Ngaahi Tohi Lēsoni Palaimelíi mo e Taimi Fevahevaheʻakí
Lēsoni 1: Ko e Fānau Au ʻa e ʻOtuá

Lēsoni 1

Ko e Fānau Au ʻa e ʻOtuá

Taumuʻá

Ke tokoniʻi ʻa e fānau taki taha ke mahino ko e fānau fakalaumālie kitautolu ʻa e Tamai Hēvaní ʻokú Ne ʻafioʻi mo ʻofaʻi kitautolu.

Teuteú

  1. Ako ʻi he faʻa lotu ʻa e ʻEkesōtosi 2:1–10; Saame 82:6; Tokāteline mo e Ngaahi Fuakavá 138:55–56; mo e Mōsese 1:1–6. Vakai foki, Ngaahi Tefitoʻi Moʻoni ʻo e Ongoongoleleí (31110 900), vahe 2.

  2. Fekumi ki ha tefitoʻi ʻulungāanga fisifisimuʻa ʻe ua pe tolu ʻo e fānaú taki taha ʻaki haʻo fetalanoaʻaki mo ʻenau mātuʻá.

  3. Ngaahi nāunau ʻoku fiemaʻú:

    1. Tohi Tapú mo e Mataʻitofe Mahuʻingá.

    2. Kiʻi tangai piini pe ha meʻa molū pehē.

    3. Fakatātā 1–1, Ko e Māmaní (62196); fakatātā 1–2, Ko Mōsese ʻi he Potu ʻAkau ʻi he Veʻe Vaitafé (Ngaahi Fakatātā ʻo e Ongoongoleleí 106; 62063).

  4. Fai mo e ngaahi teuteu ʻe fiemaʻu ki ha ngaahi ʻEkitivitī Fakatupulaki te ke fie fakaʻaongaʻi.

Ngaahi ʻEkitivitī ke ako mei aí

Fakaafeʻi ha taha ʻi he fānaú ke ne fai ʻa e fua lotú.

ʻEkitivitī ke Takiakiʻi ʻaki e Tokangá

ʻ Hivaʻi mo e fānaú ʻa e “Ko e Fānau Au ʻa e ʻOtuá” (Ngaahi Himí, 000).

Ko e fānau au ʻa e ʻOtuá,

Naʻá ne ʻomi au ki māmani

Ki ha ʻapi mo ha mātuʻa

Angalelei mo ʻofa.

Tataki au, tauhi au, pea ta ō mo au,

Ke u ʻilo ʻa e halá.

Akoʻi au pea te u ʻilo pau

Te u nofo mo Ia ha ʻaho.

Lī ʻa e kiʻi tangai pīní pe ko ha meʻa molū ke hapo ʻe ha taha ʻo e fānaú mo ke pehē “ʻOku ou ʻiloʻi ha fānau ʻa e ʻOtuá ko .” ʻAi ke leaʻaki ʻe he kiʻi tamasiʻi pē taʻahine taki taha ʻa hono hingoa ʻoʻoná peá ne toki fakafoki mai kiate koe ʻa e kiʻi tangai pīní. Toutou fai ʻa e ʻekitivitií ni kae ʻoua kuo kakato kotoa ʻa e fānaú.

Ko e fānau fakalaumālie kitautolu ʻa e Tamai Hēvaní

  • Ko hai ʻa e Tamai Hēvaní? (Fakaʻaongaʻi ʻa e ngaahi tali ʻa e fānaú ke muimui ai hoʻo fakamatalaʻi ʻa e konga ko ʻeni ʻo e lēsoní ʻi ha founga ʻe mahinongofua aí.)

Fakahā ʻa e fakatātā 1–1, Ko e Māmaní. Fakamatalaʻi naʻa tau nofo ʻi hēvani mo ʻetau Tamai Hēvaní ki muʻa pea toki fanauʻi kitautolu ki he māmaní. Ko ha ngaahi laumālie pē kitautolu ʻi ai. Ko e laumālié, ʻa e meʻa ko ia ʻoku ʻi loto ʻiate kitautolú ʻa ia ʻokú ne ngaohi kitautolu ke tau moʻuí. ʻI he taimi naʻa tau kei laumālie ai peé, naʻe ʻikai ke tau maʻu ha kakano mo ha hui ʻo hangē ko ia ʻoku tau maʻu he taimi ní, ka naʻa tau fōtunga tatau pē.

