Mwakoro 38
Kaotioti ae kaotaki rinanon Iotebwa Timiti te Burabeti, i Fayette, New York, n Tianuare 2, 1831. Te tai anne bon te maungatabu n te Ekaretia.
1–6, E kariki bwai ni kabane Kristo; 7–8, E mena i buakoia Ana Aomata aika Itiaki, ake a nang nooria; 9–12, A bane ni buakaka iriko i matana; 13–22, E a tia ni kawakina te aba ni berita ibukiia ana aomata aika itiaki n te tai aei ao te tai ae akea tokina; 23–27, A tuangaki Aomata aika Itiaki bwa a na katiteuanaaki ao n araniia i marenaia nako bwa taari; 28–29, A kaman taekinaki taian buaka; 30–33, A na anganaki Aomata aika Itiaki te mwaaka mai eta ao bwa a na waaki nako i buakoia botanaomata ni kabane; 34–42, E tuangaki te Ekaretia bwa e na tararuaia ake a kainnano ao ake akea aia bwai ao n ukoukori kaubwai ake akea tokiia.
1 E taku te Uea ae Atuam, ae Iesu Kristo, ae Korakora ae Ngai, te Arebwa ao te Omeka, te moan ao te kabane, are ngaia ae taraa te tai ae akea tokina ae raababa mani mwawawa, ao ni kabane kaaini karawa aika terabim, i mwaaini karikan te aonaba;
2 Are ngaia are e atai bwaai ni kabane, bwa a kaoti bwaai ni kabane i matau;
3 Boni Ngai are e taetae, ao e karaoaki te aonaba, ao a roko bwaai ni kabane mai irou.
4 Bon Ngai are I anaa ana Tion Enoka nakon bwanibwaniu; ao e koaua, ae I taekinna, bwa ni kabane naake a tia ni kakoaua arau, bwa Ngai Kristo, ao n oin arau, I a tia ni bubuti imatan te Tama ibukiia n raoiroin te raraa are I a tia ni kabwaroa.
5 Ma nooria, nikiraia naake a buakaka are I a tia ni kawakiniia n taurekereken te roo ni karokoa te motikitaeka n te bong ae kakannato, are e na roko n tokin te aonaba;
6 Ao N na tua bwa a na kawakinaki naake a buakaka, ake aki kan ongo bwanaau ma a kamatoai nanoia, ao te reke ni kai, te reke ni kai, te reke ni kai, bon motikan taekaia.
7 Ma nooria, e koaua, e koaua, ae I tuangkami bwa e mena matau i aomi. I mena i buakomi ao kam aki noorai;
8 Ma e a kan roko te bong are kam na noorai iai, ao n ataia bwa I boni maiu; bwa e nang raeuakaki te rabuna ae te roo, ao ane e aki kaitiakaki e na bon aki kona moan te bong anne.
9 Mangaia are, kabaea nukami ao bwaina te tatauraoi. Nooria, ami bwai te abanuea, ao a na aki tokanikai am kairiribai.
10 E koaua ae I tuangkami, kam a itiaki, ma tiaki ni kabane; ao akea riki ae I rang kukurei irouna;
11 Bwa a bane ni buakaka iriko imatau; ao e butanako mwaakan te roo i aon te aonaba, i buakoia natiia aomata, imataia kaain karawa ni kabane—
12 Are e karikia bwa e na taonaki n te mabu, ao a bane ae akea tokiia ni karawawataaki, ao anera a taningaa te taeka ae korakora bwa a na taia te aonaba, ni ikotii titania bwa aonga ni kabuekaki; ao, nooria, a ikotaki ami kairiribai.
13 Ao ngkai N na kaota nakoimi te bwai ae raba, te bwai ae e mena n te ruu ae raba, ni kakaroa bukin kamaunaakimii n te tai teuana, ao kam aki ataia;
14 Ma ngkai N na tuangkami, ao kam a kakabwaiaaki, tiaki ibukin ami buakaka, ke nanomi n aki kakoaua; bwa e koaua ae tabeman i buakomi a tia ni karaoa ae bure imatau, ma N na nanoanga ibukin mamaarami.
15 Ngaia are, kakorakoraingkami man te tai aei; tai maaku, bwa ami bwai te abanuea.
16 Ao ibukin kamaiuakimi N na anganingkami te tua, bwa I a tia n ongo ami tataro, ao a ngurengure naake a kainnano nakoiu, ao I karikiia kaubwai, ao au bwai iriko ni kabane, ao Ngai akea te inanonano irou nakoia aomata.
17 Ao I a tia ni karika te aonaba bwa e na kaubwai, ao nooria bon nnen waeu, mangaia are, N na manga bon tei i aona.
18 Ao I kaotia ao I kukurei n anga nakoimi kaubwai aika korakora riki, n te aba ni berita naba, te aba ae raanga iai te rannimamma ma ana karewe te manibeeru, are i aona e na bon akea te maraia ngkana e roko te Uea;
19 Ao N na anganingkami bwa abami ni bwaibwai, ngkana kam ukoukoria ma nanomi ni kabane.
20 Ao e na riki aio bwa au berita ae tabu ma ngkami, kam na taua bwa abami ni bwaibwai, ao ibukin abaia ni bwaibwai natimi n aki toki, ngkai e teimatoa te aonaba, ao kam na bwainna naba n te tai ae akea tokina, n aki kona ni manga bua.
