မောဇိယ ၁၂

အခန်းကြီး ၁၂

အဘိနဒိသည် လူတို့၏ပျက်စီးခြင်းနှင့် နောဧမင်းကြီး၏သေခြင်းကို ပရောဖက်ပြု၍ဟောခြင်းကြောင့် ထောင်ထဲ၌ လှောင်ထားခံရ၏—ယဇ်ပုရောဟိတ်အတုအယောင်တို့သည် ကျမ်းစာများကို ကိုးကား၍၊ မောရှေ၏ပညတ်တရားကို စောင့်ထိန်းယောင်ဆောင်ကြ၏—အဘိနဒိသည် သူတို့အား ပညတ်တော်ဆယ်ပါးကို သွန်သင်ပေးစပြု၏။ ဘီစီ ၁၄၈ ခန့်။

၁ ဤသို့အားဖြင့်အချိန်တန်လာသောအခါ၊ အဘိနဒိသည် ခြားနားသောအယောင်ကိုဆောင်၍၊ ထိုသူတို့အထဲသို့ လာသဖြင့်၊ သူ့ကို သိခြင်းမရှိကြ။ သူတို့၌ ပရောဖက်ပြု၍ဟောစပြုလေသည်မှာ၊ ထိုကဲ့သို့ ကိုယ်တော်ရှင်သည် ငါ့ကို မိန့်တော်မူလေသည်ကား—အဘိနဒိ၊ ငါ၏လူမျိုးတို့ထံသို့ သွား၍၊ ဤအမှုကို ပရောဖက်ပြု၍ဟောပြောလော့။ အကြောင်းမူကား၊ သူတို့သည် ငါ၏နှုတ်ကပတ်တော်ကို ဆန့်ကျင်၍၊ သူတို့စိတ်နှလုံးကို မာကျောစေကြလေပြီ။ သူတို့၏ ဆိုးသောအမှုများမှ နောင်တရခြင်းမရှိကြ။ ထို့ကြောင့်၊ ငါသည် သူတို့ကို အမျက်ထွက်၍၊ ဆုံးမတော်မူမည်။ အမှန်စင်စစ်၊ ငါ၏ပြင်းစွာသောအမျက်ဖြင့်၊ သူတို့၏ဒုစရိုက်များနှင့် စက်ဆုပ်ရွံရှာဖွယ်အမှုများကို ဆုံးမတော်မူမည်။

၂ ထိုမှတစ်ပါး၊ ဤမျိုးဆက်သည် အမင်္ဂလာရှိ၏။ ကိုယ်တော်ရှင်က ငါ့ကို မိန့်တော်မူသည်ကား၊ သင်၏လက်ကိုဆန့်၍၊ ပရောဖက်ပြု၍ဟောကြားလော့။ ဆိုရမည်ကား၊ ကိုယ်တော်ရှင်မိန့်တော်မူသည်မှာ၊ အချိန်တန်လာလတ္တံ့သောအခါ၊ ဤမျိုးဆက်သည် သူတို့ဒုစရိုက်များကြောင့် ကျွန်ပြုခြင်းသို့ ဆောင်ယူခံရလိမ့်မည်။ ပါးကိုလည်း အရိုက်ခံရလိမ့်မည်။ ထိုမှတစ်ပါး၊ လူတို့၏မောင်းထုတ်ခြင်းကိုခံရ၍၊ ကွပ်မျက်ခံရလိမ့်မည်။ မိုးကောင်းကင်မှလင်းတများ၊ ခွေးများနှင့် တောသားရဲတို့သည်လည်း သူတို့အသားကို ကိုက်စားကြလိမ့်မည်။

၃ ဤသို့အားဖြင့်အချိန်တန်လာလတ္တံ့သောအခါ၊ နောဧမင်းကြီး၏အသက်တာသည် ပူလှသော မီးပြင်းဖိုထဲက အဝတ်တန်ဆာတစ်ခုမျှလောက်သာ အဖိုးထိုက်လိမ့်မည်။ အကြောင်းမူကား၊ ငါသည် ကိုယ်တော်ရှင်ဖြစ်တော်မူကြောင်း သူသိလိမ့်မည်။

