ການດຶງດູດເອົາພະລັງຂອງພຣະເຢຊູຄຣິດ ເຂົ້າມາສູ່ຊີວິດຂອງເຮົາ
ພຣະກິດຕິຄຸນຂອງພຣະເຢຊູຄຣິດ ເຕັມໄປດ້ວຍພະລັງຂອງພຣະອົງ, ຊຶ່ງມີໃຫ້ທິດາ ແລະ ບຸດຂອງພຣະເຈົ້າທຸກຄົນ ທີ່ສະແຫວງຫາມັນຢ່າງພາກພຽນ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ເຮົາມີຊີວິດຢູ່ໃນຍຸກສະໄໝທີ່ຫຍຸ້ງຍາກຫລາຍ. ການທ້າທາຍ, ການໂຕ້ຖຽງ, ແລະ ຄວາມສັບສົນ ມີຢູ່ອ້ອມຮອບເຮົາ. ວັນເວລາທີ່ປັ່ນປ່ວນເຫລົ່ານີ້ ໄດ້ຖືກບອກໄວ້ລ່ວງໜ້າແລ້ວ ໂດຍພຣະຜູ້ຊ່ວຍໃຫ້ລອດ. ພຣະອົງໄດ້ເຕືອນເຮົາວ່າ ໃນວັນເວລາຂອງເຮົາ, ຜູ້ປໍລະປັກຈະຍຸຍົງໃຈຂອງມະນຸດໃຫ້ໂມໂຫ ແລະ ພາໃຫ້ຫລົງທາງໄປ.1 ແຕ່ພຣະບິດາເທິງສະຫວັນຂອງເຮົາ ບໍ່ເຄີຍຄາດຫວັງໃຫ້ເຮົາ ປະເຊີນກັບບັນຫາສ່ວນຕົວ ແລະ ບັນຫາໃນສັງຄົມ ດ້ວຍຕົວຄົນດຽວ.
ພຣະເຈົ້າຮັກໂລກຫລາຍທີ່ສຸດ ຈົນວ່າພຣະອົງໄດ້ສົ່ງພຣະບຸດອົງດຽວທີ່ຖືກຳເນີດຂອງພຣະອົງມາ2 ເພື່ອຊ່ວຍເຫລືອເຮົາ.3 ແລະ ພຣະບຸດຂອງພຣະອົງ, ພຣະເຢຊູຄຣິດ, ໄດ້ມອບຊີວິດຂອງພຣະອົງເພື່ອເຮົາ. ທັງໝົດນີ້ ເພື່ອວ່າເຮົາຈະສາມາດໄດ້ຮັບພະລັງຂອງພຣະເຈົ້າ—ທີ່ພຽງພໍສຳລັບການປະເຊີນກັບພາລະ, ສິ່ງກີດກັນ, ແລະ ການລໍ້ລວງ ໃນວັນເວລາຂອງເຮົາ.4 ມື້ນີ້ ຂ້າພະເຈົ້າຢາກກ່າວກ່ຽວກັບ ວິທີ ທີ່ເຮົາສາມາດດຶງດູດເອົາພະລັງຂອງພຣະຜູ້ເປັນເຈົ້າ ແລະ ພຣະອາຈານ, ພຣະເຢຊູຄຣິດ ເຂົ້າມາສູ່ຊີວິດຂອງເຮົາ.
