Ļapļo̧k Ad Loe Jisōs Kraist ilo Mour ko Ad

Ro jeiū im jatū, ij ettā ilo aō jutak im̧aan mejāmi ilo jibbon̄in. Ij juon wōt ippāmi ilo bōro kōn kam̧m̧oolol bwe jemaron̄ koba ippān doon, ijoko kom̧ ej pād ie ipeļaakin laļ in, n̄an ron̄jake ennaan ko jān rikanaan ro ad, rijilōk ro, rilolo ro, ribōk revelesōn ro, im ritōl ro ilo aelōn̄ in kiin̄ eo an Anij. Jej pijaikļo̧k ad āinwōt armej ro ilo tōre ko an Kiin̄ Benjamin, jej kajutak im̧ōn kōppād ko ad im kōjjeļļo̧k kōjem ko ad repeļļo̧k n̄an reilo̧k n̄an rikanaan eo an Anij ioon laļ in,¹ Būreejtōn Russell M. Nelson.

Eto an baj m̧ōjņo meja ilo aō keememej ļo̧k im eto aō kar aikuj mejen pilo ko me takto rej letok bwe en em̧m̧anļo̧k aō loļo̧kjeņ. N̄e ij kōpelļo̧k mej ko meja aolep jibbon̄, laļ in ilo aō kalimjōke elukkun pok. Aolep men ko ie rejjab alikkar, retab, im reiip. Jekdo̧o̧n ļeo ippa ejitōnbōro ilo aō kalimjōke ej āinwōt juon men me ejjab alikkar jān juon eo me eļap an jitōnbōro im lukkuun jekjekin ebōktok aeņōm̧m̧an! Aikuj eo aō me ijjab kajoor ļōmņake, m̧okta jen aō kōm̧m̧an jabdewōt men ilo jinion juon raan, ej n̄an bōk mej ko meja bwe en jipan̄ eō make en̄jake ta ko rej jepoole eō im m̧ōņōņō kōn en̄jake ko rekaitoktok limo ilo aer jipan̄ eō wōnm̧anļo̧k wōt ilowaan juon raan.

Ilowaan iiō ko, ikar kile bwe m̧wil in ej kwaļo̧k aō pedped ioon ruo men ko aolep raan: kein kajuon, juon kein jerbal me ej jipan̄ kalikkar, mije, im lukkuun loe laļ in me ej jepoole eō; im kein karuo, juon aikuj kōn tōl em̧m̧an n̄an tōl eō ilo iaļ eo ejim̧we. Kilaaj in me eļam waan, imminene kake ej juon etale eo eaorōk kōn jemjerā eo aō ippān ad Rilo̧mo̧o̧r, Jisōs Kraist.

Ilo mour ko ad me ekkā aer obrak kōn kajjitōk, inepata, eddo, im iien ko rem̧m̧an, iakwe eo an ad Rilo̧mo̧o̧r n̄an kōj kajjojo im āinwōt ajri in bujen ro Nejin im barāinwōt katak ko An im kakien ko, rej kein jipan̄ ko repojak aolep raan me jemaron̄ pedped ioon bwe en juon “meram eo ej romaak, … kōmeram[ļo̧k mejed] [im] kōm̧ōkaj[ļo̧k ad] jeļā.”² Ilo ad kappukot kōjeram̧m̧an ko an Jetōb ilo mour ko ad, jenaaj maron̄, āinwōt an Jekab kar katakin, loe “men ko āinwōt aer lukkuun waļo̧k, im … āinwōt aer naaj waļo̧k.”³

