Kweilo̧k Eo Eļap
Ļōmņak kōn Selestial
Oktoba 2023 kweilo̧k eo eļap

Ļōmņak kōn Selestial!

Jān Būreejtōn Russell M. Nelson

Būreejtōn eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata

Kāālet ko ami renaaj kwaļo̧k ijo kwonaaj mour indeeo ie, kain ānbwin rot eo kwonaaj jerkakpeje kake, im wōn ro kom̧ naaj mour ippāer n̄an indeeo.

Ro jeiū im jatū rejitōnbōro, ij lukkuun m̧ōņōņō bwe imaron̄ kōnono n̄an kom̧ rainin. Ilo jon̄an iiō e aō, kajjojo raan ej bōktok kam̧ōņōņō barāinwōt apan̄ ko ejjeļo̧k kōtmāni. Jilu wiik remootļo̧k, ekar metak m̧ajōl ko ilo tulikū. Kōn menin, ilo tōre in me elōn̄ļo̧k jān 100 kōnono ko ilo kweilo̧k eo eļap im ikar kwaļo̧ki ilo aō jutak, rainin, ikar ļōmņak bwe in jijet. Ij jar bwe Jetōb enaaj bōkwaj ennaan eo aō ilo būruōmi rainin.

Ej kab m̧ōj aō kōjeraam̧m̧ane 99th iien ļotak eo aō im jino 100 iiō in aō mour. Ekkā an armej kajjitōk ta eo ej kōm̧m̧an bwe en aetok aō mour. Juon kajjitōk em̧m̧anļo̧k “ta eo ikar ekkatak ilowaan enan̄in jibūkwi iiō in aō mour?”

Rainin iban maron̄ kōtļo̧k aō lukkuun uwaake kajjitōk in, ak imaron̄ ke kwaļo̧k juon iaan katak ko repen iaar ekkatak.

Ikar maron̄ ekkatak kōn karōk eo an Jemedwōj Ilan̄ n̄an kōj ej kabwilōn̄lōn̄, bwe ta eo jej kōm̧m̧ane ilo mour in eļap tokjen, im bwe Pinmuur eo an Rilo̧mo̧o̧r ej men eo ej kōm̧m̧an bwe karōk eo an Jemed en pidodo.1

Ilo aō kar tariņaiki metak in ekar waļo̧k jān jorrāān in ippa ej kab waļo̧k, ikar en̄jake an ļapļo̧k aō kam̧m̧oolol kōn Jisōs Kraist im mennin letok eo an ban meļeļe Pinmuur eo An. Ļōmņak kake menin! Rilo̧mo̧o̧r eo ekar en̄taan “metak ko im kaen̄tanaan ko im kapo ko otemjeļo̧k”2 bwe E en maron̄ kaenōm̧m̧an kōj, kōmour kōj, lo̧mo̧o̧ren kōj, ilo iien aikuj.3 Jisōs Kraist ekar kōmeļeļeiki en̄jake eo An ilo Gesemane im ioon Calvary: “eo eaar kōm̧m̧an bwe N̄a, em̧ool Anij, eo Eļaptata jān aolep, n̄an wūdiddid kōnke metak eo, im n̄an bōktōktōk ilo aolepān Ānbwinnnū.”4 Jorrāān in aō ekar kōm̧m̧an bwe in bar kejōkļo̧kjeņ im bar kejōkļo̧kjeņ kōn “ļap Bōtata eo an eo Rikwōjarjar Eo in Israel.”5 Ilo iien kamomo jān nan̄inmej eo aō, Irooj ekar kwaļo̧k kajoor eo An ekwojarjar ilo aenōm̧m̧an im wāween ko reban bōd.

