Gyedzi mu Tsipiama no Tum no

Mber pii na matse asɔfodzi baanodzifo dɛ wɔreda hɔn a wɔsom hɔn no ase wɔ gyedzi mu tsiapia a wɔdze ma hɔn no. Etse hɔn ndze a ayɛ botoo a, ihu dɛ hɔn enyisɔ no dɔ bun mu na ɔyɛ nokwar. Mo botae ndɛ nye dɛ mekã Ewuradze N’enyisɔ wɔ tsipiama a hom dze ma No somfo a wɔwɔ N’Asɔr mu no. Na mahyɛ hom nkuran so ma hom dze tum no a hom dze hom gyedzi ma binom tsipia no edzi dwuma ma oenyin.

Ansaana wɔrobɔwo wo hom no, hom kyerɛɛ dɛm tum no. Hom ndwen dza yenyim a ɔfa sunsum wiadze ho ansaana wɔbɔwo hɛn no. Hɛn Ɔsor Egya dze Ne nhyehyɛɛ bi maa Ne mba. Nna yɛwɔ hɔ. Lucifer, hɛn sunsum mu nua, tsiaa nhyehyɛɛ no a ɔbɛma yenya kwan yɛasan mu eyi dza yɛpɛ. Jehovah, Ɔsor Egya No Dɔba no, maa nhyehyɛɛ no tsipia. Lucifer dzii etuatsew enyim. Jehovah ne tsipiama ndze no dzii konyim, na Ɔdze Noho maa dɛ Ɔbɛyɛ hɛn Agyenkwa.

Nokwar dɛ ewɔ ɔnnkyebo asetsena mu seisei no ma hɛn awerɛhyɛmu dɛ emaa Egya na Agyenkwa no tsipia. Ɔgyee gyedzi wɔ Jesus Christ mu ma edze maa enyigye ho nhyehyɛɛ na Jesus Christ ne sibew a ɔwɔ mu no tsipia ber a nna inyim ɔhaw a ebehyia wɔ ɔnnkyebo abrabɔ yi mu no ketseaba bi.

Wo gyedzi a edze ma Nyankopɔn asomfo tsipia no ayɛ w’enyigye ne farbaa wɔ abrabɔ yi mu so. Ber a igyee asɛmpasomafo ne tafɛrbanyinmbɔmu dɛ ibɔbɔ mpaa dze ehu dɛ Mormon Nwoma no yɛ Nyame n’asɛm no, inyaa gyedzi dɛ ebɛma Ewuradze no somfo tsipia. Ber a egyee nsato too mu dɛ wobonuma wo no, emaa Nyame somfo ahobrɛadzefo tsipia.

Ber a emaa obi dze ne nsa guu wo tsirdo na ɔkãa dɛ, “Gye Sunsum Krɔnkrɔn no,” emaa no tsipia dɛ onyia okitsa Melchizedek Asɔfodzi.

Fitsi dɛm da no, ɔnam dɛ asom nokwar mu no, ema obiara a ɔdze asɔfodzi ahyɛ wo na kor biara ɔama wo asɔfodzi dzibew no, tsipia.

W’asɔfodzi ahyɛse sũahu mu no, tsipiama kor biara yɛɛ dza edze wo werɛ rehyɛ Nyame somfo mu ara. Afei, hom mu dodowara akɔ kan edu gyinabew a ebɛma tsipia no hia ndwenho ara yie.

Ɔwoara na isan mu yi dɛ ebɛma hɔn a Ewuradze afrɛ hɔn nyina tsipia—wɔ dzibew biara Ɔafrɛ hɔn no mu. Dɛm nsanmuyi no kɔ do wɔ ehyiadzi horow mu wɔ wiadze nyina mu. Ɔakɔ do wɔ iyi mu. Nhyiamu a ɔtse dɛm no, wɔkenkan mbarimba na mbaa edzin—Nyame asomfo—na wɔto nsa frɛ wo dɛ ma wo nsa do fama tsipia. Ibotum ekwetsir wo tsipia ambatow, anaa ibotum edze wo gyedzi tsipiama abɔ anohoba. Erema wo nsa do dze ama tsipia no, ibɔ anohoba bi. Enye Nyame a, iyinom yɛ no somfo no, bɔ anohoba dɛ ebɛma hɔn tsipia.

Iyinom yɛ adasa a wonndzi mu, tse dɛ ɔwoara. Irisie w’anohoba no bɛgye gyedzi a onnhihim dɛ Ewuradze na Ɔfrɛɛ hɔn. Erisie dɛm anohoba no so dze onnyiewiei enyigye bɛba. Ennsie a ɔdze awerɛhow bɛba ɔwo na hɔn a edɔ hɔn no do—na ahwerdze a ɔbor dza ibotum esusu ho.