၄ ဤသို့အားဖြင့်အချိန်တန်လာလတ္တံ့သောအခါ၊ ငါသည် ဤလူမျိုးတို့ကို ပြင်းထန်သော ဆင်းရဲဒုက္ခများ၊ ထိုမှတစ်ပါး၊ ငတ်မွတ်ခေါင်းပါးခြင်းဘေးနှင့် ကာလနာဘေးတို့ဖြင့် ဒဏ်ခတ်တော်မူမည်။ ထို့အတူ၊ သူတို့ကို တစ်နေ့လုံး ညည်းတွားမြည်တမ်းနေစေမည်။

၅ ထိုမှတစ်ပါး၊ သူတို့၏ကျောပေါ်၌ ဝန်ကိုချည်နှောင်ထားစေမည်။ သူတို့သည်လည်း စကားမပြောနိုင်သောမြည်းကဲ့သို့ ရှေ့မှာထား၍၊ မောင်းနှင်ခံရလိမ့်မည်။

၆ ဤသို့အားဖြင့်အချိန်တန်လာလတ္တံ့သောအခါ၊ သူတို့၌ မိုးသီးကိုကျစေ၍၊ ထိခိုက်လိမ့်မည်။ အရှေ့လေအားဖြင့် တိုက်ခိုက်ခြင်းကိုလည်း သူတို့ခံရလိမ့်မည်။ ပိုးမွှားများသည်လည်း သူတို့ပြည်ကို နှောင့်ယှက်၍၊ သူတို့စပါးများကို ကိုက်စားကြလိမ့်မည်။

၇ သူတို့သည် ကြီးစွာသောကာလနာဘေးဖြင့် ဒဏ်ခတ်ခံရလိမ့်မည်—ထို့အတူ၊ ခပ်သိမ်းသောဤအရာတို့ကို ငါပြုမည်ကား၊ သူတို့၏ဒုစရိုက်များနှင့် စက်ဆုပ်ရွံရှာဖွယ်အမှုများကြောင့်ပေတည်း။

၈ ဤသို့အားဖြင့်အချိန်တန်လာလတ္တံ့သောအခါ၊ သူတို့နောင်တမရလျှင်၊ ငါသည် သူတို့ကို မြေကြီးမျက်နှာပြင်မှ ရှင်းရှင်းဖျက်ဆီးတော်မူမည်။ သို့သော်လည်း၊ သူတို့နောက်၌ မှတ်တမ်းတစ်ခုကို သူတို့ချန်ထားလိမ့်မည်။ ပြည်ကို ပိုင်ဆိုင်မည့် အခြားသောလူမျိုးတို့ အတွက် ထိုအရာတို့ကို ငါထိန်းသိမ်းစောင့်ရှောက်ထားမည်။ ထိုမှတစ်ပါး၊ ဤအရာကို ငါပြုဦးမည်မှာ၊ ဤလူတို့၏စက်ဆုပ်ရွံရှာဖွယ်အမှုများကို အခြားသောလူမျိုးတို့အား ဖော်ပြနိုင်ခြင်းငှာပေတည်းဟု မိန့်တော်မူ၏။ များစွာသောအရာတို့ကိုလည်း အဘိနဒိက ဤလူတို့ကို ဆန့်ကျင်ပြီး ပရောဖက်ပြု၍ဟော၏။

၉ ဤသို့အားဖြင့်အချိန်တန်လာသောအခါ၊ သူတို့သည် အဘိနဒိကို အမျက်ထွက်၍၊ ဆောင်ယူသွားကြပြီး၊ မင်းကြီး၏ရှေ့၌ ချည်နှောင်ထား၍၊ မင်းကြီးကို လျှောက်ကြလေသည်ကား၊ ရှုလော့၊ ကိုယ်တော်၏လူတို့နှင့်စပ်လျဉ်းပြီး၊ မကောင်းသောအရာကို ပရောဖက်ပြု၍ဟောလျက်၊ သူတို့ကို ဘုရားသခင်ဖျက်ဆီးတော်မူမည့်အကြောင်း ပြောသည့်သူကို ကိုယ်တော်ရှေ့သို့ အကျွန်ုပ်တို့ဆောင်ယူခဲ့ပါပြီ။

