2010–2019
Hwɛ Jesus Christ
Ebɔwbira 2019 Wiadze Mfɛndzanan Ehyiadzi

Hwɛ Jesus Christ

Elder Kim B. Clark ne Kasae

Ɔkã Eduosuon no ho

Sɛ yɛhwɛ Jesus Christ a, Ɔbɔ boa hɛn ma yɛdze hɛn ahyɛmudzi horow no abɔ bra na wɔakrɔn hɔn frɛ no dɛ Israel elderfo.

Ber a nna Jesus nam Capernaum1 a nna nyimpadodow pii etwa Noho ehyia no, ɔbaa bi a nna mfe 12 a ɔwɔ gyinabew a ɔyɛ dzen mu no tseen ne nsa kaa N’atar ano ndwow. Na amonmu hɔ ara onyaa ayarsã.2

Kyerɛwnsɛm no kyerɛw dɛ Jesus, ohun “dɛ [ahoɔdzen] efi [No] mu kɔ no,”3 “danee no ho wɔ dɔm no mu”4 na “ɔhwɛe … dze hun ɔbaa no a ɔayɛ adze yi.”5 “Na ɔbaa no hun dɛ oennsuma no,”6 “ɔbɔhwee n’enyim, na ɔkãa nokwar nyina kyerɛɛ no.”7

Jesus see no dɛ, “Babaa, nya ahomka: wo gyedzi agye wo, kɔ asomdwee mu.”8

Jesus Christ gyee ɔbaa no nkwa. Onyaa honandua mu ayarsã, naaso ber a Jesus danee hwɛɛ no no, ɔdaa ne gyedzi edzi wɔ No mu kyerɛe na Ɔsãa n’akoma yarba.9 Ɔdze ɔdɔ kasae kyerɛɛ no, ɔmaa no Ne ngyetomu ho awerɛhyɛmu, na ɔdze N’asomdwee hyiraa no.10

Enuanom, dɛ yekitsa asɔfodzi krɔnkrɔn no, yɛreyɛ nkwagye edwuma no. Mfe da mu no Ewuradze dze baanodzi edwuma no ato elderfo a wɔwɔ Israel no hɔn abatsir do ankasa.11 Yɛwɔ nkenyan asodzi fi Ewuradze hɔ—a yɛnye hɛn nkyerɛbaa reyɛ edwuma no, ɔwɔ dɛ yɛsom wɔ kwan a ɔkrɔn mbordo mu, yɛma Israel mboaboa ano no kɔdo ntsɛmntsɛm wɔ ntwamutam n’afa nyina, yɛkyekyer hɛn efiefie dɛ gyedzi na asɛmpa nsuae krɔnkrɔn mbea, na yesiesie wiadze no ma Jesus Christ ne Mbae a Otsĩa Ebien no.12

Ma ndzɛmba nyina tse no, Agyenkwa no akyerɛ hɛn kwan: ohia dɛ yɛhwɛ na yɛsom Jesus Christ dɛ mbrɛ Ɔhwɛɛ na ɔsoom N’Egya no.13 Agyenkwa no kãa no kwan yi mu kyerɛɛ Nkɔnhyɛnyi Joseph dɛ:

“Hom nhwɛ me wɔ hom adwendwen biara mu; mma hom nngye kyim, mma hom nnsuro.

“Hom nhwɛ me mfẽ mu epirakur, nye mprɛgow ananmu wɔ me nsa nye m’anan mu; hom ndzi nokwar, hom ndzi me mbrasɛm do, na hom benya ɔsor ahenman no edzi.”14

Asetsena ansaana yɛreba asaase do no Jesus bɔɔ N’Egya anohoba dɛ Ɔbɛyɛ N’Egya ne pɛ na ɔayɛ hɛn Agyenkwa na Pomfo. Ber a N’Egya bisaa dɛ, “Woana na mobɔsoma no?”15 Jesus yii ano dɛ:

