Uwaak Eo Ej Jisōs

Ej juon utiej n̄an kōnono n̄an kom̧ ilo m̧wen̄an in an kweilo̧k in. Rainin ij kōnono n̄an kom̧ āinwōt ro m̧ōtta. Ilo Gospel Jon, Rilo̧mo̧o̧r eo ekar katakin bwe jej ro M̧ōttan n̄e jej kōm̧m̧ane ta Ej kajjitōk ippād n̄an kōm̧m̧ane.¹

Ej ad kajjojo im ad aolep iakwe n̄an Rilo̧mo̧o̧r, im bujen ko ad Ippān, me rej lukwōj kōj ippān doon. Āinwōt an Būreejtōn Henry B. Eyring kar katakin: “N̄an ko̧m ikōņaan ba ewi jon̄an an Irooj iakwe kom̧ im lōke kom̧. Im, em̧ool eļapļo̧k, ikōņaan jiron̄ kom̧ ewi jon̄an An pedped ioomi.”²

Ke kar kūr eō āinwōt juon Ritōl Rutiej an Kabun̄ in jān Būreejtōn Russell M. Nelson, ikar obrak kōn en̄jake ko. Ekar tōrjān jon̄an. Kōrā eo ippa, Julie, im n̄a kar kijooror in kōttar m̧wen̄an eo an ālkin rāelep in Jādede eo an kweilo̧k eo eļap. Ekar menin ettā n̄an kar rejtak. Ikar kanooj bwini jikin iuwe ko n̄an jea eo kar kōjenolo̧k aō bwe in jab okjak ilo ijjitōn̄ eo aō im̧aan tata.

Ilo jem̧ļo̧kin m̧wen̄an jab eo, juon men ekar waļok me ekar wōr kilaan em̧wilaļ ilo n̄a. Ro uwaan doulul eo kar ejake juon ļain im kar iak-iakwe Ritōl Reuteij ro rekāāl juon illo̧k juon. Kajjojo raar kwaļo̧k iakwe im rejtak eo aer. Kōn juon abrazo in pinnik raar ba, “Jab inepata—kwoj uwaan.”

Ilo jemjerā eo ad ippān Rilo̧mo̧o̧r, E ej kalimjōk bōro eo im ej “jab kalijekļo̧k.”³ Ļōmņak kōn ekōjkan An kar kāālet Rijilōk ro An. E ekar jab watōk kadkad ak m̧weie eo aer. Ej kajjitōk ippād n̄an ļoor E, im ij tōmak Ej kam̧ool n̄an kōj bwe kōj jej An.

Ennaan in ej jerbal eļap tata n̄an jodikdik ro an Kabun̄ in. Ij loe ilo ko̧m ta eo Būreejtōn Nelson ej loe ilo kom̧. Ekar ba bwe “ewōr juon men ban kariabwe ejenolo̧k kōn epepen in an jodikdik ro. Jememi Ilan̄ aikuj wōr an lōke eļap ilo kom̧ n̄an jilkintok kom̧ n̄an laļ in ilo tōre in. Kom̧ kar ļotak n̄an em̧m̧an!”

Ij kam̧m̧oolol kōn ta eo ij ekkatak jān jodikdik ro. Ij kam̧m̧oolol kōn ta eo ajri ro nejū rej katakin eō, kōn ta eo mijenede ro ad rej katakin eō, im kōn ta eo leddik ak ļaddik ro nej nejū rej katakin eō.

Ejjab lukkuun to, ikar jerbal ilo farm eo amim ippān eo nej nejū Nash. Jiljino an iiō im būruwōn erreo. Ej ļaddik eo nej nejū em̧m̧an tata ippa etan Nash, im ij tōmak n̄ain juon eo nej jemen em̧m̧an tata ippān ej kōnono ilo kweilo̧k in rainin.

Ke ekar jipan̄ eō walōn̄tak kōn juon uwaak n̄an būroojāāk eo am̧ro, ikar ba, “Nash, ej juon ļōmņak em̧m̧an. Ekōjkan am̧ kanooj māletlet?” Ekar kalimjōk eō, ippān juon erreitok ilo mejān me ekar ba menin, “Jema Ryan, ekōjkan am̧ jab jeļā uwaak eo n̄an kajjitōk in?”

