Hom mmee wɔ Christ n’Asɛm mu.
Eremee wɔ Christ n’asɛm mu no botum esi mber biara na wɔ gyinabew biara mu, sɛ yesiesie hɛn akoma a.
Hɛn Ɔsor Egya dɔ hɛn. Ɔayɛ nhyehyɛɛ a odzi mu ama hɛn ma yeedzi Ne nhyira mu dɛw. Abrabɔ yi mu no, wɔato nsa afrɛ hɛn nyina dɛ yɛmbra Christ hɔ na yendua enuma, yɛregye Sunsum Krɔnkrɔn n’akyɛdze, na yɛdze asɛmpa no robɔ bra nokwar mu do nya Jesus Christ n’asɛmpa no a wɔdze asan ananmu no. Nephi kã hɛn pisi dɛ wobonuma hɛn ho asɛm dɛ yɛrehɛn “kwan tseaba a ɔyɛ heaheaba,’’ no mu na ɔkaa hɛn dɛ yɛnkɔ do “mper nkɔ kan [n]gyina pintsinn wɔ Christ mu, … na [yɛ]mmee wɔ Christ n’asɛm mu, na [yen]tsim [n]kodu ewiei,’’ ama [ye]enya nhyira nyina a Ɔsor Egya esiesie ama hɛn no.(2 Nephi 31:19–20).
Nephi kɔdo kaa hɛn dɛ sɛ “[yɛbɛ]mee wɔ Christ n’asɛm mu a,’’ “wɔbɛkã ndzɛmba nyina a ɔsɛ dɛ [yɛyɛ] akyerɛ [hɛn]’’ (2 Nephi 32:3) na wɔbɛma hɛn tum ma yɛdze edzi “abɔnsam n’egyen menanba no do konyim’’ (1 Nephi 15:24).
Ebɛnadze nye Mmee?
Mber a nna mo suar no, nna modwen dɛ eremee ara nye iridzi emo pii a sushi, na soy sauce kã ho. Afei meehu nokwar mmee no mu dɔ kyɛn dɛ iridzi edziban a ɔyɛ dɛw ara. Ɔyɛ dɛw, edzidzi, enyigye, akyɛdze, yɛrekyerɛ ɔdɔ ama ebusua ebusua na adɔfo, yɛrekyerɛ hɛn ndaase ama Nyankopɔn, na yɛrekyekyer nkitahodzi ber a yeridzi edziban nwanawa pii, sũahu ɔyɛ dɛw,. Megye dzi dɛ sɛ yɛmee wɔ Christ n’asɛm mu a, otwar dɛ yɛdwendwen dɛm sũahu noara ho. Eremee wɔ kyerɛwsɛm no mu nnyɛ erekenkan ara. Ɔwɔ dɛ ɔdze nokwar dɛwdzi brɛ hɛn na yɛnye hɛn Agyenkwa no kyekyer nkitahodzi pa.
Wɔakyerɛkyerɛɛ iyi pefee wɔ Mormon Nwoma no mu. Hom nkaa Lehi n’adaasõ mu a ohun dua bi “a n’eduaba [yɛ] akɔndɔ na obotum so ama nyimpa enyigye.’’ Eduaba yi nye Nyame no dɔ, na ber a Lehi dzii eduaba no, “nna … ɔyɛ dɛw, papanara sen nduaba nyinara a [ɔasɔ] ahwɛ da.’’ Ɔdze “enyigye kɛse bi hyɛɛ [ne] kra mã’’ na ɔyɛ adze bi a ɔpɛ dɛ ɔnye n’ebusua kyɛ (1 Nephi 8:10–12).
Sɛ yɛmee, ma ndaase hyɛ hɛn akoma mu mã a, yɛsan so bohu dɛ edziban kor no anaa no dodow a yɛwɔ no nnhia. Lehi n’ebusua dzii nammon wɔ sar no do, naaso Nephi kãa nsɔhwɛ dzendzen yi ho asɛm, a ɔrekã dɛ, “Na Ewuradze ne nhyira a ɔwɔ hɛn do no yɛɛ kɛse’’ ma “hɛn mbaa … hɔnho yɛɛ dzen’’ na wotumii wowoo mba “a woennhwinhwin’’ (1 Nephi 17:1–2).
Ɔtɔfabi a iridzi na ereyɛ ka mmee ho. Alma kã aba pa a wodua no wɔ hɛn akoma mu ho asɛm. Ber a yɛsɔ hwɛ no, yebohu dɛ aba no hyɛ ase “dɛ ɔyɛ dɛw’’ (hwɛ Alma 32:28–33).
Hom mmee wɔ Christ n’Asɛm mu.
Eremee wɔ Christ n’asɛm mu ho nhyira horow yɛ ndam na ɔsesã abrabɔ so. Nhyira horow tsitsir ebiasa wɔ hɔ a mepɛ dɛ meserɛ dɛ wɔmmfa ndzi dwuma wɔ hom abrabɔ mu.
