« Eiaha roa to oe ei Atua ê atu, ia‘u nei »

I to‘u tai‘oraa i te mau papa‘iraa mo‘a tahito, te rahi noa’tura to‘u papûraa no te faufaa rahi no te riroraa te ture « Eiaha roa to oe ei Atua ê atu, ia‘u nei » ei ture matamua no na Ture Ahuru.

Aita rea taata tei ma’iti na roto i te ite e te hinaaro mau ia pato‘i i te Atua e ta’na mau haamaitairaa. Te ite nei râ tatou na roto i te mau papa‘iraa mo‘a e no te mea ho‘i e e au ra ua hau atu te fifi i te faaohiparaa i te faaroo i te ti‘aturiraa i ni‘a i te mau mea e noaa i te reira iho taime, ua hinaaro ia te taata tino nei ia huri i to’na ti‘aturiraa i te Atua i ni‘a i te mau mea no te tino nei. No reira, i te mau tau ato‘a ua ma‘iri te mau taata i raro a‘e i te mana o Satane e ua ere i te faaroo, ua mono mai ratou te faaroo i te hoê ti‘aturiraa i te rima taata e i roto i te mau « atua ario, e te auro, e te veo, e te auri, e te raau, e te ofa‘i, o te ore e ti‘a ia hi‘o, aore ho‘i i faaroo, aore ho‘i i ite » (Daniela 5: 23).–oia ho‘i, i te mau idolo. Ua ite au e, e parau tumu tamau te reira i roto i te Faufaa Tahito. Te mea noa i ni‘a te hoê taata e faatumu rahi ai i to’na aau e to’na ti‘aturiraa o to’na ïa Atua, e mai te mea e ere ta’na atua te Atua mau e te ora no Iseraela, te haa ra ïa taua taata ra i roto i te haamoriraa idolo.

Teie to‘u ti‘aturiraa papû e ia tai‘o ana‘e tatou i teie nei mau papa‘iraa mo‘a e ia tamata ana‘e tatou i te faaau ia ratou ia [tatou] », mai ta Nephi i parau (1 Nephi 19: 24), e ite ïa tatou i te mau faaauraa e rave rahi i rotopu i te haamoriraa tahito i te mau hoho‘a tarai e te mau huru raveraa a te taata i to tatou nei iho oraraa.⁵

Te haamoriraa idolo o te hoê ïa o te mau hara ino roa‘e…

E nehenehe te mau idolo apî aore râ te mau atua haavare ia rave i te huru o te ahu, te mau fare, te mau imiraa moni, te mau matini, te mau pereoo uira, te mau poti no te faa ori haere, e rave rahi atu â mau mea no te tino e faatea ê atu i te e‘a e tae atu i te atuaraa…

E nehenehe i te mau mea e ore e noaa i te fafahia i te rima ia riro ‘oi‘oi noa ei mau atua. E nehenehe te mau parau tuite, te mau re e te mau ti‘araa e riro e mau idolo…

E rave rahi mau taata e patu nei e e faanehenehe nei i te hoê fare e e hoo mai nei i te pereoo uira na mua roa–e no te ite i muri iho eita e nehenehe ia ratou ia aufau i te tuhaa ahuru. O vai ta ratou e haamori ra ? E mea papû roa e ere te Fatu no te ra‘i e te fenua…

E rave rahi o te haamori nei i te haereraa e pupuhi i te mau animala, te tere tai‘a, te tere ori faafaaea, te mau tere hopu miti e te mau tere ori i te hopea hebedoma. To vetahi ê mau idolo e mau ha‘utiraa tuaro ïa, te taoraraa popo, te tu‘eraa popo, te aroraa puaatoro, aore râ te huiraa popo…

Te vai ato‘a ra te tahi atu hoho‘a ta te taata e haamori nei o te hoho‘a ïa no te mana e te roo… E titau rahi roa teie nei mau atua no te mana faatere, no te moni, e no te mana i to tatou mau taime e e mea mau ratou mai te mau puaatoro auro a te mau tamarii no Iseraela i roto i te medebara ra.⁶

Noa’tu to tatou oaoa i te faariroraa ia tatou ei feia no te tau apî, e to tatou hinaaro ia mana‘o e ua roaa ia tatou te hoê ite i ore roa i noaa i te hoê nunaa i mutaa iho—noa’tu teie nei mau mea, ua riro tatou i te rahiraa o te taime ei nunaa haamori idolo—te hoê huru hau atu i te ino i mua i te aro o te Fatu.

