Bōro Em̧ool
Jej aikuj rikaļoor ro an Jisōs me rej lan̄lōn̄ im bōro em̧ool ilo iaļ in rikaļoor eo ad make.
Jet iien, ejipan̄ n̄an jeļā ta n̄an kōtmene.
Jem̧ļo̧kin ļo̧k jerbal in karejar eo An, Jisōs ekar jiron̄ Rijilōk ro An bwe iien ko reppen renaaj itok. Ak Ekar bar ba, “Lale bwe kom̧win jab lōļn̄o̧n̄.”1 Aaet, Enaaj kar ilo̧k, ak E ban kōmakeļo̧k er.2 Enaaj kar jilkinļo̧k Jetōb eo An n̄an jipan̄ er keememej, dim, im lo aenōm̧m̧an. Rilo̧mo̧o̧r ej kakūrm̧ool kallim̧ur ko An bwe enaaj pād ippād, rikaļoor ro An, ak jej aikuj wōnm̧aanļo̧k wōt im reilo̧k n̄an E n̄an jipan̄ kōj kile im lan̄lōn̄ kōn An pād ippād.
Ro rikaļooran Kraist raar ioon iien ko reppen aolep iien.
Juon m̧ōtta ekar jilkintok n̄an eō juon bwebwenato in etto jān Nebraska Advertiser, juon nuuj peba in Midwestern United States, kar jeje ilo Juļae 9, 1857. Ej riit: “Kiiō ej jibbon̄ juon kumi in Mormon raar eļļāļo̧k ilo iaļ eo aer n̄an Salt Lake. Kōrā ro (me ilo m̧ool raar om̧oja) kar būlli hand cart ko āinwōt n̄e kar menin mour, juon [kōrā] ekar wōtlo̧k n̄an pedkat in ekilmej eo ekar kōm̧m̧an an armej ro bōjrak jidik, ajri ro reddik rekar kadikdik aer etetal laļļo̧k kōn nuknuk ko aer rejeņoļo̧k kaki rej kaņōki āinwōt ro jineer.”3
Ekar ļap aō ļōmņak kōn kōrā in ejakoļo̧k kōn pedka. Etke liin ekar make būlbūl? Ekar ke juon m̧am̧a ejjeļo̧k rejtan? Ta eo ekar leļo̧k n̄an e kajoor itulowaan, kijejeto, kijenmej im niknik n̄an kōm̧m̧ane em̧m̧akūt in ekanooj in pen ilo pedkat, būlli aolep men ko m̧weien ilo juon handcart n̄an juon kapijuknen jab jeļā kake—jet iien kar kajirere kake er?4
Būreejtōn Joseph F. Smith ekar kōnono kōn kajoor eo itulowan an kōrā in bainier rein, ba: “Kwomaron̄ ke kar kōro̧o̧l juon iaan kōrā rein jān tōmak ko aer ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata? Kwomaron̄ ke kar kōmarokļo̧k ļōmņak ko aer kōn mijen eo an Rikanaan Josep Smith? Kwomaron̄ ke kar tōl piloik er kōn kautiej eo n̄an mijen kwojarjar eo an Jisōs Kraist, eo nejin Anij? Jaab, kwoban kar ļo̧k wōt n̄an jidik. Etke? Kōnke raar jeļā. Anij ekar kwaļo̧ke n̄an er, im raar meļeļe kake, im ejjeļo̧k kajoor ioon laļ in naaj kar kōro̧o̧lļo̧k er jān ta eo raar jeļā bwe em̧ool.”5
Ro jeiū im jatū, n̄an erom̧ kain em̧m̧aan im kōrā ro ej kūr eo ilo tōre in ad—rikaļoor ro rej kōm̧m̧ani kijejeto ko n̄an pukōt kajoor eo n̄an wōnm̧aanļo̧k n̄an kōm̧m̧ane juon kijejeto men̄e ioon idajon̄jon̄ ko reppen, rikaļoor ro kōn jeļā eo me em̧ōj an waļo̧k n̄an kōj jān Anij, rikaļoor ro an Jisōs ro rej lan̄lōn̄ im bōro em̧ool ilo iaļ eo aer make ilo mour an rikaļoor. Āinwōt rikaļooran Jisōs Kraist, jej tōmak im jemaron̄ eddōļo̧k ilo jilu m̧ool ko raorōk.
Juon, Jemaron̄ Kōjparok Bujen ko Ad, Jekdo̧o̧n N̄e Ejjab Pidodo
N̄e tōmak eo ami, an baam̧le eo ami, ak jekļaj eo ami rej idajon̄jon̄—n̄e kom̧ij ļōmņak etke mour in ekanooj pen n̄e kom̧ij kōm̧m̧an em̧m̧an tata n̄an mour kōn gosepl eo—keememej bwe Irooj ekar jiron̄ kōj n̄an kōtmene jorrāān ko. Jorrāān ko rej m̧ōttan karōk eo im ejjab meļeļe in em̧ōj kōjojoļāār kom̧; rej m̧ōttan ta meļeļe in n̄an erom̧ An rikaļoor.6 E ekar, ālkin men otemjej, “juon armej in būrom̧ōj, im ear jeļā liaajlo̧ļ.”7
Ij ekkatak bwe Jemedwōj Ilan̄ eļapļo̧k an itok limoin ilo eddōļo̧k eo aō āinwōt juon rikaļooran Jisōs Kraist jān An itok limo kōn an em̧m̧an kōjeiō. Imaron̄ jab aolep iien kōņaan bwe in āindein—ak ej!
