2010–2019
Quorum no: Bea a Wɔnye Wo Kã ho
Ebɔwbira 2019 Wiadze Mfɛndzanan Ehyiadzi

Quorum no: Bea a Wɔnye Wo Kã ho

Elder Carl B. Cook ne Kasaa

Ɔkã Eduosuon no hɔn Presidency ho

Ewuradze pɛ dɛ hom kyekyer quorum a ɔyɛ dzen. Ber a Ɔroboaboa Ne mba ano yi, wohia bea a wɔnye hɔn bɛkã ho na woenyin.

Afe 2010 mu no, nna Andre Sebako yɛ aberantsɛba a ɔrohwehwɛ nokwar. Nna ɔmmbɔɔ akoma mu nokwar mpaabɔ da, naaso ɔyɛɛ n’adwen dɛ ɔbɔbɔ ahwɛ. N’ekyir no annkyɛr na ohyiaa asɛmpasomafo no. Wɔmaa no krataa sin a wɔdze kyekyɛ a Mormon Nwoma no mfonyin wɔ do. Andre tsee biribi nkã na obisaa asɛmpasomafo no sɛ wɔbɔtɔn buukuu no ama no a. Wɔsee no dɛ sɛ ɔbɛba asɔr dze a, obotum enya buukuu no kwa.1

Andre nonko kɔr Mochudi Branch wɔ Botswana a nna wɔkyekyeree no, ɔnnkyeree. Naaso nna nkorbata no wɔ asɔrmba 40 a wɔyɛ kor na wɔdɔ hɔnho.2 Wɔtsen hɔn abasa mu yɛɛ Andre etuu. Asɛmpasomafo no nye no yɛɛ adzesũa na wonumaa no. Nna ɔyɛ enyigye!

Mbom ekyir no bowie dɛn? Andre besi dɛn akɔ do abɔ hyew? Woana bɔboa no ma oetu mpon wɔ ahyɛmu anamɔn kwan no do? Dɛm nsɛmbisa no ne nyiano kor nye n’asɔfodzi quorum no!3

Obiara a okitsa asɔfodzi no, ɔmmfa ho gyinabew a ɔwɔ mu, onya mfaso fi quorum a ɔyɛ dzen mu. Mo nuanom nkumaa a hom kitsa Aaron Asɔfodzifo no, Ewuradze pɛ dɛ hom kyekyer quorum a ɔyɛ dzen, bea a aberantsɛba biara wɔnye no kã ho, bea a Ewuradze no Sunsum wɔ, bea a quorum mba no nyina wɔyɛ hɔn etuu na wobu hɔn. Ber a Ewuradze roboaboa Ne mba ano yi, wohia bea a wɔnye hɔn bɛkã ho na woenyin.

Ber a hom hwehwɛ nkenyan no, quorum presidency-nyi biara bedzi enyim4 na oenya ɔdɔ na enuayɛ wɔ quorum mba no nyina mu. Hom nya ahwɛyie soronko mma afoforfo, hɔn a wɔmmbɔ hyew, anaa hɔn a wɔwɔ ehiadze soronko binom.5 Hom dze asɔfodzi tum no, hom bekyekyer quorum a ɔyɛ dzen.6 Na quorum a ɔyɛ dzen a nkabɔmu wɔ mu no boa aberantsɛba n’abrabɔ ara yie.

Ber a Asɔr no dze asɛmpa adzesua a wosũa no fie fofor no too gua no,7 binom dween asɔrmba tse dɛ Andre ho na wobisaa dɛ, “Na mbasirmba a wofi ebusua gyinabew a wonnsũa asɛmpa na bea a wɔtse no ɔnnyɛ mbrɛ wosũa na wɔdze asɛmpa no bɔ bra no ɛ? Ana wobegya hɔn ekyir?”

Oho! Oho wonnkotum egya obiara wɔ ekyir! Ewuradze dɔ aberantsɛba na akataasiaba biara. Hɛn, dɛ yekitsa asɔfodzi no, yɛyɛ Ewuradze Ne Nsa. Hɛn nye Asɔr n’abamba ɔdze boa fie adzesũa mbɔdzembɔ no. Bea a mboa ofi fie tɔ sin no, asɔfodzi quorum horow nye baanodzifo binom na anyɛnkofo hwɛ na wɔma ankorankor na ebusua ebusua bambɔ a wohia.

