Ļoor Jisōs Kraist kōn Bun̄tōn Ne ko an Tōmak

Kom̧ em̧ool, kuwaer en, kōn al “Faith in Every Footstep.” Kōjan̄jan̄ im naan ko an al jab in raar jeje ilo 1996 jān Brother Newell Dayley¹ ilo m̧aanjabpopo n̄an keemem eo an 150th anniversaryy eo an jikrōktok eo an bainiier ro jinoin n̄an Salt Lake Valley ilo 1847 eo.

Men̄e al in ekar jeje ilo m̧aanjabpopo n̄an iien keemem eo, ennaan eo an ej jerbal n̄an aolepān laļ in.

Iļakkar baj iakwe wōt ko̧rōj eo:

Ro jeiū im jatū, ij kam̧ool bwe ilo ad ļoor Jisōs Kraist kōn bun̄tōn ne ko an tōmak, ewōr kōjatdikdik. Ewōr kōjatdikdik ilo Irooj Jisōs Kraist. Ewōr kōjatdikdik n̄an aolep ilo mour in. Ewōr kōjatdikdik n̄an anjo̧ jān bōd ko ad, būrom̧ōj ko ad im apan̄ ko, im mālijjon̄ ko im jorrāān ko ad. Ewōr kōjatdikdik ilo ukweļo̧k im jeorļo̧k bōd im ilo jeorļo̧k bōd an ro jet bōd. Ij kam̧ool bwe ewōr kōjatdikdik im aenōm̧m̧an ilo Kraist. E emaron̄ rejtake kōj rainin ilo iien ko reppen. E ekar kōm̧m̧ane n̄an bainiier ro jinoin, im E enaaj kōm̧m̧ane kiiō n̄an kajjojo iaad.

Iiō in ejejjet 175th anniiversary eo an jikrōktok eo an bainiier ro jinoin n̄an Salt Lake Valley, eo ekar kōm̧m̧an bwe in kejekļo̧kjeņ kōn rūtto ro jibū im jim̧aaō etto, jet raar etetal laļ tok jān Nauvoo n̄an Salt Lake Valley. Ewōr ro jibū im jim̧m̧aō me raar etetal laļ tok ilo melaaj kileep ko ke rekar jodikdik. Henry Ballard ekar 20 iiō dettan;³ Margaret McNeil ekar 13;⁴ im Joseph F. Smith, eo tokālik ekar erom̧ Būreejtōn eo kein kajiljino an Kabun̄ in, ekar 9 wōt ke ekar jikrōktok ilo Salt Lake Valley.⁵

Raar ioon aolep kain en̄taan ko ilo iaļ eo aer, ko āinwōt iien ko rem̧ōļo, nan̄inmej, im jabwe m̧ōn̄ā im nuknuk. N̄an waanjon̄ak, n̄e Henry Ballard ej deļon̄e Salt Lake Valley, ej lan̄lōn̄ ilo an loe “Āneen Kallim̧ur” ak mour kōn mijak me juon armej emaron̄ lo e kōnke nuknuk ko ekar kaņōki rekar reppotaktak jon̄an ekar jab lukkuun penjak ānbwinin. Ekar nooje emake ilikin mar ko aolepen raan eo m̧ae ekar marok. Innem ekar etal wōt n̄an juon em̧ im kajjitōk an nuknuk bwe en maron̄ wōnm̧aanļo̧k ilo ilaļ eo an im pukot jinen im jemān. Ekar lukkun kam̧m̧oolol n̄an Anij bwe ekar tōpar m̧weo enej kar m̧ōn ilo ejjeļo̧k jorrāān.⁶

Jibun jim̧aaō ekar ļoor Jisōs Kraist kōn Bun̄tōn Ne ko an Tōmak ilo aolep mellijon̄ ko kajjojo aer. Ij kam̧m̧oolol er kōn aer kar jab ebbweer. Bun̄tōn ne in tōmak ko aer raar kōjeraam̧m̧an eō im epepen ko im̧aanļo̧k, ejja āinwōt bun̄tōn ne in tōmak ko ami rainin renaaj kōjeraam̧m̧an ro ineemi.

