Kōpeļļo̧k Winto ko an Lan̄

Aolep men ekar wōr ippād im aolep men ko ewōr ippād rej itok jān Anij. Āinwōt rikaļoor ro an Kraist, jej m̧ōņōņō in jeer ippān ro ipeļakiid.

Kōn aolep ko Irooj ej letok n̄an kōj, E ekar kajjitōk ippād n̄an kōro̧o̧lļok n̄an E im aelōn̄ in kiin̄ eo an ioon laļ in 10 bōkjāān in ļapļo̧k ko ad. E ekar kallim̧uri kōj bwe ilo ad m̧ool ilo m̧ōttan jon̄oul ko ad, E enaaj “kapeļļo̧k … wūnto ko an lan̄, im lutōk … ļo̧k jeraam̧m̧an, m̧ae iien enaaj ejjeļo̧k aikuj.”² E ekar kallim̧uri kōj bwe E enaaj kōjparok kōj jān nana.³ Kallim̧ur kein rej lukkuun m̧ool,⁴Irooj ej kean̄, “Mālejjon̄e eō kiiō ilo men in,”⁵ juon naan eo ejjeļo̧k bar jikin loe ilo jeje ko rekwojarjar ak ne rej kouti Malakai.

Wūntō ko an lan̄ rej peļļo̧k ilo elōn̄ wāween ko. Jet rej ilo kanniōk, ak elōn̄ rej ilo jetōb. Jet rej mera im pidodo n̄an jab kalimjōki. Lōke ilo iien eo an Irooj, kōjeraam̧m̧an ko rej iien otemjej itok.

Jej būrom̧ōj ippān ro me rej kakkōt n̄an bōk menin aikuj ko n̄an mour. Kabun̄ ej kab m̧ōj an leļo̧k jipan̄ kōn 54 milien taļa in US n̄an leļo̧k jipan̄ n̄an ajri ro raikuj jipan̄ im m̧am̧a ro ilo aolepān laļ in.⁶ Im kōn joortak ko jān jitlo̧k eo ami allōn̄ otemjej, bisop ro ad rem̧m̧an rej jipan̄ taujin armej kajjojo wiik ro rej aikuj m̧ōn̄ā n̄an ioon tebōļ ko aer ilo juon iien ekadu kitien, nuknuk n̄an kanuknuk er, im bōrwaj n̄an ioon bōraer. Uwaak eo de eo aitok kitien n̄an jeram̧ōl an laļ in ej gospel eo an Jisōs Kraist.⁷

Rijilōk Paul ekar kakkōl bwe mālōtlōt an armej ilo meļeļe men ko an armej bōtaab epen an meļeļe men ko an Anij.⁸ Laļ in ej kōnono kōn juon m̧ōttan jon̄oul ilo meļeļe ko kōn jāān ko ad, bōtaab kien eo ekwojarjar an juon m̧ōttan jon̄oul ej aorōk eo eļap an tōmak eo ad. M̧ool ilo juon m̧ōttan jon̄oul ko ad ej juon wāween jej kwaļo̧k ad m̧ōņōņō n̄an likūt Irooj m̧oktata ilo mour ko ad, ilōn̄ in kea ko im itok limo ko ad. Ij kallim̧uri eok bwe ilo am̧ lōke Irooj, kōjeraam̧m̧an ko an lan̄ rej itok iļokan tok.

Jisōs ekar ba leļo̧k “n̄an Sizar men ko an Sizar, im n̄an Anij men ko an Anij.”⁹ Rilo̧mo̧o̧r ālkin an kar jerkakpeje ekar kajjitōk ippān Rinipai ro n̄an je ilo ļo̧o̧k eo aer kallim̧ur ko An loi ilo Malakai.¹⁰ Ilo raan eo ad, Irooj ekar kapen kien kwojarjar eo an juon m̧ōttan jon̄oul, kean̄: “Im en̄in enaaj jinoin m̧ōttan-jon̄oul an armej ro aō. Im [renaaj] kōļļāik juon-m̧ōttan-jon̄oul jān aolep ļapļo̧k eo aer kajjojo iiō; im mennin enaaj kien jamin kōm̧akūti n̄an er indeeo.”¹¹

