ជំពូក ២៤
កូនស្រីរបស់យ៉ៃរ៉ុសបានរស់ពីស្លាប់ឡើងវិញ
ថ្ងៃមួយ យ៉ៃរ៉ុស ជាមេសាលា បានក្រាបនៅទៀបនឹងព្រះបាទព្រះអង្គសង្គ្រោះ ។
យ៉ៃរ៉ុសបានទូលទ្រង់ថា កូនស្រីអាយុ ១២ឆ្នាំរបស់គាត់ឈឺជាទម្ងន់ ។ គាត់បានទូលអង្វរព្រះយេស៊ូវយាងទៅប្រទានពរឲ្យនាង ។ គាត់បានជឿថា ព្រះយេស៊ូវអាចធ្វើឲ្យនាងប្រសើរឡើងបាន ។
ព្រះយេស៊ូវបានយាងតាមក្រោយយ៉ៃរ៉ុសទៅផ្ទះរបស់គាត់ ប៉ុន្តែទ្រង់បានឈប់ដើម្បីនឹងប្រោសស្ត្រីម្នាក់ឲ្យជា ។ កាលទ្រង់កំពុងមានបន្ទូលនឹងស្ត្រីនោះ មានគេមកប្រាប់យ៉ៃរ៉ុសថា យឺតពេលហើយ—កូនស្រីគាត់បានស្លាប់ហើយ ។
ព្រះយេស៊ូវបានព្រះសណ្ដាប់ឮពាក្យទាំងនោះ ។ ព្រះយេស៊ូវមានបន្ទូលប្រាប់យ៉ៃរ៉ុសថាកុំឲ្យភ័យឡើយ ប៉ុន្តែចូរជឿចុះ ។
ក្រោយមក ព្រះយេស៊ូវបានយាងជាមួយយ៉ៃរ៉ុសទៅផ្ទះរបស់គាត់ ។ មានមនុស្សច្រើនពេញផ្ទះ កំពុងយំដោយសារតែក្មេងស្រីតូចនោះបានស្លាប់ ។
ព្រះយេស៊ូវមានបន្ទូលប្រាប់ពួកគេថា ក្មេងស្រីនេះមិនមែនស្លាប់ទេ គឺវាដេកលក់ទេតើ ។ គេក៏សើចឡកឡឺយដាក់ទ្រង់ ។ ពួកគេប្រាកដណាស់ថា ក្មេងស្រីនោះបានស្លាប់ហើយ ។
ព្រះអង្គសង្គ្រោះបានឲ្យមនុស្សគ្រប់គ្នាចេញទៅក្រៅ ទុកតែពួកសិស្ស យ៉ៃរ៉ុស និង ភរិយារបស់យ៉ៃរ៉ុសប៉ុណ្ណោះ ។ ពួកគេបានទៅក្នុងបន្ទប់ដែលកូនស្រីនោះដេក ។
ព្រះយេស៊ូវបានចាប់ដៃក្មេងស្រីនោះ ។ ទ្រង់មានបន្ទូលប្រាប់នាងឲ្យក្រោកឡើង ។ ស្រាប់តែនាងក៏ក្រោកឡើងដើរទៅ ។ ឪពុកម្ដាយរបស់នាងមានក្តីរំភើបយ៉ាងខ្លាំង ។ ព្រះយេស៊ូវបានមានបន្ទូលហាមមិនឲ្យអ្នកណាដឹងពីរឿងនេះឲ្យសោះ ។ រួចទ្រង់ក៏មានបន្ទូលឲ្យឪពុកម្ដាយនាងយកអ្វីៗមកឲ្យនាងបរិភោគ ។