Te haamana‘o nei au i te hoê aamu ta‘u i tai‘o e rave rahi mau matahiti i teie nei no ni‘a i te hoê pupu taata tei haere i roto i te mau uru raau no te haru i te mau uri taata. Ua tamata ratou e rave rahi mau mea no te haru i te mau uri taata, e tae noa’tu i te mau upea. No to ratou iteraa e e nehenehe ta te mau upea e haapepe i teie mau animala na’ina’i, ua rave ihora ratou i te pae hopea i te hoê rave‘a maramarama roa. Ua hamani ratou e rave rahi mau afata iti, e i ni‘a i te afata tata‘i tahi ua hou ratou i te hoê apoo e tano noa no te vaiiho i te uri taata ia patia atu i to’na rima i roto i te afata. Ua tuu ratou i muri iho i teie nei mau afata i raro a‘e i te mau tumu raau e i roto i te afata tata‘i tahi ua tuu atu ratou i te hoê huero aratita e au-taa ê-hia e te mau uri taata.

Ia faatea ana‘e te mau taata, e haamata te mau uri taata i te pou mai na ni‘a mai i te mau tumu raau e i te hi‘opo‘a maite i te mau afata. No to ratou iteraa e te vai nei te mau huero aratita, e toro atu ratou i to ratou rima i roto no te ohi ia ratou. Ia tamata ana‘e râ te hoê uri taata i te huti mai i to’na rima e te huero aratita, eita e nehenehe ia’na ia iriti mai i to’na rima i rapae atu i te afata no te mea ua rahi to’na tu‘atiraa rima i teie nei no te huero aratita i roto i te rima.

E i taua taime ra, e haere mai te mau taata mai roto mai i te mau tumu raau iti no te haere ti‘a’tu i te mau uri taata. E teie te ohipa huru ê: Ia ite ana‘e te mau uri taata i te mau taata ia haere mai, e uă ratou e e horo ratou ma te mana‘oraa e orahia ratou, area râ noa’tu e e mea ohie roa, eita ratou e faaru‘e i te huero aratita ia nehenehe ia ratou ia iriti mai i to ratou mau rima mai roto atu i te mau afata e ia horo atu. Ua haru ohie noa te mau taata ia ratou.

E au ra e mai te reira ato‘a te mau taata, no to ratou tape‘amaite-raa i te mau mea no te ao nei—te mau mea teretetiera—aore roa ïa e a‘oraa e e ohipa rû e nehenehe e parau ia ratou ia faaru‘e e ia haere atu i te mea tiretiera. Ua roaa-ohie-hia ratou i te haavîraa a Satane. Mai te mea e onoono tatou i te haamau‘a i te taato‘araa o to tatou taime e ta tatou mau rave‘a no te paturaa i te hoê basileia no te ao nei no tatou iho, o tera ihoa ïa ta tatou e fatu ai‘a a muri atu.⁸

E ere te faturaa i te mau faufaa e hara. E tupu mai ra te hara na roto i te imiraa e te faaohiparaa i te faufaa…

Te heheu u‘ana mai nei te aamu no te Buka a Moromona i te hopea ino no te hereraa i te tao‘a. I te mau taime ato‘a ua riro te nunaa ei nunaa parau-ti‘a, ua ruperupe ratou. I muri iho ua pee atu te tauiraa mai te ruperupe e tae atu i te moni, te moni e tae atu i te here i te moni, e i muri iho i te here i te oraraa ohie e te oraraa moni. Ua nuu atu ratou i roto i te faatau i te pae varua, i muri iho i te hara rahi e te ino, e i muri iho fatata ratou i te haamouhia e to ratou mau enemi… Ahani e ua faaohipa te nunaa i ta ratou faufaa no te mau opuaraa maitai ua tamau noa ïa ratou i te oaoa i te hoê oraraa ruperupe.⁹