Meehu a wɔdze reyɛ edwuma. Menya mu sũahu. Ber a midzii mfe esia no, m’awofo gyaa awar na m’egya gyaa mba nkakraba beenum guu me maame do. Me maame hyɛɛ ase dɛ ɔreyɛ edwuma ama ɔdze aahwɛ hɛn. Ber bi mu no okehiaa dɛ ɔyɛ edwuma kor so kã ho na ɔkɔsɔw skuul do so. Nna onnya mber nntsetse hɛn. Naaso nananom, wɔfanom, auntfo, bishopfo na fie akyerɛkyerɛfo baa kan bɔboaa me nã dɛɛfo no.

Nna mowɔ quorum. M’enyisɔ m’anyɛnkofo—m’enuanom—a wɔdɔɔ me na wɔbɔɔ me abamba. Nna mo quorum yɛ bea a wɔnye wo kã ho. Bia binom dween dɛ mennsɛ bi na mebedzi nkõgu osian m’ebusua gyinabew no ntsi. Bia na ɔtse dɛm. Naaso asɔfodzi quorum horow no sesãa dza ɔkõ tsia no. Mo quorum bɔɔ mu hyiaa moho na wohyiraa m’abrabɔ kɛse noara.

Hɔn a wɔnnsɛ bi na wobedzi nkõgu etwa hɛnho ehyia. Bia na kwan bi do no yɛtse dɛmara. Naaso hɛn mu kor biara a ɔwɔ ha no wɔ quorum, bea a hɛn nyina botum agye ahoɔdzen efi na yɛama ahoɔdzen. Quorum wɔ hɔ “ma ɔbaako biara na ɔbaako biara wɔ hɔ ma hɛn nyina.”8 Ɔyɛ bea a yɛkyerɛkyerɛ hɛnho adze, yɛsom hɛnho, na yɛkyekyer koryɛ na enuayɛ ber a yɛrosom Nyankopɔn no.9 Ɔyɛ bea a anwanwadze sisi.

Mepɛ dɛ mekã kyerɛ hom anwanwadze binom a osisii wɔ Andre no quorum wɔ Mochudi. Ber a merekyɛ mfatoho yi, hom nhyɛ fapem horow a ɔhyɛ quorum biara ɔdze dzi dwuma no dzen.

Wonumaa Andre ekyir no, ɔkãa asɛmpasomafo no ho ber a wɔrekyerɛkyerɛ mberantsɛ baanan binom ho a, hɔn so wonumaa hɔn. Afei wɔayɛ mberantsɛmba beenum. Wɔhyɛɛ ase hyɛɛ hɔnho na nkorbata no dzen.

Thuso, aberantsɛba a ɔtɔ do esia no, wonumaa no. Thuso nye n’anyɛnkofo baasa kyɛɛ asɛmpa no, na annkyɛr na wɔbɛyɛɛ baakron.

Jesus Christ esuafo no nna kwan yi do na wɔboaboaa hɔn ano—nkakrankakra, ber hɔn anyɛnkofo too nsa frɛɛ hɔn no. Tsetse no, ber a Andrew hun Agyenkwa no, ɔkɔr no nua Simon hɔ ntsɛm na “ɔdze no baa Jesus nkyɛn.”10 Dɛmara, Phillip bɛyɛɛ Christ ɔkãdofo no ekyir no ara no, ɔtoo nsa frɛɛ ne nyɛnko Nathanael dɛ “bra bɔhwɛ.”11

Mochudi kurow mu no, annkyɛr na aberantsɛba a ɔtɔ do 10 no bɔdɔɔm asɔr no. Asɛmpasomafo no hun nyia ɔtɔ do 11 no. Na aberantsɛ a ɔtɔ do 12 no ohun asɛmpa no no nsunsuando wɔ n’anyɛnkofo do ekyir no, na wonuma no.

