Yebotum Ayɛ Adze Yie na Yɛayɛ Yie

Mo nuanom adɔfo, mohwɛ hom mboanofo dɔm kɛse a wɔyɛ Ewuradze ne nsordaafokuw a wokitsa asɔfodzi no a ɔma me nkenyan dodow. Mbrɛ hom si yɛ papayɛ ho ahoɔdzenfo akatakyi! Yɛdɔ hom. Yɛbɔ mpaa ma hom. Na hɛn enyisɔ hom papaapa.

Ndaansa yi Ewuradze ne nkyerɛkyerɛ a ɔdze duaa Nkɔnhyɛnyi Joseph Smith do no: “Mma nnkã hwee na mbom nnuho nko na kã kyerɛ ebusuasantsen yi”¹ no ada m’adwen do. Wɔtaa si mpaamukã yi do wɔ kyerɛwsɛm no nyina mu.² Okenyan nsɛmbisa pefee yi : “Ana obiara hia dɛ onu no ho a?” Nyiano no yɛ nyew.

Nkorɔfo dodow na wosusu nnuho dɛ ɔyɛ asotwe—biribi a wobokwetsir gyedɛ wɔ gyinabew dzendzen nko mu. Naaso Satan na ɔdze asotwe ho atsenkã no ba. Ɔbɔ mbɔdzen dɛ obesiw hɛn kwan ma yɛnnkɔhwɛ Jesus Christ,³ a Oebue N’abasa mu gyina hɔ,⁴ Ɔdze enyidado na pɛ dɛ Ɔbɛsã hɛn yarba, dze hɛn bɔn akyɛ hɛn, atsew hɛnho, ahyɛ hɛn dzen, na Ɔasan hɛnho.

Greek Ahyɛmu Fofor mu nnuho ne nsɛmfua nye metanoeo. Dza odzi enyim no meta kyerɛ “nsesã.” Ekyir dze no noeo no fa Greek nkasafua a ɔkyerɛ “adwen,” “nyimdzee,” “sunsum” na “ahom.”⁵

Ntsi, sɛ Jesus se emi na ɔwo dɛ “yenu” hɛnho a⁶ nna Ɔroto nsa afrɛ hɛn ma yɛasesã hɛn adwen, hɛn nyimdzee, hɛn sunsum—na mbrɛ yesi gye ahom mpo. Ɔrese hɛn dɛ yɛnsesã mbrɛ yesi dɔ, dwen, som, hwer hɛn mber, yɛdze yɛ hɛn yernom, kyerɛkyerɛ hɛn mbofra, na mbrɛ yɛhwɛ hɛn honandua mpo do.

Biribiara mma ahotɔ, mma nkamfo, anaa onnhia tsitsir mma hɛn ankorankor mpontu nnkyɛn dɛ daa daa yebesi hɛn adwen pi wɔ nnuho do. Nnuho nnyɛ adze a osi ber kor, ɔyɛ ndzeyɛɛ kwan. Ɔyɛ enyigye na asomdwee ho saafee. Sɛ gyedzi kã ho a, nnhu bue hɛn kwan kɔ Jesus Christ No Werdambɔ tum no ho.⁷

Sɛ erenantsew enyimia do wɔ ahyɛmu anamɔn kwan no do o, sɛ apatser o, anaa efi ahyɛmu anamɔn kwan no do o, anaa nntum mpo nnhu bea a ewɔ sesei wɔ kwan no do o, mototɔ serɛ wo dɛ nu woho. Dua ndzeyɛɛ na papayɛ nkakrankakra da kor biara do—fa nya daa daa nnuho ho ahoɔdzenhyɛ tum ho sũahu.