Naan eo bainiier ej jim̧or juon noun im juon verb. Āinwōt juon noun emaron̄ meļeļe in juon armej eo ej ibwilijin ro im̧aan tata n̄an etale ak pād ilo juon jikin (territory) kāāl. Āinwōt juon verb, emaron̄ meļeļe n̄an kōpeļļo̧k ak kōpooj iaļ eo n̄an ro jet n̄an ļoore.⁷

N̄e ij ļōmņak kōn bainiier ro raar kōpooj iaļ eo n̄an ro jet, ij m̧oktata ļōmņak kōn Rikanaan Josep Smith. Josep ekar juon bainiier kōnke bun̄tōn ne in tōmak ko an raar tōlļo̧k e n̄an bukwin wōjke ko, ijo ekar bukwelōlō im jar im kar kōpeļļo̧k iaļ eo n̄an kōj n̄an bōk tarlep in gospel eo an Jisōs Kraist. Tōmak eo an Josep n̄an “kajjitōk ippān Anij”⁸ ilo jibbon̄ in sprint eo ilo 1820, ekar kōpeļļo̧k iaļ eo n̄an Jepļaaktok eo an tarlep in gospel eo an Jisōs Kraist, eo me ekitbuuj kūr rikanaan ro im rijilōk ro n̄an jerbal ioon laļ in bar juon alen.⁹ Ijeļā Josep Smith ej juon rikanaan an Anij. Ijeļā bun̄tōn ne in tōmak eo an kar tōlļo̧k e n̄an bukwelōlō ilo im̧aan mejān Anij Jemed im Nejin Jitōnbōr, Jisōs Kraist.

Bun̄tōn ne ko an tōmak eo an Rikanaan Josep ekar kōmaron̄ e n̄an erom̧ kein jerbal an Irooj ilo bōk m̧aantak Bok in Mormon, eo ej bar juon kallim̧ur kōn Jisōs Kraist im jouj in pinmuur eo An.

Kōn tōmak niknik eo an Josep Smith ilo an kar dibuk apan̄ epen im jum̧ae, ekar maron̄ erom̧ juon kein jerbal ilo pein Irooj ilo kajutak Kabun̄ eo an Jisōs Kraist bar juon alen ioon laļ in.

Ilo kweilo̧k eo eļap me ej kab jem̧ļo̧kļo̧k, ikar kōnono kōn ekōjkan an jerbal in mijenede aolep raan kar kōjeraam̧m̧an eō. Ikar jeraam̧m̧an ilo aō kar katakin kōn aiboojoj eo an karōk in lo̧mo̧o̧r eo an Jemedwōj Ilan̄, Visōn eo Kein Kajuon an Josep Smith, im an ukōt Bok in Mormon. Katak kein kar kōjepļaaktok im katak eo kar tōl bun̄tōn ne in tōmak eo aō ilo katak ro raar m̧ōņōņō in ron̄jake ennaan eo an Jepļaaktok eo an gospel eo.

Mijenede ro ad rainin rej bainiier ro raan kein kōnke rej kwaļo̧k ennaan aiboojoj in ippān armej ro ipeļaakin laļ in, kōn menin ekōpeļļo̧k iaļ eo n̄an ajri ro nejin Jemedwōj Ilan̄ n̄an jeļā E im Nejin, Jisōs Kraist. Bōk gospel eo an Jisōs Kraist ekōpeļļo̧k iaļ eo n̄an aolep n̄an m̧aanjabpopo n̄an im bōk kain̄i ko im kōjeraam̧m̧an ko an Kabun̄ in im tampeļ.

Kweilo̧k eo eļap ej kab jem̧ļo̧kļo̧k, Būreejtōn Russell M. Nelson ekar bar kalikkarļo̧k: “bwe Irooj ekar kajjitōk ippān aolep likao ro rerreo, ekeke ānbwinnier n̄an m̧aanjabpopo n̄an im jerbale juon mijen” im bwe “mijen ej barāinwōt juon kajoor, ak kāālet, ej juon iien em̧m̧an” n̄an “jiron̄ ro im sister ro rekeke ānbwinnier.”¹⁰

Likao im jiron̄ ro jitōnbōro, bun̄tōn ne in tōmak eo ami enaaj jipan̄ kom̧ n̄an ļoor kūr eo an Irooj n̄an etal im mijen—n̄an erom̧ bainiier ro raan kein—ilo ami kōpeļļo̧k iaļ eo n̄an ajri ro nejin Anij n̄an lo im pād wōt ilo iaļan bujen eo ej tōļļo̧k n̄an im̧aan Mejān aiboojoj.

Būreejtōn Nelson ekar juon bainiier ilo Kabun̄ in. Āinwōt juon Rijilōk ekar ito itak n̄an im kar kōpeļļo̧k elōn̄ āne ko n̄an kwaļo̧k gospel eo. Ejjab to ālkin an kar erom̧ rikanaan im Būreejtōn an Kabun̄ in, ekar akweļap ippād n̄an “kōļapļo̧k maron̄ in jetōb eo [ad] n̄an bōk revelesōn.”¹¹ Ej wōnm̧aanļo̧k wōt n̄an katakin kōj kōkajoorļo̧k naan in kam̧ool ko ad. Ilo juon nokon n̄an rūm̧m̧an ded ro, ekar ba:

“Ij akweļap ippāmi n̄an bōk eddo in naan in kam̧ool eo ami. Jerbal n̄an e. Bōke bwe en wōjam̧. Kea kake. Najidiki bwe en maron̄ naaj eddōkļo̧k. …

