Kweilo̧k Eo Eļap
Rainin
Oktoba 2022 kweilo̧k eo eļap

Rainin

Jān Elder Ronald A. Rasband

Jān Doulul eo an Jon̄oulruo Rijilōk ro

Rikanaan eo ad emour ej kōm̧m̧ane ijo koņaan n̄an kaobrak laļ in kōn kape in Bok in Mormon. Jej aikuj ļoor tōl eo an.

Ro jeiū im jatū jitōnbōro, ilo Bok in Mormon naan in “rainin”1 elōn̄ kōttan kōjerbale n̄an kairūj n̄an kapilōk, kallim̧ur ko, im katakin ko. Kiin̄ Benjamin, ilo ennaan eo an āliktata, ekar rōjan̄ armej ro, “Ron̄ naan ko aō ko inaaj kōnono n̄an kom̧ rainin; … kōpeļļo̧k lo̧jiln̄ōmi bwe kom̧in maron̄ ron̄, im būruōmi bwe kom̧in maron̄ meļeļe, im ļōmņak ko ami bwe mennin ittino ko an Anij ren maron̄ erļo̧k n̄an ami loi.”2 Kweilo̧k eo eļap ej āinwōt jekjek in. Jej itok n̄an ron̄jake ko̧o̧njeļ eo an “rainin,” bwe jen maron̄ “m̧ool iien otemjej”3 n̄an Irooj im gospel eo An. Kajoor eo ilo n̄a “rainin” ej men eo eaorōk n̄an kōkāāl kallim̧ur eo ad kōn Bok in Mormon, eo Josep Smith ekar ņae etan “bok eo ejim̧we tata jān bok otemjej ioon laļ.”4

Pija
Kape in Bok in Mormon an Elder Rasband

Ij jibwe ilo peiū juon kape in Bok in Mormon. En̄in ej bok eo aō jān 1970 eo, im elukkuun aorōk ippa. Jān kilin elukkuun mōr kōn ekutkut in kōjerbale, ak ejjeļo̧k bar bok aorōk in wōt n̄an mour eo aō im naan in kam̧ool eo aō āinwōt in. Ke ikar riiti, ikar bōk juon kam̧ool jān Jetōb bwe Jisōs Kraist ej Nejin Anij,5 bwe E ej aō Rilo̧mo̧o̧r,6 bwe jeje kein rekwojarjar rej naan an Anij,7 im bwe gospel eo em̧ōj an bar jeplaaktok.8 M̧ool kein rej m̧ōttan eo eaorōk an mour eo aō. Āinwōt an rikanaan Nipai kar ba, “Aō ej lan̄lōn̄ ilo men ko an Irooj.”9

Pija
Elder Rasband ippān mijen būreejtōn eo an im Elder Hanks

Anmiin̄ n̄an anm̧oon: Elder Ronald A. Rasband, iien eo ej rūm̧m̧an ded im ej mijenede; Būreejtōn Harold Wilkinson, būreejtōn eo an Eastern States Mission; im Elder Marion D. Hanks, Ritōl Eutiej Jiljilimjuōnn̄oul.

En̄in ej bwebwenato in kape in bok in mormon eo aō. Āinwōt juon mijenede edik, ikar bōk ko̧o̧njel eo an Elder Marion D. Hanks, eo ekar lotok kōm ilo Eastern States Mission. Ekar būreejtōn n̄an British Mission, im ruo iaan mijenede ro an repād im̧aan rainin: Em̧m̧an rein jeiū rejitōnbōro Elder Jeffrey R. Holland im Elder Quentin L. Cook.10 Ejja āinwōt ippān mijenede ro an ilo England, ekar idajon̄jon̄e kōm n̄an riiti juon kape in Bok in Mormon me ejjab kakōļļe lowaan, diktata ruo kōttan. Ikar eo̧ron̄ kajjitōk in. Iien riit eo aō jinoin tata ikar kakōļļeik ak ļaini ium̧win aolep men ko me raar kwaļo̧k ak kam̧ool kōn Jisōs Kraist. Ikar kōjerbal juon pinjel bōrōrō, im kakōļleik elōn̄ eoon ko. Iien eo kein karuo, Elder Hanks ekar ba kōļare pedped in katak ko im katak ko an gospel eo, im ilo iien in ikar kōjerbal būļu n̄an kakōļļeik eoon ko. Ikar riiti Bok in Mormon ruo alen, āinwōt kar elmakot, innām bar riiti ruo kōttan, ilo aō kōjerbal iaļo im kilmeej n̄an kakōļļeik eoon ko me raorōk n̄an n̄a.11 Āinwōt ami loe, ikar kōm̧m̧an kōkaļļe ko relōn̄.