၁၀ သူသည် ကိုယ်တော်၏ဘဝနှင့်စပ်လျဉ်း၍၊ မကောင်းသောအရာကိုလည်း ပရောဖက်ပြု၍ဟော၏။ ကိုယ်တော်၏ဘဝသည် မီးပြင်းဖိုထဲက အဝတ်တန်ဆာတစ်ခုကဲ့သို့ ဖြစ်လိမ့်မည်ကိုလည်း ပြော၏။

၁၁ ထိုမှတစ်ဖန်၊ ကိုယ်တော်သည် စပါးပင်ကဲ့သို့၊ သားရဲတို့အထက်မှပြေးသွားခြင်းကို ခံရသည့်လယ်ကွင်းထဲမှ စပါးပင်အခြောက်ကဲ့သို့ပင် ခြေဖြင့်နင်းချေခံရမည်ဟုလည်း သူဆို၏။

၁၂ ထိုမှတစ်ဖန်၊ ကိုယ်တော်သည် လေတိုက်လျှင်၊ ဆူးပင်၏လုံးလုံးရင့်ရော်သောအပွင့်များ မြေမျက်နှာပြင်ပေါ်၌ လွင့်ပါသွားသကဲ့သို့ ဖြစ်လိမ့်မည်ဟု သူဆို၏။ ထိုအရာကို ကိုယ်တော်ရှင်ပြောလေသယောင် သူဟန်ဆောင်၏။ ကိုယ်တော်နောင်တမရလျှင်၊ ဤအရာခပ်သိမ်းတို့ ကိုယ်တော်အပေါ် ကျရောက်လာ၍၊ ဤအမှုသည်ကား၊ ကိုယ်တော်၏ဒုစုရိုက်များကြောင့်ဖြစ်ကြောင်းကိုလည်း သူဆို၏။

၁၃ ယခုမူကား၊ အို အရှင်မင်းကြီး၊ ကိုယ်တော်သည် အဘယ်ကြီးစွာသော မကောင်းမှုကို ပြုလေ၍၊ သို့မဟုတ်၊ ကိုယ်တော်၏လူတို့သည် အဘယ်ကြီးစွာသော အပြစ်များကို ကျူးလွန်၍၊ အကျွန်ုပ်တို့သည် ဘုရားသခင်၏ ပြစ်ဒဏ်ချမှတ်တော်မူခြင်းကို ခံရကြ၊ သို့မဟုတ်၊ ဤလူ၏ ပြစ်တင်ရှုတ်ချခြင်းကို ခံရကြမည်နည်း။

၁၄ ယခုမူကား၊ အို အရှင်မင်းကြီး၊ ရှုလော့၊ အကျွန်ုပ်တို့သည် အပြစ်ကင်းပါ၏။ အရှင်မင်းကြီးသည်လည်း အပြစ်မပြုလေခဲ့။ ထို့ကြောင့်၊ ဤလူသည် ကိုယ်တော်အကြောင်းကို မုသားပြော၍ အချည်းနှီးပရောဖက်ပြု၍ ဟောလေပြီ။

၁၅ ရှုဦးလော့၊ အကျွန်ုပ်တို့သည် အားကြီး၍၊ ကျွန်ပြုခြင်းထဲသို့ မရောက်ရ၊ သို့မဟုတ်၊ အကျွန်ုပ်တို့၏ ရန်သူများအားဖြင့်၊ ဖမ်းဆီးချုပ်နှောင် မခံရ။ ထိုမှတစ်ပါး၊ ကိုယ်တော်သည် ထိုပြည်၌၊ အောင်မြင်လေပြီ။ ထပ်၍လည်း အောင်မြင်ပေဦးမည်။