Fakamatalaʻi ange ko e Tamai Hēvaní ko e tamai ia ʻa hotau ngaahi laumālié, pea ko ʻEne fānau fakalaumālie kitautolu. ʻOku ʻikai ke tau manatuʻi ʻa ʻetau nofo ko ia mo e Tamai Hēvaní kimuʻa pea tau toki haʻu ki he māmaní, ka ʻoku tau ʻiloʻi ko ʻEne fānau fakalaumālie kitautolu, koeʻuhí he ʻoku tau lau ia ʻi he folofolá.

Fakaʻaliʻali ange ʻa e Tohi Tapú pea lau ʻa e Saame 82:6, mo fakamatalaʻi ko e ʻuhinga ʻa e Fungani Māʻolungá ki he Tamai Hēvaní. Fakamamafaʻi ange ko e toko taha kotoa pē ʻi he māmaní ko e fānau ia ʻa e Tamai Hēvaní.

Hivá

Toe hivaʻi ʻa e “Ko e Fānau au ʻa e ʻOtuá.” Fakamatalaʻi ange ko e ʻOtuá ko e huafa ia ʻe taha ʻo e Tamai Hēvaní.

ʻOku ʻ afioʻi mo ʻofaʻi kitautolu ʻe he Tamai Hēvaní

Fakamatalaʻi ange ʻoku ʻofa lahi ʻa e Tamai Hēvaní kiate kitautolu taki taha koeʻuhí he ko ʻEne fānau kitautolu. ʻOkú Ne ʻafioʻi hotau hingoá pea mo e meʻa kotoa pē fekauʻaki mo kitautolú. ʻOkú Ne ʻafioʻi ʻa e ngaahi meʻa te tau fiefia aí mo ia te tau mamahi aí. ʻOkú Ne ʻafioʻi ʻa e meʻa ko ia ʻoku lelei taha kiate kitautolú taki taha.

ʻEkitivitií

Toutou lau fakataha ʻa e ngaahi veesi ko ʻení mo e fānaú, mo fakaʻaongaʻi ʻa e ngaahi founga fakatātā ʻoku fakamatalaʻi atú:

ʻOku ʻafioʻi au ʻe he Tamai Hēvaní

ʻOku ʻafioʻi au ʻe he Tamai Hēvaní (tuhu kiate kita)

Pea mo ia ʻoku ou fie faí.

ʻOkú Ne ʻafioʻi hoku hingoá mo e feituʻu ʻoku ou nofo aí (fakatātaaʻi ha ʻato ʻaki hono fakafetaulaki ho ʻuluʻulu tuhú).

ʻOku ou ʻiloʻi ʻokú Ne ʻofa foki ʻiate au (fekolosiʻaki ho ongo nimá ki ho ongo umá).

ʻOkú Ne ʻafioʻi ʻa e meʻa te u fiefia aí (tuhu ki ho mata fofonga malimalí).

ʻOkú Ne ʻafioʻi ʻa e meʻa te u mamahi aí (tuhu ki ho mata fofonga mamahí).

ʻOku ou ʻiloʻi ʻokú Ne fie tokoniʻi au (tuhu kiate koe),

Pea ko e meʻa ia ʻoku ou fiefia aí!

Kole ki ha taha ʻo e fānaú ke haʻu ki muʻa ʻi he kalasí. ʻI he ngaahi meʻa ko ia kuó ke ʻosi ʻilo mei he mātuʻa ʻa e toko tahá ni, hanga ʻo fakamatalaʻi ange ʻoku ʻafioʻi ʻe he Tamai Hēvaní ʻa e ngaahi ʻulungāanga tuʻu-ki-muʻa ʻo e kiʻi tamasiʻi pe taʻahiné ni. Hangē ko ʻení, ʻe lava ke ke pehē ange, “ʻOku ʻafioʻi ʻe he Tamai Hēvaní ko ʻEmelií ko ha kiʻi taʻahine ʻofa, he ʻokú ne tokoni ki heʻene faʻeé ʻi hono tokangaʻi ʻa hono kiʻi tokouá, pea ʻokú ne fiefia mo faʻa malimali.” Hokohoko pehē ai pē kae ʻoua kuo kakato kotoa ʻa e fānaú.