Pija
Kape in Bok in Mormon emōj jeje ie.

Ekar kanooj lōn̄ men ko ij aikuj riiti jān kōkaļļeik eoon ko. Kajjojo iien ij riiti Bok in Mormon, tum̧an n̄an tulik, ikar obrak kōn juon iakwe em̧wilaļ n̄an Irooj. Ikar en̄jake juon kam̧ool em̧wilaļ kōn m̧ool eo an katak ko An im ekōjkan aer jerbal ilo “rainin.” Bok in ekkar n̄an taitōļ eo an, “Bar Juon Kallim̧ur kōn Jisōs Kraist.”12 Kōn ekkatak in im kam̧ool ilo jetōb eo ikar en̄jake, ikar erom̧ juon mijenede in Bok in Mormon im juon rikaloor an Jisōs Kraist. .13

“Rainin,” juon iaan mijenede ro rem̧m̧an tata an Bok in Mormon ej Būreejtōn Russell M. Nelson. Ke ekar juon Rijilōk kāāl kar kūri, ekar kwaļo̧k juon katak ak katakin ilo Accra, Ghana.14 Ro raar pād rekar routiej ro, ekoba juon kiin̄ in bwijin Riafrica, eo me ekar kōnono n̄ane ilo an wōr riukōt ainikien. Kiin̄ eo ekar juon rijikuul eniknik ilo an ekkatak Baibōl im ekar iakwe Irooj. Ālkin ennaan ko an Būreejtōn Nelson, kiin̄ eo ekar kepaakeļo̧k, eo ekar jjejjet an kajjitōk ilo kajin pālle “Kar wōn kwe?” Būreejtōn Nelson ekar kōmeļeļeik bwe e ej juon Rijilōk an Jisōs Kraist em̧ōj kapiti.15 Kajjitōk eo tok juon an kiin̄ eo ekar “Ta eo komaron̄ katakin eō kōn Jisōs Kraist?”16

Būreejtōn Nelson ekar jibwetok Bok in Mormon eo im kōpeļļo̧ke n̄an 3 Nipai 11. Ippān doon Būreejtōn Nelson im kiin̄ eo rekar riiti kwaļo̧k eo an Rilo̧mo̧o̧r n̄an Riniapi ro: “Lo, N̄aij Jisōs Kraist, eo rikanaan ro raar kam̧ool ke Enaaj itok n̄an laļ. … N̄aij meram eo im mour eo an laļ.”17

Būreejtōn Nelson ekar leļo̧k n̄an kiin̄ eo kape in Bok in Mormon in, im kiin̄ eo ekar uwaak, “Kwomaron̄ kar letok n̄an iō diamond ko im rubi ko, ak ejjeļo̧k men aorōkļo̧k n̄an n̄a jān kakobaba in jeļālokjen eo kōn Irooj Jisōs Kraist.”18