Bia woebisa wo, anaa wobebisa wo, sɛ ema wo bishop, stake president, Wiadze Mfɛndzanan Etumdzifo, na Wiadze Mfɛndzanan Asɔr Edzibewdzifo tsipia a. Bia ɔbɛba dɛ wɔbɛserɛ wo ma ama edzibewdzifo na baanodzifo tsipia wɔ ehyiadzi bi mu. Ɔtɔfabi a ɔbɛba wɔ kokoamu mpɛnsapɛnsamu a enye bishop anaa stake president yɛ.

M’afotu nye dɛ fa ahwɛyie na mpaabɔ mu ara bisa woho dɛm nsɛmbisa no ansaana ber no edu. Ereyɛ no, ibotum adwen afa ndaasa yi ɔadwendwen, wo nsɛnkã, na wo ndzeyɛɛ. Bɔ mbɔdzen kaa na dwendwen wo nyiano a edze bɛma ber a Christ nye wo bɛyɛ mpɛnsapɛnsamu no, hu dɛ dabi Ɔbɛyɛ. Ibotum ayɛ ahoboa ber a iribisa woho nsɛmbisa a ɔtse dɛ dza odzi do yinom:

1. Ana madwen anaa makasa afa honandua mu mberɛwyɛ a ɔwɔ nkorɔfo a mabɔ anohoba dɛ mebɛma hɔn tsipia a?

2. Ana mahwehwɛ dasedzi dɛ Ewuradze na Odzi hɔn kan?

3. Ana medzi hɔn baanodzi ekyir enyidahɔ na nokwar mu a?

4. Ana makã dasedzi a mutum hu dɛ wɔyɛ Ewuradze asomfo no akyerɛ a?

5. Ana metaa bɔ hɔn edzin dze ɔdɔ atsenkã bɔ mpaa ma hɔn a?

Hɛn mu dodowara no, dɛm nsɛmbisa no begya hɛn ma yɛayɛ basaa na yehu dɛ yehia nnuho. Nyame hyɛ hɛn mbra dɛ mma yemmbua nkorɔfo atsɛn kyew, naaso abrabɔ mu no, ɔyɛ dzen dɛ yebekwetsir. Dwumadzi faara a yɛnye nkorɔfo dzi no ogya hɛn ma yesusu hɔn. Na hɛn abrabɔ n’afã kɛse mu no, yɛdze hɛnho toto binom ho. Siantsir pii na ɔma yɛyɛ dɛm, binom tɔ asowa mu, mbom ɔtaa gya hɛn ma yɛkasa tsia.

President George Q. Cannon maa kɔkɔbɔ bi a medze ma hom dɛ mankasa medze. Megye dzi dɛ ɔkãa nokwar no: “Nyankopɔn na Ɔasan mu eyi N’asomfo. Ndzinoa no yɛ Nedze dɛ Obobu hɔn fɔ, sɛ wohia afɔbu a. Ɔmmfaa mmaa hɛn dɛ hɛnankasa yentwuuw hɔn enyim anaa yembu hɔn fɔ. Kaansa obiara nnyi hɔ a, mbrɛ ne gyedzi si hyɛ dzen, anaa n’Asɔfodzi no krɔn, na obotum akasa etsia hɔn a Ewuradze Asera hɔn ngo na oenya sintɔ wɔ Nyankopɔn No tumdzi a ɔwɔ asaase no do a, ɔnnkɔtwe N’ebufuhyew egu no do. Sunsum Krɔnkrɔn no twe noho fi dɛm nyimpa no mu, na ɔbɔkɔ sum mu. Dɛm na ɔtse dza, ana hom nnhu dɛ ohia paapa dɛ yɛyɛ ahwɛyie a?”¹

Mahyɛ no nsew dɛ Asɔrmba hɔn mu kɛsenara a wɔ wiadze nyina mu no wodzi nokwar ma hɔnho na hɔn a wɔhwɛ hɔn do no. Naaso, mpontu wɔ hɔ a yebotum ayɛ na otwar dɛ yɛyɛ. Yebotum epegya hɛn tum a yɛdze ma hɛn ho tsipia no akɔ sor. Obegya gyedzi na mbɔdzembɔ. Nsusui anan a medze ma hɛn dɛ yendzi do wɔ ehyiadzi yi mu yi.

1. Yebotum ahwɛ ndzeyɛɛ pɔkyee binom a hɔn a wɔkasa no kamfo, na yɛahyɛ ase ndɛ ayɛ. Yereyɛ no, hɛn tum a yɛdze ma hɔn tsipia no benyin.

