Te Sabati—Te hoê oaoaraa

Ua pou mai ra Mose i raro mai te mou‘a aueue e te auahi no Sinai e ua afai atu i te mau tamarii ori no Iseraela i na Ture Ahuru, te mau ture faufaa rahi no te faatereraa i te oraraa. E ere râ teie nei mau faaueraa i te mea apî. Ua faaitehia teie mau ture ia Adamu e i to’na huaai, tei faauehia ia ora i te reira mai te haamataraa ra e ua faahiti faahou-hia’tu e te Fatu ia Mose. Ua haamata teie nei mau ture na mua’tu i te oraraa i ni‘a i te fenua e ua riro ei tuhaa no te tamataraa i te mau taata tei haamauhia i roto i te apooraa i te ra‘i ra.

E titau nei te ture matamua no te Ture Ahuru i te mau taata ia haamori i te Fatu; ua faaite mai te maha o te ture i te mahana Sabati no taua ihoa ra haamoriraa ra:

« Eiaha roa to oe ei Atua ê atu, ia‘u nei [..].

« E haamana‘o i te mahana sabati ia haamo‘ahia ïa.

E tia ia oe ia haa, e ia rave i ta oe mau ohipa ato‘a i na mahana e ono ra;

Area te mahana hitu ra, o te sabati ïa no to Atua ra no Iehova; eiaha roa oe e rave i te ohipa i te reira mahana, o oe, e to tamaiti ato‘a, e to tamahine, e to tavini tane, e to tavini vahine, e to mau puaa ato‘a ra, e te taata ê ato‘a i μ oe ra ».

« E ono ho‘i o Iehova mahana i te hamaniraa i te ra‘i e te fenua, e te tai, e te mau mea ato‘a i roto ra; area te mahana hitu ra, faaea ihora oia i te reira: i haamaitai ai Iehova i te mahana sabati, e ua haamo‘a ihora ho‘i i te reira.(Exodo 20: 3, 8–11).

Te ofatiraa i te mahana Sabati, no te mau taata e rave rahi, e ohipa riirii noa ia, area no to tatou Metua i te Ao ra e ofatiraa ïa i te hoê o te mau ture tumu. E tapa‘o faaite te reira no te manuia ore o te taata i mua i te tamataraa no te taata tata‘i tahi tei tuuhia mai i mua ia tatou hou te ao nei i hamanihia’i, « ia ite e, e haapa‘o anei ratou i te mau mea ato‘a ta te Fatu to ratou Atua e faaue ia ratou ra » (Aberahama 3: 25)..

Te faaueraa hanahana tei afa‘i-hia mai i raro na roto i te patiri mai te mou‘a Sinai mai o teie ïa: « E haamana‘o i te mahana sabati ia haamo‘ahia ïa ». Aita roa’tu a‘e taua faaueraa i iritihia aore râ i tauihia. Ua haapuaihia râ i teie mau tau api nei:

« A haamana‘o râ i teie, te mahana o te Fatu ra, e pûpû atu ai oe i ta oe ra mau tusia e ta oe ra mau oro‘a i tei Teitei Roa ra, mai te fa‘iraa’tu i ta oe ra mau hara i to oe mau taea‘e, e i mua ho‘i i te Fatu.

« E i teie mahana eiaha oe e rave i te hoe mea ê atu, maori râ ia faaineinehia ta oe maa mai te aau hoe ra…ia î roa to oe oaoaoraa » (PH&PF 59: 12–13).³