Kōn wōt Pinmuur eo eļap an Jisōs Kraist, karōk eo an Jemedwōj Ilan̄ ej juon karōk ewāppen! Juon meļeļe ekabwilōn̄lōn̄ kōn karōk eo an Anij ebōk mennin ittiņo̧ an mour im men ko ejjeļo̧k ad jeļā kaki kōn ilju im jekļaj. Ej kōtļo̧k ad wōj kajjojo kāālet ewi wāween ad naaj mour ioon laļ in im ijo jenaaj mour ie n̄an indeeo. Pedped in meļeļe eo kōn ta eo jej aikuj “m̧ōn̄ā, idaak, im m̧are, bwe ilju jej mej; im enaaj em̧man n̄an kōj”6 ej juon iaan riab ko ejjab jim̧we ilo laļ in.

En̄in ej nuuj ko rem̧m̧an an karōk eo an Anij: men ko renaaj kōm̧m̧an bwe mour eo am̧ ioon laļ in en lukkuun em̧m̧an emaron̄ in lukkuun ejja wōt men ko renaaj kōm̧m̧an bwe mour eo am̧ indeeo im indeeo en lukkuun maron̄ em̧m̧an! Rainin, n̄an jipan̄ kom̧ maron̄ karbab n̄an kōjeraam̧m̧an ko reļļap an Jemedwōj Ilan̄ em̧ōj an kōpooji n̄an kom̧, ij kajjitōk ippemi bwe kom̧in kamineneiki imminene eo n̄an “ļōmņak kōn selestial”!7 Ļōmņak kōn Selestial meļeļe ļōmņak ilo jetōb. Jej ekkatak jān rikanaan Jekab ilo Bok in Mormon bwe “n̄an kobrak ļōmņak kōn men ko an jetōb ej mour indeeo.”8

Mour in ej juon kūlaaj in ekkatak eļap ilo ad ekkatak n̄an kāālet men ko reļļap an mour indeeo. Ebooļ wōt armej rej mour āinwōt n̄e en̄in mour eo. Ijoke, kāālet ko ami rainin renaaj ņamejļan jilu men ko: ijo kwonaaj jokwe ie ilo mour indeeo ie, kain ānbwin rot eo kwonaaj jerkakpeje kake, im wōn ro kom̧ naaj mour ippāer n̄an indeeo. Kōn menin ļōmņak kōn selestial.

Ilo ennaan eo aō kein kajuon ilo aō kar jino Būreejtōn eo an Kabun̄ in, ikar rōjan̄ kom̧ n̄an jinoe ļōmņak kōn jemļo̧kin. Meļeļein n̄an kōm̧m̧an bwe aiboojoj eo an selestial en kōttōbar eo am̧ indeeo innām tiljek im ļōmņak kōn ia eo kāālet ko am̧ ioon laļ in renaaj pād ie ilo laļ eo ej itok.9

Irooj ekar kalikkare ilo An kar kwaļo̧k bwe em̧m̧aan ro im kōrā ro em̧ōj aer liāp āinwōt ļeo pālele im lio pālele ilo tampeļ eo, im rej kōjparok bujen ko aer, naaj pād ippān doon indeeo im indeeo. Ekar ba: “Aolep bujen ko, kooņtōreak ko, koņ ko, eddo ko, kallim̧ur ko, kanejnej ko, m̧akūtkūt ko, kōtaan ko, iiaio ko, ak kōtmāne ko, im rej jab kōm̧m̧an im deļo̧n̄i im sili jān Jetōb Kwōjarjar in kallim̧ur … ewōr jem̧ļo̧kier n̄e armej rej mej.”10

Kōn menin, eļan̄n̄e ejjab em̧m̧an ad kāālet n̄an mour kōn kien ko an telestial kiiō, jej kāālet n̄an jerkakpeje kōn juon ānbwin telestial. Jej kāālet bwe jen jab mour ippān baam̧le ko ad n̄an indeeo.