Mour ilo meoeo ejjab bōktok kajoor. Kajoor eo jej aikuji n̄an jutak pen ņae apan̄ ko jej jelm̧ai kiiō kajoor an Irooj, im An kajoor ej itok kōn bujen ko ad Ippān.8 N̄an ju mejmej kōn tōmak eo ad n̄e jelm̧ae idajon̄jon̄ eo epen—ilo m̧ool in kajjieon̄ kajjojo raan n̄an kōm̧m̧ane ta eo jaar kallim̧ur ippān Rilo̧mo̧o̧r jenaaj kōm̧m̧ane, men̄e im eļap tata n̄e jej m̧ōk, inepata, im kakkōt ippān kajjitōk im jerbal ko rej kainepata—ej n̄an jidik kōn jidik bōk An meram, An kajoor, An iakwe, An Jetōb, An aenōm̧m̧an.
Un eo n̄an etetal ilo iaļ in bujen eo ej n̄an kepaak Rilo̧mo̧o̧r. E ej un eo, ejjab eddōkļo̧k eo n̄an ad eweppān. Ejjab juon aikoj, im jej aikuj jab keidi iaļ eo ad n̄an ro jet’. Jekdo̧o̧n n̄e jej kōm̧m̧an bōd, E ej pād ijo.
Ruo, Jemaron̄ Jerbal kōn Tōmak
Āinwōt rikaļooran Jisōs Kraist, jemeļeļe bwe tōmak ilo E ej aikuj jerbal—eļap tata ilo iien ko reppen.9
Elōn̄ iiō ko remootļo̧k, ro jinō im jema raar kāālet n̄an bar carpet e m̧weo. Bon̄ōn eo m̧okta carpet kāāl eo ekar itok, jinō ekar kajjitōk ippān ļōm̧aro jatū n̄an kōm̧akūt furniture eo im kōjarļo̧k karpet ko an jikin kiki eo bwe carpet eo ekāāl en maron̄ eļļak. Leddik eo kar jimjuon an iiō jatū, Emily, em̧ōj an kiki kadede. Kōn menin, ke ekar kiki, raar kōm̧akūt aolep furniture jān ruum̧ eo an, ijello̧kin peet eo an, innām kōjar carpet eo. Ekwe, āinwōt ļōmaro jein jet iien rej kōm̧m̧an, raar kāālet n̄an kōm̧man kōjak. Raar kōm̧akūt aolep men ko m̧weien jān closet eo im dipin ruum̧ eo, likūt ejjeļo̧k ilo ruum̧ eo. Innām raar je juon leta im likūti ilo dipin m̧weo “Dear Emily, em̧ōj am em̧m̧akūt. Jenaaj jeje waj jejjo raan jān kiiō im jiron̄ eok ia eo jepād ie. “Iakwe baam̧le eo am̧.”
Jibbon̄ōn eo juon ke Emily ekar jab itok in kōm̧abun̄, ļōm̧aro jatū raar ilo̧k in pukōt e—en̄ eo, būrom̧ōj im make iaan tulik in kōjām eo ekilōk. Emily ekar kōļmenļo̧kjeņ kōn en̄jake in tok ālik: “Ikar en̄jake metak. Ak ta eo enaaj kar waļo̧k n̄e in kar kōpeļļo̧k kōjām eo? Ta eo inaaj kar ron̄? Ta eo inaaj kar āt bwin? Inaaj kar jeļā ikar jab make iaaō. Inaaj kar jeļā ke kar lukkuun iakwe eō. Em̧ool ļōmņak eo eban kar jiktok ippa n̄an kōm̧m̧ane juon men kōn jekjek eo aō. Ikar ebbweer im pād wōt ilo kūļo̧jet eo aō im jan̄. Im aaet n̄e in kar baj kōpeļļo̧k kōjām eo.”10
Leddik eo jatū ekar kōm̧m̧ane juon bōklōkōt pedped ioon ta eo ekar loe, ak ekar jab juon kōļmenļo̧kjeņ kōn wāween an men ko kar lukkuun. Ekaitok tok limo ke bwe kōj, āinwōt Emily, maron̄ lukkuun en̄jake tōr jān jon̄an būrom̧ōj ak metak ak ebbweer ak inepata ak ajimakeke ak illu ak matōrtōr bwe āinwōt ejjab waļo̧k n̄an kōj n̄an baj kōm̧m̧ane juon men, n̄an kōpeļļo̧k kōjām eo, n̄an jerbal kōn tōmak ilo Jisōs Kraist?
