Juon Wōt Ippān Irooj

Ilo kar allōn̄ ko jinion tata in am̧ro kar m̧are, kōrā eo ejitenbōro pāleeō ekar kwaļo̧k ikdelel eo an n̄an ekkatak al. Kōn kōņaan eo aō n̄an kam̧ōņōņōiki, ikar kālet n̄an kailbōke in ejitōnbōro ippa kōn juon kein kōjañjan̄. Ikar etal n̄an juon m̧ōn in kein kein kōjañjañ ko im wiaiki juon nejin piano āinwōt juon mennin leļo̧k. Ilukuun mōnōnō im iaar likiti rijiit eo ilo juon bo̧o̧k im kainōknōke bo̧o̧k eo im ikar leļo̧k n̄an e, kōtmene an lukkuun nej kar m̧ōņōņō im kam̧m̧oolol kōn lein ippān me eļap an iakwe im ejeļā ta eo ej aikuji.

Ak ke kōrā eo pāleen ej kōpeļļo̧ke bo̧o̧k jidikdik eo im lo kobban, ekar reitok ilo an mōnōnō im ba, “O, aō jitenbōro, kolukkuun em̧m̧an! Ak in mōk kajjitōk ippam̧ juon kajjitōk: Menin ej juon mennin letok ak juon m̧uri? Ālkin am̧ro kar kōnono kōn mennin letok in, kom̧ro kar kāālet n̄an bar karo̧o̧le im jab wiaiki. Kom̧ro kar mour wōt jidik jāān āinwōt jet rijikuul, ejjeļo̧k oktak jān ripālele ro rej kab m̧are. En̄jake in ekar jipan̄ eō kile aorōkin pedped in katak eo n̄an erom̧ juōn wōt ilo jemjerā in pālele im wāween ad mour kake emaron̄ jipan̄ kōrā eo pāleeō im n̄a bwe kom̧ro en juon wōt ilo bōro im ilo ļōmņak.¹

Gospel in an Jisōs Kraist me em̧ōj an jeplaaktok ej kwaļo̧k bwe pedped in kata eo n̄an erom̧ juon wōt ikōtaan ļeo im lio pālele, jim̧or ilo mour in wabanban in im mour indeeo. Meñe kajjojo iaer eoktak m̧wil ko aer im eddo in ijjitōn̄ ko aer rekwojarjar, ļeo im lio rej kōm̧m̧ani ilo jokkun wōt juon eddo ko aer raorōk im remenin aikuj ilo karōk in m̧ōņōņō eo ñan ro Nejin.² Menin eaar baj waļo̧k wōt jān jinoin ke Irooj eaar ba bwe ekar “jab em̧m̧an bwe em̧m̧aan en make iaan; kōn menin, [Inaaj kōm̧m̧ane] juon rōjtan.”³

Ilo karōk ko an Irooj, juon “rijipan̄” eo juon m̧ōttan eo ej jipan̄e ilo aer juōn wōt.⁴ Ilo m̧ool, Iv eaar juōn menin letok jān lañ ilo mour eo an Adam. Kōn piktokin ekwojarjar im jetōb eo ippān, ekar im̧we Adam n̄an jerbal ilo aer juon wōt n̄an kakūrm̧ool karōk in m̧ōņōņō eo an Anij n̄an aolep armej.⁵

Jen mōk kōlmenļo̧kjeņ kōn ruo pedped in katak ko raorōk me ej kōkajoorļo̧k pād eo ikōtaan ļeo im lieo. Pedped in katak eo kein kajuon ej “aolep rej āinwōt juōn ñan Anij.”⁶ Ekkar ñan katak ko ilo gospel in, oktak eo kōtaan ļeo im lio ejjab ukōt kallim̧ur ko indeeo me Anij eaar kallim̧ur kaki n̄an ļaddik im leddik ro Nejin. Ejjeļo̧k juon en eutiejļo̧k kallim̧ur eo an kōn aiboojoj in selestial jān eo juon.⁷ Rilo̧mo̧o̧r E make ej karuwainene kōj aolep, ajri ro nejin Anij, “itok n̄an Ippān im bōk leen em̧m̧an eo An; im E aejjeļo̧k Ej kabbōjrak e jān an itok Ippān.”⁸ Kōn menin, ilo jeje kein, jej aolep joñan wōt juōn imaan Mejen.

