Jemaron̄ kōm̧m̧ani Men ko Reppen ilo E

Ilo kar iien kwaļo̧k eo an Rilo̧mo̧o̧r, E ekar kile juon em̧m̧aan eo ekar pilo. Rijilōk ro an Jisōs rekar kajjitōk, “Rabbai, wōn e ar jerọwiwi, armej in, ak jemān im jinen, bwe ear ḷotak im pilo?”

Kōn dim, iakwe, im m̧ool an Rilo̧mo̧o̧r ekar uwaak ilo an kwaļo̧k ke E ejeļā kōn eñtaan ko ad: “Armej in ear jab jerowiwi, ak jemān im jinen: a bwe jerbal ko an Anij ren waļo̧k kōn e.”¹

Ilo an jet apan̄ ko itok kōn wōt kōņaan jab pokake, jejelā ke elōn̄ iaan apan̄ ko an mour in rej itok kōn un ko jet. Jekdoon ewi wāween ad ioon apan̄ ko, remaroñ erom̧ juon iien em̧m̧an n̄an eddōkļo̧k.

Baam̧le am ekar mour ilo am jelmae apan̄ ko ilo mour in. Ilo aō kar rūttoļo̧k, iaar lukkuun nōbar baam̧le eo elōn̄ uwaaer. Baam̧le rot kein raar lukkuun kareel eō, eļaptata ieen eo iaar jeļā kōn Kabun̄ in ke iaar jodikdik ippān ļeo enaaj jema ilo karkar eo an jinō, Sarfo, im kōrā eo ippān ilo bukwōn in Takoradi, Ghana.

Ke kom̧ro Hannah kar m̧are, komro ar kōņaan kakūrm̧ool kōjeraam̧m̧an in petriak ko am̧ro, me eaar kwaļo̧k ke komro en kar jeraam̧m̧an kōn elōn̄ ajri. Bōtaab, m̧okta jān an kar ļaddik eo kein kajilu nejum̧ro ļotak, elukkuun kar alikkar ke Hannah ejjab maroñ in bar neji. Jej lukkuun kam̧m̧oolol, meñe Kenneth ekar ļotak ilo juōn wāwein eo me elukkuun kauwōtata ñan erro jinen, eaar em̧m̧an an ļotak, im jinen eaar ājmour. Eaar jino maroñ kobatok ilo aolepen m̧akūtkūt ko am āinwōt juon baam̧le—ekoba etal n̄an jikin jar, jar an baam̧le kajjojo raan, ekkatak jeje ko rekwojarjar, nokon in jota, im m̧akūtkūt ko jet.

Men̄e kōm eaar aikuj ukōt kōļmenļo̧kjen eo am kōn kar juon baamle eo en kar lap uwaan, ekar juōn kam̧ōņōņō n̄an likūt juōn imminene in ekkatak jān “Baam̧le Eo: Juon Kean̄ n̄an Laļin” ippān ajri ro nejum̧. Ļoori katakin ko ekar kobaik eļap meļeļe ko n̄an tōmak eo aō me ej eddōkļo̧k.

Āinwōt an kean̄ eo kwaļo̧k: “M̧are eo kōtaan em̧m̧aan im kōrā eļap tokjān n̄an karōk eo An indeeo. Ajri ro rej maron̄ ļotak ilo korak in m̧are ko, im kōkkaajririik er jān jemen im jinen ro me rej kautiej kallim̧ur in m̧are ko ilo ejjeļo̧k irļok.”² Ilo ad kōm̧m̧ani pedped kein, jenaaj jeraam̧m̧an.

Bōtaab, juon weekend ilo tōre in jerbal eo aō āinwōt juon stake būreejtōn, kōm kar ioon bōlen apan̄ eo enanatata pāāren ro remaron̄ ioone. Baam̧le eo am eaar ro̧o̧l jān juōn m̧akūtkūt an Kabun̄ im kuktok n̄an kōrālep. Innām ļaddik ro jilu nejumro rekar diwōj n̄an namōj n̄an ikkure lowaan wōt oror eo am̧.

