Christ: Kan No a Ɔhyerɛn wɔ Sum mu
Sɛ etse dɛ wo dasegye ne kan a ɔhyerɛn no rudum ma sum rehyɛ a, nya akokodur. Sie w’anohoba horow ma Nyankopɔn.
Mo ɔfese a ɔwɔ Relief Society Dan no mu no dzi hwɛ Salt Lake Temple no ara yie. Anafua biara, ne ber do pɛpɛr no, witɔree no, temple n’abowano nkandzea no sosɔ. Temple no yɛ daa akwankyerɛ kandzea a ɔhyerɛn wɔ me ntokura n’ekyir pɛɛ.
Fankwa abosoom a abɛsen n’anafua bi, wi kɔtɔree no nna mo ɔfese da ho yɛ sum a nna ɔnntɔkã. Ber a mohwɛɛ tokura no mu no, nna temple no ayɛ sum Nna nkandzea no nnsosɔe. Amonmu ara awerɛhow bɛkataa mo do. Nna munntum nnhu temple no sorɔmsorɔm no a meehu no ewimbir biara mfe pii mu no.
Muruhu sum wɔ bea a m’enyi da kwan dɛ mubohu kan no kaa me fapem ehiadze kor a yɛwɔ ama yenyin nye dɛ yɛbɔkɔ do atakyer Jesus Christ—hɛn kan ne farbaa no. Ɔno nye hɛn tum ne farbaa, Wiadze ne Kan na Nkwa. Sɛ yɛanntwe ammbɛn No dzendzen a yewu sunsum mu. Onyim dɛm no, Satan bɔ mbɔdzen dɛ obodua wiadze mu ɔhaw a hɛn nyina yehyia no mu dze enya hɛn. Ɔbɔ mbɔdzen bir hɛn kan, otwa ntakyeree no, otwa ahoɔdzen tum no mu koraa, na ogya hɛn nko wɔ sum mu. Ɔhaw yinom nnyɛ nã wɔ ɔnnkyebo asetsena yi mu, naaso Satan bɔ mbɔdzen yi hɛn nko si nkyɛn na ɔkã kyerɛ dɛ hɛn nkotsee na yɛrehyia.
Yaw Egura Hɛn mu Binom.
Sɛ esian to hɛn, sɛ dza osisi wɔ abrabɔ mu no hyɛ hɛn do ma yenntum nngye hɛnho, sɛ wɔabor hɛn dɛ banyin no a ɔnam Jericho kwan do na woegya hɛn hɔ dɛ yenwu a, Jesus ba na Ohuei ngo dze gu hɛn epirakur no mu, ɔtɔ bo ma hɛn do, na ɔnye hɛn kɔ ahɔhodan mu, ɔhwɛ hɛn do.1 Hɛn a yɛwɔ awerɛhow mu no, Ɔse: “Mebɛma … adzesoadze a wɔdze egu hom abatsir do no ayɛ har, a hom renntse mpo dɛ ɔda hom ekyir, … ama hom ehu nokwar no dɛ Emi, Ewuradze Nyankopɔn, mesera mo nkorɔfo wɔ hɔn amandzehu mu.’’2 Christ sã epira kur.
Hɛn mu Binom Abrɛ Dodow.
Elder Jeffrey R. Holland kãa dɛ, “Nnyɛ nsusui no nye dɛ yɛbotu mbirika akyɛn ma hɛn ahom botum. … Naaso [dɛm ekyir no], minyim dɛ hɔn mu pii tu mbirika ntsɛntsɛm ma dɛm no ɔtɔfabi a ahom na enyigye no do huan koraa.’’3 Sɛ hɛn enyidado hyɛ hɛn do a, yebotum egyina na yeebisa Ɔsor Egya dza yenngyae mu. Hɛn abrabɔ mu suahu ne fã nye dɛ yebosũa dza onnyi dɛ yɛyɛ. Naaso mpo, ɔtɔfabi a abrabɔ tum yɛ ɔberɛ. Jesus ma hɛn awerɛhyɛmu dɛ, “Hom nyina hom mbra mo hɔ, hom a hom reyɛ edwuma berɛ na wɔasoa hom dza ɔyɛ dur, na mebɛma hom ahomgye.”4
Christ pɛ dɛ ɔkã hɛnho ma yɛtwe ama adzesoa no aayɛ har Christ yɛ ahomgye.