Kōn menin, ro jeiū im jatū rejitenbōro, elmen im ia im ippān wōn eo kwoj aikuj in mour ippān n̄an indeeo? Kwoj aikuj in kāālet.11

N̄e kwoj kōm̧m̧ani kāālet ko, ij kajjitōk ippem̧ bwe kwon ļōmņak kōn jekjek in—juon erreim̧aanļo̧k eo ejjeļo̧k jem̧ļo̧kin. Likūt Jisōs Kraist m̧okta, kōnke mour indeeo eo am̧ ej pedped wōt ioon tōmak eo am̧ ilo E im ilo Pinmuur eo An.12 Ej barāinwōt pedped ioon am̧ pokake kien ko An. Pokake ej kōmanm̧an iaļ in n̄an juon mour elan̄lōn̄ n̄an kwe rainin im juon jineekjej eļap, ejjeļo̧k jem̧ļo̧kin ilju im jekļaj.

N̄e kwoj ioon jum̧ae ļōmņak kōn selestial! N̄e kwoj po ilo kapo, ļōmņak kōn selestial! N̄e mour ak ro rejitōnbōro rej kōm̧m̧an am̧ m̧ōjņo̧, ļōmņak kōn selestial! N̄e juon armej ej mej ilo ejjeļo̧k kōtmāne, ļōmņak kōn selestial. N̄e juon armej ej en̄taan kōn wāween ko rejelet nan̄inmej, ļōmņak kōn selestial. N̄e apan̄ ko an mour in rej kobrak ļōmņak ko an am̧, ļōmņak kōn selestial. Ilo am̧ ājmourļo̧k jān juon itaak in wa ak juon jorrāān, āinwōt ej waļo̧k n̄an n̄a kiiō, ļōmņak kōn selestial.

Ilo am̧ mije wōt n̄an ļōmņak kōn selestial, jeļā bwe kwonaaj ioon jum̧ae.13 Jon̄oul iiō em̧ootļo̧k, juon m̧ōtta rimāletlet ekar kōnanaik eō kōn an lukkuun “lōn̄ tampeļ ko” ilo n̄a, im elōn̄ļo̧k jān supervisor rekar kaje eō kōnke tōmak eo aō. Kar kipel eō, ijoke, ļōmņak kōn selestial ekar kōkōm̧anm̧anļo̧k jerbal eo aō.

Ilo am̧ ļōmņak kōn selestial, būruwōm̧ enaaj lukkuun oktak. Enaaj emakijkijļo̧k am̧ jar im m̧ool. Jouj jab kōtļo̧k bwe jar ko am̧ ren āinwōt laajrak in kaikujkuj. Kōļmenļo̧kjeņ eo an Irooj eutiejļo̧k jān māletlet eo am̧ ilo mour in. An uwaaki jar ko am̧ emaron̄ in kailbōk eok im naaj jipan̄ eok bwe kwon ļōmņak kōn selestial.

Ļōmņak kōn uwaak eo an Irooj n̄an Josep Smith ke ekar akweļap kōn jipan̄ ilo jikin Kalbuuj Liberty. Irooj ekar katakin Rikanaan eo bwe kōm̧m̧an ko n̄an e āinwōt ejjab juon armej renaaj leļo̧k n̄an e renaaj lewōj imminene im naaj n̄an em̧m̧anļo̧k eo am.14 “Eļan̄n̄e kwo naaj kijejetoiki em̧m̧an,” Irooj ekar kallim̧ur, “Anij enaaj kotak eok ijo eutiej.”15 Irooj ekar katakin Josep n̄an ļōmņak kōn selestial im pijaikļo̧k juon jinekjej ejjeļo̧k jem̧ļo̧kin ijjelo̧k an mije wōt wāween ko reppen ilo raan eo. Jar ko ad remaron̄ in—im eaikuj in—kōnono ko kōn mour ippān Jemedwōj Ilan̄.

