M̧ōttad Iien Otemjeļo̧k

Ro jeiū im jatū rejitōn bōro, ilo kweilo̧k in eļap jej jeraman kōn juon to̧o̧r tok in revelesōn. Rikarejar ro an Irooj Jisōs Kraist raar kōņoņo im naaj kōņoņo naan ko rem̧ool, rekōketak, im tōl.

Ikar lukkuun im̧we kōn naan in kam̧ool ko kar kwaļo̧k ilo kweilo̧k in bwe Irooj ej kōnono n̄an kōj ilo Jetōb Kwojarjar. Ilo ad jar im ron̄jake im̧we ko an Jetōb, jej bōk eļapļo̧k meļeļe im kōjerm̧m̧an n̄an tōl koj ilo raan kein reppen rej peddo tok.

Jekar bar ron̄ kakōļ eo an Būreejtōn Russell M Nelson bwe, “Ilo raan ko rej itok, enaaj maron̄ pen n̄an jo̧o̧r ilo jetōb ilo ad jab tōl, jineet, kaenōm̧m̧an, im bōk kareel eo an Jetōb Kwojarjar.”¹

Kanaan in kakōļ in ekar tōlļo̧k n̄a n̄an lin̄ūri ta eo inaaj katakin ajri ro nejū, ajri ro jibū, im ajri ro jibū jibū kōn elmen bōk tōl in aorōk ilo raan kein reppen rej peddo tok.

Kiiō naan eo aō rainin ej juon leta ekadu n̄an ro ineō eo emaron̄ jipan̄ er n̄e iban pād ippeer ilo raan kein rekam̧ōņōņō rej peddo tok. Ikōņaan bwe ren jeļā ta eo ikar itok n̄an jeļā eo emaron̄ jipan̄ er.

Emōj aō itok n̄an jeļā eļapļo̧k ta eo enaaj bōk n̄an er n̄an bōk iien otemjej im̧we eo an Jetōb Kwojarjar ilo raan ko renaaj mour ie. Im em̧ōj Aō en̄jaake m̧ōņōņō in kōņoņo rainin kōn en̄jaake eo aō make in n̄an karuwainene Jetōb Kwojarjar eo, n̄an jon̄an eo imaron̄e, bwe en m̧ōtta iien otemjeļo̧k. Jar eo aō ej bwe in maron̄ in rōjan̄ er.

Inaaj jino er kōn ļōmņak kōn ļōmaro nejin Hilamōn, Nipai im Liai, im rikarijer ro jet an Irooj rej jerbal ippeer. Er rekar jelm̧ae oktak eo ekaamijak. Er rekar jerbal ilo juon jikin enana im kar aikuj in pepe kōn m̧oņ ko renana. Ij bōke peran, im komaron̄ bar, jān eoon juon in jen ļook eo an Hilamōn:

Im ilo kajiljilimjuonn̄oul im ruwatimjuon iiō eo eaar jino wōr eļap akwāālel. A ālikin men kein Nipai im Liai, im elōn̄ iaan ro jeir im jatier ro raar jeļā kōn unin katak ko rem̧ool, kōnke raar bōk elōn̄ revelesōn ko raan otemjej, kōn menin raar kwaļo̧k naan n̄an armej ro, jon̄an raar kōjjem̧ļo̧k e aer akwāālel ilo ejja iiō eo wōt.”²

Eoon in ej rōjan̄ na, im emaron̄ rōjan̄ kwe. Ļōmaro nejin Hilamōn kar katakin er im tōl jen lelkan en̄jaake ko ippān Jetōb Kwojarjar. Menin ej kam̧ool n̄an n̄a bwe jemaron̄ in katakin im ekatak jān Jetōb ļain ioon ļain, bōk ta eo jaikuji, innām n̄e jej poojak, jenaaj bōk eļapļo̧k.

Kar kōketak eō ilo ejja wāween eo jān bwebwenato eo an Nipai kar kajitōk n̄an bar rool n̄an Jerusalem n̄an pileij ko an Laban. Kwoj keememej kāālet eo ekar kōm̧m̧ane. Ekar ba, “Inaaj ilo̧k im kōm̧m̧ani men ko Jema eaar kain̄.”³

En̄jaake eo an Nipai ippān Jetōb Kwojarjar ilo jerbal eo ear letok n̄an eō peran elōn̄ alen ke iaar bōk koņaaō ilo ijjitōn ko Ijeļā raar jet eddo ko jen Irooj ijoke raar etto ļo̧k jen aō mokta jeļā im etto ļo̧k jen ta eo Iaar loe ilo aō kakkōt.

Kwoj kemeemej ta eo Nipai eaar ba kōn an en̄jaake: “Im ekar ilo bon̄; im iaar kōm̧m̧an bwe [ro jeiū im jatū] ren tilekek itulik in wōrwōr ko. Im ālikin raar tilekek, n̄a, Nipai, iaar ne meraļo̧k n̄an jikin kwelo̧k eo im jibadekļo̧k m̧weo im̧ōn Leban.”