Hɛn mu Binom Tse dɛ Yɛnnkã Asɔrmba ho Ankasa.
Siantsir ahorow bi ntsi, yɛnntse dɛ yɛkã ho anaa wɔgye hɛn to mu. Ahyɛmu Fofor no kyerɛ mbɔdzembɔ kɛse a Jesus yɛe dze tsen ne nsa mu maa nyimpa asorɔtow nyina: akwatafo, towgyefo, mbofra, Galilefo, edwamanbɔfo, mbaa, Phariseefo, ndzebɔnyɛfo, Samariafo, ekunafo, Roman nsordaafo, awartõfo, hɔn a wɔakã fĩ. Asɛm biara mu no,nna Ɔretsen kɔ obi a amambra do no wɔnngye no ntomu wɔ man mu no.
Luke 19 kã towgyenyi panyin wɔ Jericho a ne dzin dze Zacchaeus ho asɛm. Ɔkɔfoow dua ama oehu Jesus a orutwamu no. Nna Zacchaeus ɔyɛ edwuma ma Roman aban, na wohu no dɛ ɔaprɔw na ɔyɛ dzebɔnyɛnyi. Jesus hun no dua do na ɔfrɛɛ no, see dɛ, “Zacchaeus, yɛ ntsɛm, si famu; na ndɛ ɔsɛ dɛ metsena wo fie.’’5 Na mber a Jesus hun Zacchaeus n’akoma pa na ndzɛmba a ɔyɛɛ ma binom no no, Ɔgyee n’afɔrbɔ too mu, ɔsee dɛ, “Ndɛ na nkwagye aba ofi yi mu, [susuampa] dɛ no so yɛ Abraham ba bi no.’’6
Jesus kãa kyerɛɛ Nephifo no bɔkɔɔ mu dɛ, “Mahyɛ hom dɛ mma hom mu biara nnkɔ.’’6 Peter nyaa nhumu no a ohia wɔ Ndwuma 10 mu mber a ɔpaa mu kãa dɛ, “Nyankopɔn akyerɛ me dɛ mma memmfrɛ nyimpa biara ekyiwadze anaadɛ no ho nntsew.’’8 Ɔyɛ ehiadze a ɔnnsesã ma Christian esuafo nye Latter-day Saintfo dɛ wɔkyerɛ ɔdɔ ma hɔnho nkorkor.8 Jesus tsen ɔfrɛ kor noara a Ɔdze maa Zaachaeus no ma hɛn: “Hwɛ, migyina abowano, na morobɔ mu: sɛ [obi] tsie me ndze, na obue abow no a, mebɛhɛn mu aba [ne] nkyɛn, na menye [no] bedzidzi, na [ɔno] so mye me edzidzi.’’10 Christ hu hɛn wɔ hɛn dua do.
Nsɛmbisa ama Hɛn mu Binom Adwen mu ayɛ Konsẽe.