Ñe ripālele ro rej meļeļe im ļoor pedped in katak in, reban kautiej er make āinwōt juon ritōl ak rijipan̄ n̄an baam̧le eo aer. Ejjab aikuj wōr reutiej im rūttā ilo mour in pālele, im juon en jab le im̧aan ak le ilik jān bar juon. Rej aikuj ippān doon ilo aer wōnm̧aanļo̧k, jon̄an wōt juon, āinwōt ro nejin Anij rekwojarjar. Renaaj erom̧ juōn wōt ilo ļōmņak, kōņaan, im jibadbad ippān Jemed Ilañ im Jisōs Kraist,⁹ ilo aer tōl im jipañ baam̧le eo ippān doon.

Ilo aer juon wōt, “ekōm̧man bwe iakwe en jab aitwerōk, ak ren jerbal ippān doon, … m̧ōttan kōm̧anm̧an eo ñan jerbal kein ad, armej.”¹⁰ “Kōn jerbal m̧ool, ļeo im lio renaaj koba ilo juōn wōt ļōmņak ñan erom̧ juōn wōt ‘ñan indeeo’ me ‘ejjeļo̧k emaroñ kōmeļeļeiki’ enaaj pād ilo mour in jetōb eo aer im an ro bwijier ‘ñan indeeo im indeeo.’”¹¹

Pedped in katak eo kein karuo me ejjejjet ej Kien in Em̧m̧an, me Rilo̧mo̧o̧r eo eaar katakin ilo Tōl eo: “Innām men otemjej jabdewōt koṃij kōṇaan bwe armej ren kōṃanṃan ñan koṃ, en āindein ami kōṃanṃan ñan er.”¹² Pedped in katak in ekōm̧m̧an bwe kilen aer kwaļo̧k en̄jake ko aer n̄an doon, jipan̄ doon, bōro kuk, kab ilo aer lale doon im ej pedped ioon kien eo kein karuo eļap: “Kwōn yokwe ri turum im āinwōt kwe.”¹³ Ej barāinwōt kobaļo̧k ippān m̧wiļin rikūrijtin āinwōt meanwōr, ettā, kijenmej, im jouj.

Ñan lukkuun meļeļe kilen kōjerbal pedped in katak in, jemaroñ reilo̧k ñan waanjoñok eo ekwojarjar im jemjerā eo ejjeļo̧k jem̧ļo̧k kar ejaak in Anij ikōtaan ro jined im jemed jinoin tata, Adam im Iv. Raar erom̧ juōn wōt ilo kanniōk,¹⁴ ejaake bōro kuk eļap me ekar kōtļo̧k bwe ren wōnm̧aanļo̧k wōt ippān doon ilo kautiej, kam̧m̧oolol, im iakwe, meļo̧kļo̧k er make im kappukot em̧m̧an ko aer n̄an doon ilo iaļ in aer n̄an mour indeeo.

Ejja m̧wil kein wōt rej n̄an kajjieon̄ kōttōpari ilo juon m̧are eo em̧m̧an rainin. N̄e juon em̧m̧aan im juon kōrā rej liāp ilo tampeļ, rej deļo̧n̄e kōlaajrak in m̧are eo ekwojarjar ilo bujen eo ekāāl im indeeo. Kōn kōlaajrak in an priesthood, rej maroñ bōk kōjeram̧m̧an ko ejjeļo̧k jem̧lo̧kier im kajoor in em ej kajju tok jān lan̄ n̄an kwaļo̧k m̧akūtkūt ko an baam̧le ko aer ilo aer mour ekkar n̄an bujen ko rekar kōm̧m̧ani. Jen iien eo m̧aanļo̧k, rej make wōnm̧aanļo̧k im ilo aer lukkuun juon wōt ippān Irooj, eļaptata ilo kūr ko aer rekwojarjar kar jitōn̄ er n̄an kōkajriri im tōl baam̧le ko aer.¹⁵ Kōkajiriri im tōl rej juōn wōt im ippān doon, meļeļein bwe m̧am̧a im baba ro “rej kalim̧ur n̄an jipan̄ doon āinwōt m̧ōtta ro rej juōn wōt”¹⁶im kōm̧m̧an bwe ren jokkwon wōt juon ilo aer tōl ilowaan m̧ōko m̧ōer.