Āinwōt ajri in bujen ro nejin Anij, jejeņoļo̧k im jejeram̧m̧an kōn ejouj in kein jerbal ko em̧ōj kapiti n̄an kōkm̧anm̧anļo̧k visōn ko ad ilo jetōb. Naan ko im katak ko an Jisōs Kraist āinwōt kar rekooti ilo jeje ko rekwojarjar im ennaan ko jān rikanaan ro kar kālet er, im Jetōb eo An kōn jar aolep iien, pād ilo tampeļ aolep iien, im kōn kain̄i in kwojkwoj eo aolep wiik emaron̄ jipan̄ kōjepļaaktok aenōm̧m̧an im letok menin letok eo kōn jeļā em̧m̧an jān nana me ej bōktok meram eo an Kraist im jeļā eo An n̄an kona ko ilo mour ko ad im ilo juon laļ eo me emaron̄ ekōdo̧do. Rilo̧mo̧o̧r emaron̄ āinwōt juon ad kambōj im ad pilot ilo ad jelm̧aik jim̧ōr dān ko reļae im nana ilo mour in. E emaron̄ kalikkar iaļ eo ejim̧we me ej tōl n̄an ijo jej jibadōkļo̧k indeeo. Kōn menin ta eo Enaaj kar kōņaan bwe jen loe, im ia eo Enaaj kar kōņaan bwe jen etal ie ļo̧k?

Rikanaan eo ad ejitōnbōro ekar katakin bwe “ad ejekiik rej aikuj dim ilo Rilo̧mo̧o̧r im gospel eo An” im bwe jej aikuj “reilo̧k n̄an E ilo aolep ļōmņak.”⁴ Būreejtōn Nelson ekar bar kallim̧ur bwe “ejjeļo̧k juon men eļapļo̧k an karuwaineneik Jetōb eo jān am̧ kajim̧weik jibadbad eo am̧ n̄an Jisōs Kraist. … Enaaj tōl im jineete eok ilo mour eo am̧ make eļan̄n̄e kwonaaj kōm̧m̧an am̧ iien Ippān ilo mour eo am̧—kajjojo im aolep raan.⁵ Ro m̧ōtta, Jisōs Kraist ej jim̧or un eo unin ad mije im kōttōpar mejen kajjik eo ad. N̄an jipan̄ kōj pād wōt ilo jim̧we im jipadōk iaļ eo ejim̧we, Rilo̧mo̧o̧r ej kūr kōj aolep n̄an lo mour ko ad ilo E, bwe en eļapļo̧k ad loe E ilo mour ko ad. Ikar ekkatak eļapļo̧k kōn kūr in ejeņoļo̧k ilo aō ekkatak Kallim̧ur M̧okta.

Kien Moses kar leļo̧k n̄an Ri Israel ro āinwōt juon m̧ōttan kōppopo n̄an gospel eo, kar ļōme n̄an kōpooj armej ro n̄an juon jemjerā in bujen ippān Anij kōn Jisōs Kraist.⁶ Kien eo, m̧weie kōn kōkaļļe in jitōn̄ ritōmak ro n̄an “erreim̧aanļo̧k n̄an itok eo” im Pinmuur eo an Jisōs Kraist,⁷kar meļeļein n̄an jipan̄ armej in Israel mije Rilo̧mo̧o̧r ilo ad kōjerbal tōmak ilo E, katok eo An, im kakien im kien ilo mour eo aer⁸—kar kōttōpar n̄an bōktok n̄an er juon jeļā eļap kōn RiPinmuur eo aer.

Āinwōt kōj rainin, armej ro an Anij etto kar kūr er n̄an loe mour ko aer kōn E bwe en ļapļo̧k ad loe E ilo mour ko ad. Ak ilo tōre in kwaļo̧k naan ko an Rilo̧mo̧o̧r, Ri Israel ro rekar meļo̧kļo̧k Kraist ilo kōm̧m̧an im etale ko aer, jekar kōjekdo̧o̧ne im kobaik kakien eo me ejjab mālim tōmak ko me ejjeļo̧k kōmeļeļe in kōkaļļe in jitōn̄ ļo̧k m̧ool eo im kein jipan̄ eo wōt n̄an lo̧mo̧o̧r eo aer im pinmuur—Jisōs Kraist.⁹

