Kalanga Hosana

ʻE, hoku kāinga ʻofeina, ʻi heʻetau fakamanatua e ʻUluaki Mata Meʻa-hā-mai ʻa Siosefa Sāmita ki he Tamaí mo e ʻAló, ne mau ongoʻi ʻe taau ke tau fiefia fakataha ʻaki haʻatau kau ʻi he Kalanga Hosana.

Naʻe ʻuluaki fakahoko e kalanga toputapú ni ʻi he kuongá ni, ʻi hono fakatāpui ʻo e Temipale Kirtland ʻi he ʻaho 27 Māʻasi 1836. ʻOku fakahoko ia he taimí ni ʻi he fakatāpui ʻo e temipale takitaha. Ko ha fakaʻapaʻapa toputapu ia ki he Tamaí mo e ʻAló, ko e fakataipe ki he meʻa naʻe fai ʻe ha kakai tokolahi ʻi he taimi naʻe hū fakaʻeiʻeiki mai ai e Fakamoʻuí ki Selusalemá. ʻOkú ne toe fakafakapapauʻi mai e meʻa naʻe aʻusia ʻe he talavou ko Siosefá ʻi he ʻaho ko iá he Vao ʻAkau Tapú—ʻa ia, ko e Tamaí mo e ʻAló ko ha ongo Tangata nāunauʻia ʻoku tau lotu mo fakahīkihikiʻí.

Te u fakatātaaʻi atu leva he taimí ni e founga hono fakahoko e Kalanga Hosaná. ʻI heʻeku fai iá, ʻoku ou fakaafeʻi hotau kaungā-ngāue ʻi he mītiá ke nau ʻai ʻeni ke mātuʻaki toputapu ʻi he fakaʻeiʻeiki mo e fakaʻapaʻapa.

ʻOku toʻo ʻe he taha kotoa ʻoku kaú ha holoholo maʻa lanu hinehina, puke ia ʻi ha tuliki ʻe taha, pea taʻalo ia ʻi he lolotonga ʻetau lea fakataha, “Hosana, Hosana, Hosana ki he ʻOtuá mo e Lamí,” fakahoko tuʻo tolu, pea fakaʻosi ʻaki ʻa e “ʻĒmeni, ʻĒmeni, pea ʻĒmeni.” Kapau ʻoku ʻikai ke ʻi ai haʻo holoholo hinehina, te ke lava pē ke taʻalo ʻaki ho nimá.

ʻE kāinga, ʻoku ou fakaafeʻi kimoutolu he taimí ni ke mou meʻa ki ʻolunga ʻo kau ʻi he Kalanga Hosaná, ʻe hoko ai ʻa e “Hiva Hosaná” pea ʻe hivaʻi leva mo e “Ko e Laumālie ʻo e ʻOtuá.”¹

ʻI he fakaʻilonga atu ʻa e faihivá, kātaki ʻo kau mai ʻi hono hivaʻi ʻo e “Ko e Laumālie ʻo e ʻOtuá.”