Ejjab ede in waanjon̄ak kōn an ad rikanaan ejitōnbōro jeere Bok in Mormon. Ekar liļo̧k kape ko an Bok in Mormon n̄an bukwi armej, iien otemjej ej kwaļo̧k kam̧ool eo an kōn Jisōs Kraist. N̄e Būreejtōn Nelson ej kweilo̧k ippān riutiej ro, būreejtōn ro, kiin̄ ro, jeban state ro, im ritōl ro an pejnej ro im doulul ko im ro jān kabun̄ ko jet, men̄e ilo opiij ko reļlap an Kabun̄ in ak ilo jikin ko aer make, ilo kautiej ej leļo̧k bok in jeje ko rekwojarjar me kar kōjepļaaktok. Emaron̄ kar leļo̧k n̄an er men ko me rej kitmi ilo rebin (ribbons) ko me emaron̄ pād ioon juon tebōļ ak juon desk ak ilo kapnet ko āinwōt kakeememej kōn loļo̧k eo. Ijeļo̧kin, ej leļo̧k men eo aorōk tata n̄an e, aorōkļo̧k jān rubi ko im diamond ko, āinwōt an kar kiin̄ in bwij eo kōmeļeļeik.

“M̧ool ko an Bok in Mormon,” Būreejtōn Nelson ekar ba, “elōn̄ ie kajoor n̄an kōmour, kaenōm̧m̧an, kōjepļaaktok, jipan̄, kōkajoorļo̧k, kōjebwebweik, im kam̧ōņōņōik jetōb ko ad.”19 Ikar loe an kape kein an Bok in Mormon kar kakkōt ilo pein ro me rekar būki jān rikanaan eo an Anij. Ejjeļo̧k bar menin letok eļapļo̧k.

Pija
Būreejtōn Nelson ippān first lady eo an The Gambia

Raan ko ļo̧k ekar kweilo̧k ippān first lady eo an The Gambai ilo opiij eo an im ilo ettā ekar leļo̧k n̄an e juon Bok in Mormon. Ekar jab pōjrak ijo. Ekar kōpeļļo̧k peij ko an n̄an riit ippān liin, n̄an katakin im kam̧ool kōn Jisōs Kraist, Pinmuur eo An, im iakwe eo An n̄an aolep ajri ro nejin Anij—aolep jikin.

Rikanaan eo ad emour ej kōm̧m̧ane ijo koņaan n̄an kaobrak laļ in kōn kape in Bok in Mormon.20 Bōtaab ejjab maron̄ kōm̧m̧ane menin make iaan. Jej aikuj loor tōl eo an.

Im̧we kōn waanjon̄ak eo an, em̧ōj aō kar jino kajjieon̄ in ettā im kōļapļo̧k itok limo n̄an jeere Bok in Mormon.

Pija
Elder Rasband ippān būreejtōn eo an Mozambique

Raan ko ļo̧k ikar etal ilo juon ijjitōn̄ n̄an Mozambique. Armej ro ilo laļ in eaiboojoj raar apan̄ kōn jeram̧ōl, nana ājmour, ejjeļo̧k jerbal, lan̄ ko, im ejjeļo̧k ineem̧m̧an ilo kien. Ekar menin aō utiej n̄an kweilo̧k ippān būreejtōn eo an laļ eņ, Filipe Nyusi. Jān kajjitōk eo an, ikar jar kōn e im laļ eo an; ikar jiron̄ e ke jej kalōk juon tampeļ an Jisōs Kraist21 ilo laļ eņ an. Ilo jemļo̧k in loļo̧k eo am, ikar leļo̧k n̄an e juon kape in Bok in Mormon ilo kajin Portugese, kajin eo an make. Ilo an kam̧oolo̧l im bōke bok eo, ikar kam̧ool kōn kōjatdikdik im kallim̧ur eo n̄an armej ro an, loe ilo naan ko an Irooj ilo peij ko an bok eo.22

Pija
Elder Rasband ippān kiin̄ im queen eo an Lesotho

Ilo bar juon iien, kōrā eo ippa, Melanie, im n̄a kar kweiļo̧k ippān Kiin̄ Letsie III in Lesotho im kōrā eo ippān ilo m̧weo im̧wer.23 N̄an kōm, men eo em̧m̧an tata ilo loļo̧k eo am ej leļo̧k n̄an er juon kape in Bok in Mormon innām kwaļo̧k aō naan in kam̧ool. N̄e ij reilikļo̧k n̄an en̄jake eo aō im ko jet, juon eoon in jeje ko rekwojarjar ilo raan ko āliktata ejiktok ilo kōļmenļo̧kjeņ: “Bwe tarlep in gospel eo Aō maron̄ in kean̄ kake jān ro rem̧ōjņo̧ im ļam waan n̄an jem̧ļo̧k ko an laļ, im im̧aan kiin̄ raņ im ripepe raņ.”24

