ជំពូក ៤៨
ប្រស្នាអំពីប្រាក់
មានបុរសម្នាក់បានផ្ដល់ប្រាក់ឲ្យបាវបម្រើទីមួយចំនួនប្រាំពាន់ ។ គាត់ផ្ដល់ឲ្យអ្នកបម្រើទីពីរចំនួនពីរពាន់ ។ គាត់ផ្ដល់ឲ្យអ្នកបម្រើទីបីចំនួនមួយពាន់ ។ បន្ទាប់មក បុរសនោះក៏បានទៅស្រុកឆ្ងាយបាត់ទៅ ។
បាវបម្រើដែលបានប្រាក់ប្រាំពាន់បានប្រឹងប្រែងធ្វើការ ។ គាត់រកបានប្រាក់ប្រាំពាន់បន្ថែមទៀត ។ ឥឡូវនេះ គាត់មានប្រាក់សរុបមួយម៉ឺន ។
បាវបម្រើដែលបានប្រាក់ពីរពាន់បានប្រឹងប្រែងធ្វើការ ។ គាត់រកបានប្រាក់ពីរពាន់បន្ថែមទៀត ។ ឥឡូវនេះ គាត់មានប្រាក់សរុបបួនពាន់ ។
ឯបាវបម្រើដែលមានប្រាក់មួយពាន់ បានកប់ប្រាក់នោះចោលក្នុងដី ។ គាត់ខ្លាចថាគាត់នឹងធ្វើឲ្យបាត់ប្រាក់នោះ ។ គាត់ពុំបានប្រឹងប្រែងធ្វើការ ដើម្បីរកបានប្រាក់បន្ថែមឡើយ ។
កាលបុរសជាចៅហ្វាយបានត្រឡប់មកវិញ គាត់បានសួរពួកបាវបម្រើថាតើពួកគេបានធ្វើអ្វីខ្លះ ។
បាវបម្រើទីមួយបាននាំយកប្រាក់មួយម៉ឺនមកជូនគាត់ ។ បុរសនោះរីករាយណាស់ ។ គាត់បានឲ្យបាវបម្រើនោះធ្វើជាអ្នកគ្រប់គ្រងលើទ្រព្យសម្បត្តិទាំងអស់ ហើយប្រាប់គាត់ថាឲ្យមានអំណរចុះ ។
បាវបម្រើទីពីរបាននាំយកប្រាក់បួនពាន់មកជូនគាត់ ។ ការណ៍ក៏បានធ្វើឲ្យបុរសនោះរីករាយដែរ ។ គាត់បានឲ្យបាវបម្រើទីពីរនោះធ្វើជាអ្នកគ្រប់គ្រងលើទ្រព្យសម្បត្តិទាំងអស់ ហើយប្រាប់គាត់ថាឲ្យមានអំណរចុះ ។
រីឯបាវបម្រើទីបីបានជូនប្រាក់ ដែលគាត់បានកប់ចោលនោះទៅឲ្យចៅហ្វាយវិញ ។ បុរសនោះពុំរីករាយឡើយ ។ គាត់បានពោលថា បាវបម្រើនោះខ្ជិលច្រអូស ។ គាត់គួរតែបានប្រឹងប្រែងធ្វើការ ដើម្បីរកបានប្រាក់បន្ថែម ។
បុរសនោះបានយកប្រាក់ពីរបាវបម្រើទីបី ឲ្យទៅបាវបម្រើទីមួយ ។ បន្ទាប់មក គាត់បានបណ្ដេញបាវបម្រើខ្ជិលច្រអូសចេញទៅ ។ បុរសនៅក្នុងរឿងនេះគឺដូចជាព្រះយេស៊ូវ ។ យើងគឺដូចជាពួកបាវបម្រើ ។ ព្រះយេស៊ូវនឹងជំនុំជម្រះរបៀបដែលយើងប្រើប្រាស់អំណាយទានទាំងឡាយដែលទ្រង់បានប្រទានឲ្យ ។