ເຮົາເລີ່ມຕົ້ນໂດຍການຮຽນຮູ້ກ່ຽວກັບພຣະອົງ.5 “ເປັນໄປບໍ່ໄດ້ທີ່ [ເຮົາ] ຈະລອດໃນຄວາມໂງ່ຈ້າ.”6 ເມື່ອເຮົາຮູ້ກ່ຽວກັບການປະຕິບັດສາດສະໜາກິດ ແລະ ພາລະກິດຂອງພຣະຜູ້ຊ່ວຍໃຫ້ລອດຫລາຍຂຶ້ນເທົ່າໃດ7—ເມື່ອເຮົາເຂົ້າໃຈຄຳສອນຂອງພຣະອົງ8 ແລະ ສິ່ງທີ່ພຣະອົງໄດ້ກະທຳເພື່ອເຮົາ ຫລາຍຂຶ້ນເທົ່າໃດ—ເຮົາຈະຮູ້ວ່າ ພຣະອົງສາມາດປະທານພະລັງທີ່ເຮົາຕ້ອງການສຳລັບຊີວິດຂອງເຮົາ ຫລາຍຂຶ້ນເທົ່ານັ້ນ.
ໃນຕົ້ນປີນີ້, ຂ້າພະເຈົ້າໄດ້ຂໍໃຫ້ຜູ້ໃຫຍ່ໂສດຂອງສາດສະໜາຈັກ ອຸທິດຖວາຍເວລາ ໃນແຕ່ລະອາທິດ ເພື່ອສຶກສາ ທຸກສິ່ງ ທີ່ພຣະເຢຊູໄດ້ກ່າວ ແລະ ໄດ້ກະທຳ ດັ່ງທີ່ມີບັນທຶກໄວ້ ຢູ່ໃນໜັງສືມາດຕະຖານ.9 ຂ້າພະເຈົ້າໄດ້ເຊື້ອເຊີນເຂົາເຈົ້າ ເຮັດໃຫ້ຂໍ້ອ້າງອີງພຣະຄຳພີ ກ່ຽວກັບພຣະເຢຊູຄຣິດ ຢູ່ໃນ Topical Guide ກາຍເປັນຫລັກສູດສຳຄັນຂອງເຂົາເຈົ້າ.10
ຂ້າພະເຈົ້າໄດ້ທ້າທາຍເຂົາເຈົ້າໃຫ້ເຮັດແນວນັ້ນ ເພາະວ່າ ຂ້າພະເຈົ້າກໍໄດ້ເຮັດຄືກັນ. ຂ້າພະເຈົ້າໄດ້ອ່ານ ແລະ ຂີດກ້ອງ ທຸກຂໍ້ ທີ່ກ່າວກ່ຽວກັບພຣະເຢຊູຄຣິດ, ດັ່ງທີ່ມີຢູ່ໃນ ຫົວຂໍ້ໃຫຍ່ ແລະ ຫົວຂໍ້ຫຍ່ອຍ 57 ຫົວຂໍ້ ຢູ່ໃນ Topical Guide.11 ເມື່ອຂ້າພະເຈົ້າໄດ້ສຳເລັດການສຶກສາທີ່ໜ້າຕື່ນເຕັ້ນນັ້ນແລ້ວ, ພັນລະຍາຂອງຂ້າພະເຈົ້າ ໄດ້ຖາມຂ້າພະເຈົ້າວ່າ ມັນມີຄວາມໝາຍແນວໃດຕໍ່ຂ້າພະເຈົ້າ. ຂ້າພະເຈົ້າໄດ້ບອກນາງວ່າ, “ຂ້າພະເຈົ້າກາຍເປັນຄົນໃໝ່!”
ຂ້າພະເຈົ້າຮູ້ສຶກມີຄວາມອຸທິດຕົນຕໍ່ພຣະອົງຄືນໃໝ່ ຂະນະທີ່ຂ້າພະເຈົ້າອ່ານພຣະຄຳພີມໍມອນຄືນອີກ ກ່ຽວກັບຕອນທີ່ພຣະຜູ້ຊ່ວຍໃຫ້ລອດໄດ້ກ່າວເອງ ກ່ຽວກັບພາລະກິດຂອງພຣະອົງ ຢູ່ໃນຊ່ວງມະຕະ. ພຣະອົງໄດ້ກ່າວວ່າ:
“ເຮົາໄດ້ມາເກີດໃນໂລກ ເພື່ອກະທຳຕາມພຣະປະສົງຂອງພຣະບິດາຂອງເຮົາ, ເພາະວ່າພຣະບິດາຂອງເຮົາໄດ້ສົ່ງເຮົາມາ.