Pija
Elder Rasband ippān Ambassador Pandey
Pija
Ritōl ro an Kabun̄ in ippān His Holiness Patriarch Bartholomew.

Em̧ōj leļo̧k Bok in Mormon eo n̄an Ambassador eo an India n̄an United Nations ilo Geneva, Indra Mani Pandey25; ippān His Holiness Patriarch Bartholomewn̄an27 an Eastern Orthodox Church; im elōn̄ ro jet. Ikar en̄jake Jetōb eo an Irooj ekar pād ippām ilo aō kar make liļo̧ki “dekā in jabōn em̧ n̄an tōmak in ad”27 im kwaļo̧k aō naan in kam̧ool bwe Jisōs Kraist ej dekā in jabōn em̧ in tōmak eo ad .28

Kiiō, ro jeiūim jatū, kwojjab aikuj etal n̄an Mozambique ak India ak ioon kiin̄ ro im ripepe ro n̄an leļo̧k n̄an juon armej bok in an katak ko rekwojarjar im kallim̧ur ko. Ij karuwainene kom̧, rainin, n̄an lelo̧k juon Bok in Mormon n̄an ro m̧ōttam̧ im baamle, ro m̧ōttam ilo jikin jerbal, kouj in jekad eo am̧, ak ruwia kake leen wōjke ilo jikin wia. Rej aikuji naan ko an Irooj loe ilo bok in. Rej aikuji uwaak in kajjitōk ko aer aolep raan ilo mour in im mour indeeo eo ej itok. Rej aikuj jeļā kōn iaļ in bujen eo kar kwaļo̧ke im̧aer im iakwe indeeo eo an Irooj n̄an er. Repād aolep ilo Bok in Mormon.

N̄e kwoj leļo̧k n̄an er Bok in Mormon, kwoj kōpeļļo̧k kōlmenļo̧kjen ko aer im burueer n̄an naan an Anij. Kwojjab aikuj ineek ippam̧ kape ko būrini an bok eo ippām. Emaron̄ pidodo am̧ kwaļo̧ke jān mobile phone eo am̧ jān juon site kāāl ilo Gospel Library app eo.29

Ļōmņak kōn aolep ro rekar kōjeram̧m̧an kōn gospel ilo mour ko aer, innem jilkinļo̧k er juon kape in Bok in Mormon jān taleboon eo am̧. Keememej n̄an kobaik naan in kam̧ool eo am̧ im wāween an bok in kōjeram̧m̧an mour eo am̧.

Ro m̧ōtta jitōnbōro, āinwōt juon Rijilōk an Irooj, ij karuwaineneik kom̧ n̄an ļoor rikanaan eo ad ejitōnbōro, Būreejtōn Nelson, n̄an koobrak laļ in kōn Bok in Mormon. Aikuj eo ekanooj in ļap; jej aikuj in jerbal kiiō. Ij kallim̧ur kom̧ bwe kom̧ naaj bōk koņami ilo “jerbal eo eļaptata ilo laļin,” aiintok eo an Israel30 ilo ami im̧we n̄an pukōtļo̧k ro me raar “dāpiji er jān m̧ool eo kōnke rej jab jeļā ia eo ren pukote ie.”31 Rej aikuji naan in kam̧ool eo am̧ im kam̧ool eo kōn elmen an bok in kar ukōte mour eo am̧ im kepaakeļo̧k kwe n̄an Anij, aeņōm̧m̧an eo An,32 im An “naan ko kōn lan̄lōn̄ eļap.”33

Ij kam̧ool bwe kōn karōk ekwojarjar Bok in Mormon eo kar kōpooje ilo Amedka etto n̄an bōk m̧aantak n̄an kean̄ kōn naan an Anij, n̄an bōktok jetōb ko n̄an Irooj Jisōs Kraist im gospel eo An me em̧ōj an jepļaaktok “rainin.” Ilo etan Jisōs Kraist, amen.

