʻa e loki nēsilí; muimui kiate au!… “ pe “Fakataha mai ke hiva…. ”

• “Fakafiefia ke Fai” (p. 129)

• “Here We Are Together” (p. 261)

• “I Wiggle” (p. 271)

• “Kapau ʻokú ke Fiefia” (p. 125)

• “My Hands” (p. 273)

• “Once There Was a Snowman” (p. 249) (© 1981 Pioneer Music Press, Inc.). Faʻu ha ngaahi veesi ʻo kau ki ha ngaahi meʻa kehe ʻi natula: “Tokua naʻe ʻi ai ha fuʻu ʻakau lanu mata … lōloa, lōloa, lōloa. Ne u mālōlō ʻi hono malumalú, … siʻisiʻi, siʻisiʻi, siʻisiʻi.”

• “Ko e ʻUha Kuo Tō Takai” (p. 117)

• “ʻOku Fakafiefia ʻa e Hivá” (p. 129). Fetongi ʻa e “hivá” ʻaki ha ngaahi meʻa tukupau kehe: “Puna, puna, puna” pe “Hopo, hopo, hopo.” Hiva ʻo fekauʻaki mo e valá, ngaahi lanú pe kau kia kita: “Sū, sū, sū; ʻOku ou saiʻia hoku suú. ʻOku tui ʻi hoku vaʻé; sū, sū, sū!”

• “Malimalí” (p. 128)

• “Fua‘i Koane” (p. 118)

ʻOmi ha fanga kiʻi meʻa lea faingofua ki he fānaú ke nau tā, pe te ke faʻu pē:

Mimiha pe meʻa ifi hoani: ʻAi ha fanga kiʻi ava ʻi ha tafaʻaki ʻo ha foʻi tiupi pepa fefeka (hangē ko ia ʻoku fakaʻaongaʻi ki he pepa kofukofú pe pepa holoholó). Ke toe ongo fakalata angé, hanga ʻo fakapipiki ha selofeni he muiʻi tiupí. Ke taá, ngūngū pe hiva ki he loto tiupí.

Ngaahi foʻi papa sanipepa: Tutuʻu ha ongo konga papa taki ʻinisi ʻe 1“ hona matolú pea ʻinisi ʻe 2” x 4“ hona lōloá. Toe tutuʻu mo ha ongo kiʻi konga papa ʻoku iiki angé ʻo fakafuofua ki he ʻinisi ʻe taha x 2 1/2 hona lōloá. Hanga sanipepaʻi hano tuliki ʻe hā māsilá mei he foʻi papá. Hanga leva ʻo ʻai e ongo konga papa siʻisiʻí ʻo tukiʻi ke maʻu ʻi loto mālie he ongo konga papa lalahí. Fakapipiki ha meʻi sanipepa ke taupotu ki lalo ʻi he konga papa takitaha. Ke taá, hanga ʻo fetāʻaki e konga papá pe toutou oloʻi e ongo tafaʻaki ʻoku fakapipiki ai e sanipepá.

Meʻa lulu: Faʻo ha fanga kiʻi tengaʻi koane pe fanga kiʻi piini mōmoa ʻi ha ngeʻesi kapa ʻoku ʻikai hano tapa ʻe māsilá, pe ʻi ha hina pelesitiki. ʻAi e fānaú ke nau teu-teuʻi e foʻi hiná. Fakapipiki ke maʻu ʻaupito e tāpuní ke ʻoua naʻa hanga ʻe he fānaú ʻo kai pe te nau vaʻinga ʻaki e meʻa ʻoku faʻo ʻi lotó. Ke taá, hanga ʻo lulu.

Fafangú: Hanga ʻo tuitui ha fanga kiʻi fafangu ki ha konga tupenu. Ke taá, hanga ʻo luluʻi.

ʻʻOku tokoni ʻa e fakatonu ki he mūsiká ki he fānaú ke nau fakaʻaongaʻi lelei honau iví mo fakatupulaki ʻenau malava ko ia ke fakaʻaongaʻi lelei honau ʻatamaí. Hiva, tā ha piano pe meʻa lea kehe, pe fakaʻaongaʻi ha hiva kuo ʻosi hiki kae fakatonu ki ai ʻa e fānaú.

Ke fakakau e fānaú ʻi he fakatonu ki he hivá, te ke lava ʻo:

• Tataki e fānaú ʻi he hivá, puná, punoú, viló, ʻeteʻeté, totoló, pe faofao ki he mūsiká. Tuku ke taufetongi e fānaú ʻi hono tataki e toenga ʻo e fānaú ʻi hono fakatātaaʻí.

• Tā pe hivaʻi ha ngaahi hiva ʻoku fasi kehekehé pea tuku e fānaú ke nau lele pe luelue ʻo fakatatau mo e taimi ʻa e fasí.

• ʻAi e fānaú ke nau taʻataʻalo holo ha ngaahi sikaafi lanu kehekehe pe ko ha ngaahi lauʻipepa lōloa ʻi heʻenau fakatonu ki he fasí.