Mochudi Branch asɔrmba no enyi gyee mbordo. Mberantsɛmba yinom “wɔsakyeer hɔn maa Ewuradze, na … [wɔ]baa asɔr no mu.”12

Mormon Nwoma no dzii akotsen ara yie wɔ hɔn nsakyeree ho.13 Thuso kaa dɛ, “Mehyɛɛ ase dɛ merekenkan Mormon Nwoma no … ber biara a menya kwan no, wɔ fie, wɔ skuul, beebiara.”14

Oratile n’anyɛnkofo hɔn fasusu do na ɔtwee no baa asɛmpa no ho. Ɔkyerɛkyerɛ mu dɛ, “[Ɔyɛ] dɛ ma wɔasesã amonmu hɔ ara. … Modween ho dɛ … buukuu kakraba no … a ɔhyɛ hɔn ho no a wɔhyɛɛ ase dze rikyin … skuul hɔ no kã ho. Nna mutum hu dɛ wɔabɛyɛ mbanyin pa. … Nna [me]pɛ dɛ mo so mesesã.”15

Mfonyin
Mochudu Branch

Mberantsɛmba 12 no nyina wɔboaboa hɔn ano na wonumaa hɔn wɔ mfe ebien ntamu. Kor biara ɔno nko nye n’ebusua mu ba a ɔyɛ Asɔrba. Naaso hɔn Asɔr ebusua no bɔɔ hɔn abamba, a President Rakwela,16 hɔn branch president; Elder na Akyerɛbaa Taylor17 asɛmpasomafo awarfo mpanyimfo, na asɔrmba binom so kã ho.

Onuabanyin Junior,18 quorum baanodzinyi, too nsa frɛɛ mberantsɛmba no baa ne fie Kwesida ewiaber na ɔkyerɛɛ hɔn adze. Mberantsɛ no bɔɔ mu sũaa kyerɛwsɛm no a wɔtaa yɛɛ fie ewimbir nhyiamu.

Mfonyin
Asɔrmba a wɔresera

Onuabanyin Junior nye hɔn kɛseraa asɔrmba, nkorɔfo a asɛmpasomafo no rekyerɛkyerɛ hɔn, nye obiara a ohia nsera. Mberantsɛ 12 no nyina hyɛɛ Onuabanyin Junior ne hɛn no ekyir. Osian hɔn wɔ efiefi mu dɛ adamfo ebien ebien anaa ebiasa ebiasa na ekyir no ɔkɛfaa hɔn.

Nna mbrɛana mberantsɛ yinom esũa asɛmpa no na wonnyi atsenkã biara dɛ wonyim dodow no, naaso Onuabanyin Junior kãa kyerɛɛ hɔn dɛ wɔnye nkorɔfo a wɔsera hɔn no nkyɛ adze kor anaa ebien bi a wonyim. Mberantsɛ yinom a wokitsa asɔfodzi no kyerɛkyerɛe, wɔbɔɔ mpaa, na wɔboae ma wɔhwɛɛ Asɔr no do.19 Wɔhyɛɛ hɔn asɔfodzi asodzi no mã na wonyaa enyigye wɔ hɔn som mu.

Mfonyin
Enuanom Mbanyin Kuw

Andre see dɛ, Yɛbɔɔ mu dzii agor, yɛserewee bɔɔ mu, yɛbɔɔ mu sũi, na yɛbenyaa enuayɛ.”20 Nokwar, wɔfrɛɛ hɔnho “Enuanom Kuw.”

Wɔyɛɛ botae kor dɛ hɔn nyina bɔkɔ asɛmpakã som. Osiandɛ nna hɔn nko na wɔyɛ Asɔrmba wɔ hɔn ebusua ebusua mu no ntsi, wohyiaa akwansiwdze pii a ɔsɛ dɛ wodzi do konyim, naaso wɔboaa hɔnho nkorkor ma woduaa mu.

Mberantsɛ yinom nyaa hɔn asɛmpakã ɔfrɛ, nkorkor. Hɔn a wodzii kan kɔree no kyerɛɛw nkrataa baa fie dze brɛɛ hɔn a wɔda ho reyɛ ahosiesie no, kyɛɛ hɔn sũahu na wɔhyɛɛ hɔn nkuran dɛ wɔnkɔ som. Mberantsɛ no hɔn mu dubiako soom asɛmpakã.