“N̄an kōkajiriri meļeļein naajdik, katakin, im jipan̄” ro uwaan baam̧le eo, ej waļo̧k eļan̄n̄e kwoj jipan̄ er “ekkatak m̧ool ko an gospel im ejaake tōmak ilo Jemedwōj Ilan̄ im Jisōs Kraist” ilo juon mejatoto in iakwe. N̄an tōl baam̧le eo ej meļeļein “jipan̄ ro uwaan baam̧le eo bar jepļaak im mour ippān Anij. Menin ej bōk jikin ilo ad jipan̄ im katakin kōn jouj, meanwōd, ettā, im kōn iakwe em̧ool. Ej bar koba “tōl ro uwaan baam̧le eo ilo jar aolep iien, ekkatak gospel eo, im m̧ōttan ko jet n̄an kabun̄jar. Ro jinen im jemen ajri ro rej jerbal ilo bōro kuk,” ļoor waanjon̄ak eo an Jisōs Kraist, “n̄an kakūrm̧ool jerbal kein [ruo reļļap].”¹⁷

Elukkun aorōk ñan lale bwe kien eo ilo baam̧e eo en ļoor jon̄ak in tōl an jemān baam̧le eo, eoktak jidik jān jekjek ko jet ekkar n̄an tōl in priesthood ilo Kabuñ in.¹⁸ Jon̄ak in tōl an jemān baam̧le eo ej kwaļo̧k ke lio im ļeo rej jim̧or aer eddo kajju ñan Anij n̄an kakūrm̧ool eddo ko aer ilo baam̧le eo. Ej kūr n̄an erom̧ juon wōt—juon kōņaan im errā kōn aolep pedped in katak ko an jim̧we im bōk eddo—im leļo̧k iien ko rem̧m̧an n̄an eddōkļo̧k ilo juon jikin eo ewōr iakwe ie im jikin jipañ doon.¹⁹ Eddo kein ejjab ñan ad kappok taitōl im eļaptata ejjab ñan jabdewōt kain kakkure ko ak ñan kautiej kōj make ilo ad kōjerbal maron̄ ko rebōd.

Ta eo eaar waļok ñan Adam im Iv, ālkin aer kar diwōjļo̧k jen jikin kallib Eden, eaar waļo̧k aibojooj in bwebwenato in kilen aerro jerbal in lale doon āinwōt juon m̧am̧a im baba ilo aer kaajiririk im tōl baamle eo aer. Āinwōt an katakin ilo bok in Moses, erro eaar jerbal ippān doon ñan jino katōk bwidej n̄an m̧ōn̄ā jān menokadu in turin mejāer n̄an maron̄ kakke aikuj n̄an baam̧le eo aer;²⁰ raar boktok ajiri ro ñan lal in;²¹ Rar jim̧or kūr etan Irooj im raar ron̄ Ainikien “jen ettoļo̧k iturin jikin Kallib Iden”;²² raar errā kōn kien ko Irooj eaar leļo̧k ñan erro im raar kate er jim̧or n̄an pokaki.²³ Im raar “kwaļo̧k [aolep men] kein n̄an m̧aan ro im kōrā ro nejier”²⁴ im “raar jab bōjrak jān kūr ioon Anij” ippān doon ekkar ñan aikuj ko aer.²⁵

Ro jeiū im jatū jitōn bōro, kaajiriri im tōl rej iien ko rem̧m̧an, ejjab ñan kwalok joñan ar jeļā. Juon armej emaron̄ wōr an eddo kōn juon men ak emaron̄ jab e wōt ej kōm̧m̧ane. Ñe rein jined im jemed me eļap aer iakwe kōj relukkun meļeļe eddo kein ruo reļļap, renaaj kajjieon̄ ippān doon n̄an kōjparok im kea kōn doon ilo ānbwin im en̄jake. Renaaj bar jipan̄ er jelm̧ae kauwōtata ko an jetōb ilo raan kein ilo aer kōkaajririik er kōn naan eo em̧m̧an an Irooj āinwōt an kar kwaļo̧k n̄an rikanaan ro An.