• Fakaʻaongaʻi e ngaahi hiva fakatātaá he taimi ʻoku fie maʻu ai ke liliu e meʻa ʻoku fai ʻe he fānaú. Kapau ne fuoloa e tangutu ʻa e fānaú, ʻe feʻunga ke fakaʻaongaʻi ha foʻi hiva ʻoku lava ʻo fakatātaaʻi ʻa ia ʻe fakaʻaongaʻi ai e ngaahi uoua lalahí mo lahi ai e ngaue holó. Kapau ne nau ngaungaue holo pea fie maʻu ke fakanonga kinautolu, ʻe lava ke fakaʻaongaʻi ha hiva fakatātā ʻoku ngaue siʻisiʻi holo ai pē ʻa e uouá ʻa ia ʻe ʻaonga ʻo ka tangutu ai ki lalo ʻa e fānaú.

ʻOku ʻoatu fakataha ʻa e tohi lēsoni ko ʻení mo ha kāsete tepi ʻe lava ke fakaʻaon-gaʻi ki he ngaahi ʻekitivitī fakafanongó. ʻOku ʻi ai ha konga ʻe nima ʻi he kāsete tepi ko ʻení:

1. ʻE lava ke fakaʻaongaʻi e “Quiet Music” ʻi he hū atu ʻa e fānaú ki he lokiakó pe ʻi ha ngaahi taimi kehe he taimi ʻoku fie maʻu ai ha ʻātakai ʻoku nongá.

2. ʻOku fakaʻaongaʻi ʻa e “Musical Awareness”—ke tokoni ke ʻiloʻi ʻe he fānaú ʻa e ngaahi natula ʻo ha ngaahi hiva kehekehe.

3. ʻE lava ke fakaʻaongaʻi ʻa e “Moving to Music”—ke tā ki he fānaú ʻi heʻenau fai ha ngaahi fakatātā hangē ko e punou ki laló pe faofaó. ʻE lava ʻe he fānaú ʻo fakaʻaongaʻi honau iví mo fakatupulaki e ngaahi taukei fakatuʻasinó mo ʻenau sino tonú ʻi heʻenau fakafanongo mo kau ki aí.

4. ʻOku fakaʻaongaʻi ʻa e “Musical Expression”—ke poupouʻi ʻaki e fānaú ke nau fakafanongo mo ngaue tauʻatāina holo ʻo fakatonu ki he mūsiká. ʻOku ʻoatu ha fanga kiʻi fasi nounou ai ʻe hongofulu mā ua, pea mo ha fakamatala ke fokotuʻu atu e ngaahi founga ke fakatonu ʻaki ki he mūsiká. ʻOua naʻá ke toe fakaʻaongaʻi ʻo lahi ange he foʻi fasi ʻe tolú ʻi he foʻi kalasi ʻe taha.

5. ʻE lava ke fakaʻaongaʻi ʻa e “Pretend Stories”—ke fakahoko ʻaki ha ʻekitivitī maʻá e fānaú. ʻE lava e fānaú ʻo kau ki ha fanga kiʻi faiva fakaoli pe ngaahi ʻekitivitī fakatuʻasino kehé, ʻaki ʻenau muimui ki he ngaahi fakahinohinó mo fakafanongo lelei ki he fanga kiʻi talanoá. ʻOku ui e fanga kiʻi talanoá “Ko ha ʻEveʻeva ʻi he Vaotaá,” “Ko ha ʻAʻahi ki he Suú,” mo e “Ko e Fanga Kiʻi Meʻa-vaʻinga ʻi he Puha Meʻa-vaʻingá.” Fakaʻaongaʻi ʻa e foʻi talanoa pē ʻe taha ʻi he foʻi kalasi ʻe taha.

Te ke lava ʻo fakaʻaongaʻi e ngaahi tepi kāsete ʻo e Tohi Hiva ʻa e Fānaú (mūsiká ʻataʻatā pē, 52505; mūsiká mo e fakaleá, 52428) pe cd (mūsiká ʻataʻatā pē, 50505; mūsiká mo e fakaleá, 50428), ʻo ka maʻu.

ʻE lava ke faingataʻa ki he fānaú ke nau tokanga ki he hivá ʻo kapau ko ʻenau meʻa ʻoku faí ko e fanongo ʻataʻatā pē. Fakatahaʻi e fanongó mo e hivá, ngaue holó pe ngaahi ʻekitivitī kehé, ʻo hangē ko ia ʻoku hā atu he ngaahi sīpinga ko ʻení:

• ʻAi e fānaú ke nau tokoto he falikí ʻo fakafanongo ki he ngaahi faʻahinga kehekehe ʻo e mūsiká. Talanoa ki he ongo ʻoku ʻoange kia kinautolu ʻe he mūsiká. ʻAi leva ke nau fakatātaaʻi atu e faʻahinga ongo ʻoku nau maʻú.

• Tā ha hiva laka pea tuku e fānaú ke nau laka holo he lokí.

• ʻAi e fānaú ke nau pasipasi fakatonu ki he fasi ʻo e hiva ʻoku nau fakafanongo ki aí.