Ekar kōm̧akūtkūt aeran, im ettōn̄ dikdik, im ba kōn lōke, “Jisōs.”

Nash ekar kakeememej eō raan eo kōn katak in eļem waan im aaet m̧wilaļ. Uwaak eo n̄an kajjitōk ko reļem waan tata im n̄an jorrāān ko rōkapokpok tata ejjab oktak iien otemjej. Uwaak eo ej Jisōs Kraist. Aolep uwaak loe ilo E.

Ilo Gospel Jon, Rilo̧mo̧o̧r eo ekar ba n̄an ro Rikaļooran bwe E enaaj kar kōpooj juon jikin n̄an er. Tomas ekar pok im ba n̄an Rilo̧mo̧o̧r eo:

“Irooj, kōm jaje ijo kwoj ilo̧k ie ļo̧k; im ekōjkan am jeļā iaļ eo?

“Jisōs e ba n̄an e, N̄a iaḷ, im ṃool, im mour. Ejjeḷọk armej ej itok n̄an Jema, eļan̄n̄e jab kōn Eō.”⁵

Rilo̧mo̧o̧r eo ekar katakin ro Rikaļooran bwe E ej “iaļ eo, m̧ool eo, im mour eo.” E ej uwaak eo n̄an kajjitōk eo kōn wāween itok n̄an ippān Jemed Ilan̄. Bōk juon naan in kam̧ool kōn jerbal kwojarjar eo An ilo mour ko ad ekar juon men ikar ekkatak āinwōt juon likao.

Ke ikar jerbal āinwōt juon mijenede ilo Argentina, Būreejtōn Howard W. Hunter ekar karuwainene kōm n̄an kōm̧m̧an juon men eļap an jelet mour eo aō. Ekar ba, “Jej aikuj jeļā Kraist em̧m̧anļo̧k jān ad jeļā e; jej aikuj keememej E emakijkijļo̧k jān ad keememej e; ej aikuj ļapļo̧k ad peran ilo jerbal n̄an e jān jerbal n̄an e.”⁶

Ilo iien eo, ikar inepata kōn ekōjkan aō erom juon mijenede em̧m̧anļo̧k. Menin ekar uwaak eo: n̄an jeļā Kraist, n̄an keememej E, im n̄an jerbal n̄an E. Mijenede ro ilo aolepān laļ in rej ippān doon ilo jibadbad in: n̄an “karuwaineneik ro jet n̄an itok n̄an Kraist ilo aer jipan̄ er bōk gospel eo kar kōjepļaaktok kōn tōmak ilo E im Pinmuur eo An” im kōn “ukweļo̧k, peptaij, bōk menin letok eo an Jetōb Kwojarjar, im niknik n̄an jem̧ļo̧kin.”⁷ N̄an ro m̧ōttad, ro rej ron̄jake mijenede ro, ij kobaik kūr in aō n̄an itok n̄an Kraist. Ippān doon jenaaj kajjieon̄ n̄an jeļā E, keememej E, im jerbal n̄an E.

Jerbale juon mijen ekar juon iien ekwojarjar ilo mour e aō. Ilo intōrpiu eo aō āliktata ippān āinwōt juon mijenede ej jerbal aolep raan, Būreejtōn Blair Pincock ekar kōnono kōn oktak eo ej pojān kōm̧m̧an ilo ritōl ro an mijen, āinwōt e im lio pāleen ekar epaak an dedeļok aer jerbal. Kōm̧ro jim̧or kar būrom̧ōj n̄an ilo̧k jān juon men eo ekar kanooj ļap am iakwe. Emaron̄ kar lo bwe ikar inepata kōn ļōmņak eo n̄e enaaj jem̧ļo̧k aō juon mijenede eo ej jerbal aolep raan. Ekar juon em̧m̧aan eo eļap an tōmak im kar katakin eō ilo iakwe āinwōt an kar ilo iiō ko ruo im̧aan. Ekar jitōn̄ļo̧k pija in Jisōs Kraist itulōn̄ in tebōļ eo an im ba, “Elder Olsen, Men otemjej renaaj Em̧m̧an kōnke ej jerbal eo An in.” Ikar bar kajoor ilo aō jeļā bwe Rilo̧mo̧o̧r eo enaaj jipan̄ kōm, ejjab ilo iien eo jej jerbal ak iien otemjej—eļan̄n̄e jenaaj n̄an E.