Te… ti‘aoro atu nei au i te Feia Mo‘a ato‘a i te mau vahi ato‘a ia haapa‘o etaeta’tu â i te mahana Sabati. Te ere vitiviti nei te mahana mo‘a o te Fatu i to’na auraa mo‘a na te ao taato‘a nei… Te rahi noa’tu ra to te taata haamouraa i te mau opuaraa mo‘a no te Sabati no te imiraa i te moni, te faaoaoaraa, te ha‘utiraa, e te haamoriraa i te mau atua haavare e te mau atua materia. Te tamau nei matou i te ti‘aoro i te Feia Mo‘a ato‘a e te mau taata ato‘a e măta‘u nei i te Atua i te mau vahi ato‘a ia haapa‘o e ia haamo‘a i te mahana Sabati. Eita te mau vahi raveraa ohipa e vai matara mai te mea eita e haerehia’tu i reira i taua mahana mo‘a ra. E parau mau ato‘a no te mau vahi faaarearearaa, te mau ohipa tuaro, e te mau vahi huru rau ato‘a no te faaoaoaraa. E au ra e, te upooti‘a nei te imiraa i te tao‘a rahi i ni‘a’tu i te faaueraa a te Fatu e ‘E haapa‘o outou i tau mau sabati, e e faahanahana i tau vahi mo‘a ra » (Levitiko 19: 30).⁴

Te ite nei matou e i roto i to tatou nei ao Kerisetiano i te mau vahi e rave rahi te vai matara noa ra te mau fare toa i te Sabati mo‘a. Ua ite papû matou e te raau rapaau no te reira tei roto ïa ia tatou iho, te feia e hoo. E mea papû eita te mau fare toa e te mau vahi ohiparaa e vai matara noa mai te mea eita tatou, te feia hoo, e haere e hoo mai i te mau tauihaa io ratou. E nehenehe anei ta outou e hi‘opo‘a faahou i te reira. A faahaere atu te reira i roto i ta outou mau pureraa pô utuafare e a aparau atu i ta outou mau tamarii no ni‘a i taua tumu parau ra. E mea faahiahia ahani e faaoti te mau utuafare ato‘a e mai teie atu taime aore roa e hoo-faahou-raa i te Sabati.⁵

Ua riro tatou ei hoê ao no te feia ofati i te Sabati. I te Sabati ua î roa te mau roto i te mau poti, ua apiapi roa te mau tahatai i te taata, ua rahi roa’tu te mau taata i te mau fare teata, e ua î te mau tahua huiraa popo i te feia ha‘uti. Ua riro te Sabati te mahana auhia no te mau faaiteiteraa e te mau tatauraa puaahorofenua, te mau rururaa, te mau ori haereraa a te utuafare; te ha‘uti-ato‘a-hia nei te mau ha‘utiraa popo i te mahana mo‘a. « E ohipa mai tei matauhia » o te parau tumu ïa a te mau taata e rave rahi, e ua riro to tatou mahana mo‘a ei mahana faaearaa ohipa. E no te mea ho‘i e te faariro nei te mau taata e rave rahi i teie mahana mai te hoê mahana faaearaa ohipa, e rave rahi ïa te mau taata e tamata nei i te haamaha i te mau hinaaro o te feia e au nei i te arearea e te feia e imi nei i te moni…

Aita te haereraa e pupuhi i te animala e te tai‘araa i te mahana o te Fatu i te haamo‘araa i te reira. Te tanuraa aore râ te faaapuraa aore râ te pafa‘iraa i te mau maa e ere ïa te haamo‘araa i te mahana o te Fatu. Te haereraa i roto i te mau faa no te tere ori haere, te haereraa e mataitai i te mau tuaro aore râ te mau faaiteiteraa na te mau puaahorofenua aore râ te mau hororaa aore râ te mau faaiteiteraa aore râ te tahi atu mau faaoaoaraa i taua mahana ra e ere ïa te haamo‘araa i te reira.

E mea maere paha teie huru ohipa, te faati‘a nei te tahi mau Feia Mo‘a i te mau Mahana Hopea nei, o tei riro ho‘i e mau melo haapa‘o maitai i roto i te tahi ê atu mau tuhaa, i to ratou ma’iriraa i te tahi mau taime i ta ratou mau pureraa no te mau faaoaoaraa, ma te mana‘o e e ma‘iri ratou i te tai‘araa maitai mai te mea aita ratou i roto i te tahora i te mahana iritiraa aore râ e e poto roa te tau faafaaearaa mai te mea eita ratou e tere atu i te Sabati aore râ e ere ratou i te hoê hoho‘a ta ratou i hinaaro i te hi‘o mai te mea eita ratou e haere i te Sabati. E i ta ratou ofatiraa i te Sabati e mea pinepine ratou i te afa‘i ato‘a’tu i to ratou mau utuafare na muri ia ratou…