Ealikkar an Irooj kar kwaļo̧k ekōjkan an m̧ōtttan jon̄oul eo aikuj kōjerbale, ba, “Bōktok aolepen m̧ōttan jon̄oul eo n̄an m̧ōn kakoņkoņ eo,”¹² meļeļein bōktok m̧ōttan jon̄oul ko n̄an aelōn̄ in kiin̄ eo An kar kōjepļaaktok, Kabun̄ eo an Jisōs Kraist im Armej ro Rekwojarjar ilo Raan ko Āliktata.¹³ E ekar ba bwe kōjerbal m̧ōttan jon̄oul kein rekwojarjar naaj watwate ilo jar jān ko̧o̧njeļ eo an Būreejtōnji eo Kein Kajuon, Doulul eo an Jon̄oulruo Rijilōk ko, Bisop eo Eutiej Ej Tōl, “im jān ainikiō make n̄an er, Irooj ej ba.”¹⁴

Jāān kein rekwojarjar rejjab an ritōl ro an Kabun̄ in. Rej an Irooj. Ro Rikarejeran rej lukkuun jeļā kōn paotok kwojarjar eo an jerbal eo aer.

Būreejtōn Gordon B. Hinckley ekar keememej en̄jake in ke ekar dik: “Ke ikar juon ļaddik ikar kajjitōk juon kajjitōk ippān jema … ikkijien kōjerbal jāān ko an Kabun̄ in. Ekar kakeememej eō bwe ewōr juon aō eddo Anij ekar letok n̄an aō kōļļā juon m̧ōttan jon̄oul ko im joortak ko aō. N̄e ij kōm̧m̧ane aindein, [jema ekar ba,] bwe eo ij leļo̧k ejako an aō. Ej an Irooj eo ikar kōkwojarjare.” Jemen ekar kakkobaba, “Ta eo ritōl ro an Kabun̄ in rej kōjerbale kake ejjab aō inepata [kwe, Gordon]. Rej uwaak ļo̧k n̄an Irooj, eo enaaj aikuji juon ļo̧o̧k in aer kōjerbale.”¹⁵

Em̧wilaļ am en̄jake eddo eo an “uwaak ļo̧k n̄an Irooj.”

Jān juon m̧ōttan jon̄oul ko rejouj im joortak ko kom̧ kar kōkwojarjari n̄an Irooj, iiō eo ļo̧k elōn̄ļo̧k jān juon pilien taļa in US kar kōjerbale n̄an kōjeraam̧m̧an rein ilo aikuj.¹⁶

Ilo eddo eo ad eļap n̄an bōk gospel eo me em̧ōj an jepļaaktok n̄an aolepān laļ in, ewōr eļapļo̧k jen 71,000 mijinede ro rej jerbal ilo 414 mijen ko.¹⁷ Kōnke kōn m̧ōttan jon̄oul ko im joortak ko am, mijenede ro, kejdo̧o̧n ta jekjek in jāān an baam̧le eo aer, rej maron̄ jerbal.

Tampeļ ko rej ekkal aolepān laļ in ilo oran ko rejjab kar m̧okta. Kiiō, 177 tampeļ ko rej jerbal, 59 rej kiiō pād wōt ilo aer ekkal ak bar kōkāāli, im 79 rej pād ilo karōk im design.¹⁸ M̧ōttan jon̄oul ko ami rej kōm̧m̧an bwe kōjeraam̧m̧an ko an tampeļ ren pād ilo jikin ko wōt me Irooj emaron̄ loi.

Elōn̄ļo̧k jān 30,000 jarlepju in rijar ro rej jar ilo taujin im̧ōn jar ko im m̧ōko jet ilo 195 laļ ko im territory ko.¹⁹ Kōnke kōn tiljek in juon m̧ōttan jon̄oul ko ami, Kabun̄ in ej ejaak ilo jikin ko rettoļo̧k kom̧ jab maron̄ loļo̧k ibwilijin Rikwojarjar ro kom̧ jab maron̄ jeļā.