Kōrā eo ippa eaar bar en̄jake im̧we ke elōn̄ men ko rejjab jim̧we. Ekar kajjitōk bwe in tin lale ajri ro ke kom̧ro ej kwalkwōl kōnno. Ikkar eñjake ke rekar pād ilo kōjparok bwe kōmij roñ ainikien aer e m̧ōnōnō ilo aer ikkure.

Ke komro ekar jimoor etaļ im lale rej ta, ilo amro jab tōmak komro ar lo Kenneth edik eo ej 18 an allōn ej bed lowaan bōkaj in dān eo ak ejjab makūtkūt, ladrik ro jein rejjab loe. Kōm ekar buul kake ñan hospital, bōtaab aolep men ko n̄an bar kōroole tok ekar jab maroñ kōmman bwe en mour.

Kōm ekar lukkuun būromōj bwe kōm ban maron̄ bōk iien em̧m̧an n̄an kajiririk ajri eo nejim ejitōn bōro ilo mour in. Men̄e kom̧ro jeļā ke Kenneth enaaj m̧ōttan baam̧le eo am̧ indeeo, iaar kajjitōkin eō make etke Anij emaron̄ kōtļo̧k būrom̧ōj in bwe en waļo̧k n̄an eō ke ikar kajeon jon̄an aō maron̄ n̄an kōm̧m̧ane kūr eo aō. Ij kab deļo̧n̄tok jān aō kar kōm̧m̧ane juōn aō jerbal n̄an loļo̧k Ro Rekwojarjar. Etke Anij eaar jab lale jerbal ko aō innām kōjparok ļaddik eo nejū im baam̧le eo aō jān jorrāān in? Toon wōt aō ļōmņake, toon wōt an ļapļo̧k aō illu.

Kōrā eo ippa eaar jab ņaruō kōn aō kar jab ron̄jake im̧we ko an, bōtaab iaar katak juōn ekkatak me ekar ukot mour e aō im ikar kōm̧m̧ane ruo kien ko, rej jab aikuj rub:

Kakien 1: Roñjake im pokake im̧we ko an kōrā eo ippam̧.

Kakien 2: N̄e kwojjab lukkuun jeļā kōn jabdewōt, ro̧o̧l n̄an kakien 1.

Men̄e en̄jake in ekar kalulu im kōm eaar wōnm̧aanļo̧k wōt im būromōj, eddo in am̧ ekar jakoļo̧k.³ Kōrā eo ippa im n̄a kar jeļā ekkatak ko raorōk jān jako eo an eo ejitenbōro ippem. Kōmro ekar eñjake am̧ro juon wōt im dim ilo bujen ko am̧ro ilo tampeļ; kom̧ro jeļā komro naaj bar bōke Kenneth āinwōt nejumro ilo laļ eo juōn kōnke eaar lōtak iumin bujen in. Kom̧ro eaar bar ekkatak kōn jerbal in karejar ñan ro jet im maron̄ būrom̧ōj ippān metak ko aer. Ij kam̧ool bwe būrom̧ōj ko am̧ro rekar jako kōn am kōjerbal tōmak ilo Irooj. En̄jake eo am ej penļo̧k wōt, ak kōm ekar ekkatak jān Rijilōk Paul bwe je “maron̄ in kōm̧m̧an men otemjej ilo Kraist eo ej [kakajoor kōj]” n̄e jej pedped wōt ilo E.⁴

Būreejtōn Russelll M. Nelson ekar katakin: “N̄e mour ko ad rej pedped wōt ilo karōk in lo̧mo̧o̧r eo an Anij … im Jisōs Kraist im gospel eo An, jemaron̄ en̄jake lan̄lōn̄ jekdo̧o̧n ta eo ej waļo̧k—ak ejjab waļo̧k—ilo mour ko ad.” Eaar wōnmaanlok wōt im ba, “Mōņōņō ej itok jān im kōn E.”⁵

Jemaroñ em̧ōņōņō im obrak kōn aenōm̧m̧an ilo iien ko ad reppen. Iakwe eo jej en̄jake kōn wōt Rilo̧mo̧o̧r im Pinmuur eo An ej erom juon kein jipan̄ ekajoor ilo kōj n̄an iien ko jej kajjieon̄. “Aolepen men ko reppen im [kaen̄tanaan] kōn mour in remaron̄ kōm̧m̧an bwe ren jim̧we kōn Pinmuur eo an Jisōs Kraist.”⁶ Ekar kakien bwe, “Ilo laļ kom̧ij en̄taan: a kom̧win m̧ōņōņō; N̄a Iar bōk anjo̧ ioon laļ” .”⁷ Emaroñ jipañ kōj anjo jabdewōt metak, nan̄inmej, im melijoñ ko jej iooni ilo mour in.