“[Innām] alooje menin bwilōn̄ ko me rej waļo̧k ilo mour eo ami.”¹²

Ej katakin kōj kōn ekōjkan an ļapļo̧k ad ūn̄n̄are kōj make ilo jetōb. Ekar bar ba, “Ilo raan ko rej itok, enaaj maron̄ pen n̄an jo̧o̧r ilo jetōb ilo ad jab tōl, jineet, kaenōm̧m̧an, im bōk kareel eo an Jetōb Kwojarjar.”¹³

Ij kam̧ool bwe Būreejtōn Russell M. Nelson ej rikanaan eo an Anij ioon laļ in rainin.

Ad Rilo̧mo̧o̧r, Jisōs Kraist, ej bainiier eo āliktata ilo kōpooj iaļ eo. Ilo m̧ool, E ej “iaļ eo”¹⁴ n̄an karōk in lo̧mo̧o̧r eo n̄an kadedeļo̧k bwe jen maron̄ ukweļo̧k im, kōn tōmak ilo E, bar ro̧o̧l n̄an ippān Jemedwōj Ilan̄.

Jisōs Kraist eaar ba, “N̄a iaļ eo, im m̧ool eo, im mour eo: ejjeļo̧k armej ej itok n̄an Jema, eļan̄n̄e jab kōn eō.”¹⁵ E ekar kallim̧ur n̄an jab likūt kōj atajinemjen; E enaaj itok n̄an mālijjon̄ ko ad.¹⁶ E ekar kajjitōk ippād n̄an “itok n̄an [E] kōn aolepān kōttōpar in bōro, im [E] enaaj kemour [kōj].”¹⁷

Ij kam̧ool bwe Jisōs Kraist ej ad Rilo̧mo̧o̧r im ad Ripinmuur, ad Rijojomar ippān Jemen. Jemedwōj Ilan̄ ekar kōpeļļo̧k iaļ eo n̄an kōj n̄an bar ro̧o̧l n̄an E kōn ļoor Nejin Jitōnbōro, Jisōs Kraist, kōn tōmak ilo aolep bun̄tōn ne.

Ro jibū im jim̧m̧aō im bainiier ro jet jinoin tata raar jelm̧ae elōn̄ kapan̄pan̄ ko ke raar itok kōn waikōn ko, handcart ko, im etetal laļ tok n̄an Salt Lake Valley. Jej barāinwōt jelm̧ae apan̄ ko ilo iaļ ko ad make ilo aolepān mour ko ad. Jejjab būlbūl handcart ko ak kattōri waikōn ko elōn̄ raer ilo toļ ko reju im ilo jikin ko emejel jiņo̧ ko ie; jej kajjieon̄ āinwōt kar er n̄an anjo̧ ilo jetōb ioon kapo ko im apan̄ ko an tōre in ad. Ewōr ad mālijjon̄ ko n̄an dibuki; ewōr ad bat ko—im jet iien toļ ko—n̄an tallōn̄i. Men̄e mālijjon̄ ko rainin rooktak jān ko an bainiier ro jinoin, ejjab dikļo̧k aer kapan̄ kōj.

Eaorōk n̄an ļoor rikanaan eo im jab ne teļeļe ilo dim ilo iaļan bujen eo ad ilo tiljek, ejja āinwōt kar n̄an bainiier ro jinoin.

Jen ļoor Jisōs Kraist kōn tōmak ilo aolep bun̄tōn ne. Jej aikuj in jerbal n̄an Irooj im jerbal n̄an doon. Jej aikuj in kōkajoorļo̧k kōj make ilo jetōb kōn kōjparok im kautiej bujen ko ad. Jej aikuj jab jerwane en̄jake eo aorōk n̄an kōjparok kien ko. Setan ej kajjieon̄ in kōm̧ōjņo̧ikļo̧k kallim̧ur eo ad im iakwe eo ad n̄an Anij im Irooj Jisōs Kraist. Jouj keememej bwe eļan̄n̄e jabdewōt ej jejļo̧k jān iaļ eo an, jejjamin naaj jako jān ad Rilo̧mo̧o̧r. Kōn kōjeraam̧m̧an eo an ukweļo̧k, jemaron̄ bar ro̧o̧l n̄an E. E enaaj jipan̄ kōj ekkatak, eddōkļo̧k, im oktak ilo ad kajjieon̄ pād wōt ilo iaļan bujen eo.

Jen indeeo ļoor ilo bun̄tōn ne ko an Jisōs Kraist im, kōn tōmak ilo aolep bun̄tōn ne ko ad, kalimjōk E, jab ne teļeļe ilo dim ioon iaļan bujen eo ad, ej jar eo aō ettā in ilo etan Jisōs Kraist, amen.