Ilo am̧ ļōmņak kōn selestial, kwonaaj loe am̧ kōjekdo̧o̧n jabdewōt men rej ko̧te eok jān anemkwoj eo am̧. Jabdewōt an̄n̄ūrlep—emaron̄ in ikkure, kāāmbōļ, m̧uri, uno ko rekajoor, illu, pija ko renana, pālele waan, ak emaron̄ m̧ōn̄ā—rej jum̧ae Anij. Etke? Kōnke am̧ ļōmņaki wōt men kein rej erom̧ anij ro am̧. Kwoj pukoti ijjelo̧kin E n̄an kainōm̧m̧an. Eļan̄n̄e kwoj en̄taan kōn an̄n̄ūrlep, pukot jipan̄ ilo jetōb im an ro retijem̧ļo̧k n̄an jipan̄ aikuj eo am̧. Jouj im jab kōtļo̧k an men kein ko̧o̧te anemkwoj eo am̧ n̄an ļoore karōk eo ekabwilōn̄lōn̄ an Anij.

Ļōmņak kōn selestial enaaj barāinwōt jipan̄ eok pokake kien erreo. Jejjo men renaaj kapen mour eo am̧ eļapļo̧k im m̧ōkajļo̧k jān am̧ kakkure kien in ekwojarjar. N̄an ro em̧ōj aer kōm̧m̧an bujen ko ippān Anij, mour jab erreo ej juon iaan wāween ko rōm̧ōkaj n̄an luuji naan in kam̧ool eo am̧.

Elōn̄ wōt iaan kapo ko an rikapo eo rej waļo̧k n̄an kakkure erreo eo an mour in pālele. Kajoor eo n̄an ejaak mour ej juon jeraam̧m̧an in kwojarjar eo me Jemedwōj Ilan̄ ej kōtļo̧k an ajri ro nejin kōjerbale. Menin, Anij ej letok unin tōl ko ralikkar n̄an kōjerbale, kajoor in ekwojarjar. Pālele ej wōt n̄an juon em̧m̧aan im juon kōrā ro rekar m̧areik doon.

Aolepān laļin ejjab tōmak menin, ak meļeļe eo an public ejjab armej eo ak juon opiij ej peek ta m̧ool eo. Irooj ekar kwaļo̧k bwe ejjeļo̧k armej ettonoon enaaj bōk aelōn̄ in selestial. Kōn menin, n̄e kwoj kōm̧m̧ani kāālet ko rejelet mour erreo, jouj ļōmņak kōn selestial. Im eļan̄n̄e kwaar jab erreo, ij akweļap ippem̧ n̄an ukweļo̧k. Itok n̄an Kraist im bōk kallim̧ur eo An ej lukkuun jeorļo̧ki ilo am̧ lukkuun ukweļo̧k jān jerawiwi ko am̧.16

Ilo am̧ ļōmņak kōn selestial, kwonaaj kalimjōk mālijjon̄ ko im jum̧ae ko ilo juon meram ekāāl. N̄e eo kwoj iakwe ej jum̧aik m̧ool eo, ļōmņak kōn selestial, jab kajjitōkin naan in kam̧ool eo am̧. Rijilōk Paul ekar kanaan bwe “ilo iien ko ālik, jet re naaj bun̄ jān tōmak, im eo̧ron̄ jetōb ro rej m̧oņ, katak ko an devil.”17

Ejjeļo̧k jem̧ļo̧kin aujiid ko an rikapo eo. Jouj im pojak. Jab bōk kapilōk jān jabdewōt ro rejjab tōmak. Pukot tōl jān ainikien ko kwoj lōke—rikanaan ro, rilolo ro, im rikwaļo̧k revelesōn ro im jān unoojdikdik eo an Jetōb Kwojarjar, eo “enaaj kwaļo̧k n̄an kom̧ aolep men ko kom̧ij aikuj kōm̧m̧an.”18 Jouj kōm̧m̧ane jerbal eo an jetōb n̄an kōļapļo̧k maron̄ eo am̧ n̄an bōk revelesōn ko an juon make.19

Ilo am̧ ļōmņak kōn selestial, tōmak eo am̧ enaaj eddōkļo̧k. Ke ikar juon likao ekar itern ak jerbal, men eo wōņeeō ekar $15 juon allōn̄. Juon bon̄, kōrā eo pāleeō Dantzel ekar kajjitōk eļan̄n̄e ikar kōļlāiki juon m̧ōttan jon̄oul eo aō jān kōļļā in stipend eo aō. Ikar jab. Ekar m̧ōkaj aō ukweļo̧k im jino kōļļāiki dōm̧m̧oļo̧k eo $1.50 ilo kajjojo allōn̄ ij juon m̧ōttan jon̄oul.