Men̄e ļeo im lio rej jipan̄ doon ilo eddo in aer ekwojarjar kar jitōn̄ er n̄ane, “Mōjņo in ānbwin, mej, ak jōkjōk ko jet maron̄ aikuji n̄an oktak ko kajjojo.”²⁶ Jet iien juon iaan ļeo ak lio pālele enaaj wōr an eddo n̄an kōm̧m̧ani eddo ko jim̧or ilo juon wōt iien, men̄e jidik wōt iien ak aolep iien.

Iaar ioon juon sister im juon bratōr me rej pād ilo jekjek in. Āinwōt juon eo ej make iaan, er kajjojo, ilo baam̧le ko aer im ilo aer juon wot ippān Irooj, em̧ōj aer kapen ippāer make ke rej leļo̧k mour ko aer n̄an lale ajri ro nejier ilo men ko an jetōb im ilo aikuj ko an mour in. Eaar jab jako aer reilo̧k ñan bujen ko aer raar kōm̧m̧ani ilo tampeļ ippān Irooj im ilo kallim̧ur ko An n̄an indeeo meñe rekar jepel. Rej jim̧or kappukot jipan̄ eo an Irooj ilo aolep men ko ilo aer wōnm̧aanļo̧k im kajjieon̄ niknik ilo men ko reppen im etetal ilo iaļan bujen eo. Rej kōjatdikdik bwe Irooj enaaj kōttōprak aikuj ko aer, ejjab ilo mour in wōt ak n̄an indeeo. Rej jim̧or katakin ajiri ro nejier ilo meanwōd, ettā, im iakwe em̧ool, men̄e rej ioon men ko reppen ilo mour in. Jen men ko ijeļā, rein me ewōr nejier ajri im ejjeļo̧k pāleer rejjab ņa ruōn Anij kōn mellijon̄ ko aer reppen. Ak, rej reim̧aanļo̧k ilo juon meram in kōjatdikdik ewāppen im lōke ilo kōjeram̧m̧an ko Anij em̧ōj an kōpooji n̄an kōj.²⁷

Būratōr im sister ro, Rilo̧mo̧o̧r ej kōm̧m̧ane waanjon̄ak eo eweppān kōn bōro kuk im aenōm̧m̧an kōn un im katak ippān Jemed ilo Lan̄. E kar jar ilo etan rikaloor ro An, ilo an ba, “Bwe er otemjej ren juon; āinwōt Kwe, Jema, ilo Ña, im Ña ilo Kwe, bwe er barāinwōt ren ilo kōj: … bwe ren juon, āinwōt Kōj juon.”²⁸

Ij kam̧ool n̄an kom̧ bwe eļan̄n̄e kōj—kōrā im em̧m̧aan ro—rej jerbal ippān doon ilo juon jem̧jerā em̧ool im juon wōt, jenaaj m̧ōņōņō kōn bōro kuk me Rilo̧mo̧o̧r ekar katakin kake ilo ad kakūrm̧ool eddo eo ad ekwojarjar ilo m̧are ko ad. Ij kallim̧uri kom̧, ilo etan Kraist, bwe bōro ko “ren kuk ippān doon ilo bōrokuk im ilo iakwe n̄an doon,”²⁸jenaaj lo eļapļo̧k m̧ōņōņō ilo iaļ in ad ļo̧k n̄an mour indeeo, im ad maron̄ n̄an jipan̄ doon im ippān doon enaaj lukkuun ajeeded.²⁹ Ij kwaļo̧k aō naan in kam̧ool kōn m̧ool kein ilo āt ekwojarjar etan Jisōs Kraist, amen.