“Emi nye yi, soma me.”16

“Egya, wo pɛ nyɛ hɔ, na enyimyam no nyɛ wodze afebɔɔ.”17

No ɔnnkyebo abrabɔ nyina mu no Jesus dze dɛm anohoba no bɔɔ bra. Ahobrɛadze, botooyɛ, na ɔdɔ mu no Ɔkyerɛkyerɛɛ N’Egya ne nkyerɛkyerɛ na Ɔdze tum na etumdzi a N’Egya dze maa No no yɛɛ N’Egya n’edwuma.18

Jesus dze N’akoma maa N’Egya. Ɔsee dɛ:

“Modɔ Egya no.”19

“Meyɛ dza ɔsɔ n’enyi daa.”20

“Mebae … nnyɛ dɛ merebɛyɛ mankasa me pɛ, na mbom [Egya no a] ɔsomaa me no ne pɛ.”21

No owuyaw mu wɔ Gethsemane no Ɔbɔɔ mpaa dɛ, “Naaso nnyɛ me pɛ a, na wodze na ɔnyɛ.”22

Sɛ Ewuradze frɛ Israel elderfo dɛ “hom nhwɛ me wɔ hom adwendwen biara mu” na “hom nhwɛ epirakur no” wɔ No honandua a ɔasoɛr efi owu mu no a, ɔyɛ ɔfrɛ dɛ yefi bɔn na wiadze ho na yɛdan mbra No hɔ na yɛndɔ na yentsie No. Ɔyɛ ɔfrɛ dɛ yɛkyerɛkyerɛ Ne nkyerɛkyerɛ na yɛyɛ N’edwuma wɔ No kwan mu. Dɛm ntsi, ɔyɛ ɔfrɛ, dɛ yebenya awerɛhyɛmu wɔ No mu koraa, yegyaa hɛn pɛ mu na yɛdze hɛn akoma ma No, na ɔnam No ɔpon tum no do yɛabɛyɛ tse dɛ Ɔno.23

Enuanom, sɛ yɛhwɛ Jesus Christ a Obehyira hɛn ma yɛayɛ Ne elderfo wɔ Israel—ahobrɛadze, botoo, ogyaa no ho ma, ɔdɔ hyɛ no .mã.24 Na yɛdze N’asɛmpa na N’Asɔr ho nhyira na dɛwdzi bɛbrɛ hɛn ebusua ebusua na hɛn enuanom mbanyin na nkyerɛbaa a wɔwɔ ntwamutam n’afa ebien no.

President Russell M. Nelson afrɛ hɛn dɛ yɛnhwɛ Jesus Christ wɔ kwan yi ara mu: “Biribiara nnyi hɔ a ɔyɛ mberɛw anaa ɔba ara wɔ yɛrebɛyɛ esuafo a yɛyɛ ndam no. Otwar dɛ hɛn enyi tsim wɔ Agyenkwa na N’asɛmpa no do. Ɔyɛ adwen mu edwuma dzen dɛ yɛbɛper na yɛahwɛ No wɔ adwendwen biara mu. Naaso sɛ yɛyɛ a, hɛn ekyingye na suro tu kɔ.”24

Otsim yɛ kasafua kɛse. N’asekyerɛ nye dɛ idze betsim dzendzenndzen, ɔbɔtwe afam na oesuo mu koraa.26 Yɛdze hɛn enyi tsim Jesus Christ na N’asɛmpa no do ber a yɛdze hɛn ahyɛmudzi horow robɔ bra.

Sɛ yɛdze hɛn ahyɛmudzi horow no bɔ bra a, wonya nhyɛdo wɔ adzebiara a yɛkã na yɛyɛ do. Yɛbɔ ahyɛmudzi bra27 a dabiara gyedzi ho nyɛe a ɔnnyɛ dzen a otsim wɔ Jesus Christ do ahyɛ no mã: mpaabɔ a ofi akoma mu wɔ Ne dzin mu, yɛremee wɔ Ne asɛm mu, yɛredan akɔ No hɔ dze ennu hɛn bɔn ho, yeresie Ne mbransɛm, yeridzi sacrament na yɛresie N’ Ahomgyeda krɔnkrɔn, yɛrosɔr wɔ Ne temple krɔnkrɔn mu mber dodow a yebotum, na yɛdze N’ asɔfodzi krɔnkrɔn no ridzi dwuma asom Nyankopɔn ne mba.