Kabun̄ in ekar ke oktak kōnke jej kōļapļo̧k juon m̧ōttan jon̄oul eo ad? Ekar jab. Ijoke, erom̧ juon eo ej m̧ool ilo an kōļļā juon m̧ōttan jon̄oul ekar ukōt eō. En̄in ej iien eo ikar jeļā bwe kōļļā juon m̧ōttan jon̄oul ej kōn tōmak, ejjab jāān. Ke iaar jino m̧ool n̄an kōļļā juon m̧ōttan jon̄oul, wintō in lan̄ eaar jino peļļo̧k n̄an eō. Ij kaorōk jejjo iaan wāween ko rem̧m̧an im iien kein rem̧m̧an ilo ad tiljek kōļļā juon m̧ōttan jon̄oul.20

Kōļļā juon m̧ōttan jon̄oul ej aikuji tōmak, im ej barāinwōt kalōk tōmak ilo Anij im Nejin Emake Wōt.

Kāālet n̄an mour juon mour ewānōk ilo juon laļ eobrak kōn mōm̧ an kanniōk, im iktōltōl kōn kareleel ko an kien ej kalōk tōmak.

Joļo̧k eļap iien ilo tampel ej kalōk tōmak. Im am̧ jerbal in jipan̄ im kabun̄jar ilo tampeļ enaaj jipan̄ eok ļōmņak kōn selestial. Tampeļ ej juon jikin bōk revelesōn. Ijeņ kwoj lo wāween eo n̄an eddōk m̧aanļo̧k n̄an juon mour in selestial. Ijeņ kwoj epaakeļo̧k Rilo̧mo̧o̧r eo im bōk eļapļo̧k maron̄ in deļo̧n̄e kajoor eo An. Ijeņ kwoj bōk tōl n̄an ņamejļan jorrāān ko ilo mour eo am̧, aaet jorrāān ko reļļaptata.

Kain̄i ko im bujen ko an tampeļ eo rej men ko rem̧m̧an tata an indeeo. Jej wōnm̧aanļo̧k im kalōk elōn̄ļo̧k tampeļ ko n̄an kōm̧m̧an bwe eddo kein rekwojarjar ren maron̄ pidodo im erom̧ m̧ool ilo kajjojo mour ko ami. Kōm̧ij m̧ōņōņō in kōjjjeļā kōn karōk ko ad n̄an kalōk juon tampeļ ilo kajjojo jikin kein 20 rej ellaajrak:

  • Savai’i, Samoa

  • Cancún, Mexico

  • Piura, Peru

  • Huancayo, Peru

  • Viña del Mar, Chile

  • Goiânia, Brazil

  • João Pessoa, Brazil

  • Calabar, Nigeria

  • Cape Coast, Ghana

  • Luanda, Angola

  • Mbuji-Mayi, Democratic Republic of the Congo

  • Laoag, Philippines

  • Osaka, Japan

  • Kahului, Maui, Hawaii

  • Fairbanks, Alaska

  • Vancouver, Washington

  • Colorado Springs, Colorado

  • Tulsa, Oklahoma

  • Roanoke, Virginia

  • Ulaanbaatar, Mongolia

Irooj ej tōl kōj n̄an kalōk tampeļ kein n̄an jipan̄ kōj ļōmņak kōn selestial. Anij ej mour. Jisōs ej RiKraist eo. Kabun̄ eo An em̧ōj an jepļaaktok n̄an kōjeraam̧m̧an aolep ajri ro nejin Anij. Āindein ij kam̧ool ilo āt eo ekwojarjar etan Jisōs Kraist, amen.