Sɛ yesan mu yi dɛ yebonu hɛnho a, yɛfa dɛ yɛbɛsesã. Yɛma Agyenkwa no kwan ma ɔsesã hɛn ma yɛfa hɛn tam mapã no fura. Yɛsan mu yi dɛ yebenyin sunsum mu na yeenya enyigye—hɛn mponee ho enyigye wɔ No mu.⁸ Sɛ yesan mu yi dɛ yebonu hɛnho a, yɛfa dɛ yɛbɛyɛ tse dɛ Jesus Christ ara yie!⁹

Enuanom, yehia dɛ yɛyɛ hɛn ndzeyɛɛ yie na yɛbɛyɛ yie osiandɛ yɛwɔ akõno. Ampara yɛnye bɔn wɔ akõno. Otsĩafo no emia no mbɔdzembɔ mu mbɔho mbɔho dɛ ɔbɛsɛɛ hɛn dasegye na oesiw Ewuradze n’edwuma no kwan. Ɔrema no nkowaa no akõdze a ɔyɛ ndam ara yie ama wɔdze eesiw hɛn kwan ma yennkenya Ewuradze n’enyigye na no dɔ no.¹⁰

Nnuho nye saafee a yɛdze kwetsir awerɛhowdzi a otsĩafo ne mfir dze ba no. Ewuradze n’enyi nnda hɛn ahotsewyɛ seisei wɔ hɛn onnyiewiei mpontu gyinabew yi do. Naaso N’enyi da kwan dɛ hɛnho bɔkɔ do atsew. Daa daa nnuho nye ahotsew no kwan, na ahotsew dze tum ba. Ankorankor ahotsew botum ama yɛaabɛyɛ edwindadze a ɔyɛ ndam wɔ Nyame nsamu. Hɛn nnuho—hɛn ahotsew—bɛma hɛn tum ma yɛdze aboa Israel mboano no no.

Ewuradze kyerɛkyerɛɛ Nkɔnhyɛnyi Joseph Smith “dɛ kyɛfa a ɔwɔ asɔfodzi no mu no nye sor tum no fam ho, na wonnkotum ahyɛ ɔsor tum do anaa wɔdze edzi dwuma gyedɛ wɔnam tsenenee fapem kwan do.”¹¹

Yenyim dza ɔbɛma hɛn kwan kɛse wɔ ɔsor tum ho no. Yenyim dza obesianka hɛn mpontu so—dza yehia dɛ yebegyaa yɛ dze enya ɔsor tum ho kwan kɛse no. Enuanom, mpaabɔ mu ara hom nhwehwɛ nya ntseasee wɔ dza ogyina hɛn nnuho kwan no mu no. Hu dza osianka wo ma innu woho. Na nkyii sesã! Nu woho! Hɛn nyina yebotum ayɛ adze yie na yɛayɛ yie akyɛn ber biara.¹²

Akwan horow pɔkyee wɔ hɔ a yebotum etu mpon. Kwan kor nye mbrɛ yesi hwɛ hɛn honandua do. Nyimpadua n’anwanwadze yɛ me nwanwa dodow. Ɔyɛ abɔdze a ɔyɛ nwanwa, a ohia tsitsir ma nkakrankakra yetum yetu mpon kɔ hɛn hyɛbea krɔnkrɔn no. Yennkotum enya mpontu a honandua nnkã ho. Ɔrema hɛn honandua akyɛdze no, Nyankopɔn ama yeetu anamɔn a ohia mapã a yɛdze bɛyɛ tse dɛ Ɔno.

Satan tse iyi ase. Ɔhaw no yie dɛ n’etuatsew wɔ asetsena ansaana yɛreba asaase do no amma ɔammfata dabiarada dɛ obenya ndzinoa yi, na ogya no ɔtan na ebufuw a onngyaa da. Dɛm ntsi pii, sɛ nnyɛ dodowara a, nsɔhwɛ mu kɛse a ɔdze to hɛn akwan mu no ma yɛsɛɛ hɛn honandua anaa binom honandua. Osiandɛ Satan nnyi honandua ma odzi awerɛhow no, ɔpɛ dɛ yedzi awerɛhow osian hɛndze ntsi.¹³