Sister Pincock ekar katakin kōm jān m̧wilaļ in būruen ilo juon jantōj in kajin Spanish epidodo. Ke ekar ba, “Jesucristo vive (Jisōs Kraist emour),” Ijeļā ekar m̧ool im bwe E ekar mour. Ke ekar ba, “Elderes y hermanas, les amo (elder im sister ro, ij akwe kom̧),” Ijelā bwe ekar iakwe kōm im kōņaan bwe kōmin ļoor Rilo̧mo̧o̧r iien otemjej.

Jidik iien emootļo̧k n̄a im kōrā eo pāleeō kar jeraam̧m̧an n̄an jerbal āinwōt ritōl ro an mijen n̄an jerbal ippān mijenede ro ejej uwaer ilo Urgugay. Imaron̄ ba bwe rein raar mijenede ro rem̧m̧an tata ilo laļ in, im ij lōke bwe aolep ritōl an mijen rej en̄jake ejja in wōt. Rikaļoor rein raar katakin kōj aolep raan kōn ļoor Rilo̧mo̧o̧r eo.

Ilo juon iien intōrpiu juon iaan sister mijenede ro am rem̧m̧an ekar deļo̧n̄tok n̄an opiij eo. Leddik in ekar juon mijenede ewājepedik, juon trainer elukkun em̧m̧an, im juon ritōl eo eļap an kijejeto. Kampānien ro an rekar kautiej e im kar ļap an armej iakwe. Ekar pokake, ettā, im lōke. Iien lotok ko am m̧oktaļo̧k kar pedped ioon eria eo an im armej ro ekar katakin. Lotok in ekar oktak. Ke ikar kajjitōk ippān ejet an kar pād, ekar wōr aō jeļā ke ekar inepata. Ekar ba, “Būreejtōn Olsen, ijjab jeļā eļan̄n̄e imaron̄ kōm̧m̧ane menin. Ijjab jeļā eļan̄n̄e enaaj ke bwe aō em̧m̧an. Ijjab jeļā eļan̄n̄e imaron̄ in mijenede eo me Irooj ej aikuj bwe in erom̧.”

Leddik in ekar juon mijenede ekabwilōn̄lōn̄. Kanooj em̧m̧an ilo aolep wāween. Ej ettōņak eo an juon mijen būreejtōn. Ijjan̄in kar inepata kōn maron̄ ko an āinwōt juon mijenede.

Ke ikar ron̄jake, ekar ben aō jeļā ta eo in ba. Ikar jar ilo būruo: “Jema Ilan̄, leddik in ej juon mijenede ejej uwaan. E Ej am̧. Aolep men ej kōm̧m̧ane rejim̧we. Ijjab kōņaan kakkure wāwein in. Jouj im jipan̄ eō jeļā ta eo in ba.”

Naan ko raar itok n̄an n̄a. Ikar ba, “Hermana, kwon lukkuun joļo̧k aō bōd kwoj en̄jake wāween in. In m̧ōk kajjitōk ippōm̧ juon kajjitōk. Eļan̄n̄e ekar wōr juon m̧ōttam̧ kwoj katakin im ekar en̄jake wāween in, ta eo kwonaaj kar ba?”

Ekar kalimjōk eō im ettōn̄ dikdik. Kōn jetōb in mijenede in ban kabōde im lōke, ekar ba, “Būreejtōn, epidodo. Inaaj kar jiron̄ e bwe Rilo̧mo̧o̧r eo eweppān an jeļā kōn e. Inaaj kar ba n̄an e bwe E emour. Ej iakwe eok. Ebwe am̧ em̧m̧an, im kwomaron̄e menin!”