Odzi Kan, Christ n’asɛm no botum aboa hɛn ma “[hɛn] sunsum mu tum dɛ yenya nyikyerɛ no enyin’’ (Russell M. Nelson, “Revelation for the Church, Revelation for Our Lives,’’ Liahona, Esusow Aketseaba 2018, 96) na ɔakyerɛ hɛn kwan dwudwoodwo wɔ hɛn abrabɔ nyina mu. Alma kyerɛkyerɛ dɛ Christ n’asɛm no nya “tum kɛse bi wɔ nkorɔfo no do ma ogya hɔn ma wɔyɛ [dza] ɔtsen,’’ na onya tum kɛse sen dza “nkrantsee’’botum ayɛ (Alma 31:5). Ber a maahwehwɛ Nyankopɔn ne nyansaa dze asɔw mara me haw no, ber biara a masɔ “Nyame n’asɛm no nokwar (Alma 31:5), no ahwɛ no’’ meenya nkenyan na tum a medze bɔ adwenpɔw, midzi nsɔhwɛ do konyim, na medze gyedzi nkɔdo wɔ Christ mu na ɔdɔ ma hɔn a woetwa moho no ehyira m’abrabɔ. Hɛn nkɔnhyɛnyi, Russell M. Nelson, akyerɛkyerɛ hɛn dɛ “nda a ɔreba mu no yennkotum enya sunsum mu nkwa a Sunsum Krɔnkrɔn ne bambɔ, n’akwankyerɛ, n’awerɛkyekyer, na ne daa daa nhyɛdo nnkã ho’’ (“Revelation for the Church, Revelation for Our Lives,’’ 96). Nyikyerɛ a ohia bɛba ber a yɛsɔ “asɛm no nokwar,’’ no hwɛ na dɛm asɛm no benya tum mbordo asen adzebiara a yebotum asɔ ahwɛ anaa yeesusu.
Otsĩa Ebien, sɛ yɛper dɛ yebohu hɛn nyimpa ban na yemmbu hɛnho enyimtsia a, “Nyankopɔn n’asɛm a ɔyɛ enyigye’’ (Jacob 2:8) wɔ kyerɛwsɛm no mu bɔboa hɛn ma yeehu hɛn nyimpa ban na ɔama hɛn ahoɔdzen a ɔbor hɛnara hɛn do. Mber a ɔyɛ dɛw papaapa mu kor a meenya da nye muhun dɛ meyɛ Nyame ne ba. Me mbasir ber mu no, nna minnyim biribiara fa Agyenkwa ne nkyerɛkyerɛ no ho, Mber a midzii kan kenkanee Ahyɛmu Fofor no, nokwar mu ara Christ n’asɛm no sãa me kra a oepira no yarba. Muhun dɛ mennyɛ ankonam na meyɛ Nyame ne ba. Ber a muhun nyia nokwar meyɛ wɔ Nyankopɔn enyim no, menam Christ no Werdambɔ no mu hun me ndaamba no a ɔmmbɔadze da.
Dɛmara na Enos kãa ɔnoara no sũahu dɛ erodwendwen Christ n’asɛm ho no, adwen mu tsewee a ofi mu ba ho asɛm. Ber a Enos maa nsɛm a n’egya kyerɛkyerɛɛ no a ɔfa “onnyiewiei nkwa, na Ahotseweefo hɔn dɛw ho, [hyɛɛ] [n’akoma] mã,’’ ɔkɔm dzee ne kra; na [obuu] ntwɛr wɔ [ne] Yɛfo enyim … wɔ mpaabɔ a ɔyɛ dzen mu’’ (Enos 1:2–4). Dɛm mpaabɔ mu no, obohun Agyenkwa no na osũaa dɛ yɛsom bo kɛse, wɔdɔ hɛn na yebotum enya hɛn mfomdo ho bɔnfakyɛ, na nokwar ara yɛyɛ Nyankopɔn ne mba.
Otsĩa Ebiasa, yebotum edua Christ n’asɛm do epagya binom hɔn abrabɔ. Dɛ mbrɛ Enos nyaa ɔnoara ne mber na bea a Christ n’asɛm no kaa n’akoma no, Ewuradze bɛyɛ N’afamudze aka hɔn a yɛpɛ dɛ yɛnye hɔn kyɛ asɛmpa no akoma. Yɛbɔɔ mbɔdzen too nsa frɛ obi dɛ ombetsie asɛmpa no hɛn mu pii abaw gurae osiandɛ dza yɛhwehwɛ no ennsi. No nsunsuando mmfa ho no, Ewuradze se hɛn dɛ yembuei hɛn ano na yɛnye binom nkyɛ asɛmpa asɛm no.