21 Ma, e koaua ae I tuangkami bwa n taai aika a na roko a na akea ami uea ke te tia tautaeka bwa N na riki bwa ami uea ao n tarataraingkami.
22 Mangaia are, ongo bwanaau ao irai, ao kam na riki bwa aomata aika inaomata, ao a na akea ami tua bwa tii au tua ngkana I roko, bwa Ngai ami tia anga tua, ao tera ae na kona n tuka baiu?
23 Ma, e koaua ae I tuangkami, reirei imarenami ni kaineti ma te nakoa are I a tia n rineingkami nako iai;
24 Ao aomata ni kabane e na iangoa tarina n ai arona i bon irouna, ao ni karaoa ae raoiroi ao ae tabu imatau.
25 Ao I a manga tuangkami, bwa a riai aomata ni kabane n iangoia tariia n ai arona i bon irouna.
26 Bwa antai te aomata i buakomi ae tengaun ma uoman natina, ao akea te inanonano ibukia, ao a beku irouna ma te ongeaba, ao e taku nakon temanna: Ko na kunnikaiaki ni kunikai aika tamaroa ao tekateka ikai; ao nakon are temanna: Ko na kunnikaiaki ni kunnikai aika mane ao tekateka ikekei—ao e taraia natina ao n taku I moti raoi?
27 Nooria, I anganingkami aio bwa ai aron te taetae ni kaikonaki, ao ai bon arou naba Ngai. I tuangkami, katiteuanaaki; ao ngkana kam aki katiteuanaaki tiaki au bwai ngkami.
28 Ao I a manga tuangkami bwa a ukoukora maiumi ami kairiribai ake a mena i nanon ruu aika raba.
29 Kam ongo taekan taian buaka n aaba aika a raroa, ao ko taku bwa e nang boo te buaka ae korakora n aaba aika a raroa, ma kam aki ataa nanoia aomata n oin abami.
30 I tuangkami bwaai aikai ibukin ami tataro; ngaia are, kawakina te wanawana inanomi, bwa mwiina a kaotaki bwaai aikai nakoimi man aia buakaka aomata, n te aro are e taetae i taningam ma te bwanaa ae takarua riki nakon anne are e na ioioa te aonaba; ma ngkana ko tauraoi ao ko na aki maaku.
31 Ao bwa kam aonga n totokoa mwaakan ami kairiribai, ao ni ikoikotaki nakoiu n aroia aomata aika raoiroi, n akea barekami ao kabuakakakimi—
32 Mangaia are, ibukin aio I anganingkami te tua bwa kam na nako Ohio; ao ikekei N na anganingkami au tua; ao ikekei kam na anganaki te mwaaka mai eta;
33 Ao mai ikanne, ane I kantaningaia bwa e na nako buakoia botanaomata ni kabane, a na bon tuangaki bwa tera ae a na karaoia; bwa iai au mwakuri ae korakora ae e a tia ni kaikoaki, bwa e na kamaiuaki Iteraera, ao N na kairiia nakon are I taku, ao akea te mwaaka ae na kona n tuka baiu.
34 Ao ngkai, I anga te tua nakon te ekaretia n te mwakoro aei, bwa a rineaki tabeman mwaane mai i buakoia, ao a na rineaki man bwanaan te ekaretia;
35 Ao a na tararuaia naake akea aia bwai ma kainnano, ao ni karaoa te ibuobuoki ibukin kabebeteaia bwa aonga n aki kainnano; ao ni kanakoia nakon taabo ake I a tia n tuangiia;
36 Ao aio aia mwakuri, bwa a na bairea aron ana bwai te ekaretia aio.
37 Ao naake iai aia nne ni man ao n aroka ae e aki kona ni kabooaki nako, a na katukui ke ni kaboaki kabonganana n aron noran raoiroina.
38 Taraia bwa a na kawakinaki bwaai ni kabane; ao ngkana a anganki mwaane te mwaaka mai i eta ao ni kanakoaki, a na ikotaki bwai ni kabane aikai nako nanon te ekaretia.
39 Ao ngkana kam ukoukora te kaubwai are ana kantaninga te Tama bwa E na anganingkami, kam na riki ni kaubwai nakoia aomata ni kabane, bwa kam na karekei kaubwai ae akea tokiia; ao e riai bwa au bwai n anga kaubwain te aonaba; ma tarataraingkami man te kamoamoa, bwa kam kaawa n riki n aroia Nibwaite ake ngkoa.
40 Ao I a manga tuangkami, I anganingkami te tua, bwa mwaane ni kabane, te unimwaane, te ibonga, te tia reirei, ao kaain naba te ekaretia, a na nako ma korakoraia, ma mwakurin baia, ni katauraoa ao ni kakoroa bukin bwaai ake I a tia n tuangiia.
41 Ao e na riki tataetaemi n tatabeman nako bwa te bwanaa ni kauring, ae beebete ao e nimamannei nakoia kaain rarikim.
42 Ao naako mai i buakoia ake a buakaka. Kamaiuingkami. Kam na itiaki ngkami aika kam uouoti ana bwai ni mwakuri te Uea. Eng. Amen.