Kakeememej ko

  1. Lale Jekab 2:2–3; Mosaia 2:14, 30; 5:7; Alma 7:15; im elōn̄ eoon ko ilo Bok in Mormon.

  2. Mosaia 2:9.

  3. Alma 53:20.

  4. Teachings of Presidents of the Church: Joseph Smith (2007), 64. Aolepen ennaan letok jān Josep Smith ilo Nobōṃba 28, 1841, ko̧o̧ņjel eo an ippān Jono̧ulruo Rijilōk ro: “Iaar jiron̄ em̧m̧aan ro jeiū im jatū bwe Bok in Mormon eaar bok eo ejim̧we tata jān bok otemjej ioon laļ, im bwe ej dekā in jabōn em̧ n̄an tōmak in ad, im juon armej enaaj epaakeļo̧k Anij jān an mour ekkar n̄an katak ko ie, jān jabdewōt bok ko jet.” Kii eo ej kōnono kōn “jim̧we” emaron̄ kar letok ilo revelesōn bōke jān ukook eo bok eo im katak eo katakin ilo Bok in Mormon ej ijino em̧m̧anļo̧k jān bok ko jet “realikkar im reaorōk,” rem̧ool an gospel in (lale 1 Nipai 13:40).

  5. Lale “The Living Christ: The Testimony of the Apostles,” a declaration by the First Presidency and Quorum of the Twelve Apostles, January 1, 2000: “We bear testimony, as His duly ordained Apostles—that Jesus is the Living Christ, the immortal Son of God. Ej Kiin̄ Immanuel eo ekajoor potata, eo ej jutak rainin ituanbwijmaroñ in Jemān. E ej meram eo, mour eo, im kōjatdikdik eo an laļ in. Iaļ eo An ej iaļ eo me ej tōl n̄an m̧ōņōņō ilo mour in im mour indeeo ilo laļ eo ej itok. God be thanked for the matchless gift of His divine Son” (ChurchofJesusChrist.org).

  6. Lale Aisiea 49:26; 1 Nipai 21:26; 22:12; Katak im Bujen Ko 66:1.

  7. Naan eo Anij ej pād ilo jeje ko rekwojarjar. N̄an waanjon̄ak, ilo Bok in Mormon, Laman im Lamuel rekar kajjitōk, “Ta meļeļein aen in dāpdep eo?” kōnono kōn etōņak eo an Liai. Nipai eaar uwaak: “Eaar naan in Anij; im jabdewōt eo enaaj kar eo̧ron̄ naan in Anij, im naaj jirōk likatōttōt ilo e, renaaj jamin jako; barāinwōt kapo ko im m̧ade kijeek ko an rikapo rej jamin anjo̧ ioer im kapiloik er, n̄an tōl ļo̧k er n̄an jako” (1 Nipai 15:23–24).

  8. See “The Restoration of the Fulness of the Gospel of Jesus Christ: A Bicentennial Proclamation to the World,” which includes the following: “We declare that The Church of Jesus Christ of Latter-day Saints, organized on April 6, 1830, is Christ’s New Testament Church restored. Kabun̄ in ej amjak ilo mour in ewānōk an lukkuun dōm̧an em̧, Jisōs Kraist, im ilo Pinmuur eo ejjeļo̧k jem̧ļo̧k im Jerkakpeje eo em̧ool. Jisōs Kraist ekar bar kūr juon alen Rijilōk ro im kar leļo̧k n̄an er mālimi an priesthood. Ej karuwaineneik kōj aolep n̄an itok n̄an E im Kabun̄ eo An, n̄an bōk Jetōb Kwojarjar, kain̄i ko an lo̧mo̧o̧r, im bōk lan̄lōn̄ eo ejjeļo̧k jem̧ļo̧kin. … Kōmij lukkuun m̧ōņōņō in kwaļo̧k bwe Jepļaaktok eo kar kallim̧ur kake ej wōnm̧aanļo̧k wōt kōn revelesōn ko rejjab jem̧ļo̧k. The earth will never again be the same, as God will ‘gather together in one all things in Christ’ (Ephesians 1:10)” (ChurchofJesusChrist.org).