Aita e faahaparaa no te faaoaoaraa ti‘a–te mau tuaro, te mau tere ori haere, te mau ha‘utiraa e te mau hoho‘a teata. E maitai to ratou paato‘a no te faaitoito i te oraraa, e te paturu itoito nei te Ekalesia mai te hoê faanahonahoraa i taua mau faaoaoaraa. Te vai ra râ te hoê taime e te hoê vahi au maitai no te mau mea maitai ato‘a–te hoê taime no te ohipa, te hoê taime no te ha‘uti, te hoê taime no te haamori…

E parau mau e ti‘a i te tahi mau taata ia rave i te ohipa i te Sabati. E, oia mau, e nehenehe te tahi o te mau ohipa i hinaaromau-hia—mai te utuuturaa i te feia ma‘i—e riro ei haamo‘araa i te Sabati.

I te tahi mau taime ua faarirohia te haapa‘oraa i te Sabati ei tumu parau no te tusia e te faaereraa ia’na iho i te mau mea, e ere râ te reira. E ohipa noa ra no te faanahonaho e te ma‘iti i te mau taime. Ua nava‘i te taime, i roto ihoa ra i to tatou nei tau o te aamu o te ao nei, i roto i na mahana e ono no te hebedoma no te rave i ta tatou ohipa e no te ha‘uti. E rave rahi te ohipa e nehenehe e ravehia no te faanaho e no te faaitoito i te mau ohipa i roto i te hebedoma, ma te haapae i te Sabati i te hiti.⁷

Te Sabati o te hoê ïa mahana mo‘a no te rave i te mau ohipa maitai e te mau ohipa mo‘a. E mea faufaa rahi te haapaeraa i te ohipa e te faaoaoaraa, aita ra te reira i nava‘i. Te pii nei te Sabati i te mau mana‘o e te mau ohipa e faatupu i te maitai, e mai te mea e faaea noa te taata ma te ohipa ore i te Sabati, te ofati ra ïa oia i te mahana Sabati. No te haapa‘oraa i te reira e ti‘a ïa ia’na ia tuturi e ia pure, ia faaineine i te mau haapiiraa, ia tuatapapa i te evanelia, ia feruri hohonu, ia farerei i te feia ma‘i e te feia i roto i te hepohepo, ia papa‘i i te mau rata i te mau misionare, ia taotooto rii, ia tai‘o i te mau buka maitai, e ia haere i te mau pureraa ato‘a no taua mahana ra tei ti‘a ia’na ia haere atu.⁸

A rave i te taime i te mahana Sabati ia faaea i roto i to outou mau utuafare no te aparau te tahi e te tahi, no te tai‘o i te mau papa‘iraa mo‘a, no te farerei i te mau hoa, te mau fetii e te feia ma‘i e te feia otare. Teie ato‘a te hoê taime maitai no te rave i te ohipa i roto i ta outou mau buka aamu utuafare e ta outou tuatapaparaa tupuna.⁹

Teie te auraa o te parau Sabati i roto i te reo Hebera « faafaaea ». Oia ho‘i te faaea hau noaraa, te hau i roto i te feruriraa e te varua. E mahana no te tiavaru atu i te mau mana‘o nounou e te mau ohipa e rave rahi nei i to tatou taime.