Wo honandua nye wankasa wo temple, wɔbɔe dɛ ɔbɛyɛ wo onnyiewiei sunsum ne tsenabea.¹⁴ Mbrɛ isi hwɛ dɛm temple no do no hia ara yie. Afei, enuanom, mibisa hom: ana hom rema hom ntarhyɛ na hom ahosiesie ayɛ dza wiadzemba pɛ no ehia hom akyɛn dza hom bɛma Nyame enyi asɔ? Wo mbuae wɔ asɛmbisa yi ho no bɔ No amandzɛɛ pefee a ɔkyerɛ w’atsenkã wɔ enyimnyam abɔso akyɛdze a Ɔdze ama wo no ho. Obu a yɛdze bu hɛn honandua no, enuanom, megye dzi dɛ yebotum ayɛ adze yie na yɛayɛ yie.

Kwan kor so a yebotum ayɛ adze yie na yɛayɛ yie nye mbrɛ yesi dzi mbaa a wɔwɔ hɛn abrabɔ mu no nyi, ɔhyɛ ase fi hɛn yernom na hɛn mbabaa, hɛn enãnom na hɛn nkyerɛbaa do.¹⁵

Abosoom kakra a abɛsen no, menyaa krataa a ɔkyerɛɛ ayawdzi fi akyerɛbaa dɔfo bi hɔ. Ɔkyerɛɛw dɛ: [Emi na me babaa] tse dɛ ma yɛnye hɛn kunnom na mbabanyin hyɛ akansi a ɔyɛ dzen mu a yɛdze regye hɔn asokyɛn efi TV do akansi a ɔkɔ do aber biara, video agordzi horow, TV do sikasɛm, agor akansi ho nsɛm a wɔnngyaa kã a wɔhwɛ no daa daa. Yɛtse dɛ hɛnho nnhia hɛn kunnom na hɛn mbabanyin bio osiandɛ [agodzi akansi] no nhwɛe na ohia hɔn.”¹⁶

Enuanom, hom nhu dɛ hom asodzi tsitsir dɛ hom kitsa asɔfodzi no nye dɛ hom bɔdɔ hom yer na hom ahwɛ no yie. Enye no nyɛ kor. Yɛ ne boafo mapã. Ma ɔnyɛ mberɛw mma no dɛ ɔbɛpɛ dɛ ɔbɛyɛ wodze. Adze biara nnyi hɔ wɔ abrabɔ yi mu a ɔsɛ dɛ noho hia kyɛn enye no rekyekyer onnyiewiei nkitahodzi. Biribiara a ɔwɔ TV do, abaɛfo foon do, anaa computer ho nnhia nnkyɛn ne yieyɛ. Susu mbrɛ isi hwer wo mber na hwehwɛ bea a ibotu w’ahoɔdzen ahyɛ. Ɔno bɛkyerɛ no bea a w’akoma wɔ. Bɔ mpaa dɛ w’akoma nye wo yer n’akoma bɔbɔ mu ayɛ kor. Per hwehwɛ dɛ ebɛma n’enyi agye. Hwehwɛ ne nkyɛn afotu na tsie. Dza ɔdze bɔboa wo bɛma wo ndzeyɛɛ etu mpon.

Sɛ ewɔ hia dɛ inu woho osian dza edze ayɛ mbaa a wɔbɛn wo no a, hyɛ ase seisei. Kaa so dɛ, ɔyɛ w’asodzii dɛ eboa mbaa no a wɔwɔ w’abrabɔ mu no ma wonya nhyira no a ofi Ewuradze n’ahosan ho mbra abrabɔ mu ba no. Mma nnyɛ siantsir no dabiarada dɛ ɔbaa no enntum anngye ne temple nhyira no.