Ua haamaitai te Fatu ia tatou ei nunaa e te manuiaraa i ore roa i noaa i mutaa iho ra. E mea maitai te mau rave‘a tei tuuhia mai i roto i to tatou nei mana e e tei titauhia no ta tatou ohipa i ni‘a i te fenua. Te măta‘u nei râ vau e e ua haamaitai-rahi-hia tatou e te mau nana e te mau animala e te mau fenua e te mau fare vairaa maa e te moni e ua haamata tatou i te haamori ia ratou ei mau atua haavare, e e mana to ratou i ni‘a iho ia tatou… Ua mo‘ehia te parau e ta tatou ohipa o te faaohiparaa ïa i teie nei mau rave‘a e rave rahi i roto i to tatou mau utufare e te mau pûpû autahu‘araa no te paturaa i te basileia a te Atua–no te faananea i te ohipa misionare e te ohipa tuatapaparaa tupuna e te ohipa hiero; no te atuatu i ta tatou mau tamarii ia riro ratou ei mau tavini maitai na te Fatu; no te haamaitai ia vetahi ê na roto i te mau rave‘a ato‘a, ia manuia ato‘a ratou. Aita râ, te haamau‘a nei tatou i teie nei mau haamaitairaa no to tatou iho mau hinaaro, e mai ta Moroni i parau, «Te faaunauna nei outou ia outou iho i te mea ora ore, e eiaha e haapa‘o i tei poia, e tei veve, e tei ma‘i, e tei roohia i te ati ra » (Moromona 8: 39).

Mai ta te Fatu iho i parau i to tatou nei anotau, « Aita ratou i imi i te Fatu no te faatupu i ta’na parau-ti‘a area râ te haere nei te taata tata‘i tahi i to’na ihora haere‘a, ia au i te hohoa o to’na iho Atua, o tei faito ho‘i to’na hohoa i te hohoa o te ao nei, e to’na huru ra o te huru ïa o te hoe idolo, o te riro ei mea tahito e o te pohe ho‘i i roto ia Babulonia, oia o Babulonia rahi, o te ma‘iri i raro » (PH&PF 1: 16; ua amuihia’tu te reta opa).¹⁰

Ua parau te Fatu e, « …E mata râ na outou i te imi i te basileia o te Atua, e te parau-ti‘a na’na; e amui-ato‘a-hia mai taua mau mea ra ia outou » (Mataio 6: 33). E mea pinepine tatou i te hinaaro i te « mau mea »na mua.¹¹

Peneia‘e aita te hara tei roto i te « mau mea » tei roto râ i to tatou huru e ta tatou haamoriraa i « te mau mea ». Mai te mea e nehenehe i te hoê taata nounou ia haaputu e ia tape‘a i te faufaa a haapa‘o maite ai i te faaueraa e te faanahoraa a te Atua—mai te mea e nehenehe i te taata ona ia haamo‘a i te mahana Sabati, ia ore to’na feruriraa e to’na tino e to’na varua e viiviihia e ia horo‘a oia i te tavini-hua-raa i to’na mau taata tupu na roto i te rave‘a faataahia a te Atua–mai te mea e faatere e e tape‘a maite te taata ona i te taato‘araa o ta’na mau faufaa i raro a‘e i ta’na faatereraa, ma te auraro i te piiraa a te Fatu na roto i ta’na mau tavini i haamanahia, e mea papû roa, no te maitai no to’na varua, i reira taua taata ra e « tii a hoo i ta’na ato‘a ra a hopoi atu ai na te taata riirii… i reira a haere mai e a pee mai ia‘u » (Mataio 19: 21).

« Te vahi ho‘i i vaiihohia’i ta outou tao‘a ra, e riro ato‘a i reira to outou aau » (Mataio 6: 21).¹²

Ua piihia te hoê taata ta‘u i matau i te hoê ti‘araa no te tavini i roto i te Ekalesia, aita râ oia i mana‘o e e nehenehe ta’na e farii no te mea ua rahi te taime e te haapa‘o maitairaa tei titauhia ia’na e ta’na mau imiraa faufaa e aita e nehenehe ia’na ia horo‘a i te tahi taime no te ohipa a te Fatu. Ua vaiiho oia i te taviniraa i te Fatu no te imiraa ia Mamona, e e taata ona milioni oia i teie nei mahana.

