Katak Im Bujen Ko

1 Eo̧ron̄, O kom armej in Kabun̄ eo Aō, ainikien eo An eo ej jokwe ijo eutiej Ej ba, im eo mejān rej ioon armej otemjej; aaet, em̧ool Ij ba: Kom̧in ron̄jake kom̧ armej raņ jān ettoļo̧k; im kom̧ ro rej pād ioon aelōn̄ ko in lo̧meto, ron̄jake ippān doon.

2 Bwe em̧ool ainikien Irooj ej n̄an armej otemjej, im ejjeļo̧k enaaj ko; im ejjeļo̧k māj ejamin naaj loe, im ejjeļo̧k lo̧jiln̄i ejamin naaj ron̄, im ejjeļo̧k bōro naaj jab deili.

3 Im naaj wākar rijum̧ae kōn eļap būrom̧ōj; bwe nana ko aer naaj kōnono kaki ioon bōrwaj ko, im jerbal ittino ko aer naaj kwaļo̧ki.

4 Im ainikien kakkōl naaj n̄an armej otemjej, jān lo̧n̄iin ro rikaļoora, ro Iaar kāālet ilo raan kein āliktata.

5 Im renaaj wōnm̧aanļo̧k im ejjeļo̧k enaaj kapan̄ er, bwe N̄a Irooj Iaar jiron̄ er.

6 Lo, en̄in ej Aō maron̄, im maron̄ eo an ro karejera, im ennaan eo im̧aan in bok in kien ko Aō, eo Iaar leļo̧k n̄an er n̄an likūt ilo bok n̄an kom̧, o kom̧ ro rej pād ilaļ.

7 Kōn menin, kom̧in mijak im wūdiddid, o kom̧ armej, bwe ta N̄a Irooj Iaar kean̄ ilo er naaj kūrm̧ool.

8 Im em̧ool Ij ba n̄an kom̧, bwe ro rej wōnm̧aanļo̧k, tilmaaki ennaan kein n̄an ro rej pād ioon laļ, n̄an er em̧ōj leļo̧k kajoor n̄an liāpe jim̧or ioon laļ im ilo lan̄, ro rej jab tōmak im rijum̧ae;

9 Aaet, em̧ool, n̄an liāpe er n̄an raan eo n̄e illu an Anij naaj lutōkleplep ioon ro rinana ilo ejjeļo̧k jon̄an—

10 N̄an raan eo n̄e Irooj enaaj itok n̄an ņa wōņāān armej otemjej ekkar n̄an jerbal eo an, im jon̄e n̄an armej otemjej ekkar n̄an jon̄an eo eaar leļo̧k n̄an armej ro iturin.

11 Kōn menin ainikien Irooj ej n̄an jem̧ļo̧k ko in laļ, bwe aolep ro renaaj ron̄ ren maron̄ ron̄:

12 Kom̧in pojak, kom̧in pojak n̄an men eo ej itok, bwe Irooj epaaktok;

13 Im illu an Irooj ej urur, im An jāje etutu ilo lan̄, im enaaj wōtlo̧k ioon ro rej pād ioon laļ.

14 Im pein Irooj naaj waļo̧k; im raan eo ej itok n̄e ro reban ron̄ ainikien Irooj, ak ainikien ro rikarejeran, im jab eo̧ron̄ naan ko an rikanaan ro im rijjilōk ro, naaj bukweļo̧k er jān ilubwiljin armej ro;

15 Bwe rekar jebwābweļo̧k jān kain̄i ko Aō, im kar rupe bujen eo ejjeļo̧k jem̧ļo̧kin Aō;

16 Rej jab pukot Irooj n̄an kajutak an wānōk, ak armej otemjej ej etetal ilo iaļ eo an make, im ilo̧kan nememen anij eo an make, nememe eo ej āinwōt eo an laļ, im eo kobban ej eo an ekjab, eo ej bwijwoļā ļo̧k im naaj jako ilo Babilon, em̧ool Babilon eļap, eo enaaj jeepepļo̧k.

