Kalōk juon Mour Edipen ņae Rikapo eo

Ilo iiō ko jān jikin kōnono in aiboojoj ilo Im̧ōn Kweilo̧k in Eļap, jekar bōk kapilōk eļap, im̧we, naan in katakin, im revelesōn. Ilo jet iien, rikōnono ro raar kōjerbal keidi ko rej iookļo̧k eria ko rejeļā kaki im imminene n̄an kōmeļeļeik alikkar im kajoor eo an juon pedped in katak an gospel eo an Jisōs Kraist.

Ilo wāween in, n̄an waanjon̄ak, jaar ekkatak kōn baļuun ko im flight ko me kōn juon irļo̧k edik emaron̄ bōkļo̧k kōj n̄an juon jikin ettoļo̧k jān ijo jekar m̧oktata jibadōkļo̧k.¹ Barāinwōt ilo wāween in, jaar ekkatak jān juon keidi an jerbal eo an menono eo ad ippān oktak in bōro eo ekajoor ej aikuj in uwaake kūr eo an Irooj n̄an ļoor E.²

Iien in, ikōņaan ilo ettā kobaiktok juon keidi eim̧we jān juon eria eo itijem̧ļo̧k ie ilo jerbal eo ikar ekkatak kake. Ij kōnono kōn jabdewōt men eo kōn civil engineering. Jān jinoin in ekkatak ko aō ilo university, ikar ettōņak kōn raan eo n̄e inaaj kar kadedeļo̧k men ko aikuji n̄an tōprak n̄an bōk kūlaaj eo me enaaj kar katakin eō ekōjkan design e im̧ōko im m̧ōko jet me renaaj kar watōki remaron̄ “kalōk n̄an jelm̧ae makūtkūt an laļ.”

Āliktata raan eo ekar itok n̄an kūlaaj eo aō im̧aan tata kōn unin katak in. Naan ko im̧aan tata jān professor eo raar er kein: “Kwoj m̧ool kwoj kijooror n̄an jino kūlaaj in im ekkatak kōn ekōjkan designi im̧ōko remaron̄ kalōk jelm̧ae makūtkūt an laļ,” innām elōn̄ iaami rej kijooror im kar em̧ajidjid. Innām professor ekar ba, “Joļo̧k aō bōd n̄an jiron̄ kom̧ bwe menin ejjab maron̄, bwe ijjab maron̄ katakin kom̧ ekōjkan designi juon em̧ me ej ņae ‘anti-’ak emaron̄ jutak, ņae m̧akūtkūt in laļ. Menin ejjab meļeļe,” ekar ba, “kōnke m̧akūtkūt in laļ ko renaaj waļo̧k jekdo̧o̧n ta, men̄e jekōņaan ak jaab.”

Innām ekar kakobaba, “Ta eo imaron̄ katakin kom̧ ej ekōjkan designi im̧ōko me rej kadikļo̧k joreen ko itok jān makūtkūt an laļ, im̧ōko me remaron̄ jum̧ae kajoor ko rej itok jān m̧akūtkūt in laļ ko, bwe m̧weo en jutak wōt bwe en jab jorrāān jān jabdewōt jorrāān eļap im maron̄ wōnm̧aanļo̧k in jerbal kōn design eo kar kōm̧m̧ane n̄an e.”

Engineer eo ej kōm̧m̧ane bōnbōn ko me rej kwaļo̧k dettan ko, jon̄an dettan ko, im piktok ko an pedped ko, joor ko, tur ko, jimeeņ dāpdep ko, im m̧ōttan kein ekkal ko jet kar karōki. Karōk ko im jon̄ak ko rejetjet reiookļo̧k rej itok jān bōnbōn ko, ko rej aikuj lukkuun ļoori jān rūkkal eo n̄an an tōprak karōk ko waļo̧k n̄e ekkal in m̧weo im kakūrm̧ool jibadbad eo an kar designi im em̧ōj kalōke.

Men̄e elōn̄ļo̧k jān 40 iiō ko remootļo̧k jān raan eo jinoin tata kar bōk kūļaaj in kilen kalōk im̧ōko n̄an kadikļo̧k joreen ko itok jān makūtkūt an laļ, ejetjet aō keememej iien eo ke ikar jino pukōt juon meļeļe em̧wilaļo̧k, edipio kōn aorōk eo ejetjet me ekkatak in enaaj kar kwaļo̧ke ilo m̧ōko me inaaj kar designi ilo jerbal eo aō ilju im jekļaj ilo mour eo aō. Ejjab in wōt, ak em̧ool eļapļo̧k an aorōk—bwe enaaj kar lukkuun waļo̧k ilo kōkōm̧anm̧anļo̧k mour eo aō make im ioon ro me imaron̄ kōjerbale juon kareel em̧m̧an.