Fakamatalaʻi ange ko e taimi ko ia ʻoku tau fai ai ha ngaahi meʻa lelei mo anga- ʻofá, ʻoku tau hangē ai ko e Tamai Hēvaní.

ʻE lava pē ke tau hangē ko e Tamai Hēvaní

  • ʻOku ui ʻa e kiʻi kulī valevalé ko e hā?

  • ʻE tupu hake ʻa e kiʻi ʻuhikiʻi kulī ko iá ʻo hoko ko e hā?

  • ʻOku ui ʻa e kiʻi moa valevalé ko e hā?

  • ʻE tupu hake ʻa e kiʻi moa kei valevale ko iá ʻo hoko ko e hā?

Fakamatalaʻi ange ʻoku hangē pē ʻa e tupu hake ʻa e fanga kiʻi monumanu īkí ʻo hangē ko ʻenau mātuʻá, pea mo ʻetau tupu hake ʻo hangē pē ko ʻetau mātuʻá. Ko e tamai ʻa hotau ngaahi laumālié ʻa e Tamai Hēvaní, ko ia te tau lava ʻo tupu hake ke tatau mo ia. ʻOku ʻofa, lelei, mo anga-lelei ʻa e Tamai Hēvaní, pea ʻokú Ne fie maʻu ke tokoniʻi kitautolu. ʻI he taimi ʻoku tau ʻofa, lelei, mo anga-lelei aí, ʻoku tau hangē ai ko e Tamai Hēvaní. Fakamatalaʻi ange ʻoku totonu ke tau feinga ke tau hoko ʻo tatau pē mo e Tamai Hēvaní ʻi he ʻaho kotoa pē.

ʻOku ʻi ai ʻa e ngāue mahuʻinga ʻa e Tamai Hēvaní ke tau fakahoko

Talanoá

Fakaʻaliʻali ʻa e fakatātā 1–2, Ko Mōsese ʻi he Potu ʻAkau he Veʻe Vaitafé, pea fai ange mo e talanoa ʻo e founga naʻe fakahaofi ai ʻe he ʻofefine ʻo Feló ʻa Mōsese mei he fakatuʻutāmaki ʻi heʻene kei pēpeé, ʻo hangē ko ia ʻoku hā ʻi he tohi ʻEkesōtosí 2:1–10.

Fakamatalaʻi ange naʻe tupu ʻa Mōsese ʻo hoko ko ha palōfita peá ne hoko ai ko e taha ʻo e kau tokoni mahuʻinga taha ki he Tamai Hēvaní. Naʻe folofola hangatonu ange ʻa e Tamai Hēvaní kia Mōsese ko hono foha (vakai, Mōsese 1:4, 6) pea ʻoku ʻi ai ʻEne ngāue mahuʻinga kia Mōsese ke ne fai. Lau ki he fānaú ʻa e konga ʻuluaki ʻo e tohi Mōsese 1:6. Naʻe fakahoko ʻe Mōsese ʻa e ngāué ni ʻi heʻene ʻomi ʻa e fānau ʻIsilelí mei he fonua ko ʻIsipité, ʻa ia naʻe ngaohi kovia ai kinautolú, ki ha fonua kehe ʻa ia naʻá ne akoʻi ai kiate kinautolu ʻa e ngaahi fekau ʻa e Tamai Hēvaní.

ʻAi ke haʻu tahataha ʻa e fānaú ki muʻa ʻi he kalasí, peá ke tokoniʻi taki taha ʻa kinautolu ke nau angimui ki he konga ʻuluaki ʻo e tohi Mōsesé 1:6, kae fetongiʻaki hono hingoa pē ʻoʻoná: “Pea ʻoku ʻi ai ʻeku ngāue ke ke fai, ʻe hoku foha/ʻofefine ko (hingoa ʻo e kiʻi tamasiʻí pe taʻahiné)”.