Kabun̄ in kiiō ej bōk eddo in ļalem institution ko an bōk jeļāļo̧kjen eutiejļo̧k.²⁰ Jikin kein rej kajikuuļ elōn̄ļo̧k jān 145,000 rijikuuļ ro. Jibukwi im jon̄oul taujin kūlaaj ko rej katakin kajjojo wiik ilo jemenere im institute ko.²¹

Kōjeraam̧m̧an kein im ekanooj lōn̄ rej itok ilo juon jon̄an eļap jān ro reddik im rūtto an aolep jekjek in menin jeraam̧m̧an me rej kōļļā m̧ōttan jon̄oul em̧ool.

Kajoor in jetōb eo an kien juon m̧ōttan jon̄oul eo ekwojarjar ejjab jon̄e kōn dettan jāān eo leļo̧k, jim̧or n̄an eo ejeraam̧m̧an im eo ejerata rej kakien jān Irooj n̄an leļo̧k 10 bōkjāān in kōļļā eo aer.²² Kajoor eo ej itok jān likūt ad lōke ilo Irooj.²³

Lōn̄ļo̧k in kōjeraam̧m̧an an Irooj ekar waļo̧k kōn juon m̧ōttan jon̄oul ko ami rejouj ekar kōkajoorļo̧k jikin kakoņkoņ ko an Kabun̄ in, leļo̧k iien ko rem̧m̧an n̄an lem̧aanļo̧k jerbal eo an Irooj eļapļo̧k jān jabdewōt men jejjan̄in kar iione. Aolep men Irooj ejeļā, im ilo iien eo, jenaaj lo jibadbad kwojarjar ko An rej kūrm̧ool.²⁴

Kōjeraam̧m̧an ko an juon m̧ōttan jon̄oul rej itok ilo elōn̄ wāween ko. Ilo 1998 ikar etal ippānļo̧k ilo tōre eo Elder Henry B. Eyring n̄an juon kweilo̧k eļap an Kabun̄ in ilo Utah eria eo kiiō jeļā kake āinwōt Silicon Slopes, juon jukjuk in pād an oktak eļap ilo technology. Ekar juon iien eddōkļo̧k an m̧weie, im Elder Eyring ekar kakkōl Rikwojarjar ro kōn keidi ta eo ewōr ippāer ippān ro jet im kōņaan eļapļo̧k. Inaaj iien otemjej keememej kallim̧ur eo an bwe ilo aer kōļļā juon m̧ōttan jon̄oul ilo m̧ool, ikdeelel eo aer n̄an elōn̄ļo̧k m̧weiuk naaj makunļo̧k. Ilowaan ruo iiō ko, m̧ōkaj an dikļo̧k aorōk eo an technology. Elōn̄ ekar jako jerbal ko aer, im kom̧bani ko raar jorrāān ilo iien in an oktak an jāān. Ro raar ļoor kapilōk eo an Elder Eyring raar jeraam̧m̧an.

Kallim̧ur eo an ekar kakeememej eō kōn bar juon en̄jake. Ikar iioon Charlotte Hlimi 12 iiō-dettan epaakeļo̧k Carassonne, France, ilo 1990 eo ke ikar jerbal āinwōt juon mijen būreejtōn. Hlimi ro raar juon baam̧le etiljek rekar jokwe ilo juon abatmen edik kōn ruwalitōk ajri. Ekar wōr juon nejier pija in Rilo̧mo̧o̧r eo im rikanaan eo ilo dipin m̧weo. Ilo intōrpiu eo n̄an kōjeraam̧m̧an an petriak eo an, ikar kajjitōk ippān Charlotte eļan̄n̄e ekar kōļļā juon m̧ōttan jon̄oul ilo m̧ool. Ekar uwaak, “Aaet, Būreejtōn Andersen. Jinō ekar katakin eō bwe ewōr kōjeraam̧m̧an ko an kanniōk im jetōb me rej itok jān kōļļā juon m̧ōttan jon̄oul eo ad. Jinnō ekar katakin eō bwe eļan̄n̄e kōmij kōļļā juon m̧ōttan jon̄oul aolep iien, enaaj wōr ippām aolep men. Im Būreejtōn Andersen, kōm kōņaan aolep men.”