Eļap ad jeraam̧m̧an n̄an pedped ioon juon jeļā kōn karōk in lo̧mo̧o̧r eo kar ejake jān Jemedwōj Ilan̄, n̄an an wōr jepļaaktok eo an gospel eo an Jisōs Kraist, im n̄an pedped ioon tōl rej im̧we jān rikanaan ro remour! Aolepān men ko rekar ejake “karōk ko” rekwojarjar kar designi im “jon̄ak ko rejetjet” me rej katakin kōj ilo alikkar ekōjkan karōk mour ko rem̧ōņōņō—mour ko me rej anjo jān jerawiwi, anjo jān kapo, anjo jān kakkure ko an Setan, eo elukkuun pukōt n̄an kabōjrak mejān kajjik eo ad indeeo n̄an ippān Jemedwōj Ilan̄ im ippān baam̧le ko ad rejitōnbōro.

Rilo̧mo̧o̧r eo Make, ilo jinoin jerbal in karejar eo An, kar katōļo̧k bwe en kapo jān devil eo.³ Bōtaab Jisōs ekar waļo̧k an wejepedik jān mālijjon̄ in eļap. Ekōjkan an nej kar bōk m̧wil in an jum̧ae Setan ak jum̧ae kapo kar jerbal n̄an E? Ta eo ekar kōm̧m̧an an Jisōs waļo̧ktok ilo anjo̧ jān iien ko reppen tata ekar pojak eo An ilo jetōb, eo ekar kōtļo̧k bwe en pidodo An pād ilo juon jekjek n̄an jum̧ae kapo ko an rikapo eo.

Ta kar jet iaan ļamļam ko me raar jipan̄ Rilo̧mo̧o̧r eo pojak n̄an iien eo ekanooj aorōk?

M̧oktata, E ekar jiltļo̧k 40 raan im 40 bon̄, juon jitlo̧k eo me aikuji in kar itok ippān juon jar ejjab jokod. Kōn menin, men̄e E kar m̧ōjņo̧ ilo kanniōk, An jetōb ekar kanooj kajoor. Men̄e jekdo̧o̧n, jeraam̧m̧an, jab kajjitōk ippād n̄an jitlo̧k n̄an jon̄an aitokan in—ijello̧kin ium̧win 24 awa ko im juon alen juon allōn̄—jitlo̧k ej bōktok n̄an kōj kajoor ilo jetōb im ej kōpooj kōj n̄an jum̧ae mālijjon̄ ko an mour in.

Uwaak eo kein karuo, n̄an bwebwenato eo kōn kapo ko me Rilo̧mo̧o̧r eo ekar jedmadmad n̄an e, jej lo bwe iien otemjej E ekar uwaake Setan kōn eoon ko ilo kōļmenļo̧kjeņ eo An, kōnono jāni, im kōjerbali ilo iien eo ejetjet.

Ke Setan ekar kapo E n̄an ukōt dekā ko n̄an pilawe bwe En maron̄ kabun̄ būruōn kwōle eo An jān jitlo̧k eo An aitok, Irooj ekar ba n̄an e, “Ar jeje, Armej e jāmin mour kōn pilawā wōt, a kōn naan otemjej rej waļo̧ktok jān lo̧n̄iin Anij.”⁴ Innām, ke Irooj ekar pād ioon kōjmen tampeļ eo, devil ekar kajjieon̄ in kapoik E n̄an kwaļo̧k An kajoor, eo Irooj ekar uwaak kōn kajoor, “Ar bar je, Kwōn jab kapo Irooj am̧ Anij.”⁵ Im n̄an kajjieon̄ eo an Setan kein kajilu, Irooj ekar uwaak, “Bwe ar je, Kwōn kabun̄ n̄an Irooj am̧ Anij, im kwōn jerbal n̄an E wōt.”⁶

Ilo juon m̧akūtkūt in laļ ej likūt jeno̧k ko an em̧ool ilo im̧ōko me ekar jim̧we aer kar designi im kalōki—kain jekjek rōt in āinwōt bōlen jet kōk ko, wujkinen ko ak jiļiin̄ ko kar wōtlo̧k im wintō ko rerup. Bōtaab m̧wiin ejetjet designi im jetjet kalōke naaj kakūrm̧ool jibadbad eo an kōjparok ro ilowaan, im kōn jet kōkarpenpen ko, naaj bar kōm̧m̧ane n̄an jekjek eo m̧okta.