Jej lo bwijin bwebwenato ko ilo jeje ko rekwojarjar kōn ritōl ro reļļap im m̧ool, āinwōt Jeremia, Job, Josep Smith, im Nipai, ro im raar jab bōbrae er jān ioon eñtaan kein relļļap im reppen ilo mour in. Er rej jet ro raar ekkatak kilen pokake Irooj ilo iien ko reppen.⁸

Ilo iien ko reppen ilo kar jikin kalbuuj Liberty, Josep Smith ekar jan̄ im lam̧ōj, “O Anij, kwo pād ia? Im ia eo em̧ nuknuk eo ej kalbubu ajikin tilekek eo Am?”⁹ Irooj ekar katakin Joseph n̄an “kijejetoiki”¹⁰ im kar kallim̧ur bwe n̄e enaaj, aolep men kein renaaj leļo̧k n̄an e en̄jake ko me renaaj n̄an em̧m̧an eo an.¹¹

Reilikļo̧k n̄an ta ko rekar waļo̧k n̄an n̄a make, ij kile ke iaar ekkatak jet iaan katak ko ilo iien ko reppen ilo mour eo aō, iien ko rekar bōk iō jān ijo ikwo̧n ie. Men ko reppen me iaar iooni ke iaar jodikdik, ilo aō kar katak kōn Kabuñ in ilo jemeneri, āinwōt juōn eo ej kab oktak tok, im āinwōt juōn eo ekar jerbal in mijinede, im apan̄ ko ikar jeļmae ilo jikin jikuul, ilo aō niknik ilo kōm̧m̧ane kūr ko aō, im kaajiririk juon baamle ekar kepooj n̄a n̄an ilju im jeklaj. Elak ļapļo̧k aō mōnōnō ilo aō iooni men kein reppen kōn tōmak ilo Irooj, eļapļo̧k aō eddōkļo̧k ilo mour in rikaloor eo aō.

Men ko reppen ilo mour ko ad renaaj itok ilo ad jab ilbōk eļan̄n̄e emōj aer deļo̧n̄e iaļ in erānin̄ im eaidik.¹² Jisōs Kraist eaar katakin “pokake kōn men ko eaar eñtaan kaki.”¹³ Ilo ad ļoor E, eļaptata ilo iien ko reppen ñan kōj, jemaroñ eddōkļo̧k ñan erom̧ āinwōt E.

Juon iaan kallim̧ur ko jinoin jaar kōm̧m̧ane ippān Irooj ilo tampeļ ej n̄an mour kōn kien wūjeļepļo̧k. En̄taan ekar baj aolep iien m̧ōttan gospel eo an Jisōs Kraist. Ej juon menin kakeememej kōn en̄taan eo eļap an Jisōs Kraist n̄an aolep ro rekar mour ak naaj mour ioon laļin.

Pija

Mijenede ro an Elder Morrison

Ijeļā bwe Irooj ej aolep iien jeļā ikdeleel ko ad rejim̧we. Keememej elōn̄ ajri ro kar kallim̧ur kaki ilo kōjeraam̧m̧an in petriak eo aō? Em̧ōj aer kūrm̧ool. Kōrā eo ippa im n̄a kar jerbal ippān bukwi mijinede ro, jān elōn̄ļo̧k jān 25 laļ ko, ilo Ghana Cape Cost Mission. Relukkuun aorōk ippem āinwōt n̄e rej lukkuun nejim.

Ij kam̧ool bwe jej eddōkļo̧k ilo mour in rikaloor n̄e jej kōjerbal tōmak eo ilo Irooj ilo iien ko reppen. Ilo ad kōm̧m̧ane menin, E enaaj tūraim̧o ilo an kōkajoor im jipan̄ kōj ineek eddo ko ad. Ilo etan Jisōs Kraist, amen.