Jekjek in mour ko an Ri Israel ro aolep raan ekar erom poktak im kar pen meļeļe kake. Ajri ro nejin Israel, ilo jekjek in, rekar tōmak bwe kōm̧m̧an ko im m̧akūtkūt ko an kien eo ekar iaļ eo an juon armej make n̄an bōk lo̧mo̧o̧r im ekar kadikļo̧k kien Moses n̄an jet wāween m̧akūtkūt ko n̄an mour itunam̧ōjin.¹⁰ Menin ekar aikuji an Rilo̧mo̧o̧r eo kōro̧o̧ltok mije im alikkar n̄an gospel eo An.

Āliktata eļap jon̄an ri Israel ro rekar kajekdoon enaan eo An, jon̄an an ļap rekar ņa ruon Rilo̧mo̧o̧r—E eo ekar leļo̧k kien eo im kwaļo̧k bwe E ekar “kien eo, im meram”¹¹—bwe E ekar rubwe kien eo. Ak Jisōs ilo Kwaļo̧k eo ioon Tōļ eo, ekōnono kōn kien Moses, kar ba “Jab ļōmņak bwe I ar itōn ko̧kkure kien, ak an ri kanaan ro katak: I ar jab iten ko̧kkure, a kajejjeti.”¹² Inne Rilo̧mo̧o̧r eo, kōn Pinmuur eo An indeeo, kar kōjem̧ļo̧k kakien ko, im imminene ko ilo wāween aer kabun̄ me armej in Israel ro rekar imminene kaki ilo tōre ko. En̄taan eo An āliktata ekar oktak jān ittil kein katok n̄an ajeļo̧k ad “juon bōro erup im jetōb ettā,”¹³ jān kain̄i eo an katok n̄an kain̄i eo an kwojkwoj eo.

Būreetōn M. Russell Ballard, katakin kōn menin, ekar ba “Ilo kōļmenļo̧kijeņ, katok eo ekar oktak jān menin joortak n̄an rileļo̧k eo.”¹⁴ N̄e jej bōkok joortak ko ad n̄an Rilo̧mo̧o̧r, jej bōk karuwainene n̄an loe eļapļo̧k kōn Jisōs Kraist ilo mour ko ad, ilo ad kōttāik kōj im leļo̧k ankilaad n̄an E ilo kile im meļeļe kōn ajeļo̧k eo ewāppen An n̄an ankilaan Jemen. N̄e jej kōjim̧we ad erreim̧aanļo̧k n̄an Jisōs Kraist, jej kile im jej meļeļe bwe E ej make wōt kein jipan̄ im wāween n̄an bōk jeorļo̧k bōd im pinmuur, aeet n̄an mour indeeo im mour āinwōt Anij ijo eutiejtata.

Āinwōt juon riļoor gospel eo, ikar jelm̧ae elōn̄ men ko me rekar etale im meļeļe kōn oktak ko ilo m̧wilū, imminene, im jokāālet ālkin aō kar kobatok ilo Kabun̄ in. Rekar bwilōn̄ kōn “etke ko” kōn ta eo rej loe—etke iaar kālet n̄an peptaij n̄an kabun̄ in an ritōmak ro, em̧ool Kabun̄ eo an Jisōs Kraist im Armej ro Rekwojarjar ilo Raan Ko Āliktata, etke ijjab kōm̧m̧ane jet m̧akūtkūt ko em̧ōj kamoiki ilo raan in Jabōt, etke ij tiljek ilo kejparok Naan in Māletlet, etke ij riiti Bok in Mormon eo, etke ij tōmak ilo im mour kake katak ko an rikanaan ro raan kein im rijilōk ro, etke ij kobaļo̧k ilo kweilo̧k ko an Kabun̄ ilo aolep wiik, etke ij karuwaineneik ro jet n̄an “itok im loe, itok im jipan̄, … itok im pād wōt,”¹⁵ im “itok im uwaan.”¹⁶

