ជំពូក ៤០
គង្វាលល្អ
គង្វាលល្អមើលថែហ្វូងចៀម ។ គាត់ជួយពួកវាឲ្យស្វែងរកអាហារ និង ទឹក ។ គាត់ពុំទុកឲ្យវាឈឺ ឬ វង្វេងបាត់ឡើយ ។ គាត់ស្គាល់ ហើយស្រឡាញ់ពួកវា ព្រមទាំងលះបង់ជីវិតដើម្បីជួយសង្គ្រោះពួកវាផង ។
ព្រះយេស៊ូវគ្រីស្ទបានចាត់ទុកខ្លួនទ្រង់ថាជាគង្វាលល្អ ។ ទ្រង់គឺជាគង្វាលរបស់យើង ។ យើងគឺជាចៀមរបស់ទ្រង់ ។ ទ្រង់ស្រឡាញ់យើង ។ ទ្រង់ជួយយើងឲ្យរៀនសេចក្ដីពិត ។ ទ្រង់ត្រាស់បង្រៀនយើងអំពីរបៀបរស់នៅ ដើម្បីយើងអាចត្រឡប់ទៅឯព្រះវរបិតាសួគ៌វិញ ។ ទ្រង់បានលះបង់ព្រះជន្មទ្រង់ដើម្បីយើង ។
ព្រះអង្គសង្គ្រោះបានមានបន្ទូលប្រាប់ប្រជាជននៅក្រុងយេរ៉ូសាឡិមថា ទ្រង់មានចៀមមួយហ្វូងទៀត ។ ទ្រង់មានបន្ទូលថា ទ្រង់នឹងយាងទៅជួបហ្វូងចៀមមួយហ្វូងទៀតនោះ ។ ប្រជាជនពុំយល់សេចក្ដីនេះទេ ។
បន្ទាប់ពីព្រះយេស៊ូវបានមានព្រះជន្មរស់ឡើងវិញ ទ្រង់បានយាងទៅជួបចៀមទ្រង់មួយហ្វូងទៀតនៅទ្វីបអាមេរិក ។ ព្រះគម្ពីរមរមនប្រាប់យើងអំពីការយាងទៅជួបនោះ ។ ព្រះយេស៊ូវបានគង់នៅទីនោះជាច្រើនថ្ងៃ ដោយប្រោសព្យាបាលអ្នកឈឺ និងប្រសិទ្ធពរដល់មនុស្សទាំងឡាយ ។ ទ្រង់បានប្រទានបព្វជិតភាពដល់ពួកគេ ហើយបានរៀបចំសាសនាចក្រទ្រង់ឡើងនៅទីនោះ ។ ព្រះយេស៊ូវបានត្រាស់បង្រៀនអំពីសេចក្ដីដូចគ្នាទៅដល់ប្រជាជននៅទីនោះ ថាទ្រង់បានបង្រៀនប្រជាជននៅឯក្រុងយេរ៉ូសាឡិម ។