E eaar etal wōt im ba, “Im Jetōb eaar tōl eō, ilo aō jab jeļā kōn men ko renaaj bōk jikin im̧aan in kar kōm̧m̧ani.”⁴

Kar kōketak eō ilo aō jeļā bwe Nipai eaar bōk tōl jen Jetōb minit ilo minit aolepen bon̄ōn eo ilo jerbal an Irooj.

Jej aikuji, im kwonaaj aikuj, mōttā eo an Jetōb Kwojarjar iien otemjeļo̧k. Kiiō, ad kōņaan bōke, ak aaet jej jeļā jān en̄jake bwe ejjab pidodo n̄an kōtōprake. Kōj kajjojo jej kōļmenļo̧kjeņ, im kōnono im kōm̧m̧ani men ko kajjojo raan in ad mour bwe en jab kainepataik Jetōb eo.

N̄e ej waļo̧k, ilo an naaj, jej maron̄ en̄jaake bwe kar jab kōmālimi jān Irooj. Im jej maron̄ in idajon̄jon̄ n̄an en̄jaake ad make iaad. Menin eaorōk bwe n̄an kemeemej kalimur eo em̧ool jej bōke kajojo wiik ilo ad ukweļo̧k im m̧ōttan kwojkwoj eo, “Bwe ren maron̄ iien otemjej bōk jetōb eo An bwe en maron̄ pād ippāer.”⁵

Eļan̄n̄e kwaar en̄jake im̧we eo an Jetōb Kwojarjar rainin, komaron̄ bōke āinwōt juon kein kam̧ool em̧m̧an bwe Pinmuur eo ej jerbal ilo mour eo am̧.

Āinwōt Elder Jeffrey R. Holland ear ba: Jabdewōt iien jemļo̧k ko ad rej itok, jej aikuj in ebweer kōn mijak im ļōmņak bwe Anij ekar kōjojoļāār e kōj ak bwe E jab ron̄jake jar ko ad. E ej ron̄jake kōj. E ej loe kōj. E ej iakwe kōj.”⁶

Mool eo eaar jipan̄ eō. N̄e ij en̄jaake etto ļo̧k jen Irooj, n̄e uwaak ko n̄an jar ko aō rej rūm̧ij ļo̧k, iaar bōk ekatak n̄an ļoore kapilōk eo an Būreejtōn Nelson n̄an bar etale aō mour n̄an iien ko remman n̄an ukweļo̧k. E ej bar kakemejmej kōj “Ukweļo̧k aolep iien ej iaļ eo n̄an erreo, im erreo ej bōktok kajoor.”⁷

N̄e kwōj loe am make pen am en̄jaake Jetōb Kwojarjar, komaron̄ ļōmņak ewōr ke juon men eo im kwomaron̄ ukweļo̧k im bōk jeorļo̧k bōd.⁸ Kwoj maron̄ jar kōn tōmak n̄an jeļā ta eo n̄an kōmmane n̄an an erreo im āindein eļap ļo̧k maron̄ ittōn bōke mōttā eo iien otemjeļo̧k an Jetōb Kwojarjar.

Eļan̄n̄e kwoj kōņaan bōk juon mōttā iien otemjej an Jetōb Kwojarjar, kwoj aikuj in kōņaan menin n̄an wūn ko rejim̧we. Kōtōpar ko am̧ ej aikuj kōtōpar ko an Irooj. Eļan̄n̄e wūn ko am relukuun n̄an kwe wot, kwōnaj loe an pen n̄an bōke en̄jaake ko an Jetōb eo.

Kii eo n̄an kwe im n̄a ej n̄an kōņaan ta eo Rilo̧mo̧o̧r ekōņaan. Wūn ko ad rej aikuj in tōl jen iakwe eo erreo an Kraist. Jar ko ad rej aikujin “Aolep aō kōņaan ren ta kwoj kōņaan. En Ankilaam̧.”

Ij kajieon̄ in keememej en̄taan eo an Rilo̧mo̧o̧r eo im An iakwe n̄an n̄a. Innām, n̄e Ij jar n̄an Jemed Ilan̄ n̄an leļo̧k kam̧oolol ko, Ij en̄jaake iakwe im kam̧ool bwe jar ko aō rej ron̄jaki im bwe inaaj bōk jabdewōt ta eo em̧m̧an n̄an n̄a im ro ij iakwe. Ej kakajoor naan in kam̧ool eo aō.

Ilōn̄in aolep men ko Jetōb Kwojarjar ej kam̧ool, eo eaorōk tata n̄an kōj ej bwe Jisōs ej riKraist, eo Nejin Anij emour. Rilo̧mo̧o̧r ekar kalimūr, “N̄e Ri Kaaeņōm̧m̧an ej itok, Eo I naaj jilkinwōj n̄an kom̧ jān Jema, E Jetōb in m̧ool, Eo ej itok jān Jema, Enaaj kōnnaan kōn Eō.”⁹

Iiō ko remootļo̧k ikar bōk juon call jān juon mama einepata. Liin ekar jiron̄ eō bwe leddik eo nejin ekar emmakūt jen m̧weo. Liin ekar en̄jake jen an kar jidik wōt an tōpar leddik eo nejin bwe juon men eaar lukkuun bōd. Liin ekar akweļap bwe in jipan̄.