Ahyɛmudzi som nyɛe yinom buei hɛn akoma na adwen wɔ Agyenkwa No ɔpon tum na Sunsum Krɔnkrɔn n’ahotsew nhyɛdo no ho. Nkakrankakra no, Agyenkwa sesã hɛn awosu ankasa, hɛn nsakyeree ba No hɔ no mu dɔ mbordo na hɛn ahyɛmudzi horow no dzɛw wɔ hɛn akoma mu.28

Anohoba horow a yɛyɛ kyerɛ hɛn Ɔsor Egya no bɛyɛ ɔbotan-tsim pisi, hɛn bun mu apɛdze. Ɔsor Egya n’anohoba ma hɛn no dze enyisɔ na dɛwdzi hyɛ hɛn mã.29 Hɛn ahyɛmudzi no gyae dɛ wɔreyɛ mbra a yedzi do na wɔbɛyɛ ahomka fapem a wokenyan na wɔkyerɛ hɛn kwan ma yɛdze hɛn adwen tsim Jesus Christ do.30

Ɔsom nyɛe yinom wɔ hɔ ma hɛn nyina, mbofra nye mpanyin. Hom mberantsɛ a hom kitsa Aaronic Asɔfodzi krɔnkrɔn no, biribiara a maakã no anafua yi fa hom ho. Meda Nyankopɔn ase ma hom. Hom yɛ ayɛdze horow na ahyɛmudzi krɔnkrɔn a ɔwɔ hɔ ma Latter-day Saintfo ɔpepe dapɛn biara. Sɛ hom siesie, hom hyira, anaa wɔdze sacrament no kɔ aprɔw; hom som; hom numa wɔ temple; hom to nsa frɛ nyɛnko bi ba dwumadzi mu; anaa hom gye hom quorumba a, hom reyɛ nkwagye edwuma no. Hom so botum ahwɛ Jesus Christ na hom dze hom ahyɛmudzi no abɔ bra dabiara. Mobɔ hom anohoba dɛ sɛ hom yɛ a, hom bɛyɛ Ewuradze no nkowaa awerɛhyɛmufo seisei na, wɔ da ɔreba mu no, elderfo ekunyin wɔ Israel.

Enuanom, minyim dɛ iyi nyina bɛyɛ dɛ ma ɔyɛ dzen. Naaso meserɛ hom nkaa Agyenkwa ne nsɛm yinom: “Ɔnnka mo nko, osiandɛ Egya no wɔ me nkyɛn.”31 Dɛmara na ɔtse dze ma hɛn. Ɔnnka hɛn nko. Ewuradze Jesus Christ na hɛn Ɔsor Egya dɔ hɛn, na Wɔwɔ hɛn nkyɛn.32 Osiandɛ Jesus hwɛɛ N’Egya na owiei werdam afɔrbɔ kɛse no ntsi yebotum dze awerɛhyɛmu ahwɛ Jesus Christ dɛ Obotum aboa hɛn.

Hɛn mu biara nndzi mu. Ɔtɔfabi a yenntu mpon wɔ sunsum mu. Biribi twe hɛn adwen anaa yenya abagura. Yɛyɛ mfomdo. Naaso sɛ yɛdze nnuho akoma hwɛ Jesus Christ a, Obepegya hɛn, ɔaatsew hɛn efi bɔn ho, ɔdze hɛn bɔn akyɛ hɛn, na ɔaasa hɛn akoma yarba. Ɔwɔ abotar na ayamuyie; No ɔpon ho ɔdɔ no nnyi ewiei da na ɔmmbɔ adze da.33 Ɔbɔ boa hɛn ma yɛdze hɛn ahyɛmudzi no abɔ bra na yɛakrɔn hɛn ɔfrɛ mu dɛ Israel elderfo.