Mfe kakra a abɛsen no, nsɛmbisa a munntum nnya nyiano hyɛɛ modo na ɔtseetsee me. Memenda anapa bi mosõo daa bi. Adaaso mu no muhun ɔpɛ ber dan bi na metsee ase dɛ ɔwɔ dɛ mekegyina mu. Na ɔwɔ kɔntɔnkrɔn wiifã enum a etwa ho ehyia, mbom nna abo na wɔdze ayɛ ntokura no. Mo hwinhwinii wɔ adaaso no mu a, nna memmpɛ dɛ mokɔ mu osiandɛ nna musuro dɛ osuar na ɔyɛ sum. Hɔ na adwen no baa m’adwen mu dɛ Jared no nuabanyin no dze abotar nanee mboba ma wɔyɛɛ gyerasse petee. Gyerasse yɛ abo a no su asesã. Mber a Ewuradze dze ne nsa kaa mboba no maa Jared no nuabanyin no, ɔmaa kan hyerɛɛn wɔ ahɛn a no mu ayɛ sum no mu.11 Awerɛfirmu na ɔpɛ hyɛɛ me mã dɛ monkɔ ɔpɛber dan no mu nkyɛn beebiara. Nna ɔyɛ bea noara—bea kor—ma me dɛ “metse ase’’ yie. Nsɛmbisa a nna ɔrehaw me no annkɔ, mbom mosoɛree no modween asɛmbisa yi ho yie: “Ibesi dɛn botu wo gyedzi mpon, tse dɛ Jared no nuabanyin no, ama wo mboba eetum adan kan?”12
Wɔyɛɛ hɛn honanadua adwen no dɛ yɛbɔhwehwɛ ntseasee na nkyerɛase nkakrakakra. Minnyim siantsir nyinara a ɔyɛ dzen dɛ yɛbɛtse ndzɛmba ase wɔ hɛn ɔnnkyebo asetsena mu. Iyi nnyɛ hɛn onnyiewiei no mpontu ne fã a yɛwɔ nyiano nyinara. Ɔyɛ fã a yetu hɛn awerɛhyɛmu mpon (anaa ɔtɔfabi a hɛn enyidado) wɔ ndzɛmba a hɛn enyi nntua ho. Awerɛhyɛmu ba wɔ akwan a ɔnntaa nnyɛ mberɛw dɛ wɔbɔhwehwɛ mu, naaso kan hyerɛn wɔ hɛn sum mu. Jesus see dɛ, “Emi nye kan no, nye nkwa no, nye wiadze nokwar no.’’13 Hɔn a wɔrohwehwɛ nokwar no, ahyɛase no ɔbɛyɛ suro hun dɛ ebɛhyɛ dan kakraba a no mu ayɛ sum na wɔdze abo ayɛ ntokura no. Naaso yɛdze abotar na nokwar nsɛmbisa no, Jesus botum adan hɛn abo ntokura no ma wɔayɛ gyerasse na kan.. Christ nye kan a yɛdze hu adze.
Hɛn mu Binom Tse Nkã dɛ Yennkotum Ayɛ Yie Dabiarada.
Ahyɛmu Dadaw ne adaaben enyi no nnyɛ fɛw ara, mbom ɔsan so nnhoa, a n’asekyerɛ nye dɛ n’enyi kann no ka nguannhwi no mu, a mber dodow a wɔbɔhor mmfa ho na ɔmmpa.14 Satan kitsa siantsir yi tse dɛ potsibaa: nguannhwi fufuw a adaaben aka mu no nnkotum asan ayɛ fufuw dabiarada. Naaso Jesus Christ paa mu kã dɛ, “M’akwan krɔn bɔ hom akwan do,’’15 na N’adom n’anwanwadze nye dɛ sɛ yenu hɛnho fi hɛn bɔn ho a, No bɔgyaa adaaben enyi no dze hɛn san kɔ ahotsew mu. Ɔnnyɛ adwendwen ho nyimdzee, naaso ɔyɛ nokwar
Mfonyin fi iStock.com/iinwibisono
“Kaansa hom bɔn tse dɛ adaaben mpo a, ɔbɔhoa dɛ esukwankyɛba; kaansa ɔber dɛ bɔgyaben mpo a, ɔbɛyɛ dɛ guannhwi.’’16 Ewuradze tsimu kã dɛ: nyia a “oenu noho wɔ … [bɔn horow] ho no, ɔno na wɔdze no bɔn akyɛ, na Emi, Ewuradze, merennkaa no bio.’’17 Yɛbɛkã no dɛ: Hom mbra, ma yɛkekã ɛ.18 Hɔn ayɛ afom; obiara atɔ sin.19 Hom mbra me nkyɛn na hom nnu homho.20 Merennkaa bɔn no bio.21 Homho botum edzi mu bio.22 Mowɔ edwuma ma hom dɛ hom yɛ.23 Christ yɛ nguannhwi fufuw.