၁၆ ရှုလော့၊ သည်မှာ ထိုလူရောက်ပါပြီ။ အကျွန်ုပ်တို့သည် သူ့ကို ကိုယ်တော်လက်သို့ အပ်ပါ၏။ ကိုယ်တော်ကောင်းမြတ်သည်ဟု မှတ်ယူသည့်အတိုင်း ပြုနိုင်ပါ၏။

၁၇ ဤသို့အားဖြင့်အချိန်တန်လာသောအခါ၊ နောဧမင်းကြီးသည် အဘိနဒိကို ထောင်ထဲ၌ လှောင်ထားစေ၏။ သူ့ကို အဘယ်ကဲ့သို့ ပြုရမည့်အကြောင်း တိုင်ပင်နိုင်ခြင်းငှာ၊ ယဇ်ပုရောဟိတ်တို့အား သူတို့ကိုယ်သူတို့ အတူတကွစုဝေးရမည့်အကြောင်းကိုလည်း အမိန့်ပေး၏။

၁၈ ဤသို့အားဖြင့်အချိန်တန်လာသောအခါ၊ ထိုယဇ်ပုရောဟိတ်တို့က ငါတို့ သူ့ကိုမေးမြန်းနိုင်ရန်၊ ဤနေရာသို့ ဆောင်ယူခဲ့လော့ဟု မင်းကြီးကို ဆိုလျှင်၊ သူတို့ရှေ့သို့ ဆောင်ယူခဲ့စေရန် မင်းကြီးက အမိန့်ပေး၏။

၁၉ သူတို့သည် အဘိနဒိအား သူ့ကိုယ်ကို ဆန့်ကျင်ယုံမှားသံသယခြင်းရှိစေခြင်းငှာ၊ ထိုနည်းအားဖြင့် စွပ်စွဲကြခြင်းငှာ မေးမြန်းစပြုကြ၏။ သို့ရာတွင်၊ သူသည် ရဲရင့်စွာဖြေ၏။ သူတို့၏မေးခွန်းမှန်သမျှကိုလည်း ငြင်းဆို၍၊ သူတို့အမှန်ပင် အံ့ဩကြလေ၏။ အကြောင်းမူကား၊ သူတို့၏မေးခွန်းမှန်သမျှကို ငြင်းဆို၏။ သူတို့၏စကားမှန်သမျှတို့ကိုလည်း ချေပ၏။

၂၀ ဤသို့အားဖြင့်အချိန်တန်လာသောအခါ၊ ထိုသူတို့အထဲမှတစ်ဦးက သူ့ကို ဆင့်ဆိုလေသည်မှာ၊ ရေးထားသောစကားများ၊ ငါတို့ဘိုးဘေးတို့သွန်သင်ခဲ့သော စကားများသည် အဘယ်သို့ဆိုလိုသနည်း၊ ထိုစကားများသည်ကား၊

၂၁ ဝမ်းမြောက်စရာသတင်းကို ဆောင်ယူလာသောသူ၊ ငြိမ်းချမ်းခြင်းကို ပြောကြားသောသူ၊ ကောင်းမြတ်ခြင်း၏ ဝမ်းမြောက်စရာသတင်းကို ဆောင်ယူလာသောသူ၊ ကယ်တင်ခြင်းကို ပြောကြားသောသူ၊ သင်၏ဘုရားသခင် စိုးစံတော်မူ၏ဟု ဇိအုန်မြို့ကို ပြောသောသူ၏ ခြေတို့သည်ကား၊ တောင်ပေါ်မှာ အလွန်တင့်တယ်လှပေစွတကား။

၂၂ သင်၏ကင်းစောင့်တို့သည် ကြွေးကြော်ကြ၍၊ တညီတညွတ်တည်းသောအသံဖြင့်၊ သီဆိုကြလိမ့်မည်။ အကြောင်းမူကား၊ ကိုယ်တော်ရှင်က ဇိအုန်မြို့ကို ပြန်လည်တည်ရှိစေတော်မူသောအခါ သူတို့သည် ကိုယ်တိုင်မြင်ရလိမ့်မည်။