Na Egya no dze ndzɛmba nyina yebehia dze bɛyɛ No botae behyira hɛn: “ndzɛmba … dza ɔwɔ sor nye asaase do nyina, nkwa nye kan, Sunsum nye tum no a, Egya no ne pɛ do dze edua ne Jesus Christ Ba, no do no.”34

Sɛ kan na tum krɔnkrɔn hɛn hɛn abrabɔ mu a, ndzɛmba nwanwa na osi:

Odzi Kan, yetum hu adze! Ɔnam nyikyerɛ do yɛhyɛ ase hu dɛ mbrɛ Jesus hun ɔbaa no: traa enyi do kɔr akoma mu no.35 Sɛ yehu dɛ mbrɛ Jesus hu a, Ohyira hɛn ma yɛdze No dɔ dɔ hɔn a yɛsom hɔn no. Yɛdze No mboa no, hɔn a yɛsom hɔn no bohu Agyenkwa no na wɔatse No dɔ nkã.36

Otsĩa Ebien, yɛwɔ asɔfodzi tum! Yɛwɔ etumdzi na tum dɛ yedzi dwuma wɔ Jesus Christ ne dzin mu dze “hyira, kyerɛ kwan, bɔ ban, hyɛ dzen, na yɛsã binom yarba na yɛdze anwanwadze brɛ hɔn a [yɛ] dɔ hɔn na yesie [hɛn] awar na ebusua ebusua dwudwoodwo.”37

Otsĩa Ebiasa, Jesus Christ nye hɛn kɔ! Ɔkɔ, bea a yɛkɔ. Sɛ yɛkyerɛkyerɛ a, Ɔkyerɛkyerɛ. Sɛ yɛkyekye werɛ a, Ɔkyekye werɛ. Sɛ yehyira a, Ohyira.38

Enuanom, ana siantsir bi nnyi hɔ mma hɛn dɛ yedzi dɛw? Yɛwɔ! Yekitsa Nyankopɔn n’asɔfodzi krɔnkrɔn no. Ber a yɛhwɛ Jesus Christ, yɛdze hɛn ahyɛmudzi bɔ bra, na hɛn enyi tsim No do no, yɛnye hɛn nkyerɛbaa bɔbɔmu na yɛasom wɔ kwan krɔnkrɔn mbordo mu, aboaboa Israel a wɔabɔ hɔn apetse ano wɔ ntwamutam n’afa ebien no, yɛahyɛ hɛn ebusua ebusua dzen na yɛasɔw hɔn ano, na yeesiesie wiadze no ama Ewuradze Jesus Christ ne Mbae a Otsĩa Ebien no. Obesi. Megye ho dase

Medze m’akoma mu mpaabɔ wie iyi, dɛ hɛn nyina, obiara, bɔhwɛ Jesus Christ wɔ adwendwen biara mu. Mma nngye kyim. Mma nnsuro. Jesus Christ ne dzin mu, amen.

Nsɛnsin

  1. James E. Talmage kyerɛw dɛ nna Jesus wɔ “Capernaum sɔn mu” ber a ayarsa no sii (hwɛ Jesus the Christ [1916], 313).

  2. Hwɛ Luke 8:43–44; hwɛ Mark 5:25–29; Matthew 9:20–21 so.

  3. Luke 8:46.

  4. Mark 5:30.

  5. Mark 5:32.

  6. Luke 8:47.

  7. Mark 5:33.

  8. Luke 8:48.

  9. James E. Talmage kyerɛɛw dɛ dza nna ɔsombo kɛsenara ma ɔbaa no sen honandua mu ayarsã no nye awerɛhyɛmu dɛ Agyenkwa no dze n’akoma apɛdze maa no, na Ɔgyee ne gyedzi too mu (hwɛ Jesus the Christ, 318). Jesus sãa no honandua na sunsum mu yarba na obueii nkwagye kwan no dze maa no (hwɛ Jesus the Christ,296).