Pija

Baam̧le eo an Hlimi.

N̄an letok aō mālim n̄an kwaļo̧k bwebwenato in an, Charlotte, kiiō 45 im kar liāp ilo tampeļ, kar ba: “Naan in kam̧ool eo aō kōn juon m̧ōttan jon̄oul ekar m̧ool ilo iien eo, im ekajoorļo̧k wōt kiiō. Eļap aō kam̧m̧oolol kōn kien in. Āinwōt aō mour ij wōnm̧anļo̧k wōt im bōk eļap jeram̧m̧an ko.”²⁵

Juon raan kajjojo enaaj mej jān laļ in. Rōn̄oul-ļalem iiō ko remootļo̧k, raan ko m̧okta jān an kōra eo jinō jinen lio pāleō, Martha Williams, kar mej jān kāānjōr, ekar bōk juon check edik ilo meeļ. Ekar m̧ōkaj an kajjitōk ippān kōrā eo ippa, Kathy, kōn bok in check eo an n̄an kōļļā juon m̧ōttan jon̄oul eo an. Ke jinen ekar kanooj in m̧ōjņo jon̄an ekar pen an jeje, Kathy ekar kajjitōk eļan̄n̄e emaron̄ kar jipan̄ je check eo an n̄an e. Jinen ekar uwaak, “Jaab, Kathy. Ikōņaan kōm̧m̧ane kōn n̄a make.” Innām ekar kakobaba, “Ikōņaan jim̧we im̧aan mejān Irooj.” Juon iaan men ko āliktata Kathy ekar kōm̧m̧ane n̄an jinen ekar leļo̧k n̄an e juon kūl in leta in juon m̧ōttan jon̄oul n̄an bisop eo an.

Ro jeiū im jatū, Kabun̄ eo an Jisōs Kraist im Armej ro Rekwojarjar ilo Raan ko Āliktata ej “bōktok jān ņojak,”²⁶ ej bōktok kōjeraam̧m̧an ko rekabwilōn̄lōn̄ aolepān laļ in. Enaaj wōr ro me rej pinniki kōj im ro me reban. Ikar ļōmņak kōn naan ko an Gamaliel, eo, ke ekar ron̄ mennin bwilōn̄ ko an Rijilōk Piter im Jon, ekar kakkōl ko̧o̧njeļ eo ilo Jerusalem:

“Kom̧win ilo̧k jān [em̧m̧aan rein]: bwe eļan̄n̄e … jerbal in ej jān armej raņ, enaaj jako.

“A eļan̄n̄e e jān Anij, kom̧ jab maron̄ in ko̧kkure; n̄e … re ab lo kom̧ tariņaek Anij.”²⁷

Kwe im n̄a jej m̧ōttan jerbal eo aorōk an Anij ioon laļ in. Eban itok n̄an ejjeļo̧k bōtaab enaaj wōnm̧aanļo̧k im etal n̄an aolepān laļ, kōpooj iaļ eo n̄an bar ro̧o̧ltok eo an Rilo̧mo̧o̧r. Ij kam̧ool n̄an naan ko an Būreejtōn Russell M. Nelson ekar kean̄: “Ilo raan kane rej itok, jenaaj lo kajoor eo eļap an Rilo̧mo̧o̧r me laļ in ejjan̄in kar loe. Ikōtaan kiiō im iien eo Ej jepļaaktok … , Enaaj kwaļo̧k jim̧we ko ejjeļo̧k jon̄an, kōjeraam̧m̧an ko, im kabwilōn̄lōn̄ ko ioon ro rej tiljek.”²⁸

En̄in kam̧ool eo aō. Jisōs ej RiKraist eo. En̄in ej jerbal eo An ekwojarjar. E enaaj bar itok. Ilo etan Jisōs Kraist, amen.