Fakamatalaʻi ange ʻoku ʻi ai ʻa e ngaahi meʻa mahuʻinga ʻa e Tamai Hēvaní ke tau fai ʻi he lolotonga ʻo ʻetau moʻui ʻi he māmaní, ʻo hangē ko ʻete hoko ko e tamai pe faʻē, hoko ko ha faifekau, faiako, ko ha taha tokoni ʻi he Siasí, pe ko ha taha ke tokoni ʻi he nofo ʻa e koló.

Talanoá

  • Ko e hā ha ngāue mahuʻinga ʻe ngali fie maʻu ʻe he Tamai Hēvaní ke ke faí?

ʻEkitivitií

ʻAi ʻa e fānaú ke nau fakatātaaʻi fakalongolongo ʻa e meʻa ko ia te nau fie hoko ki ai ʻi heʻenau tupu haké, ʻo hangē ko ha faʻē pe tamai ʻokú ne amoamohi pe fakamohemohe ha kiʻi pēpē, ko ha faifekau ʻokú ne lolotonga fakahā ʻa e Ongoongoleleí, pe ko ha faiako ʻokú ne lolotonga akoʻi ha kalasi.

Fakamoʻoní

Fakahā ange ki he fānaú ʻoku tonu ke nau manatuʻi maʻu pē ko e fānau fakalaumālie kinautolu ʻa e Tamai Hēvaní pea ʻokú Ne ʻafioʻi mo ʻofaʻi ʻa kinautolu. Tokoniʻi kinautolu ke mahino te nau lava ke hoko ʻo tatau mo e Tamai Hēvaní pea ʻoku ʻi ai mo ʻenau ngāue mahuʻinga ke fakahoko ʻi he māmaní. ʻE lava pē ke ke feʻinasiʻaki mo kinautolu ʻi ha meʻa naʻe hoko tonu kiate koe ʻa ia naʻe tokoni ke ke ʻiloʻi ai ʻoku ʻafioʻi mo ʻofaʻi koe ʻe he Tamai Hēvaní.

Ngaahi ʻEkitivitī Fakatupulakí

Fili ha niʻihi ʻo e ngaahi ʻekitivitií ni ke fakaʻaongaʻi lolotonga ʻa e lēsoní.

  1. Fakaʻaliʻali ha ngaahi fakatātā ʻo ha kakai kehekehe, pe te ke talanoa ʻo kau ki ha kakai ʻoku ʻiloʻi ʻe he fānaú, peá ke fehuʻi ange, “Ko e fānau nai ʻa e ʻOtuá ʻa e toko tahá ni?” Hangē ko ʻení, “Ko ha fānau nai ʻa e ʻOtuá ʻa e Pīsopé?” “Ko e fānau nai ʻa e ʻOtuá ʻa e tangata polisí?” “Ko e fānau nai ʻa e ʻOtuá ho kaungāʻapí?” pea fai pehē atu ai pē. Tokoniʻi ʻa e fānaú ke nau ʻiloʻi ko e fānau ʻa e ʻOtuá ʻa e toko taha kotoa pē.

  2. Ke fakamamafaʻi ʻa e ʻafioʻi mo e ʻofa ʻa e Tamai Hēvaní ki he fānaú taki taha, ʻai ke fakaʻosi ʻe he fānaú hoʻo ngaahi sētesi ko ʻení, ʻo hangē ko ʻení: “ʻOku ʻafioʻi ʻe he Tamai Hēvaní ʻoku ou mamahi ʻi he taimi ʻoku ou ,” “ʻOku ʻafioʻi ʻe he Tamai Hēvaní ʻoku ou fiefia ʻi he taimi ʻoku ou ,” “ʻOku ʻafioʻi ʻe he Tamai Hēvaní ʻa e meʻa ʻoku ou manako taha aí, ʻa ia ko e ,” “ʻOku ʻafioʻi ʻe he Tamai Hēvaní ʻoku ou manako ke haʻu ki he Palaimelí koeʻuhí he ʻoku ou ,” pea fai pehē atu ai pē.

