Ngaahi Tohi Lēsoni Palaimelíi mo e Taimi Fevahevaheʻakí
Lēsoni 5: Ko Sīsū Kalaisí ko e ʻAlo Ia ʻo e Tamai Hēvaní

Lēsoni 5

Ko Sīsū Kalaisí ko e ʻAlo Ia ʻo e Tamai Hēvaní

Taumuʻá

Ke tokoniʻi ʻa e fānaú taki taha ke mahino ko Sīsū Kalaisí ko e ʻAlo ia ʻo e Tamai Hēvaní.

Teuteú

  1. Ako ʻi he faʻa lotu ʻa e Mātiu 3:13–17 mo e Luke 1:26–35; 2:1–7, 41–52. Vakai foki, Ngaahi Tefitoʻi Moʻoni ʻo e Ongoongoleleí (31110 900), vahe 3.

  2. ʻI ha loto ki ai ʻa e Palesiteni ʻo e Palaimelí, fakaafeʻi ha tamai ʻa e taha ʻo e fānaú ke haʻu ki he kalasí ke ne fakamatala fekauʻaki mo ʻene kiʻi tamasiʻí pe taʻahiné ʻi he taimi naʻe kei pēpē aí. Kole ange ki ai ke ne ʻomai ha ngaahi tā pea mo ha kiʻi meʻa vaʻinga naʻe manako lahi taha ai ʻene tamasiʻí pe taʻahiné, ʻo kapau ʻe kei maʻu. Fakalotolahiʻi ia ke ne fakahā ʻa ʻene ʻofa ki hono fohá pe ʻofefiné.

  3. Ngaahi nāunau ʻoku fiemaʻú:

    1. Tohi Tapú

    2. Fakatātā 1–16, Ko e ʻAloʻi ʻo Sīsū Kalaisi ʻi he ʻAiʻangakai ʻo e Manú (Ko e Ngaahi Fakatātā ʻo e Ongoongoleleí 201;62495); fakatātā 1–17,Ko e Tamasiʻi ko Sīsuú ʻi he Temipalé (Ko e Ngaahi Fakatātā ʻo e Ongoongoleleí 205;62500); fakatātā 1–18, Ko hono Papitaiso ʻa Sīsū ʻe Sione Papitaisó (Ko e Ngaahi Fakatātā ʻo e Ongoongoleleí 208;62133).

  4. Fai mo ha ngaahi teuteu ʻe fiemaʻu ki ha ngaahi ʻEkitivitī Fakatupulaki te ke fie fakaʻaongaʻí.

Ki he faiakó: ʻI hoʻo fakamatala fekauʻaki mo e ngaahi tamaí ʻi he lēsoní, tokanga ki ha fānau ʻi hoʻo kalasí ʻa ia ʻoku ʻikai ke ʻi ai ha ngaahi tamai ʻi honau ngaahi ʻapí. Fakamamafaʻi ʻoku tau maʻu kātoa ha Tamai Hēvani ʻa ia ʻokú ne ʻofa ʻiate kitautolu. Kapau ʻoku ʻi ai ha fānau ʻe niʻihi ʻi hoʻo kalasí ʻoku ʻi ai haʻanau ngaahi tamai-ʻi-he-fonó, fakamatalaʻi ange ʻoku ʻofa foki mo e ngaahi tamai-ʻi-he-fonó mo tokangaʻi kitautolu.

Ngaahi ʻEkitivitī ke ako mei aí

Fakaafeʻi ha taha ʻo e fānaú ke ne fai ʻa e fua lotú.

ʻEkitivitī ke taki ʻaki e tokangá

ʻEke ange ki he fānaú pe ʻoku nau ʻiloʻi ko hai e toko taha ʻaʻahi ki he kalasí. Fakaafeʻi e tamasiʻi pe taʻahine ʻa e tamai kuo fakaafeʻí ke ne hanga ʻo fakafeʻiloaki ʻene tamaí ki he kalasí. Tuku ke fai ʻe he tamaí ha fakamatala fekauʻaki mo hono ʻofefiné pe fohá. Fakaafeʻi ʻa e fānaú kātoa ke nau taki taha fakahā ha ngaahi meʻa fekauʻaki mo ʻenau tamaí, ʻo hangē ko e lanu hono ʻulú pe ko ʻene ngāue maʻuʻanga moʻuí.

Ko Sīsū Kalaisí ko e ʻAlo ia ʻo e Tamai Hēvaní

Fakahā ange ki he fānaú ko kinautolu tāutaha ʻoku ua ʻa ʻenau tamaí: ko ha tamai fakamāmani pea mo ʻetau Tamai Hēvaní. Ko ʻetau tamai fakamāmaní ko e tamai ia ʻa hotau ngaahi sinó. Ko e Tamai Hēvaní ko e tamai ia ʻa hotau ngaahi laumālié ʻa ia ʻoku ʻi loto ʻi hotau ngaahi sinó. ʻOku taha pē ʻa e tamai ʻa Sīsuú, koeʻuhí ko e Tamai Hēvaní ʻa e tamai ʻo e sinó pea mo e laumālie ʻo Sīsuú. Ko hono ʻuhinga ia ʻoku ui ai ʻa Sīsū ko e ʻAlo ʻo e ʻOtuá.

