ជំពូក ៤៩
ពិធីសាក្រាម៉ង់លើកដំបូង
រៀងរាល់ឆ្នាំ ពួកសាសន៍យូដាប្រារព្ធពិធីបុណ្យរំលង ។ ពិធីបុណ្យនោះជួយឲ្យប្រជាជនយូដាចងចាំថា ព្រះបានសង្គ្រោះជីដូនជីតារបស់ពួកគេនៅជំនាន់របស់ម៉ូសេ ។
ព្រះយេស៊ូវ និង ពួកសាវកដប់ពីរនាក់ ត្រូវការកន្លែងមួយដើម្បីបរិភោគអាហារបុណ្យរំលង ។ ព្រះអង្គសង្គ្រោះបានត្រាស់បង្គាប់ឲ្យពេត្រុស និង យ៉ូហាន ស្វែងរកបន្ទប់មួយ ហើយមើលថាតើបន្ទប់នោះសមរម្យសម្រាប់ការបរិភោគអាហារឬទេ ។
ពួកគេបានរកបានបន្ទប់មួយ ហើយរៀបចំអាហារទីនោះ ។
ព្រះយេស៊ូវ និង ពួកសាវកទាំងអស់បានទៅទីនោះ ។ ទ្រង់បានសោយអាហារបុណ្យរំលងនៅទីនោះជាមួយពួកគេ ។
ព្រះយេស៊ូវបានបង្ហាញពិធីសាក្រាម៉ង់ដល់ពួកសាវកទ្រង់ជាលើកដំបូង ។ ទ្រង់បានយកនំប៉័ង ហើយប្រសិទ្ធពរ ហើយបានហែកជាដុំៗ ។ ទ្រង់មានបន្ទូលប្រាប់ពួកសាវកឲ្យបរិភោគនំប៉័ងនោះ ។
ព្រះយេស៊ូវមានបន្ទូលប្រាប់ពួកគេ ឲ្យគិតដល់ព្រះកាយទ្រង់នៅពេលពួកគេទទួលទាននំប៉័ង ។ ទ្រង់បានសុំឲ្យពួកគេចងចាំថា ទ្រង់នឹងសុគតដើម្បីពួកគេ ។
ព្រះយេស៊ូវបានចាក់ស្រាទំពាំងបាយជូរចូលក្នុងពែង ។ ទ្រង់បានប្រសិទ្ធពរ ហើយមានបន្ទូលប្រាប់ឲ្យពួកសាវកទទួលទានស្រាទំពាំងបាយជូរនោះ ។
ព្រះយេស៊ូវមានបន្ទូលប្រាប់ពួកគេ ឲ្យគិតដល់ព្រះលោហិតទ្រង់នៅពេលពួកគេទទួលទានស្រាទំពាំងបាយជូរ ។ ទ្រង់បានសុំឲ្យពួកគេចងចាំថា ទ្រង់នឹងបង្ហូរព្រះលោហិត ហើយរងទុក្ខជំនួសអំពើបាបនៃមនុស្សទាំងពួង ។
ព្រះយេស៊ូវបានមានបន្ទូលប្រាប់ពួកសាវកថា មនុស្សទុច្ចរិតនឹងធ្វើគុតទ្រង់ក្នុងពេលឆាប់ៗនេះ ។ សាវកទាំងដប់មួយនាក់ក្រៀមក្រំជាខ្លាំង ។ ពួកគេស្រឡាញ់ព្រះអង្គសង្គ្រោះ ហើយពុំចង់ឲ្យទ្រង់សុគតឡើយ ។ ព្រះយេស៊ូវបានជ្រាបថា សាវកម្នាក់របស់ទ្រង់នឹងជួយពួកទុច្ចរិត ។ សាវកនោះឈ្មោះថា យូដាស-អ៊ីស្ការីយ៉ុត ។