Ilo iien eo, kajjitōk ko rekar rekanooj lōn̄ ilo en̄jake, alikkar ad loe, jet iien kajinet. Bōtaab ilo aō tariņae kōn ekkatak ko kōn armej, ikar kile bwe etale ko aer rekar, ilo m̧ool, kūr eo aō m̧oktata n̄an kotak im kōņake juon mej in jetōb kwojarjar n̄an kalikkare, mije, im kapen ta eo ej kōketak tiljek eo aō n̄an katak im jon̄ak ko an gospel. Ia eo naan in kam̧ool eo aō ej itok jene? Ikar ke wōt kwaļo̧k “m̧akūtkūt ko ralikkar” ilo aō jab kōtļo̧k an m̧akūtkūt kein ekkeijeļo̧k ippān kien ko an Anij n̄an “kōkajoorļo̧k [aō] tōmak Kraist,”¹⁷ ak n̄an kwaļo̧k jeļā eo aō bwe Jisōs Kraist ej jikin kajoor eo ilo aō ekkatak?

Kōn kijejeto ko reļļap n̄an kappukot im n̄an an Jisōs Kraist pād ilo aolep aō ļōmņak im kōm̧m̧an, mej ko meja rekar peļļo̧k im jeļā eo aō ekar m̧ōkaj n̄an kile bwe Jisōs Kraist ekar kūr eō n̄an “itok n̄an” E.¹⁸ Jān jinoin jijen in an mour in rijilōk ilo tōre ko ij jodikdik, ikar keememej juon kūr n̄an eō jān mijinede ro bwe in kobaļo̧k ippāer ilo aer katakin gospel eo n̄an juon kurup in leddik ro jon̄an wōt n̄a. Juon jota, ke kōm ekar jijet ilo m̧weo im̧ōn baam̧le eo an juon iaan jiron̄ rein, kajjitōk ko aer rejouj kōn etke ij tōmak rekar ūn̄ūr būruō im kōtļo̧k bwe in kwaļo̧k kam̧ool n̄an er kōn juon meļeļe eo em̧wilaļ kōn visōn eo an Irooj kōn men ko ilo jetōb rej kōketak eō ilo mour āinwōt juon rikaļoor, im ekar kōkm̧anm̧anļo̧k wōt naan in kam̧ool eo aō.

Jān iien eo ikar ekkatak, ilo aō jeļā kiiō, bwe ad Rilo̧mo̧o̧r, Jisōs Kraist, ej im̧we kōj n̄an kabun̄ jar ilo im̧ōn jar ko kajjojo wiik n̄an bōk m̧ōttan kwojkwoj eo An, ej im̧we kōj n̄an m̧weo im̧ōn Irooj n̄an kōm̧m̧an bujen Ippān, n̄an jeje ko rekwojarjar im katak ko an rikanaan ro n̄an ekkatak kōn naan ko An. E ej tōl naan ko jān lo̧n̄iid n̄an kam̧ool kōn E, pā ko peid n̄an lōn̄aj im jipan̄ āinwōt An naaj kar lōn̄aj im jipan̄, mej ko mejād n̄an kalimjōk laļ in im kalimjōk ro jet āinwōt an kalimjōk er—“āinwōt aer lukkuun waļo̧ke, im … āinwōt aer naaj waļo̧k.”¹⁹ Im ilo ad kōtļo̧k bwe E en tōl kōj ilo aolep men, jej bōk naan in kam̧ool bwe “men otemjeļo̧k rej kam̧ool ewōr juon Anij,”²⁰ kōnke ijo jej kappukot E ie jenaaj lo E²¹—kajjojo raan im aolep raan. Menin Ij kam̧ool ilo et eo ekwojarjar etan Jisōs Kraist, amen.