17 Kōn menin, N̄a Irooj, kōn Aō jeļā kōn ko̧kkure eo enaaj itok ioon ro rej pād ioon laļ, Iaar kūr rikarejera Josep Smith, Jun., im kar kōnono n̄an e jān lan̄, im kar leļo̧k n̄an e kien ko;

18 Im barāinwōt kar liļo̧k kien ko n̄an bar ro jet, bwe ren maron̄ kabun̄bun̄ļo̧k men kein n̄an laļ in; im aolep men in bwe en maron̄ kūrm̧ool, men eo kar jeje jān rikanaan ro—

19 Men ko rem̧ōjņo̧ an laļ naaj waļo̧ktok im ruprupe ro rellāj im kajoor, bwe armej en jab pepe ippān armej eo m̧ōttan, im jab lōke pein kanniōk—

20 A bwe armej otemjej en maron̄ ekkōnono ilo etan Anij Irooj, em̧ool Rilo̧mo̧o̧r eo an laļ;

21 Bwe tōmak barāinwōt en maron̄ ļapļo̧k ilo laļ;

22 Bwe bujen eo Aō ejjeļo̧k jem̧ļo̧kin en maron̄ jutak;

23 Bwe tarlep in gospel eo Aō maron̄ in kean̄ kake jān ro rem̧ōjņo̧ im ļam waan n̄an jem̧ļo̧k ko an laļ, im im̧aan kiin̄ raņ im ripepe raņ.

24 Lo, N̄a Anij im Iaar kōnono men in; kien kein rej jān N̄a, im kar liļo̧k n̄an ro rikarejera ilo aer m̧ōjņo̧, ilo̧kan jekjek im kajin eo aer, bwe ren maron̄ itok n̄an meļeļe.

25 Im jon̄an wōt aer bōd en maron̄ alikkar;

26 Im jon̄an wōt aer pukot mālōtlōt ren maron̄ bōk naan in tōl;

27 Im jon̄an wōt aer jero̧wiwi ren maron̄ bōk kauwe, bwe ren maron̄ ukeļo̧k;

28 Im jon̄an wōt aer kar ettā ren maron̄ in kajoor, im jeraam̧m̧an jān ijo ilan̄, im bōk jeļāļo̧kjeņ jān iien n̄an iien.

29 Im ālikin aer kar bōk ļo̧o̧k eo an riNipai ro, aaet, em̧ool rikarejera Josep Smith, Jun., eaar maron̄ wōr an kajoor n̄an ukok kōn tūriam̧o eo an Anij, jān kajoor eo an Anij, Bok in Mormon eo.

30 Im barāinwōt ro n̄an er kar liļo̧k kien kein, en wōr aer kajoor n̄an kalōk pedped eo an kabun̄ in, im n̄an bōktok jān ņojak im jān marok jilōn̄lōn̄, kabun̄ eo wōt em̧ool im emour ioon mejān laļ, eo kōn e N̄a, Irooj, ebun̄-buruō, Ij kōnono n̄an kabun̄ āinwōt juon wōt im jab kajjojo—

31 Bwe N̄a Irooj ijjab maron̄ kalimejek jabdewōt jero̧wiwi n̄an jidik;

32 Mekarta, eo ej ukeļo̧k im kōjparoki kien ko an Irooj naaj jeorļo̧k an bōd;

33 Im e eo ej jab ukeļo̧k, jān e naaj bōk em̧ool meram eo e ar bōk e; bwe Jetōb eo Aō ejamin pād iien otemjej ippān armej, Irooj in Inelep eo ej ba.

34 Im bar juon alen, em̧ool Ij ba n̄an kom̧, o kom̧ ro rej pād ioon laļ: N̄a Irooj ij m̧ōņōņō in kwaļo̧ki men kein n̄an kanniōk otemjej;

35 Bwe N̄a ejjeļo̧k Aō kalijekļo̧k, im I kōņaan bwe aolep armej ren jeļā ke raan eo em̧ōkaj an itok; awa eo ejjan̄in kiiō, ak epaaktok, n̄e aenōm̧m̧an naaj bōke jān laļ, im devil e naaj wōr an kajoor ioon mo̧jen eo an make.

36 Im barāinwōt Irooj enaaj wōr an kajoor ioon ro rekwōjarjar An, im naaj irooj ilubwiljier, im naaj wanlaļtak ilo ekajet ioon Aidumia, ak laļ in.

37 Lin̄ōri kien kein, bwe rem̧ool im tiljek, im kanaan ko im kallim̧ur ko ie renaaj aolep kūrm̧ool.

38 Ta eo N̄a Irooj ar ba, I ar ba, im Ijjab jekpen n̄an Eō make; im men̄e lan̄ ko im laļ rej jako, Aō naan ej jamin naaj jako, ak enaaj aolep kūrm̧ool, mekarta jān Ainikiō make ak jān ainikien ro rikarejera, ej āinwōt juon.

39 Bwe lo, im lo, Irooj ej Anij, im Jetōb ej kam̧ool kake, im ļo̧o̧k eo ej m̧ool, im m̧ool eo ej pād indeeo im indeeo. Amen.