  9. 2 Nipai 4:16.

  10. Lale Quentin L. Cook, “Be Not Weary in Well-Doing” (Brigham Young University devotional, Aug. 24, 2020), speeches.byu.edu; Eliza Smith-Driggs, “This Week on Social: How to Develop a Love for the Lord, Yourself and Others,” Church News, July 17, 2020, thechurchnews.com.

  11. Riit eo kein kajilu, ialo: geology ak geography; kein kāmen riiti, kilmeej: lain in bwebwenato in Bok in Mormon.

  12. “Bar Juon Kallim̧ur kōn Jisōs Kraist” kar kobaik āinwōt taitōl eo tok laļ an Bok in Mormon. Ritōl ro an Kabun̄ in rekar ukōt et eo n̄an kaitokļo̧k un in bok in āinwōt an kwaļo̧k ilo taitōl peij: “Im n̄an karreel riJu im riAelōn̄ ko bwe Jisōs ej RiKraist, Anij Indeeo, Ej kwaļo̧k E n̄an laļ ko otemjeļo̧k.”

  13. Juon rikaļoor an Anij ej kwaļo̧k iakwe eo ad n̄an E. Rikaloor ro emōj aer peptaij; rej bōk ioer etan Jisōs Kraist; rej niknik n̄an loore E ilo aer m̧ōņōņō kōn jerbal ko an āinwōt an kōmeļeļeik jān Rijilōk Piter: “Aet, im kōn men in koṃwin kanooj kate koṃ, im ñan ami tōmak koṃwin kobaik eṃṃan; im ilo ami eṃṃan, jeḷāḷọkjeṇ; Im ilo ami jeḷāḷọkjeṇ, jatōr; im ilo ami jatōr, kijenmej; im ilo ami kijenmej, wānōk; Im ilo ami wānōk, jouj ñan doon; im ilo ami jouj, yokwe” (2 Piter 1:5–7; lale barāinwōt Preach My Gospel: A Guide to Missionary Service [2019], 121–32).

  14. Būreejtōn Russell M. Nelson, ilo aolepen laļin kar jeļā ej juon rimwijmwij menono m̧okta jān kūr eo an n̄an Doulul eo an Jonōulruo Rijilōk ro ilo 1984, kar kōnono ilo juon jikuul in takto ilo Accra, Ghana, ilo 1986 ilo bwebwenato in mwijmwij menono. Interviewed later by the media, he explained he was there “as a servant of the Lord to help [the people] become better citizens, to build strong families, to gain true happiness and prosper in the land.” He returned to Accra, Ghana, on November 16, 2001, for the groundbreaking of the Accra Ghana Temple (see “Ground Broken for First Temple in West Africa,” Church News, Nov. 24, 2001, thechurchnews.com).

  15. See General Handbook: Serving in The Church of Jesus Christ of Latter-day Saints, 5.1.1.1: “In our day, the Lord calls men through the President of the Church to be ordained as Apostles and to serve in the Quorum of the Twelve Apostles (lale Katak im Bujen Ko 18:26–28)” (ChurchofJesusChrist.org).

  16. Lale Russell M. Nelson, “The Book of Mormon: What Would Your Life Be Like without It?,” Liahona, Nov. 2017, 60.

  17. 3 Nipai 11:10–11.