Talanoá

Fakaʻaliʻali ʻa e fakatātā 1–16, Ko e ʻAloʻi ʻo Sīsū ʻi he ʻAiʻangakai ʻo e Manú, pea fai mo e talanoa ʻo hono ʻaloʻi ʻo Sīsuú, ʻo hangē ko ʻene hā ʻi he Luke 1:26–35 pea mo e Luke 2:1–7. Fakamamafaʻi ange naʻe fakahā ange ʻe ha ʻāngelo kia Mele ko ʻene tamá ʻe hoko ia ko e ʻAlo ʻo e ʻOtuá. Fakaʻaongaʻi ʻa e fakatātaá ʻi he lolotonga hoʻo fai ʻa e ngaahi fehuʻi ko ʻeni:

Talanoá

  • Ko hai ʻiate kinautolú ni ʻa e faʻē ʻa Sīsuú?

  • Ko hai hono hingoá? (Vakai, Luke 1:27.)

  • Ko hai ʻa e tangata ko ia ʻi he fakatātā ní? (Vakai, Luke 1:27.)

  • Ko hai ʻa e tamai ʻa Sīsuú? (Ko e Tamai Hēvaní. Ko ha tangata lelei ʻa Siosefa naʻe fili ʻe he Tamai Hēvaní ke ne tokangaʻi ʻa Mele mo Sīsū.)

Hivá

ʻAi ke tuʻu ʻa e fānaú ʻo hivaʻi pe lau ʻa e ngaahi lea ʻo e “ʻI he ʻAiʻangakai ʻo e Manú” (Children’s Songbook). Faʻu ha ngaahi founga fakatātaaʻi ʻaki e nimá ʻo fakatatau mo hono ngaahi leá.

Naʻe ʻaloʻi mai ʻa Sīsū Kalaisi

ʻI he ʻaiʻanga kai ʻo e manú

Naʻe ʻikai siʻano mohenga

Ka ko e mohuku pē naʻe ʻaloʻi aí

Mohe ā, Mohe ā, Mohe ā, Mohe ā, Mohe ā

ʻA hotau Fakamoʻuí

Mohe ā, Mohe ā, Mohe ā, Mohe ā, Mohe ā

ʻA hotau ʻEikí

ʻOku ʻofa ʻa Sīsū ʻi he Tamai Hēvaní pea mo talangofua ki ai

Talanoá

Fakaʻaliʻali ʻa e fakatātā 1–17, Ko e Tamasiʻi ko Sīsuú ʻi he loto Temipalé, pea fai mo e talanoa ʻo Sīsū ʻi he loto temipalé, ʻo hangē ko ʻene hā ʻi he Luke 2:41–52. Fakamamafaʻi ange naʻe ʻalu ʻa Sīsū ki he temipalé koeʻuhí ko ʻene ʻofa ki he Tamai Hēvaní pea naʻa Ne fiemaʻu ke fai ʻa ʻEne ngāué.

Talanoá

  • Ko e hā e meʻa ʻa Sīsū naʻe fai ʻi he loto temipalé? (Vakai, Luke 2:46.)

ʻEkitivitií

Tuku ke tuʻu ʻa e fānaú ki ʻolunga ʻo toutou fai ʻa e ʻekitivitī ko ʻení:

Naʻe ʻalu ʻa e talavou ko Sīsuú ki he temipalé (ʻalu tuʻu-maʻu)

Ki muʻa peá Ne tupu ʻo mālohi mo māʻolungá (fakamafao ho ongo nimá ki ʻolunga)

Ke fai ʻa e ngāue ʻa ʻene Tamaí (fakamafao mai ho ongo nima ki muʻa)

Koeʻuhí he ʻokú ne ʻofa ʻiate kitautolu hono kātoa (kuku ho fatafatá)

Talanoá

Fakaʻaliʻali ʻa e fakatātā 1–18, Ko Sione Papitaiso ʻi heʻene papi ʻa Sīsuú, pea fai mo e talanoa ʻo e papi ʻo Sīsuú, ʻo hangē ko ia ʻoku hā ʻi he Mātiu 3:13–17. Fakamatalaʻi ange naʻe papitaiso ʻa Sīsū koeʻuhí he naʻa Ne ʻofa ʻi he Tamai Hēvaní pea naʻá ne fiemaʻu ke talangofua kiate Ia. Naʻe toe fiemaʻu foki ʻe Sīsū ke ne tā ha sīpinga lelei maʻa kitautolu. Lau leʻo lahi ʻa e veesi 17 (kamataʻaki ʻa e Ko hoku ʻAlo ʻOfa-ʻangá ʻeni), mo fakahaaʻi ange ko e ngaahi lea ʻeni ʻa e Tamai Hēvaní. Naʻe hōifua ʻa e Tamai Hēvaní ʻi he papitaiso ʻa Sīsuú.