Naaso ebɛn anamɔn kwan na yɛmfa do? Ebɛnadze tsitsir na ohia dɛ yɛtwe bɛn Jesus Christ no tum no ber a yɛregye kyim? President Russell M. Nelson kãa no tsiabaa dɛ: “Dza ohia tsitsir nye dɛ yɛbɛyɛ na yesie ahyɛmudzi krɔnkrɔn. … Ɔnnyɛ kwan a ɔkyer do.24 Ma w’abrabɔ ntsim Christ do.25
Sɛ etse dɛ wo dasegye ne kan a ɔhyerɛn no rudum ma sum rehyɛ a, nya akokodur. Sie w’anohoba ma Nyankopɔn. Bisa wo nsɛmbisa. Abotar mu ara nan mboba ma ɔmbɛyɛ gyerasee Dan kɔ Jesus Christ hɔ, Ɔno a Ɔda ho dɔ wo no.
Jesus kãa dɛ, “Emi nye kan [a] ɔhyerɛn sum mu, na sum no annkyer ‘’no.26 N’asekyerɛ nye dɛ mbɔdzenbɔ biara ɔbɔbɔ no, sum nnkotum edum kan da. Dabiarada. Ibotum enya awerɛhyɛmu dɛ Ne kan bɔboa wo.
Hɛn, anaa nkorɔfo a yɛdɔ hɔn no botum ayew hɔn dasee mber kumaa mu. Salt Lake Temple asɛm no dze, wɔfrɛɛ opanyin a ɔhwɛ hɔ no, Nuabanyin Val. White, ntsɛmara. Nna nkorɔfo ehu. Ebɛn mfom na nna ɔwɔ temple nkandzea no ho? Odzi Kan, edwumayɛfo hɔnankasa kɔr enyinam panel kor biara wɔ temple no mu, na wɔdze hɔn nsa sosɔɔ nkandzea no. Afei wɔdze battery afofor hyehyɛɛ mprɛprɛ ahoɔdzen efir no mu na wɔhwɛɛ dza nna ɔma ɔnnyɛ edwuma.
Ɔyɛ dzen dɛ hɛnankasa yɛbɔsɔ nkandzea no. Yehia anyɛnkofo. Yehia hɛnho nkorkor. Tse dɛ temple edwumayɛfo noara no, yebotum aboa hɛnho nkorkor ber a hɛnankasa yɛrokɔ hɔ, yerekenyan hɛn sunsum mu, na yeresiesie dza ɔsɛe no.
Hɛn ankorankor kandze botum ayɛ tse dɛ kandzea kor pɛ a ɔsan dua do. Naaso yɛbɛda ho ahyerɛn hɛn kandzea kakraba no, na yɛbɔmu a, tse dɛ Borɔnyaber wɔ Temple Square no, yɛtwe nkorɔfo ɔpepe dze ba Ewuradze ne fie. Dza oye koraa no, dɛ mbrɛ President Nelson ahyɛ nkuran no, yebotum dze Agyenkwa ne kan no ama hɛnankasa hɛnho na nkorɔfo a wohia hɛn ber a yɛreyɛ ndzeyɛɛ a ɔnnyɛ dzen dɛ yeresie hɛn ahyɛmudzi horow. Akwanhorow mu no, Ewuradze dze tum na dɛwdzi tua dɛm nokwar ndzeyɛɛ no kaw.27
Megye dase dɛ Wɔdɔ wo. Ewuradze nyim mbrɛ esi emia woho robɔ mbɔdzen. Erutu mpon. Kɔdo. Ohu w’afɔrbɔ a wonnhu nyina na obu no dze ma wo yieyɛ na hɔn a idɔ hɔn so hɔn yieyɛ. W’edwuma nnyɛ gyan. Nnyɛ ankonam. Ne dzin ankasa, Emmanuel, ne nkyerɛase nye dɛ “Onyame nye hɛn wɔ hɔ.’’28 Ɔnye hɛn wɔ hɔ ampara.
Tu anamɔn kakra wɔ ahyɛmudzi anamɔn kwan no do, mpo sɛ ɔyɛ sum dodow dɛ nnkohu ekyir ekyir a. Nkandzea no bɛsan asɔ. Megye Jesus ne nsɛm no nokwar ho dase, na kan ahyɛmu mã: “Hom ntwe mbɛn me na mobɔtwe abɛn hom; hom nhwehwɛ me enyiberdo na hom bohu me; hom mbisa na hom nsa bɛkã; hom mbɔ mu, na wobobue ama hom.’’29 Jesus Christ ne dzin mu, amen.