Ua horo‘ahia te mahana Sabati i te taata na roto i te mau u‘i ato‘a no te hoê faufaa vaiiho tamau [a hi‘o Exodo 31: 16]. E tapa‘o te reira i rotopu i te Fatu e ta’na mau tamarii e a muri noa’tu [a hi‘o Exodo 31: 17]. E mahana teie no te haamori e no te faaite i te Fatu to tatou mauruuru e to tatou fana‘o. E mahana teie no te vaiiho i te mau mea ato‘a no te ao nei e no te arue i te Fatu ma te haehaa, no te mea te haehaa o te haamataraa ïa no te faateiteiraa. E ere teie mahana no te ati e te fifi no te faaearaa râ e te oaoa parau-ti‘a. E ere te mahana no te tamaaraa rahi e mahana râ no te maa ohie e te tamaaraa varua… E mahana tei horo‘a-aroha-hia mai e to tatou Metua i te Ao ra. E mahana i reira te mau animala e tuuhia ai no te amu i te aihere e no te faafaaea; i reira te ope e vaiihohia’i i roto i te fare vairaa e e tupohehia ai te tahi atu mau matini, te hoê mahana e faaea ai te fatu ohipa e te taata rave ohipa, te fatu e te tavini, i te faaapu, i te heru e te haa. E mahana i reira te piha toro‘a e tapirihia ai e e faataimehia’i te ohipa e e haamo‘ehia’i te mau pe‘ape‘a; te hoê mahana i reira te taata e matara ai no te tahi taime poto i te faaueraa matamua ra, « E amu oe i ta oe maa ma te hou i nia i to rae, e ho‘i noa’tu oe i raro i te repo » [A hi‘o Genese 3:19]. E mahana i reira te mau tino e faafaaea ai, te mau feruriraa e tamărû ai, e te mau varua e tupu rahi ai. E mahana i reira te mau himene e nehenehe ai e himenehia, te mau pure e pûpûhia ai, te mau a‘oraa e a‘ohia ai, te mau iteraa papû e faaitehia ai, e i reira te taata e pouma teitei ai, ma te haamou roa i te taime, te aore, te atea i rotopu ia’na e to’na Rahu Nui.

Te Sabati o te hoê ïa mahana no te hi‘opo‘araa i to’na iho oraraa—te tuatapaparaa i to tatou mau paruparu, te fa‘iraa i ta tatou mau hara i to tatou mau hoa ohipa e i to tatou Fatu. E mahana no te haapae i te maa « ma te ahu paau e te rehu auahi ». E mahana no te tai‘oraa i te mau buka maitai, te hoê mahana no te feruri hohonu, te hoê mahana no te tai‘oraa i te mau haapiiraa no te mau pŭpŭ autahu‘araa e te mau pŭpŭ tauturu, te hoê mahana no te tai‘oraa i te mau papa‘iraa mo‘a e te faaineineraa i te mau a‘oraa, te hoê mahana no te taotooto e no te faaea e te faafaaea, te hoê mahana no te farerei i te feia ma‘i, te hoê mahana no te poro i te evanelia, te hoê mahana no te poro, te hoê mahana no te farerei ma te hau i te utuafare e no te haamatau maitai i ta tatou mau tamarii, te hoê mahana no te haamatau maite i to tatou hoa tamahine aore râ hoa tamaroa, te hoê mahana no te rave i te maitai, te hoê mahana no te inu i te pape pihaa no te ite e te haapiiraa, te hoê mahana no te imi ia faaorehia ta tatou mau hara, te hoê mahana no te haafaufaa i to tatou varua e to tatou aau, te hoê mahana no te faaho‘i ia tatou i to tatou huru varua, te hoê mahana no te rave i te mau tapa‘o no te tusia e te taraehara o [te Fatu], te hoê mahana no te feruri i te mau hanahana o te evanelia e te mau ao mure ore, te hoê mahana no te pouma teitei atu i ni‘a i te e‘a e tae atu i to tatou Metua i te Ao ra.¹⁰

Te ti‘aturi nei matou e…na mua a‘e e aore râ na muri a‘e i ta outou mau pureraa i te mahana Sabati, tei te huru o te mau hora no ta outou mau pureraa, e rave outou i te mea ta te Faaora i ani atu i te mau pĭpĭ Nephi ia rave: I muri a‘e i to’na haapiraa’tu ia ratou, ua ani oia ia ratou ia haere i to ratou mau utuafare no te feruri e no te pure no ni‘a i te mau mea tei parauhia (a hi‘o 3 Nephi 17: 3). Ia haamana‘o noa tatou i taua hoho‘a ra.¹¹