Ikar jelā wōn eo an kar rūkaki in loļo̧k m̧weo. Komaron̄ jeļā jen et eo bwe ekar menin jemaan. Ikar call e ļein. Eaar emman dettan. E ear kijer in ba n̄an n̄a ke e im kampānien eo an rekar ruj bon̄ōn eo im jab wōt n̄ūrbōktak kōn leddik eo nejim ak kōn im̧we bwe liin eaar tin kōmmani kālet ko me remaron̄ in kar bōktok būrom̧ōj im jerata. Kōn wōt im̧we eo an Jetōb eo, raar etal im loļo̧k e.

Mokta liin eaar jab kōņaan kwaļo̧k n̄an er kōn jekjek eo an. Um̧win im̧we, erro kar akweļap ippen bwe en ukweļo̧k im kālet iaļ eo Irooj ekar kepooje n̄an e. Innām liin ekar kile, Ij tōmak jān Jetōb eo, bwe iaļ eo wōt bwe ren kar jeļā ta eo kōn mour eo an eaar jān Anij. Juon m̧am̧a ekar leļo̧k n̄ūrbōktak ko an ekōņaan n̄an Jemed Ilan̄ im Rilo̧mo̧o̧r. Kar jilkinļo̧k Jetōb Kwojarjar n̄an rūkaki in loļo̧k m̧weo kōnke raar m̧ōņōņō in jerbal n̄an Irooj. Erro kar ļoor kapilōk eo im kallim̧ur eo loi ilo Katak im Bujen ko:

“Am en barāinwōt obrak kōn iakwe n̄an aolep armej im n̄an ro rej tōmak, im erreeo eaikuj kaiboojoj ļōmņak ko am. Innām am leke en kajoor ļo̧k im̧aan Anij, im katak eo kōn priesthood enaaj waļo̧k n̄an jetōb ko am āinwōt m̧ōļawi jān lan̄.

“Jetōb Kwōjarjar enaaj m̧ōttam iien otemjeļo̧k, im jokoņam̧ juon jokoņan wānōk im m̧ool ej jab ukoktak; im mo̧jen eo am enaaj juon mo̧jen ejjeļo̧k jem̧ļo̧kin, im kōn ejjeļo̧k wāween kipel ko enaaj to̧o̧rwaj n̄an eok indeeo im indeeo.”¹⁰

Ij kam̧ool bwe Irooj ej dāpij kallim̧ur eo An. Jetōb Kwojarjar emōj jilkin tok e n̄an membōr ro retiljek ilo bujen an Kabun̄ eo an Jisōs Kraist. Kiiō, en̄jaake eo am enaaj āinjuon, im Jetōb enaaj tōl ilo iaļ eo ejejjet n̄an tōmak eo im am im jon̄an n̄an bōki revelesion n̄an kwe im ro kwoj iakwe im jerbal n̄an er. Ij jar kōn aolepen būruō bwe am lōke enaaj eddōk ļo̧k.

Ij kwaļo̧k aō kam̧ool bwe Anij Jemān ej mour. Ej iakwe eok. E ej ron̄jake jar ko am̧. Jisōs Kraist ekar jar n̄an Jemān n̄an jilkin tok Jetōb Kwojarjar n̄an tōl, kaaeņōmman, im kam̧ool kōn m̧ool eo n̄an kōj. Anij Jemen im Nejin Jitenbōro raar waļo̧k n̄an Joseph Smith ilubwiljin wōjke ko. Josep Smith ekar ukot Bok in Mormon kōn menin letok im kajoor eo an Anij.

Ribōktok ennaan jen lan̄ raar bar kōjepļaak tok kiii ko. Būreejtōn Russell M. Nelson ej rikanaan eo emour an Anij ioon mejen laļin.

Āinwōt juon rikam̧ool an Jisōs Kraist, ijeļā bwe E ej mour im E ej tōl kabun̄ in An. Kwe im n̄a ewōr juon iien em̧m̧ān n̄an bōk Jetōb Kwojarjar eo āinwōt m̧ōttad iien otemjeļo̧k im bōk m̧ool ko repen ilo ad kemeemej im iakwe Rilo̧mo̧o̧r, ukweļo̧k im kajitōk kōn iakwe eo An bwe en pād ilo bōro ko ad. Ij jar bwe jen maron̄ bōk kōjeram̧m̧an eo im m̧ōttā eo an Jetōb Kwojarjar rainin im kajjojo raan ilo mour ko ad. Ij iakwe kom̧. Ilo āt eo ekwojarjar etan Jisōs Kraist, amen.