၂၃ ဝမ်းမြောက်စွာ ကြွေးကြော်ကြလော့၊ အတူတကွ သီချင်းဆိုကြလော့၊ ယေရုရှလင်ရှိ ပြိုပျက်ရာအရပ်တို့။ အကြောင်းမူကား၊ ကိုယ်တော်ရှင်သည် မိမိလူမျိုးတို့ကို နှစ်သိမ့်စေတော်မူလေပြီ၊ ယေရုရှလင်ကို ရွေးနှုတ်တော်မူလေပြီ။

၂၄ ကိုယ်တော်ရှင်သည် သူ၏သန့်ရှင်းသောလက်တော်ကို ခပ်သိမ်းသော ပြည်သားတို့ရှေ့၌ ဖွင့်ပြထားတော်မူ၏။ မြေကြီးစွန်းသားခပ်သိမ်းတို့သည်လည်း ငါတို့ဘုရားသခင်၏ ကယ်တင်ခြင်းကို မြင်ရလိမ့်မည်။

၂၅ ယခုမူကား၊ အဘိနဒိက သူတို့ကို ဆိုလေသည်မှာ၊ အသင်ယဇ်ပုရောဟိတ်တို့သည် ဤလူတို့ကို သွန်သင်ပေးခြင်းငှာနှင့် ပရောဖက်ပြု၍ဟောခြင်းဝိညာဉ်ကို နားလည်ခြင်းငှာ ဟန်ဆောင်ကြသော်လည်း၊ ဤအရာများအဘယ်သို့ ဆိုလိုသည်ကို ငါ့ထံမှ သိလိုကြသလော။

၂၆ သင်တို့ကို ငါဆိုသည်ကား၊ ကိုယ်တော်ရှင်၏လမ်းစဉ်များကို မှောက်လှန်ကြသောကြောင့် သင်တို့သည် အမင်္ဂလာရှိ၏။ အကြောင်းမူကား၊ သင်တို့သည် ဤအရာများကို နားလည်ကြသော်လည်း သွန်သင်မပေးလေကြ။ ထိုကြောင့်၊ သင်တို့သည် ကိုယ်တော်ရှင်၏လမ်းစဉ်များကို မှောက်လှန်ကြလေပြီ။

၂၇ သင်တို့သည် သင်တို့၏စိတ်နှလုံးကို နားလည်ခြင်းသို့ မပေးဆပ်ကြ။ ထို့ကြောင့်၊ ဉာဏ်ပညာမရှိလေကြ။ ထို့ကြောင့်၊ သင်တို့သည် ဤလူတို့အား အဘယ်အရာကို သွန်သင်ကြသနည်း။

၂၈ သူတို့ကလည်း၊ ငါတို့သည် မောရှေ၏ပညတ်တရားကို သွန်သင်၏ဟု ဆိုကြ၏။

၂၉ ထိုမှတစ်ဖန်၊ သူဆိုလေသည်ကား၊ သင်တို့သည် မောရှေ၏ပညတ်တရားကို သွင်သင်ပေးကြလျှင်၊ အဘယ်ကြောင့် ထိုပညတ်တရားကို မစောင့်ထိန်းကြသနည်း။ သင်တို့သည် အဘယ်ကြောင့် သင်တို့စိတ်နှလုံးကို စည်းစိမ်ဥစ္စာများအပေါ်၌ ထားကြလေသနည်း။ သင်တို့သည် အဘယ်ကြောင့် မတရားသောမေထုန်အမှုများကို ကျူးလွန်၍၊ ပြည့်တန်ဆာများနှင့် သင်တို့၏အင်အားကို ဖြုန်တီး၍၊ ထိုမှတစ်ပါး၊ ဤလူတို့ကို အပြစ်ကျူးလွန်စေကြသနည်း။ သို့ဖြစ်၍၊ ဤလူတို့တစ်ဖက်၌ ကြီးစွာသောမကောင်းမှုကိုပင် ပရောဖက်ပြုဟောစေခြင်းငှာ၊ ကိုယ်တော်ရှင်က ငါ့ကို စေလွှတ်ခဲ့ပေပြီ။