E au ra e te mana‘o o te Fatu no te hoê Sabati tei î e tei faufaahia o te haamoriraa ïa e te haapiiraa no ni‘a ia’na e te raveraa i ta’na oro‘a. Te hinaaro nei oia e ia faa î tatou i taua mahana ra i te mau ohipa faufaa e te mau ohipa no te pae varua. Te hinaaro nei oia ia rave tatou i teie nei mau mea na roto i te mana‘o haamaitai e te aau e te mata oaoa ho‘i, eiaha râ na roto i te ata faarahi. Te hinaaro nei oia ia haere ta tatou mau tane e ta tatou mau tamaroa i ta ratou mau pureraa autahu‘araa ma te faaineine i ta ratou mau haapiiraa e ma te aau oaoa. Te hinaaro nei oia e ia haere to’na nunaa i te Haapiiraa Sabati e ia haapii i reira i ta’na opuaraa no te faaoraraa. Te hinaaro nei oia ia haere to’na nunaa i te pureraa oro‘a ia himene e te Feia Mo‘a e ia pure ma te varua e te taata tei riro ei auvaha e ia rave i te mau tapa‘o no te oro‘a, ma te faaapî i te fafauraa, na roto i te auraro-maite-raa i te Fatu, ma te rave-papûraa i te ohipa, e te haamana‘o tamau noaraa ia’na.¹²

O vai tei ti‘a ia haere i te mau pureraa oro‘a ? Ua faataehia te faaueraa na roto i te peropheta i te feia ato‘a « e tia ra to ratou pue avae i nia i te fenua no Ziona », te melo no ta’na Ekalesia [a hi‘o PH&PF 59: 3, 9]. Aita te titauraa i faataa-noa-hia no te feia paari tei roto ato‘a râ te feia api e te feia paari ato‘a… Eaha ïa ta te mau metua e nehenehe e rave no te tauturu maitai atu â no te haapaariraa i te utuafare maori râ ia haere amui atu te taato‘araa o te utuafare, te mea rahi e te mea na’ina’i, i te fare pureraa no te mau pureraa oro‘a ? I reira te mau tamarii e haapii ai i te peu no te haere tamau i te pureraa, e tape‘ahia ai ratou i te ofati i te Sabati, e apo mai ai ratou, noa’tu to ratou apî, i te mau haapiraa e te mau iteraa papû, e te varua i reira. E ti‘a i te feia faatere no te tĭtĭ, no te paroita e no te mau pŭpŭ ia riro ei hi‘oraa maitai no te mau taata i roto i teie tumu parau.¹³

I to‘u tamarii-rii-raa, ua haapiihia vau i te peu no te haere i te mau pureraa oro‘a. Ua afa‘i noa to‘u Metua vahine ia‘u na muri ia’na. I taua mau avatea ve‘ave‘a ra, ua hinaaro vau i te taoto e ua turu‘i vau i ni‘a i to’na turi no te taoto. Aita paha vau i haapii rahi mai na roto i te mau a‘oraa, ua haapii râ vau i te peu « no te haere i te pureraa ». Ua vai noa teie nei peu ia‘u nei i te taato‘araa o to‘u nei oraraa.¹⁴

Aita e tamarii rii e farii nei i te hihi mahana o te ite papû eaha te tupu i ni‘a i to’na tino; ma to’na ite ore, te afa‘i mai nei râ te hihi mahana i te puai i to’na tino na’ina’i. Aore roa e tamarii tei ite i te faufaa o te u a to’na metua vahine aore râ te maa i roto i te mau punu tei tatarahia no te faaamu ia’na. No reira mai ho‘i to’na puai e to’na mana ia tupu e ia riro mai ei taata a muri iho…

E nehenehe i te mau tamarii ato‘a e apo rahi mai i roto i te hoê pureraa oro‘a ma te taa ore i te faufaa rahi no taua pureraa ra. E momi ratou i te mau mea ato‘a i te mau taime ato‘a.¹⁵

E ere anei te hoê ereraa rahi no te taime e te tautoraa mai te mea e ti‘a ia tatou ia faaea e ia parau i te mau po‘ipo‘i Sabati ato‘a e « E haere anei au aore râ aita i te pureraa autahu‘araa ? E haere anei au aore râ aita i te pureraa oro‘a i teie mahana ? E haere anei au aore râ aita ? » Auê ïa tautooraa rahi haamau‘ahia…A rave hope roa na i te faaotiraa.¹⁶