  10. Ɔyɛ adzesua dɛ nna Jairus, nhyiamudan mu panyin, no nye Jesus wɔ hɔ mber a ayarsa no sii. Nna Jesus nam rokɔ Jairus ne fie, bea a Obenyan Jairus ne babaa no efi owu mu. Ɔbɛba no dɛ nna ɔbaa no a Jesus sãa no yarba no osian n’amandzehu no ntsi nna oeyi no edzi efi nhyiamudan hɔ. Mber a Jesus sãa no yarba no, Ɔsan so daa no edzi pefee kyerɛɛ hɔn a nna wɔwɔ hɔ no, a Jairus ka ho, dɛ ɔyɛ babaa dɔfo, ɔbaa gyedzinyi, na odzi mu wɔ honandua na sunsum mu.

  11. Hwɛ D. Todd Christofferson, “The Elders Quorum” (Liahona, Esusow Aketseaba 2018, 55–58) fa nya mpɛnsampɛnsamu a ɔkɔr do wɔ nsesã a wɔdze Melchizedek Asɔfodzi quorum no bɔɔ mu kor wɔ ward mu no. Wɔkãa nsesã no botae ho asɛm kwan yi mu wɔ Nsɛmbisa horow a Wɔtaa Bisa ɔfã a ɔwɔ Erosom no website: “Having one Melchizedek Priesthood quorum in a ward unifies priesthood holders to accomplish all aspects of the work of salvation, including temple and family history work previously coordinated by the high priests group leader” (“This Is Ministering: Frequently Asked Questions,” question 8, ministering.ChurchofJesusChrist.org).

    Nsesã kakra a ɔtoa do no dze ward asɛmpakã banodzinyi na temple na ebusua abakɔsɛm fofor banodzinyi a wɔwɔ ward hɔ no ahyɛ elderfo quorum president na n’apamfo hɔn akwankyerɛ ase. Erosom ebusua ebusua wɔ president na n’apamfo hɔn akwankyerɛ ase dada no, nsesa yinom dze nkwagye ho edwuma baanodzidwuma no ahyɛ elderfo quorum horow no ase, a Relief Societyfo boa. Nokwar, bishop no kitsa nkwagye ho edwuma nsaafee wɔ ward hɔ, naaso ɔkyɛ dɛm edwuma ho asodzi na tumdzi no ma elderfo quorum president no ama bishop no eetum enya mber pii ama ɔnoara n’ebusua, ɔahyɛ mbabun no dzen, na ɔasom dɛ ɔtsɛmbuafo wɔ Israel.

  12. Hwɛ Russell M. Nelson, “Let Us All Press On,” Liahona, Esusow Aketseaba 2018, 118–19; Russell M. Nelson, “Becoming Exemplary Latter-day Saints,” Liahona, Ɔberɛfɛw 2018, 113–14; Quentin L. Cook, “Deep and Lasting Conversion to Heavenly Father and the Lord Jesus Christ,” Liahona, Ɔberɛfɛw 2018, 8–12.

  13. Egya no somaa Jesus Christ wɔ wiadze (hwɛ John 17:18).

  14. Nkyerɛkyerɛ na Ahyɛmudzi 6:36–37.

  15. Abraham 3:27.

  16. Abraham 3:27.

  17. Moses 4:2.

  18. Ntotoho pii wɔ kyerɛwnsɛm no mu a ɔkã nsɛm a Jesus kãe a ɔfa Ɔreyɛ N’Egya n’edwuma na Ɔrekyerɛkyerɛ N’Egya ne nkyerɛkyerɛ ho. Hwɛ, mfatoho, John 5:19 (Jesus yɛ dza Ohu dɛ Egya no yɛ); John 5:36 (Egya no maa Ne Ba edwuma dɛ ɔnyɛ); John 8:26 (Jesus kyerɛkyerɛɛ dza Onyae fii N’Egya hɔ); John 14:28 (Jesus paa mu kãa dɛ ,”M’Egya sõ sen me”); 3 Nephi 11:32 (Ne nkyerɛkyerɛ nye nkyerɛkyerɛ a N’Egya dze maa No).