Enuanom, hɛn nyina hia dɛ yenu hɛnho. Ɔsɛ dɛ yɛsoɛr gyina, yɛdze ntõtõanan mu no to nkyɛn, na yenyan fi hɛn sunsum mu nkomtɔ no mu. Mber no asõ dɛ yɛbɛfa Nyankopɔn akõntar nyina ahyɛ ama yeetum ayɛ edwuma a no ho hia tsitsir wɔ asaase yi do. Mber no asõ dɛ hom mfa hom ahom, adwen, nye ahoɔdzen nyina ntow hom kantankrankye “¹⁷ Bɔnfo no dɔm no regyam yerɛyerɛw ndɛ kyɛn ber biara. Dɛ yɛyɛ Ewuradze asomfo no, yennkotum ada ber a akõno yi wɔ do no.

W’ebusua hia wo baanodzi na wo dɔ. Wo quorum na hɔn a wɔwɔ wo ward anaa nkorbata no hia w’ahoɔdzen. Na hɔn a wohyia wo nyina hia dɛ wohu mbrɛ Ewuradze no suanyi tse na mbrɛ ne ndzeyɛɛ tse.

Mo nuanom adɔfo, Egya no saan mu yii hom dɛ hom bɛba asaase yi do mber a ohia papaapa yi mu, osian hom sunsum mu ndamyɛ wɔ asetsena ansaana yɛreba asaase do no. Hom kã mbarimba abran akokodurfo, a wɔaba asaase yi do pɛn no. Satan nyim mbrɛ hom tse wɔ asetsena ansaana yɛreba asaase do no na ɔtse edwuma a otwar dɛ wɔyɛ ana Agyenkwa no asan aba no ase. Mfe mpempem a ɔdze ne ndaadaa no edzi dwuma no, otsĩafo no ɔawea na wonnkotum asesã no.

Enyisɔ mu ara, asɔfodzi no a yekitsa no yɛ dzen koraa kyɛn otsĩafo no ne ndaadaa no. Mototɔ serɛ hom dɛ hom nyɛ mbarimba na mberantsɛ a Ewuradze rohwehwɛ ma hom ayɛ no. Ma w’adwen ntsim wɔ daa daa nnuho ara do ma ɔmbɛyɛ w’abrabɔ mu ntɔyɛɛ ama eetum edze tum kɛsenara dze asɔfodzi no edzi dwuma akyɛn ber biara. Iyi nko nye kwan a ibotum esie woho na w’ebusua sunsum mu bambɔ mu wɔ ɔhaw nda a ɔreba no mu.

Ewuradze hia mbarimba etuhoakyɛfo a wɔhwɛ binom hɔn yieyɛ kyɛn hɔnara hɔn dze. Ohia mbarimba a wɔgye enyim yɛ edwuma dze tsie Ewuradze ne ndze pefee. Ohia ahyɛmu mbarimba a wɔdze nokwardzi sie hɔn ahyɛmudzi no. Ohia mbarimba a woesi nketse dɛ wobesie ahosan mbra no—mbarimba a wodzi mu a wobotum afrɛ hɔn amonmu hɔara ma wɔdze akoma na adwem a no mu tsew, na nsa a wɔayɛ krado ama nhyira. Ewuradze hia mbarimba a woenya pɛ dɛ wobonu hɔnho—mbarimba a wɔdze enyimpi som na wɔbɛkã Ewuradze no nsordaafokuw a wodzi mu a wokitsa asɔfodzi no ho.

Mihyira hom dɛ hom mbɛyɛ dɛm mbarimba no. Medze akokodur a hom dze bonu hom ho daa daa no, na hom sũa mbrɛ hom dze asɔfodzi tum no bedzi dwuma ara yie no hyira hom. Mihyira wo dɛ ebɛda Agyenkwa no dɔ no akyerɛ wo yer na wo mba na hɔn a wonyim wo nyina. Mihyira wo dɛ ibɛyɛ adze yie na ayɛ yie. Na mihyira wo dɛ ber a edze mbɔdzembɔ yɛ iyinom no, ibohu anwanwadze wɔ w’abrabɔ mu.

Yɛreyɛ Tumfo Nyame n’edwuma. Jesus nye Christ no. Yɛyɛ Hɔn asomfo. Megye ho dase wɔ Jesus Christ ne dzin mu, amen.