Mberantsɛ yinom nye hɔn ebusua ebusua kyɛɛ asɛmpa no. Enãnom, nkyerɛbaa, nuambanyin, anyɛnkofo, nye nkorɔfo a wɔkyerɛɛ hɔn adze wɔ hɔn asɛmpakã ber no, wɔsakyeree na wonumaa hɔn. Anwanwadze sisii na abrabɔ dodow wonntum nkan na wonyaa nhyira.

Mutum tse dɛ hom mu binom rodwen dɛ bia anwanwadze a ɔtse dɛm no gyedɛ Ebibiman mu, bea a ayɛ asaase pa a Israel mboano no rokɔ do ntsɛm no, nko na woesi hɔ. Mbom, megye dase dɛ fapem horow a wɔdze dzii dwuma wɔ Mochudi Branch no yɛ nokwar wɔ beebiara. Beebiara ewɔ no, wo quorum botum edua ahokekã na asɛmpa ne nkyɛe do enyin. Sɛ osuanyi kor mpo tsen kɔ nyɛnko bi do a, baako botum abɛyɛ beenu. Beenu botum abɛyɛ baanan. Baanan botum abɛyɛ baawɔtwe. Na baawɔtwe abɛyɛ duebien. Nkorbata botum horow abɛyɛ ward ahorow.

Mfonyin
Mochudi Ward

Agyenkwa no kyerɛkyerɛɛ dɛ, “Beebira a beenu anaa baasa [anaa no mboree] edzi ehyia wɔ me dzin mu, … hɔ na mowɔ hɔn finimfin.”21 Ɔsor Egya resiesie nkorɔfo a woetwa hɛn ho nyina ehyia no hɔn adwen na hɔn akoma. Yebotum edzi nkenyan do, atsen fɛkuwbɔ nsa, akyɛ nokwar no, na yɛato nsa afrɛ binom ma wɔakenkan Mormon Nwoma no, na wɔadɔ na wɔama hɔn abamba ber a wɔba bohu hɛn Agyenkwa no.

Ɔka kakra ma aso mfe 10 fitsi ber a Mochudi Enuanom Kuw no bɔɔ mu hyɛɛ hɔn akwantu no ase.

Katlego see dɛ, “Kwan tsentsen apaa hɛn ntamu dze naaso yɛda ho wɔ hɔ ma hɛnho nkorkor.”22

Ɔyɛ me mpaabɔ dɛ yɛbɛgye Ewuradze ne nsato dɛ yɛnye No nyɛ nkabɔmu wɔ hɛn asɔfodzi quorum horow no mu ama quorum biara eetum aabɛyɛ bea a wɔnye wo kã ho, bea a wɔboaboa ano, bea a onyin.

Jesus Christ nye hɛn Agyenkwa, na iyi nye N’edwuma. Megye ho dase wɔ Jesus Christ ne dzin krɔnkrɔn no mu, amen.

Nsɛnsin

  1. Hwɛ Mark na Shirley Taylor, mboaboa ano nsɛm, The Band of Brothers (Mochudi Branch nsakyeree nsɛm na dasegye horow, 2012–13), 4, Asɔr Abakɔsɛm Nwoma Korabea, Salt Lake City.

  2. Nankasa ne nkrataa a woedzi ho akyerɛw, Andre Sebako, Band of Brothers resource files, 2011–19, Asɔr Abakɔsɛm Nwoma Korabea, Salt Lake City.

  3. President Boyd K. Packer kãa dɛ: “Sɛ banyin bi kitsa asɔfodzi a, ɔdɔm biribi a ɔsõ kyɛn ɔno ankasa. Ɔyɛ biribi a ɔwɔ hɔ a obotum esi ho enyimpi emudzi mu” (“The Circle of Sisters,” Ensign, Ɔberɛfɛw 1980, 109–10).