  19. John 14:31.

  20. John 8:29.

  21. John 6:38; san so hwɛ John 5:30.

  22. Luke 22:42.

  23. Kasafua hwɛ wɔ asɛnsin yi mu (hwɛ Nkyerɛkyerɛ na Ahyɛmudzi 6:36–37) wɔ nkyerɛase horow a ɔnye Ewuradze no ɔfrɛ no kɔdo: dɛ gyina enyim (anaa dan no); twe w’adwen kɔ; dan biribi; hwehwɛ adze; fa enyidado tweɔn; fa to adwen do dɛ ewiei; enyida kwan anaa erohwɛ kwan (hwɛ “Look,” merriam-webster.com).

  24. Hwɛ Nkyerɛkyerɛ na Ahyɛmudzi 121:41–42. Christsu a wɔbobɔ edzin wɔ kyerɛwsɛm mu no yɛ Sunsum akyɛdze a wɔnam Jesus Christ n’ehumbɔbɔr na n’adom do ba. Ɔno na ɔma Israel elderfo no Ne elderfo.

  25. Russell M. Nelson, “Drawing the Power of Jesus Christ into Our Lives,” Liahona, Esusow Aketseaba 2017, 41.

  26. Hwɛ merriam-webster.com, “rivet.”

  27. Ahyɛmudzi abrabɔ ho adwen mpɛnsampɛnsamu no, hwɛ Donald L. Hallstrom, “Living a Covenant Life,” Ensign, Obiradzi 2013, 46–49. Woyii asɛm no fii kasa bi a wɔmaa no wɔ Brigham Young University–Idaho wɔ Esusow Aketseaba 2011 mu. Kasa ne nyina no, hwɛ Donald L. Hallstrom, “A Covenant Life” (Brigham Young University–Idaho devotional, Esusow Aketseaba 10, 2011), byui.edu.

  28. Hwɛ Jeremiah 31:31–33, bea a Ewuradze paa mu kã dɛ Ɔnye Israel fifo bedzi ahyɛmu fofor a ɔbɛkyerɛw no wɔ hɔn akoma mu. Ahyɛmu su a ɔakyerɛw no wɔ hɛn akoma mu, anaa ahyɛmu a wɔtse hɛn akoma mu no, wɔhu no wɔ Paul ne nkyerɛwee so mu (hwɛ 2 Corinthfo 3:3; Hebrewfo 8:10). Nsakyeree na akoma ho mpɛnsampɛnsamu no, hwɛ David A. Bednar, “Converted unto the Lord,” Liahona, Ɔberɛfɛw 2012, 106–9.

  29. Sacrament mpaabɔ wɔ paano no do no kã no ahomkã mu ara hɛn ɔdomankoma ahyɛmudzi nkitahodzi a yɛnye hɛn Ɔsor Egya wɔ. Egya no nkwagye ho nhyehyɛɛ mu no, yɛnye hɛn Ɔsor Egya dzi ahyɛmu horow, mbom na yɛnam Ewuradze Jesus Christ do; Ɔno nye Ntamugyinafo no, na yenya ahyɛmudzi no botae na yɛfata anohoba nhyira no. Sacrament ayɛdze mu no yɛgye dase kyerɛ Egya no (tse dɛ ma, yɛnye No dzi ahyɛmu fofor) dɛ yɛwɔ pɛ dɛ yɛfa Jesus Christ ne dzin to hɛn do, yɛakaa No aber nyina, na yeesie Ne mbransɛm ama yeenya No Sunsum (Sunsum Krɔnkrɔn no) ma ɔnye hɛn atsena.

    Akyɛdze horow a ɔwɔ Egya n’anohoba mu no nam Jesus Christ no ɔpon na ahoɔdzen tum do ba. Mfatoho, dɛ mbrɛ President Russell M. Nelson akyerɛkyerɛ no, Jesus Christ “nye enyigye nyinara ne farbaa ” (hwɛ “Joy and Spiritual Survival,” Liahona, Ɔberɛfɛw 2016, 82) Dɛm ntsi, yɛdze hɛn enyi tsim Jesus Christ do dze enyigye ba hɛn abrabɔ mu a hɛn gyinabew horow mmfa ho.