Ua faaea noa te hoê taata ta‘u i matau i te fare i te mau Sabati ato‘a e ua faati‘a oia i ta’na faaotiraa ma te parau e e mea rahi a‘e te maitai ta’na e farii na roto i te tai‘oraa i te hoê buka maitai i te fare eiaha ra i te haereraa i te pureraa oro‘a e i te faarooraa i te hoê a‘oraa ino. E ere ho‘i te utuafare, noa’tu to’na huru mo‘a, i te fare no te pure. Aita e oro‘a e faaterehia i roto i te fare; aita e itehia te autaea‘eraa e te mau melo, aita ato‘a te fa‘iraa i te mau hara i te mau taea‘e. E topahia paha te mau mou‘a ei mau hiero no te Atua e e parauhia paha te mau uru raau e te mau tahora pape ei mau mea hamanihia e ana; i roto ana‘e râ te fare pureraa, aore râ te fare no te pure, e oti ai te taato‘araa o te mau titauraa a te Fatu. E no reira i parau mai ai oia ia tatou e « E mea tia i to te ekalesia ia tairuru pinepine mai ia amu i te pane e te uaina ei haamana‘oraa i te Fatu ra o Iesu » (PH&PF 20: 75).¹⁷

Eita tatou e haere i te mau pureraa i te Sabati ia faaanaanataehia tatou aore râ ia haapii-noa-hia tatou. Te haere nei tatou no te haamori i te Fatu. E hopoi‘a na te taata tata‘i tahi, e taa ê noa’tu i te mau parau tei parauhia na mua mai, mai te mea te hinaaro ra te hoê taata ia haamori i te Fatu ma te varua e te parau mau, e nehenehe ïa ta’na e na reira ma te haereraa’tu i ta’na mau pureraa, ma te amuraa i te oro‘a, e te feruri-hohonu-raa i te mau mea hanahana o te evanelia. Mai te mea aita te pureraa i manuia maitai i to outou feruriraa, aita ïa outou i manuia. Aita e nehenehe i te hoê taata ia haamori no outou; e ti‘a ia outou ia rave i ta outou iho ti‘aturiraa i te Fatu.¹⁸

Te opuaraa no te faaueraa [ia haamo‘a i te mahana Sabati] e ere ïa i te faa-ere-raa i te taata i te tahi mea. Te mau faaueraa ato‘a ta te Atua i horo‘a i ta’na mau tavini no te maitai ïa o te feia e farii e e haapa‘o i te reira mau faaueraa. O te taata iho o te fana‘o na roto i te haapa‘o maiteraa e te etaeta; o te taata iho o te mauiui na roto i te ofatiraa i te mau ture a te Atua…

Te ite nei au i roto i to‘u mau tere i te mau taata e faa ere nei ia ratou i te mau haamaitairaa no te mahana Sabati e e rave nei i te mau mea rahuihia. Ua ite au i te mau taata faaamu animala o te haaputuputu nei i ta ratou mau animala i te Sabati; te mau hoohooraa maa hotu i te pae puromu, e te rahiraa o te taime, o te matara nei i te ao e te pô i te tau auhuneraa, e o te tapiri i te Sabati; te mau fare toa hoo raau, te mau fare tamaaraa, e te mau hoohooraa i te pae puromu tei tapiri i te mahana o te Fatu—i te mau fatu ohipa o te ora nei e o te oaoa mau nei i te haapa‘oraa i te ture. E i te mau taime ato‘a e ite au i te mau taata maitai o te haapae nei i teie mau huru imiraa moni, te oaoa nei au e te hinaaro nei au i roto i to‘u aau ia haamaitai ia ratou no to ratou faaroo e to ratou tape‘a-maite-raa.¹⁹

Ua ite au e e ore roa te mau taata e mauiui i te pae hopea no te hoê noa‘e tusia i te pae moni tei ti‘a ia ravehia, no te mea ua faaue [te Atua] ia tatou ia haapa‘o i ta’na mau ture e ua titau ato‘a oia ia tatou ia:

« … e tamataraa te reira ia‘u nei, te parau maira Iehova sabaota ra; i te oreraa vau i te iritiraa i te mau haamaramarama o te ra‘i ra, a niinii atu ai i te tao‘a rahi roa ei maitai no outou » (Malaki 3:10).²⁰

No ni‘a i teie nei faaueraa, e i rotopu i te tahi atu mau faaueraa, e pee na tatou i te peropheta Iosua: « E tena na, e măta‘u outou ia Iehova, e e haamori ho‘i ia’na ma te haavare ore, ma te parau mau:…e faataa na outou i teie nei mahana i ta outou e haamori; …area vau e to‘u ato‘a ra utuafare, e haamori ïa matou ia Iehova » (Iosua 24: 14-15).

I reira e nehenehe ai ia tatou ia ti‘aturi i te mau haamaitairaa tei fafauhia i te mau tamarii no Iseraela: « E haapa‘o outou i tau mau sabati, e e faahanahana i tau vahi mo‘a ra: o vau o Iehova.

« Ia haapa‘o outou i ta‘u ra mau haapa‘oraa, e ia mau i ta‘u ra parau, e ia rave i te reira;

« E horo‘a’tu vau i te ûa i te tau mau ra, e e maahia to te fenua, e e faahotu mai te mau raau o te fenua ra i te huero.

« E tae ta outou papairaa sitona i te haaputuraa vine, e tae roa ho‘i te haaputuraa vine i te ueueraa huero; e amu ho‘i outou i ta outou maa ma te rahi, e e parahi i to outou fenua ma te ora;

« E na‘u e horo‘a’tu i te hau i to outou na fenua, e taoto ho‘i outou, e ore roa ho‘i te hoê e haamăta‘u mai » (Levitiko 26: 2–6).²¹

E au ra e te tumu e mea fifi roa te mahana Sabati no te mau taata e rave rahi ia haapa‘o no te mea ïa e ua papa‘ihia te reira i ni‘a i te mau ofa‘i eiaha râ i roto i to ratou ra aau…

… I to tatou iho nei tau e au ra e ua ite [te Fatu] i te maramarama o to’na nunaa, e ua mana‘o oia e e apo mai ratou i te taato‘araa o te varua haamori e te haapa‘oraa i te Sabati a parau ai oia ia ratou e:

« E pûpû atu oe i te hoe tusia i te Fatu ra o to oe Atua na roto i te parau-ti‘a, oia ho‘i i te aau oto e i te varua haehaa ra » (PH&PF 59:8).

… Ua horo‘a mai oia ia tatou te ture matamua e te hau i te rahi:

« Hinaaro oe i to Atua ia Iehova ma to aau ato‘a, e ma to varua ato‘a, e ma to mana‘o ato‘a » (Mataio 22: 37).

Eita e mana‘ohia e te taata o tei hinaaro i te Fatu ma to’na aau ato‘a e ma to’na varua ato‘a e ma te aau oto e te varua haehaa e tei ite i te mau horo‘a hopea ore ta te Fatu i horo‘atu ia’na eita ïa oia e faaohipa i te hoê mahana i ni‘a i te hitu na roto te haamaitai e te aau mauruuru, ma te faahaere i mua te mau ohipa maitai a te Fatu. Ua riro te haapa‘oraa i te Sabati ei hoê faaiteraa no te faito o to tatou here i to tatou Metua i te Ao ra.²²

Te ani pinepine nei te mau taata i hea e huti ai te reni: eaha te mea ti‘a e eaha te mea ti‘a ore ia rave i te Sabati. Mai te mea râ e here mau te hoê taata i te Fatu ma to’na aau ato‘a, e i to’na puai ato‘a, te mana‘o e te itoito; mai te mea e nehenehe ta te hoê taata e faatea ê atu te mana‘o nounou te hinaaro haavî; mai te mea e nehenehe ta te hoê taata e faito i te mau ohipa ato‘a no te Sabati i te raau faito no te haamoriraa; mai te mea eita te hoê taata e haavare i to’na Fatu e ia’na iho, mai te mea e pûpû te hoê taata i « te aau oto e te varua haehaa », eita roa ïa e vai mai te ofatiraa i te Sabati i roto i te oraraa o taua huru taata ra.²³