၃၀ သင်တို့သည် ငါသမ္မာတရားကို ပြောကြောင်း သိခြင်းမရှိကြသလော။ ဟုတ်ပေ၏။ သင်တို့သည် ငါသမ္မာတရားကို ပြောကြောင်း သိကြ၏။ သင်တို့သည် ဘုရားသခင်ရှေ့၌ တုန်လိမ့်မည်။

၃၁ ဤသို့အားဖြင့်အချိန်တန်လာလတ္တံ့သောအခါ၊ သင်တို့၏ဒုစရိုက်များကြောင့် ဒဏ်ခတ်တော်မူခြင်းကို ခံရကြလိမ့်မည်။ အကြောင်းမူကား၊ သင်တို့သည် မောရှေ၏ပညတ်တရားကို သွန်သင်ပေးကြောင်း ပြောကြလေပြီ။ မောရှေ၏ပညတ်တရားနှင့်စပ်လျဉ်း၍လည်း အဘယ်အရာကို သင်တို့သိသနည်း။ ကယ်တင်ခြင်းသည် မောရှေ၏ပညတ်တရားအားဖြင့် ရောက်လာသလော။ အဘယ်အရာကို သင်တို့ပြောသနည်း။

၃၂ ကယ်တင်ခြင်းသည် မောရှေ၏ပညတ်တရားအားဖြင့် ရောက်လာကြောင်း သူတို့ဖြေ၏။

၃၃ သို့ရာတွင်၊ ယခုမူကား၊ အဘိနဒိဆိုသည်မှာ၊ သင်တို့သည် ဘုရားသခင်၏ပညတ်တော်များကို စောင့်ထိန်းကြလျှင်၊ ကယ်တင်ခြင်းသို့ ရောက်ကြမည်ကို ငါသိ၏။ အထူးသဖြင့်၊ သိနာတောင်ပေါ်၌ မောရှေအား ကိုယ်တော်ရှင်ဟောတော်မူခဲ့သည့်ပညတ်တော်တို့ကို သင်တို့စောင့်ထိန်းကြလျှင်၊ မိန့်တော်မူလေသည်မှာ၊

၃၄ ငါသည်ကား၊ သင့်ကို အဲဂုတ္တုပြည်မှဝေးရာသို့၊ ကျွန်ခံရာမှဝေးရာသို့ ဆောင်ယူတော်မူခဲ့လေသော သင်၏ဘုရားသခင်ကိုယ်တော်ရှင်ဖြစ်၏။

၃၅ သင်သည် ငါမှတစ်ပါး အခြားသောဘုရားသခင်ကို မကိုးကွယ်နှင့်။

၃၆ အထက်ကောင်းကင်၌လည်းကောင်း၊ အောက်အရပ်မြေကြီးပေါ်၌လည်းကောင်း ရှိသောအရာနှင့် ပုံသဏ္ဌာန်တူအောင် ရုပ်တုဆင်းတုကို ကိုယ့်အဖို့ မလုပ်နှင့်။

၃၇ ယခုတွင်၊ အဘိနဒိက ဆိုလေသည်ကား၊ သင်တို့သည် ဤအရာခပ်သိမ်းတို့ကို ပြုလေကြပြီလော။ မဟုတ်ပေဟု သင်တို့ကို ငါဆို၏။ သင်တို့မပြုလေကြ။ ဤလူတို့အား ခပ်သိမ်းသော ဤအရာတို့ကို ပြုစေခြင်းငှာ သင်တို့သွန်သင်ပေးလေကြပြီလော။ မဟုတ်ပေဟု ငါဆို၏။ သင်တို့မသွန်သင်လေကြ။