  4. President Russell M. Nelson kyerɛkyerɛɛ mbrɛ wosi hwehwɛ nyikyerɛ na nkyii ɔkãa dɛ, “Ekɔ do fa kwan yi do dabiara no, bosom bosom, afe afe no, ibenyin wɔ nyikyerɛ fapem no mu’” (“Revelation for the Church, Revelation for Our Lives,” Liahona, Esusow Aketseaba 2018, 95; hwɛ iyi so Teachings of Presidents of the Church: Joseph Smith [2007], 132).

  5. Hwɛ Handbook 2: Administering the Church (2010), 8.3.2.

  6. Binom so ma mboa, a bishop na n’apamfo na afotufo kã ho. Elder Ronald A. Rasband hyɛɛ no nsew dɛ Melchizedek Asɔfodzi quorum horow ne nhyehyɛɛ fofor no a, wɔbɔɔ ho amandzɛɛ wɔ 31 Ebɔw 2018 ne mfaso kor nye, “ɔbɛma bishop no kwan ma ɔdze asodzi binom ama elderfo quorum na Relief Society presidentfo, ama bishop na n’apamfo no etsim wɔ hɔn dwuma tsitsir no do—nkankara dɛ wɔbɔhwɛ nkataasia na mberantsɛ a wokitsa Aaron Asɔfodzi no do” (“Behold! A Royal Army,” Liahona, Esusow Aketseaba 2018, 59). Abɔfo so bɔboa. Hɔn a wokitsa Aaron Asɔfodzi no kitsa abɔfo hɔn som ho nsaafee (hwɛ Nkyerɛkyerɛ na Ahyɛmudzi 13:1hwɛ Dale G. Renlund na Ruth Lybbert Renlund so, The Melchizedek Priesthood [2018], 26). Elder Jeffrey R. Holland see dɛ: Ɔtaa dɛ [abɔfo asomfo] no wonnhu hɔn. Ɔtɔfabi a, wohu hɔn. Naaso dɛ wohu hɔn anaa wonnhu hɔn no daa wɔbɛn hɛn. Ɔtɔfabi a hɔn dwuma krɔn kɛse noara na ɔwɔ adze tsitisr ma wiadze no nyina. Ɔtɔfabi a amandzɛɛbɔ no yɛ kokoa mu. Dakor dakor no abɔfo hɔn botae nye dɛ wɔbɔ kɔkɔ. Mbom ɔtaa dɛ wɔma awerɛkyekye, wɔma ehumbɔbɔr ahwɛdo bi, kwankyerɛ wɔ nkõdzen ber mu” (“The Ministry of Angels,” Liahona, Ɔberɛfɛw 2008, 29). Sɛ hom pɛ mboa a ɔtse dɛm a, hom botum “[a]serɛ na hom benya” (John:16:24).

  7. See Russell M. Nelson, “Opening Remarks; Liahona, Ɔberɛfɛw 2018, 6–8.

  8. Hwɛ Alexandre Dumas, The Three Musketeers (1844).

  9. Hwɛ Handbook 2, 8.1.2.

  10. Hwɛ John 1:40–42.

  11. Hwɛ John 1:43–46.

  12. 3 Nephi 28:23.

  13. Hwɛ D. Todd Christofferson, “The Power of the Book of Mormon” (2017 Nsɛmpakã Presidentfo Ntsetsee Nhyiamu, Obiradzi 27, 2017).

  14. Thuso Molefe, wɔ Taylor, The Band of Brothers, 22 mu.

  15. Oratile Molosankwa, wɔ Taylor, The Band of Brothers, 31–32 mu.

  16. Lucas Rakwela, Mochudi, Botswana.

  17. Mark na Shirley Taylor, Idaho, USA.

  18. Cilvester Junior Kgosiemang, Mochudi, Botswana.

  19. Hwɛ Nkyerɛkyerɛ na Ahyɛmudzi 20:46–47, 53, 54.

  20. Nankasa ne nkrataa a woedzi ho akyerɛw, Letanang Andre Sebako, Band of Brothers resource files.

  21. Nkyerɛkyerɛ na Ahyɛmudzi 6:32.

  22. Katlego Mongole, wɔ “Band of Brothers 2nd Generation” (nsɛm mboano a wɔmmfa mmpue guado), 21 mu.