Jeje ko rekwojarjar robrak kōn waanjon̄ak ko in em̧m̧aan im kōrā ro, rikaļoor ro an Kraist, ro, n̄e jelm̧ae kōn apan̄ pen, kar jerbal—ro rekar jutak lōn̄tak ilo tōmak im etetal.11
N̄an rileba ro raar kappukot kemour, Kraist ekar ba: “Kom̧win ilo̧k im kwaļo̧k kom̧ n̄an pris ro. Im kōn menin, bwe, ke rej ilo̧k, em̧ōj karreoik er.”12
Raar ilo̧k n̄an kwaļo̧k er make n̄an pris ro āinwōt n̄e ekar mōj kar kōmour er, im ilo jekjek eo an jerbal, raar.
Ibar kōņaan ba n̄e ļōmņak eo n̄an jerbal ilo ioļapļap in am̧ en̄jake metak epen, jouj kōtļo̧k bwe jibadbad eo am̧ en n̄an kappok jipan̄—n̄an juon m̧ōttad, juon uwaan baam̧le, ak ritōl an Kabun̄ in, juon ritijem̧ļo̧k. Menin emaron̄ bun̄tōn im̧aan n̄an kōjatdikdik.
Jilu, Jemaron̄ Erom̧ Bōro Em̧ool im Lan̄lōn̄ ilo Wūjlepļo̧k eo Ad13
N̄e iien ko reppen rej itok, ij kajjieon̄ keememej bwe ikar kāālet n̄an ļoor Kraist m̧okta jān aō kar itok n̄an laļ in im bwe ej idajon̄jon̄ n̄an aō tōmak, aō ājmour, im aō niknik rej aolep m̧ōttan un eo ij pād ijin. Im ilo m̧ool ijjab aikuj ļōmņak bwe mālijjon̄ ko an rainin ren ejaak pere kōn iakwe an Anij n̄an n̄a ak en ukōt tōmak eo aō ilo E n̄an pere. Mālijjon̄ ko ejjab meļeļein bwe karōk eo ejorrāān; rej m̧ōttan karōk eo n̄an jipan̄ eō pukōt Anij. Ij erom̧ āinwōt E n̄e ij niknik ilo kōmaanwa im, kōjatdikdik, āinwōt E, n̄e ilo en̄taan, eļapļo̧k an m̧ool aō jar.14
Jisōs Kraist ekar waanjon̄ak eo eweppān kōn iakwe Jemen kōn aolepān Būruōn—kōn kōm̧anm̧an Ankilan, jekdo̧o̧n ta wōņāān eo.15 Ikōņaan ļoor waanjon̄ak eo An ilo aō kōm̧m̧ane ejja men eo wōt.
Ij im̧we kōn bōro em̧ool, rikaļoor eo eļap an kōrā eo emej pāleen eo ekar joļo̧k jāān dekā ko ruo an n̄an jikin kakoņkoņ eo an tampeļ eo. Liin ekar kōmaatļo̧k men otemjej.16
Jisōs Kraist ekar kile tenkwadik eo an ke ekar leļo̧k aolepen ilo an ro jet lo liin wōt kōn jabwe. Menin em̧ool bar n̄an kōj kajjojo. Ejjab lo jabwe eo ad āinwōt likjab ijello̧kin āinwōt juon iien em̧m̧an n̄an kōjerbal tōmak im eddōkļo̧k.
Jem̧ļo̧k in
Rikaļoor ro m̧ōtta an Jisōs Kraist, kōn aolepān būruō, ij kāālet n̄an jutak ippān Irooj. Ij kāālet n̄an jutak ippān ro Rikaraejeran kar kāālet—Būreejtōn Russell M. Nelson im Rijilōk ro m̧ōttan—bwe rej kōnono n̄an E im rej rikōjparok kain̄i ko im bujen ko me rej liāp eō n̄an Rilo̧mo̧o̧r.
N̄e ij wōtlo̧k, inaaj jerkak wōt, pedped ioon jouj im kajoor in kōmaron̄ eo an Jisōs Kraist. Inaaj pād ilo bujen eo aō Ippān im jerbali kajjitōk ko aō kōn ekkatak naan an Anij, kōn tōmak, im kōn jipan̄ eo an Jetōb Kwojarjar, eo an tōl ij lōke. Inaaj pukōt Jetōb eo An aolep raan n̄an kōm̧m̧ani men ko reddik im ļam waan.
En̄in ej iaļ in rikaļoor eo aō.
Im m̧ae raan eo me aolep kinej ko an mour wabanban in rej mo, inaaj kōttar Irooj im lōke E—iien eo An, An mālōtlōt, An karōk.17
Jibwe pein doon ippam̧i, ikōņaan jutak Ippān n̄an indeeo. Bōro Em̧ool. Jeļā bwe n̄e jej iakwe Jisōs Kraist kōn aolepān būruōd, E ej letok n̄an kōj aolep men.18 Ilo etan Jisōs Kraist, amen.