Aita i maoro roa iho nei ua haapii mai au i te hoê ohipa maere: Mai te mea e fatu te hoê taata e hoê milioni tara auro i te faito moni no teie nei mahana, te fatu râ ïa oia fatata i te 27 tuhaa iti milia no te mau auro ato‘a e vai nei i roto i te repo reirei o te fenua nei. E mea na’ina’i roa teie nei faito i roto i te feruriraa o te taata. Te vai atu â te tahi mea: Te Fatu tei hamani e tei faatere i ni‘a i te mau mea ato‘a o te fenua nei, ua hamani ïa oia i te tahi ê atu mau fenua e rave rahi, « aore e hope ia tai‘ohia » (Mose 1: 33).; e i te taime a farii ai teie nei taata i te tăpŭraa e te fafauraa no te Autahu‘araa (PH&PF 84: 33-44), ua farii oia i te hoê fafauraa no ô mai i te Fatu « no te mau mea ato‘a a to‘u Metua » (irava 38). Te vaiihoraa i te hiti teie nei mau fafauraa rahi no te hoê afata auro e te hinaaro i te oraraa paruruhia i te pae tino o te hoê ïa hape rahi o te ravehia na roto i te ite ore. Te feruriraa e ua ma‘iti oia no te tao‘a iti o te hoê ïa opuaraa oto mau; e mea hau atu te faufaa o te mau varua o te mau taata i teie nei mau mea.

Ua pahono te hoê taure‘are‘a tamaroa a piihia’i oia no te hoê misioni e aita ta’na e taleni no taua huru ohipa ra. Te mea râ ta’na i ite maitai i te rave o te atuatu-maitai-raa ïa i to’na pereoo uira api puai maitai. Ua oaoa oia i te parau no te puai e te vitiviti, e ia faahoro ana‘e oia i to’na pereoo uira, e au ra te horo‘a nei te tere o te pereoo i te mana‘oraa e te tere mau ra oia i te tahi vahi.

E ua oaoa to’na metua tane i te parauraa e, « Mea au na’na ia rave i te mau mea e to’na na rima. E mea maitai te reira no’na ».

E mea maitai te reira no te hoê tamaiti a te Atua ? Aita teie nei taure‘are‘a i ite e te puai o teie nei pereoo uira e mea na’ina’i mau ïa ia faaauhia i te mana o te moana, aore râ o te mahana; e e rave rahi mau mahana, tei faaterehia e te ture e te autahu‘araa, e i te hopearaa–te hoê mana autahu‘araa ta’na e nehenehe e faarahi i roto i te taviniraa i te Fatu. Ua ma’iti oia no te hoê atua haamâ, te hoê anoiraa no te auri e te uaua e te auri anaana.

Ua faatuhaahia te hoê tane e te hoê vahine paari i ta raua ohipa pae tino, e na roto i te reira, i te Ekalesia ato‘a. Ua hoo mai raua i te hoê pereoo fauta tauhaa na’ina’i e te hoê pereoo e nehenehe e taoto i roto, e, ua faatea ê atu ia raua i te mau titauraa ato‘a, e ua tere atu no te mata‘ita‘i haere i te ao e ia oaoa noa i te maa moni iti ta raua i haaputu i te toe‘a no to raua mau mahana. Aita to raua e taime no te hiero, aita to raua taime no te ohipa ma’imiraa i te parau tuatapaparaa tupuna e no te ohipa misionare. Aita oia i farerei faahou i ta’na pŭpŭ tahu‘a rahi e aita oia i faaea mai i te fare no te haaraa i ni‘a i to’na iho aamu. Ua hinaaro-mau-roa-hia to raua ite e to raua aravihi i te faatereraa i te ohipa i roto i ta raua amaa, aita râ raua i nehenehe i te « tape‘a e tae noa’tu i te hopea », no te mea aita raua i vata.¹³

E ere i te mea nava‘i no tatou ia ite noa e te Fatu to tatou Atua e ia haapae i te haamoriraa i te mau idolo; e ti‘a râ ia tatou ia here i te Fatu ma to tatou aau ato‘a, ma to tatou puai ato‘a, ma to tatou mana‘o ato‘a, e ma to tatou itoito ato‘a. E ti‘a ia tatou ia faahanahana ia’na e ia pee ia’na i roto i te ohipa no te ora mure ore. Auê ïa to’na oaoa i te parau-ti‘a o ta’na mau tamarii ! ¹⁴

E mea maramarama maitai ta tatou ohipa: ia faaru‘e i te mau mea o te ao nei; ia ape i te haamoriraa idolo e te haere-tamauraa i mua ma te faaroo; ia afa‘i atu te evanelia i to tatou mau enemi, ia ore ratou e riro faahou ei enemi no tatou.