  18. Lale Russell M. Nelson, “The Book of Mormon: What Would Your Life Be Like without It?,” 61.

  19. Russell M. Nelson, “The Book of Mormon: What Would Your Life Be Like without It?,” 62.

  20. Lale Moses 7:62.

  21. Beira Mozambique Tampeļ kar kōjeļļa kake ilo Eprōļ 4, 2021, jān Būreejtōn Russell M. Nelson. Elōn̄ļo̧k jān 1/2 milien armej rej jokwe ilo Beira, eo ej pād ilo tōrerein Indian Ocean eo.

  22. Waanjon̄ak kōn kōjatdikdik im kallim̧ur ko loe ilo Bok in Mormon ekoba 2 Nipai 31:20; Jekab 4:4–6; Alma 13:28–29; 22:16; 34:41; Ether 12:32; Moronai 7:41; 8:26.

  23. Elder im Sister Rasband rekar kweiļo̧k ippān baamle eo euteij ilo Pāpode 10, 2020, kar etal ilo jerbal eo ilo Africa n̄an kōjeraam̧m̧an Durban South Africa Tampeļ eo.

  24. Katak im Bujen ko 1:23.

  25. Elder Rasband kar kweiļo̧k ippān Ambassador Indra Mani Pandey, Permanent Representative in India n̄an United Nations im Other International Organizations ilo Geneva, ke ekar pād ilo juon jerbal ilo Interfaith Forum in Bologna, Italy, ilo Jeptōmba 17, 2021.

  26. Elder Rasband ej kweilo̧k ippān His All Holiness Ecumenical Patriarch Bartholomew an Eastern Orthodox Church ke ekar pād ilo juon jerbal ilo Interfaith Forum in Bologna, Italy, ilo Jeptōmba 13, 2021.

  27. Teachings: Joseph Smith, 64. A keystone is a wedge-shaped piece of masonry that sits at the crown of an arch, holding the other pieces in place. Rikanaan Josep ekar kōmeļeļeik Bok in Mormon āinwōt “dekā in jabōn em̧ n̄an tōmak eo ad” kōnke aorōk eo an n̄an kakobaik Kabun̄ in ilo katak ko im kain̄i ko. Bok in Mormon ej jerbal āinwōt “deka eo io̧lap” n̄an mour eo an membōr ro, jipan̄ er pen ilo iaļan bujen eo.

  28. See Ephesians 2:19–20. Jisōs Kraist ej dekā in jabōn em̧ eo an Kabun̄ in ad, eo ej etōņake Etan. Āinwōt an kababu juon dekā in jabōn em̧ ilo tampel eo juon kōkalle in dekā eo aorōk tata ej kalōk jabōn pedped in m̧weo imōn Anij, Jisōs Kraist ej jabōn em̧ in tōmak eo ad im lo̧mo̧o̧r eo ad. Ekar letok mour eo An bwe jen maron̄ mour; ejeļo̧k juōn āinwōt E ilo kajoor, ilo un, ak ilo iakwe.

  29. Kwomaron̄ kwaļo̧ke ilo talboon eo am̧. Juon wāween ej ilo am kōppeļo̧k Gospel Library app eo, etal n̄an Jeje ko Rekwojarjar, innām jiped “Share Now” ilo lon̄ Ak jān Bok in Mormon app eo, komaron̄ jipede “Share” icon eo, eo ej kwaļo̧k juōn QR code eo juōn mōttam̧ emaron̄ scan jān talboon eo an.

  30. Russell M. Nelson, “Hope of Israel” (worldwide youth devotional, June 3, 2018), HopeofIsrael.ChurchofJesusChrist.org. “On June 3, 2018, President Russell M. Nelson and his wife, Wendy W. Nelson, invited the youth to ‘enlist in the youth battalion of the Lord’ and take part in ‘the greatest challenge, the greatest cause, and the greatest work on earth.’ Im ta apan̄ eo eļaptata? The gathering of Israel” (Charlotte Larcabal, “A Call to Enlist and Gather Israel,” New Era, Mar. 2019, 24).

  31. Katak im Bujen ko 123:12.

  32. Lale 2 Nipai 4:27; Mosaia 4:3; 15:18; Alma 46:12.

  33. 1 Nipai 13:37.