Ilo ejja jekjek in wōt, aujiid ko an rikapo eo remaron̄ bar kōm̧m̧ani “kōk ko” ak jet jijdikdik jorrāān ilo mour ko ad, jekdo̧o̧n kijejeto ko ad n̄an kalōk mour ko ad ekkar n̄an design eo eweppān ekwojarjar. “Kōk” kein remaron̄ waļo̧k kōn er make jān en̄jak ko an būrom̧ōj ak ajļo̧k kōn kar kōm̧m̧ane jet bōd ko im kōn jab kōm̧m̧ane aolep men ilo jetjet, ak kōn en̄jake eo me jejjab em̧m̧an in wōt eo jej kōņaan.

Bōtaab ta eo em̧ool ejetjet ej bwe kōn ļoor karōk ko rekwojarjar kar designi im kōmeļeļe ko, eo ej bwe, kōn gospel eo an Jisōs Kraist, jej jutak wōt. M̧weo im̧ōn mour kein ad ejjan̄in de jepepļo̧k kōnke kōn kijejeto ko an rikapo eo ak kōn jekjek ko repen me jej aikuj jelm̧ai; ijello̧kin, jej pojak n̄an bun̄ m̧aanļo̧k.

Lan̄lōn̄ eo kar kallim̧ur kake ilo jeje ko rekwojarjar āinwōt jibadbad eo an mour eo ad⁷ ejjab aikuj meļeļein bwe ejjāmin wōr men ko repen ak būrom̧ōj ko, bwe enaaj ejjeļo̧k ad “kōk ko” āinwōt tōprak ko an kapo ko, an rikapo eo, ak jān mālijjon̄ ko an mour in ad laļ in.

Lan̄lōn̄ in ej itok jān wāween an Nipai kalimjōk mour in ke ekar ba, “aō lo elōn̄ en̄taan ilo raan ko aō, mekarta, āinwōt ke iaar utiej ippān Irooj ilo raan ko aō.”⁸ Aolepān raan ko an! Men̄e ilo raan ko me Nipai ekar en̄taan ilo jab tōmak eo im kowaan eo an ļōmaro jein, men̄e iien eo raar lukwoj e ioon wa eo, men̄e raan eo me jemen, Liai, ekar mej, men̄e Leman im Lamuel raar erom rikōjdāt ro an armej ro an. Men̄e ilo raan ko rekar eppen, Nipai ekar en̄jake an utiej ippān Irooj.

Emaron̄ wōr ippād ineem̧m̧an kōn jeļā bwe Irooj ejjamin naaj kōtļo̧k ad kapo eļapļo̧k jān ta eo jemaron̄ jum̧ae. Alma ej kajjitōk ippād n̄an “ekkōl im jar im jab bōjrak, bwe kom̧in jab maron̄ ioon kapo ko reļļapļo̧k jān ami maron̄ inene, im āindein bōk tōl jān Jetōb Kwōjarjar, im erom rittā bōro, kom̧in jeļāņae im jouj, kipiliie, obrak kōn iakwe im meanwōd otemjeļo̧k.”⁹

Ejja in wōt emaron̄ in jerbal n̄an mālijjon̄ ko an mour. Ammōn ej kakeememej kōj kōn naan ko an Irooj: “Ilo̧k … ineek ilo kōmmaanwa en̄taan ko ami, im Inaaj lewōj n̄an kom̧ tōprak eļap.”¹⁰

Irooj ej iien otemjej letok n̄an kōj juon iaļ in anjo̧ n̄e jej jelm̧ae rikapo eo, kapo, im jab tōmak, m̧ōjņo̧ ko, im em̧ool mej. Ekar ba, “Im kiiō, em̧ool Ij ba n̄an kom̧, im men eo Ij ba n̄an juon Ij ba n̄an aolep, kom̧in m̧ōņōņō, ajri reddik; bwe N̄aij pād ilubwiljimi, im Iaar jab eļļo̧k jān kom̧.”¹¹ E ejjamin kōjerwawaik kōj!

Ij jar bwe jemaron̄ wōnm̧aanļo̧k wōt n̄an kalōk mour ko ad ilo ļoor karōk ko im kōmeļeļe ko kōn mālim eo designi ekwojarjar jān Jemedwōj Ilan̄ im bōk kōn ad Rilo̧mo̧o̧r, Jisōs Kraist. Āindein, kōn jouj eo me ej tōpar kōj kōn Pinmuur eo an ad Rilo̧mo̧o̧r, jenaaj jeraam̧m̧an ilo kalōk juon mour ej jum̧ae jerawiwi, jum̧ae kapo, im ej kajoorļo̧k n̄an niknik n̄an dibuk būrom̧ōj, iien ko reppen ilo mour ko ad. Im eļapļo̧k, jenaaj pād ilo jekjek eo n̄an tōpar aolep kōjeraam̧m̧an ko kar kallim̧ur kaki kōn iakwe eo an Jemed im ad Rilo̧mo̧o̧r. Ilo etan Jisōs Kraist, amen.