  3. Fakamatalaʻi ange ko e Tamai Hēvaní ko e tuʻi ia ʻo e langí mo māmani. Koeʻuhí ko ʻEne fānau kitautolu, ko ia ʻoku tau hoko ai ko e kau pilinisi mo e kau pilinisesi. Faʻu ha kiʻi kalauni vaʻinga maʻá e kiʻi tamasiʻi mo e taʻahine taki taha pea tohiʻi ʻi he kiʻi kalauni kotoa pē ʻa e fakalea ko ʻení, Ko e Fānau Au ʻa e ʻOtuá. Tuku ke toki valivali ʻe he fānaú honau ngaahi kalauní.

  4. Hiva pe lau fakataha mo e fānaú ʻa e fakalea ʻo e ongo veesi ʻo e hiva faka-Pilitānia ko ʻení, “I Know My Father Lives” (Children’s Songbook, p. 5).

Ngaahi ʻEkitivitī Kehe Maʻá e Fānau Iiki Angé

  1. Kole ange ki he fānaú ke nau fakakaukau ki ha meʻa ʻoku nau manako ai (ʻe lava foki ke ke muʻaki maʻu ʻa e ngaahi fakamatala ko ʻení mei heʻenau mātuʻá). Fehuʻi taki taha ange ki he fānaú pe ko e hā ʻoku nau manako taha aí, pea ke fakahā ange ki ai ʻoku ʻafioʻi ʻe he Tamai Hēvaní ʻa e meʻa ko iá, ʻo hangē ko ʻení: “ʻOku ʻafioʻi ʻe he Tamai Hēvaní ʻoku saiʻia ʻa Lia ʻi he fanga kulií.”

  2. Tokoniʻi ʻa e fānaú ke nau fai ʻa e fanga kiʻi ʻekitivitī ʻoku fakatātaaʻi ko ʻení:

    Kapau ʻokú ke fuʻu lōloa (Fakamafao pea kakapa hake ho ongo nimá ki ʻolunga),

    ʻOku ʻi ai ha feituʻu ʻi he Siasí moʻou.

    Kapau ʻokú ke fuʻu nounou (tuʻusike hifo ki lalo),

    ʻOku ʻi ai ha feituʻu ʻi he Siasí moʻou.

    Lōloa (kakapa ki ʻolunga)

    Nounou (tuʻusike hifo)

    Lōloa (kakapa ki ʻolunga)

    Nounou (tuʻusike hifo)

    ʻOku ʻofaʻi kātoa kitautolu ʻe he Tamai Hēvaní.

  3. Tokoniʻi ʻa e fānaú ke nau fakatātaaʻi ʻa e fanga kiʻi ʻekitivitī ko ʻení ʻi he lolotonga hoʻo lau atu ʻa e ngaahi leá ki ai:

    Ko e Kiʻi Pēpē ko Mōsesé

    Ko e Kiʻi Pēpē ko Mōsesé naʻe hoko ha vaka ko hono moheʻanga. (Hapai hake ʻa e nima hemá pea tuhu hifo ʻa e tuhu mataʻú ki loto ai.)

    Naʻe toitoi ʻa hono tuofefiné ʻi he musié ʻo ne fakasiosio kiate ia (fakasiosio mai ʻi ho louhiʻi-nimá).

    ʻI ha ʻaho ʻe taha ne ʻilo ai ia ʻe ha pilinisesi (maleʻei ki muʻa pea fakasio ki lalo);

    Mo ne fua hake ia pea fāʻofua ki ai (fakangalingali ʻokú ke fua ki ʻolunga ʻa e pēpeé mo fāʻofua ki ai)

    Peá ne pehē ange, “Te u ʻave ʻa e pēpeé mo maluʻi ia naʻa hoko ha faingataʻa ki ai (luelue ʻa e pēpeé ʻi ho nimá).

    (Toʻo ʻeni mei he Fascinating Finger Fun by Eleanor Doan. © 1951. Ke toki fakaʻaongaʻi pē ʻi hano fakangofua.)