Talanoá

  • Kuó ke mamata nai ha taha ʻoku papitaiso?

Fakamatalaʻi ange ko e founga ʻe taha ʻe talangofua ai ʻa e fānaú ki he Tamai Hēvaní pea mo fakahaaʻi ʻa ʻenau ʻofa ʻiate Iá ʻi he taimi te nau papitaiso ai ʻi heʻenau taʻu valú.

Fakamoʻoní

Fai hoʻo fakamoʻoni kia Sīsū Kalaisí ko e ʻAlo ʻo e Tamai Hēvaní. Fakahā ʻa hoʻo ʻofa kia Sīsuú pea mo e houngaʻia ʻokú ke maʻu kau ki aí.

Ngaahi ʻEkitivitī Fakatupulakí

Fili ha niʻihi ʻo e ngaahi ʻekitivitī ko ʻení ke ke fakaʻaongaʻi ʻi he lolotonga hoʻo lēsoní.

  1. Fakahanga ki lalo ʻa e ngaahi fakatātā ʻe tolu ʻo e lēsoní ʻi ho fungá pe funga tēpilé. Fakaafeʻi mai ha taha ke ne fili ha taha ʻo e ngaahi fakatātaá, fakaʻaliʻali ange ki he kalasí, pea fai mo e talanoa ʻoku ʻomai ʻe he fakatātā ko iá. Fai ʻa e meʻa tatau mo e ongo fakatātā kehe ʻe ua ko eé.

  2. ʻAi ke hivaʻi pe leaʻaki ʻe he fānaú ʻa e ngaahi lea ʻo e veesi ʻuluaki ʻo e “Talamai ʻa e talanoa ʻo Sīsuú” (Children’s Songbook).

  3. ʻAi ʻa e fānaú ke nau fakatātaaʻi ʻa e talanoa ʻo hono ʻaloʻi ʻo Sīsuú, ʻo fakaʻaongaʻi ʻa e fanga kiʻi meʻa maʻungofua ʻo hangē ko e kiʻi tamapua, konga pulupulu, pea mo ha sikaafi pe holoholo.

Ngaahi ʻEkitivitī Kehe Maʻá e Fānau Iiki Angé

  1. Fakaʻaliʻali ʻa e fakatātā 1–16, Ko e ʻAloʻi ʻo Sīsū Kalaisí, pea ʻeke ange ki he fānaú pe ko hai ʻa e pēpē ʻoku hā he fakatātaá. Fai ange ʻa e talanoa ʻo hono ʻaloʻi ʻo Sīsuú.

    Fakahā ange ʻoku ʻikai ke kei pēpē ai pē ʻa Sīsū. Kuo ne fuʻu lahi ia he taimí ni pea ko e tokoni mahuʻinga taha ia ʻo e Tamaí. Fakaʻaliʻali ʻa e fakatātā 1–3, Ko Sīsū ko e Kalaisí, mo fakahā ange ʻoku ʻofa ʻa Sīsū kiate kitautolu pea mo tokoniʻi kitautolu ʻi he ngaahi meʻa lahi.

  2. ʻAi ke tuʻu ʻa e fānaú ʻo hivaʻi ʻa e ngaahi kupuʻi lea ko ʻení fakatatau mo e fasi ʻo e “Ko ha Tangata Sinou” (Children’s Songbook). Fakaʻaongaʻi ʻa e tuʻusiké ki he veesi ʻuluakí pea mo e tuʻu hangatonú ki he veesi uá.

    Ne u hoko ko ha pēpē, pēpē, pēpē,

    Ko ha kiʻi pēpē, valevale, valevale, valevale.

    ʻOi, peá u tupu hake, tupu hake, tupu hake, tupu hake,

    ʻOi, kuó u lōloa ange, lōloa ange, lōloa ange.

  3. ʻUluaki fetalanoaʻaki mo e mātuʻa hoʻo kalasí kimuʻa pea toki fai e kalasí ke maʻu mei ai ha ngaahi tā ʻo e fānaú ʻi heʻenau kei pēpeé pe ko ha fanga kiʻi meʻa-vaʻinga ʻa ia naʻa nau faʻa vaʻinga mo ia. Fakaʻaliʻali ʻeni ki he kalasí. Tuhuʻi ʻa e toko taha ko ia ʻoku ʻoʻona ʻa e taá ʻi heʻene kei pēpeé pe ko e tokotaha ko ia ʻoku ʻaʻana ʻa e kiʻi meʻa vaʻingá. Fakamatalaʻi ange ko e taimi ko ia naʻa nau kei pēpē aí, naʻa nau hangē pē ko e fanga kiʻi pēpē ko ʻeni he taá pea naʻa nau vaʻinga mo e fanga kiʻi meʻa vaʻingá.