Kōn jidik māidikdik ekar ba, “Ij ļōmņak n̄e menin ej jerbal n̄an ro m̧ōttad, innām ej barāinwōt jerbal n̄an n̄a.”

N̄e ewōr ad kajjitōk ko ak pere ko, jemaron̄ en̄jake bwe uwaak ko rekanooj pen ak bwe ekapokpok kappukot uaak ko. Jen keememej bwe rikapo eo, em̧ool jemen aolep riab ko, ej rikkal eo an kapokpok.⁸

Rilo̧mo̧o̧r eo ej M̧aajta eo an meļak.

Būreejtōn Nelson ekar bar ba:

“Eo enana emāletlet. Ium̧win taujin iiō ko ellakar kōm̧m̧an bwe em̧m̧an en nana im nana en em̧m̧an. Ennaan ko an rekoļap, rekajju, im rejejjej.

“Ijoke, ennaan ko jān Jemedwōj Ilan̄ relukkuun oktak. E ej kōnono ippād ilo juon wāween epidodo, elur, im kōn alikkar ko rekabwilōn̄lōn̄ me jeban pok kōn ta eo Ej ba.”⁹

Ewi jon̄an ad kam̧m̧oolol bwe Anij ekar kanooj iakwe kōj jon̄an Ekar jilkintok Nejin. E ej uwaak eo.

Būreejtōn Nelson ejjab kar to ekar ba:

“Gospel eo an Jisōs Kraist ej jan̄in kar ļapļo̧k aikuji jān rainin. …

“… Men in ej kwaļo̧k aorōk in kōmeļeļe ko an Irooj n̄an rikaļoor ro An n̄an ‘ilo̧k … ilo aolepānlaļ, im kwaļo̧k gospel eo n̄an armejotemjeļo̧k.’”¹⁰

N̄an kom̧ ro me renaaj kāālet n̄an jerbal, imaron̄ kwaļo̧k kam̧ool kōn kōjeraam̧m̧an ko me renaaj itok ilo ami ron̄jake kūr eo an juon rikanaan. Jerbal ejjab kōn kwe; ej kōn Rilo̧mo̧o̧r eo. Naaj kūr kom̧ n̄an juon jikin, bōtaab eo aorōkļo̧k naaj kūr kom̧ n̄an armej ro. Enaaj wōr ami eddo eļap im kōjeraam̧m̧an kōn jipan̄ ro m̧ōttami rekāāl meļeļe bwe uwaak eo ej Jisōs.

En̄in ej Kabun̄ eo an Jisōs Kraist im Armej ro Rekwojarjar ilo Raan-ko Āliktata, im en̄in ej ijo jej uwaan. Aolep men ko me Būreejtōn Nelson ej kōketak ilo iakwe n̄an kōj n̄an kōm̧m̧ani naaj kepaakļo̧k kōj n̄an Rilo̧mo̧o̧r eo.

N̄an Jodikdik ro ad raiboojoj—ekoba eo nej neju Nash—ilo aolepān mour eo ami, jekdo̧o̧n ewi pen im kapokpok in apan̄ ko remaron̄, kom̧ maron̄ iien otemjej keememej bwe uwaak eo eļem waan; ej iien otemjej Jisōs.

Āinwōt aō kar ron̄ an ro me jaar rejtake āinwōt rikanaan ro, rilolo ro, im ribōk revelesōn ro ba ilo elōn̄ iien ko, ij barāinwōt ba bwe kōmij iakwe kom̧, kōmij kam̧m̧oolol kom̧, im kōmij aikuji kom̧. En̄in ej ijo kom̧ij uwaan.

Ij iakwe Rilo̧mo̧o̧r eo. Ij kwaļo̧k kam̧ool kōn Etan, em̧ool Jisōs Kraist. Ij kam̧ool bwe E ej “Ri tōl im Ri koweeppān tōmak eo ad,”¹¹im E ej M̧aajta an ļam waan. Uwaak eo ej Jisōs. Ilo etan Jisōs Kraist, amen.