  30. President Ezra Taft Benson kãa nsesã wɔ suban na dza yetsim do no nsunsuando ho asɛm mber a ɔkãa dɛ, “Sɛ setsie gyae dɛ ɔreyɛ hɛn atseetsee na ɔbɛyɛ hɛn ahwehwɛdze a, dɛm ber mu noara Nyankopɔn dze tum kyɛ hɛn” (wɔ Donald L. Staheli, “Obedience—Life’s Great Challenge,” Ensign, Esusow Aketseaba 1998, 82).

  31. John 16:32.

  32. Mpɛnsampɛnsamu a ɔkekãkaho a ɔfa hɛnho hia ma Egya na Ɔba ho nokwar wɔ enyikadze mu, ɔdɔ, na wɔwɔ hɛn abrabɔ mu no, hwɛ Jeffrey R. Holland, “The Grandeur of God,” Liahona, Ɔberɛfɛw 2003, 70–73; Henry B. Eyring, “Walk with Me,” Liahona, Esusow Aketseaba 2017, 82–85. Hwɛ Matthew 18:20; 28:20; Nkyerɛkyerɛ na Ahyɛmudzi 6:32; 29:5; 38:7; 61:36; 84:88 so.

  33. Hwɛ Romanfo 8:35–39; 1 Corinthfo 13:1–8; Moroni 7:46–47.

  34. Nkyerɛkyerɛ na Ahyɛmudzi 50:27. Hyɛ no nsew dɛ nyia biara a Ewuradze ahyɛ no sɔfo na ɔasoma no no, anohoba yi fa ho, na ɔbata edwuma tsitisr a wɔdze ama no noho.

    “Dɛm nyimpa no ara so na woeyi no dɛ ɔyɛ ɔkɛse, ɔmmfa ho dɛ ɔyɛ kumabaa na hom nyina mu akowaa.

    “Dɛm ntsi, ɔno na ndzɛmba nyina yɛ nedze; osiandɛ ndzɛmba nyina hyɛ n’ase, dza ɔwɔ sor nye asaase do nyina, nkwa nye kan, Sunsum nye tum no a, Egya no ne pɛ do dze edua Jesus Christ, Ne Ba, no do no.

    “Mbom nyimpa biara nnyi hɔ a ɔwɔ ndzɛmba nyina, gyedɛ wɔatsew noho na wɔahohor bɔn nyina efi ho.

    “Na sɛ hom tsew homho na wɔhohor bɔn nyina fi hɔ a, hom bebisa biribiara a hom pɛ wɔ Jesus ne dzin mu, na ɔbɛyɛ.”(Nkyerɛkyerɛ na Ahyɛmudzi 50:26–29).

  35. Hwɛ 1 Samuel 16:7; 1 Corinthfo 2:14. Nhyira yi a ɔfa no erohwɛ dɛ mbrɛ Jesus hwɛ adze ho mfatoho, hwɛ President Henry B. Eyring no sũahu asɛm ber a nna ɔyɛ aberantsɛba bi a ɔayɛ mfomdo ne bishop no. Ewuradze see dɛm ber no Bishop Eyring dɛ, “Merema wo kwan ma ehu no dɛ mbrɛ emi mohu no” (“Walk with Me,” 84).

  36. Iyi nye anohoba na asodzi a Agyenkwa no dze maa nkorɔfo a nna wɔwɔ Bountiful temple hɔ no. Ɔhyɛɛ hɔn dɛ wɔmbɔ hɔn bra ama Ne kan na Ne fasusu aabɛtsena hɔn mu, ama woeetum eekura No sor dɛ Wiadze ne kan wɔ hɔn abrabɔ mu na wɔ hɔn nsato a wɔdze frɛ binom dɛ wɔmbra No hɔ no. Dɛ mbrɛ N’akadofo bɔɔ bra na wɔtoo nsa frɛɛ no, binom bɛtse Ne nkã na wɔahwɛ No wɔ Ewuradze no nkowaa mu. (Hwɛ 3 Nephi 9:14, 22.)

  37. Hwɛ Russell M. Nelson, “The Price of Priesthood Power,” Liahona, Esusow Aketseaba 2016, 68.

  38. Hwɛ Nkyerɛkyerɛ na Ahyɛmudzi 84:88.