E ti‘a ia tatou ia faaru‘e i te haamoriraa i te mau idolo no teie nei tau apî e te ti‘aturiraa i te « rima o te tino », no te mea ua parau te Fatu i to te ao i to tatou nei anotau, « E ore roa vau e faaherehere i te hoê o te faaea i Babulonia ra » (PH&PF 64: 24).

A poro ai o Petero i teie huru poro‘iraa i te mau taata i te mahana no te Penetekote, e rave rahi « ua putapû atura to ratou aau, e ua na ô maira ia Petero e te mau aposetolo ato‘a ra, E te mau taea‘e nei, eaha matou nei ? » (Te Ohipa 2: 37).

E pahono atura Petero: « E tatarahapa, e ia bapetizohia outou ato‘a i roto i te i‘oa o Iesu Mesia ia matara te hara, e… horo‘ahia mai ïa te Varua Maitai ia outou » (irava 38).

… Hoê â ta matou nei poro‘i i te poro‘i ta Petero i horo‘a. E oia â, mai ta te Fatu i horo‘a « i te mau hopea o te ao nei, ia faaroo mai te mau taata’toa o tei hinaaro:

« A faaineine outou, a faaineine outou no te mea e tae mai nei, no te mea e ua fatata mai te Fatu ». (PH&PF1:11–12).

Te ti‘aturi nei tatou e te rave‘a no te taata tata‘i tahi e no te utuafare tata‘i tahi ia faaineine mai ta te Fatu i parau o te haamataraa ïa i te faaohipa i te faaroo rahi a‘e, i te tatarahapa, e te tomoraa’tu i roto i te ohipa no to’na basileia i ni‘a i te fenua nei, oia ho‘i te Ekalesia a Iesu Mesia i te Feia Mo‘a i te mau Mahana Hopea nei. E au ra e mea fifi rii i te haamataraa, ia haamata ana‘e ra te hoê taata i te maramarama i te ohipa mau, ia haamata ana‘e oia i te ite i te tahi tuhaa iti no te ora mure ore i roto i to’na ti‘araa mau, e haamata ïa te mau haamaitairaa i te rahi atu i te tusia no te faaru‘eraa i « to te ao » i muri.¹⁵

A feruri i teie nei mau mana‘o a tuatapapa ai outou i te pene aore râ, a faaineine ai outou i te haapii. No te tahi atu tautururaa, a hi‘o i te mau api v–xi.

• I to outou feruriraa no teaha te « « Eiaha roa to oe ei Atua ê atu, ia‘u nei » i riro ai te Ture matamua no na Ture Ahuru ?

• A feruri i teie nei faahitiraa parau: « Te mau mea ato‘a i faatumu rahi ai te taata i to’na ra aau e to’na ti‘aturiraa o to’na ïa atua » (api 176). Eaha te tahi o te mau atua haavare i roto i te ao i teie nei mahana ? (A hi‘o i te mau hoho‘a i te mau api 176-78).

• Eaha te haapiiraa e nehenehe ta tatou e apo mai na roto i te aamu no te mau herepata no te mau uri taata ? (A hi‘o i te mau api 178-79). Eaha ta tatou e faaruru ia hinaaro mau roa ana‘e tatou i te mau mea o teie nei ao ?

• A tai‘o i te mau api 179-81. Eaha te tahi mau fifi ia monihia ana‘e tatou ? Eaha te mau rave‘a e nehenehe ta tatou e faaohipa ti‘a i te mau rave‘a ta te Fatu i horo‘a mai ia tatou ?

• A tai‘o i te mau aamu i te mau api 181-83. I to outou feruriraa no teaha te tahi mau taata e haapae mau ai i te mau haamaitairaa no te taviniraa i roto i te basileia o te Fatu. Eaha mau ta tatou opuaraa ia tavini ana‘e tatou ?

• I to outou feruriraa eaha te auraa no te parau « ia here i te Fatu ma to tatou aau ato‘a, ma to tatou puai ato‘a, ma to tatou mana‘o ato‘a, e ma to tatou itoito ato‘a » ? (api 183). Eaha ta te mau metua e nehenehe e rave no te tauturu i ta ratou mau tamarii ia here i te Fatu ?

Te mau papa‘iraa mo‘a: Exodo 20:3–6; Mataio 6:24; 22:36–38; Kolosa 3:1–5; 2 Nephi 9:30, 37; PH&PF 133:14