2. Ber a wɔrekasa no, yebotum abɔ mpaa ama hɔn dɛ Sunsum Krɔnkrɔn no mfa hɔn nsɛm no nkɔ nkorɔfo binom a yɛdɔ hɔn no hɔn akoma mu. Sɛ ekyir no yehu dɛ hɛn mpaabɔ no wobuae a, hɛn tum a yɛdze ma dɛm baanodzifo no tsipia no bɛyɛ kɛse.

3. Yebotum abɔ mpaa dɛ wonhyira na wompegya hɔn a wɔkasa no mu binom pɔkyee. Sɛ yehu dɛ woepegya hɔn a, yebenyin wɔ hɛn gyedzi a yɛdze ma hɔn tsipia no, na obetsim.

4. Yebotum etsie nsɛm a hɔn a wɔkasa kã a ɔba dɛ hɛn ankorankor mpaabɔ a yɛdze resera mboa ne nyiano. Sɛ mbuae no ba a, na ɔbɛba, hɛn gyedzi a yɛdze ma Ewuradze n’asomfo nyina tsipia no benyin.

Dza ɔkã hɛn mpontu wɔ hɔn a wɔsom wɔ Asɔr no mu a yɛma hɔn tsipia no, nye dɛ yebohu dɛ gyinabew bi so wɔ hɔ a yebotum enya dɛm tum no mbordo. Hɔ no, obotum dze nhyira kɛsenara mpo abrɛ hɛn. Ɔno wɔ fie na ebusua mu.

Mekasa kyerɛ onua kumabaa a okitsa asɔfodzi a ɔnye ne papa tse fie. Hom ma menkã mankasa mo sũahu wɔ atsenkã a egya nya dɛ hom dze gyedzi ma no tsipia nkyerɛ hom. No hwɛbew bɛyɛ nkenyan. Naaso orihyia ɔhaw horow kyɛn dza inyim. Ɔtɔfabi a onntum nnhu kwan mu yie wɔ nsɛnhia horow a ɔda n’enyim no.

Nkamfo a edze ma no no bɔboa no kakra. Wo dɔ a ewɔ ma no bɔboa no koraa. Mbom dza ɔbɔboa no ara yie no nye nokwar nsɛm tse dɛ: “Paapa, mabɔ mpaa ama wo, na menya atsenkã dɛ Ewuradze bɔboa wo. Biribiara bɛyɛ yie. Minyim dɛ ɔbɛyɛ.”

Nsɛmfua a ɔtse dɛm no so wɔ tum sɛ idan no a, dɛ ofi egya kɔ ɔba hɔ. Sɛ ba afom kɛse a, bia wɔ sunsum adze bi mu no, obotum ama ɔaatse dɛ oeedzi nkõgu. Dɛ eyɛ n’egya no, ber no mu ara no, ɔbɛyɛ wo ahobow dɛ ber a, abɔ mpaa ahwehwɛ dza yɛ no, Sunsum Krɔnkrɔn no dze nsɛm yinom bogu w’anomu: “Ɔba, menye wo bɛnantsew kwan ne nyina do. Ewuradze dɔ wo. Yɛdze No mboa no, ibotum asan ekyir. Minyim dɛ ibotum, na ibɛyɛ. Modɔ wo.”

Asɔfodzi quorum mu na ebusua mu no, gyedzi kɛse a yɛdze ma hɛnho nkorkor tsipia no yɛ kwan a yɛdze kyekyer Zion no a Ewuradze pɛ dɛ yɛdze bɔbɔ adze no. Yɛdze No mboa no, yebotum ayɛ na yɛbɛyɛ so. Obehia adzesũa ma yɛdze hɛn akoma nyina, ahom, adwen, na ahoɔdzen dze adɔ Ewuradze na yɛadodɔ hɛn ho nkorkor dɛ mbrɛ yɛdɔ hɛnho.

Ber a yenyin wɔ Christ Ne dɛm dɔ mapã mu no, hɛn akoma gow. Dɛm dɔ no bɛma yenya ahobrɛadze a obegya hɛn ma yeenu hɛnho. Hɛn awerɛhyɛmu wɔ Ewuradze mu na hɛnho nkorkor mu no benyin. Na nkyii yɛbɛba abɛyɛ kor dɛ mbrɛ Ewuradze bɔ anohoba dɛ yɛbɛyɛ no.²

Megye dase dɛ Ɔsor Egya no nyim hom na Ɔdɔ hom. Jesus nye Christ tseasefo no. Iyi nye N’Asɔr. Yekitsa N’asɔfodzi. Ɔbɛkamfo hɛn mbɔdzembɔ dɛ hɛn tum a yɛdze dzi dwuma no benyin na yɛama hɛnho nkorkor tsipia. Megye ho dase wɔ Jesus Christ ne dzin krɔnkrɔn no mu, amen.