Kakeememej ko

  1. Lale Jon 6:38.

  2. Alma 7:11.

  3. Lale Alma 7:12.

  4. Katak im Bujen Ko 19:18.

  5. 2 Nipai 9:40.

  6. 2 Nipai 28:7.

  7. Emaron̄ kōkm̧anm̧anļo̧k n̄an kapidodoiki n̄an ukweļo̧k im wōnm̧aaļo̧k ilo mour in jetōb ijin, ilo an jetōb eo ad koba ippān ānbwiniid, innām ilo laļ eo juon ikōtaan iien eo jej mej im jerkakpeje. Ke Amulek eaar katakin riZoram ro, “Mour in ej iien eo … n̄an m̧aanjāppopo n̄an iioon Anij” (lale Alma 34:32–35).

  8. 2 Nipai 9:39.

  9. Lale Mosaia 4:30, ijo Kiin̄ Benjamin ej kipel armej ro an: “Eļan̄n̄e kom̧ij jab lale kom̧ make, im ļōmņak ko ami, im naan ko ami, im kōm̧m̧an ko ami, im pokake kien ko an Anij, im wōnm̧aanļo̧k ilo tōmak … , kom̧ aikuj mej.”

  10. Katak im Bujen Ko 132:7; naan ko kar kobaiktok.

  11. Aaet, anemkwoj in kāālet eo am̧ eban anjo̧ ioon bar juon anemkwoj in kāālet kōn jekjek ko jet. Ikar inepata kōn liāp eo an ro jinō im jema. Ijoke, iaar aikuj kōttar m̧ae raar kāālet n̄an bōk menin letok kwojarjar eo, ke raar 80 aer iiō. Innām raar liāp āinwōt ļeo im lieo pālele, im kōm ro nejier raar liāp ippāer.

  12. Jeje ko Rekwojarjar rej āliji n̄an kam̧ool bwe menin letok eo an mour indeeo ej maron̄ wōt jerbal kōn jouj, tiriam̧o, im jouj eo an Rilo̧mo̧o̧r Jisōs Kraist, Moronai 7:41; bar lale 2 Nipai 2:6–8, 27).

  13. Lale 2 Nipai 2:11.

  14. Lale Katak im Bujen Ko 122:7.

  15. Katak im Bujen Ko 121:8.

  16. Lale Aiseia 1:16–18; Katak im Bujen Ko 58: 42–43.

  17. 1 Timote 4:1. Eoon eo juon, “Riab im bōklōkōt ko aer re pen im āinwōt n̄e jej ittil kōn māāl e bwil” (eoon 2). Paul eaar bar kwaļo̧k bwe aolep ro “re kōņaan mour im kwōjarjar ilo Kraist Jisōs, naaj matōrtōre er” (2 Timote 3:12).

  18. 2 Nipai 32:5; eoon eo eaorōk kar kobaiktok. N̄e kar kar kajjitōk, jemaron̄ “bōk revelsōn ioon revelesōn, jeļāļo̧kjeņ ioon jeļāļo̧kjeņ” (Katak im Bujen Ko 42:61).

  19. Lale Russell M. Nelson, “Revelesōn n̄an Kabun̄ eo, im Revelesōn n̄an Mour ko Ad,” Liaona, Māe 2018, 96.

  20. This is not to imply a cause-and-effect relationship. Ro rejjab kōļļā juon m̧ōttan jon̄oul rej būki jeraam̧m̧an ko, ilo an ro kōļļā juon m̧ōttan jon̄oul jab būki. Kallim̧ur in ej bwe wintō in lan̄ enaaj peļļo̧k n̄an ro rej kōļļā juon m̧ōttan jon̄oul. Kōjeraam̧m̧an eo an menin elukkuun in aorōk.