Mfe ebien a abasen kɔ no, Ewuradze kaa me na dɔfo n’akoma, a ɔboaa no ma osi gyinae dze gye enuma ayɛdze no. Nna maatweɔn bɛyɛ mfe 35 dɛ dɛm da no bɛba. Ama ɔayɛ dɛm ngyinae no, asɔrmba pii soom no nokwar ara dɛ mbrɛ Christ bɛyɛ. Kwesida bi, onyaa atsenkã dɛ ɔwɔ dɛ ɔkɔ asɔr. Odzii nkenyan no do. Ber a nna ɔtsena enyim ngua no do na ɔrotweɔn ma sacrament som ahyɛ ase no, mfe anan banyimba bi begyina n’enyim na ɔhwɛɛ no. Ɔyerɛɛw n’ano dze kyiaa no. Banyimba kakraba no fii ne nkyɛn ntsɛmara na ɔsanee kɔr n’ananmu, a nna ɔwɔ bea a nna me maame tsenae no n’afa. Banyimba kakraba yi faa biribi fii n’egua do na ɔsanee dze asɔr ndwom buukuu maa me maame na ɔsanee kɔr n’ananmu Me maame hun dɛ wɔdze asɔr ndwom buukuu no totomu to chapel egua biara do. Nkyɛ obotum eyi kor efi egua a ɔbɛn no no do. Naaso, n’enyi gyee banyimba no n’ayamuyie nyɛe a afɔdzi biara nnyi ho no ho, a nna oesua no wɔ ne fie na asɔr hɔ. Na ɔyɛ mber a okitsaa no. Onyaa nkenyan dzendzen dɛ nna Nyankopɔn roto nsa afrɛ no dɛ ɔmbra na ombedzi Agyenkwa n’ekyir. Ɔtsee nkã dɛ ɔwɔ dɛ wonuma no. Banyimba kakraba yi annhwehwɛ enyimnyam wɔ dza ɔyɛɛ no ho, mbom ɔyɛɛ dza oye ara dɛ ɔdze Nyankopɔn n’asɛm bɔbɔ bra na ɔadɔ ne nyɛnko. N’ayamuyie maa me maame akoma nsesã a ohia.
Christ n’asɛm no bɛkã akoma kɛse na woebue hɔn a wonnhun No no hɔn enyiwa. Emmaus kwan do no, esuafo beenu nye Jesus nantsewee. Nna hɔn werɛ ahow na wɔnntsee ase dɛ Agyenkwa no edzi owu do konyim. Hɔn awerɛhow mu no, woennhu dɛ nna Christ ɔtseasefo no nye hɔn nam. Ɔwɔ mu dɛ Jesus “kyerɛɛ hɔn nkyerɛw nyina mu dza ɔfa no ho no ase,’’ nna wɔda ho ara ennhu No dɛ Agyenkwa no a Ɔaasoɛr efi owu mu no kɛpem dɛ wɔnye No tsenae na Obubuu paano. Afei na hɔn “enyiwa’’ bueii. Ber a ihɛn—anaa hɛn anyɛnkofo, mfɛfo, na fipamfo—mee na yɛnye No bubu paanoo no, hɛn ntseasee enyiwa bobue. Mber a esuafo a wɔwɔ Emmaus dwendwenn hɔn mber a wɔnye Agyenkwa a Ɔasoɛr efi owu mu dzii no ho a, wɔkãa dɛ hɔn akoma mu hyehyee hɔn mu ber a Obuee kyerɛwnsɛm no mu kyerɛɛ hɔn (hwɛ Luke 24:27–32). Iyi bɛyɛ nokwar ama hɛn nyina.
Ewiei
Muruwie no, megye dase dɛ eremee wɔ Christ n’asɛm mu no botum esi mber biara na wɔ gyinabew biara mu, sɛ yesiesie hɛn akoma dɛ yɛbɛgye a. Eremee wɔ Christ n’asɛm mu no dze nkwa nyikyerɛ bɛba, oesi nyimpa ban a yɛyɛ na hɛn bo a yɛsom wɔ Nyankopɔn enyim dɛ Ne ba no tadua, na oegya hɛn anyɛnkofo akɔ Christ na nkwa onnyiewiei ho. Hom ma mensi Nephi ne ɔfrɛ no do ber a ɔkãa dɛ: “Ɔwɔ dɛ hom per kɔ kan gyina pintsinn wɔ Christ mu, nya enyidado a ɔhyerɛn na odzi mu, na hom nya Nyankopɔn nye nyimpa nyina ho dɔ. Dɛm ntsi, sɛ hom per kɔ kan, na hom mee wɔ Christ n’asɛm mu, na hom tsim kodu ewiei a, hwɛ, dɛm na Egya no se: Hom benya onnyiewiei nkwa.”(2 Nephi 31:20). Jesus Christ ne dzin mu, amen.