“ແລະ ພຣະບິດາຂອງເຮົາໄດ້ສົ່ງເຮົາມາ ເພື່ອວ່າເຮົາຈະໄດ້ຖືກຍົກຂຶ້ນເທິງໄມ້ກາງແຂນ.”12
ໂດຍທີ່ເປັນໄພ່ພົນຍຸກສຸດທ້າຍ, ເຮົາກ່າວເຖິງພາລະກິດຂອງພຣະອົງວ່າ ເປັນການຊົດໃຊ້ຂອງພຣະເຢຊູຄຣິດ, ຊຶ່ງເຮັດໃຫ້ການຟື້ນຄືນຊີວິດເກີດເປັນຈິງ ສຳລັບທຸກຄົນ ແລະ ເຮັດໃຫ້ຊີວິດນິລັນດອນ ເປັນໄປໄດ້ສຳລັບຜູ້ທີ່ກັບໃຈຈາກບາບຂອງຕົນ ແລະ ຮັບເອົາ ແລະ ຮັກສາພິທີການ ແລະ ພັນທະສັນຍາທີ່ຈຳເປັນ.
ມັນເປັນການກ່າວຄຳສອນແບບບໍ່ຈົບ ຖ້າເຮົາກ່າວເຖິງການເສຍສະລະຊົດໃຊ້ຂອງພຣະຜູ້ເປັນເຈົ້າ ແບບສັ້ນໆວ່າ “ການຊົດໃຊ້,” ຫລື “ພະລັງທີ່ເຮັດໃຫ້ເປັນໄປໄດ້ຂອງການຊົດໃຊ້,” ຫລື “ການນຳໃຊ້ການຊົດໃຊ້,” ຫລື “ການຖືກເຮັດໃຫ້ເຂັ້ມແຂງໂດຍການຊົດໃຊ້.” ຄຳເວົ້າເຫລົ່ານີ້ ຈະກໍ່ໃຫ້ເກີດການຊີ້ນຳສັດທາໄປໃນທາງຜິດ ໂດຍການຖືວ່າ ການຊົດໃຊ້ ເປັນຄືກັບ ສິ່ງ ທີ່ມີຊີວິດ ແລະ ມີຄວາມສາມາດ ທີ່ບໍ່ເພິ່ງອາໄສພຣະບິດາເທິງສະຫວັນຂອງເຮົາ ແລະ ພຣະບຸດຂອງພຣະອົງ, ພຣະເຢຊູຄຣິດ.
ພາຍໃຕ້ແຜນນິລັນດອນທີ່ຍິ່ງໃຫຍ່ຂອງພຣະບິດາ, ມັນແມ່ນພຣະຜູ້ຊ່ວຍໃຫ້ລອດ ທີ່ໄດ້ຮັບທຸກທໍລະມານ. ມັນແມ່ນພຣະຜູ້ຊ່ວຍໃຫ້ລອດ ທີ່ໄດ້ເຮັດໃຫ້ສາຍຫັດແຫ່ງຄວາມຕາຍຂາດອອກ. ມັນແມ່ນພຣະຜູ້ຊ່ວຍໃຫ້ລອດ ທີ່ໄດ້ຈ່າຍແທນບາບ ແລະ ການລ່ວງລະເມີດຂອງເຮົາ ແລະ ລຶບມັນອອກ ໃນເງື່ອນໄຂຂອງການກັບໃຈ. ມັນແມ່ນພຣະຜູ້ຊ່ວຍໃຫ້ລອດ ທີ່ປົດປ່ອຍເຮົາຈາກຄວາມຕາຍທາງຮ່າງກາຍ ແລະ ທາງວິນຍານ.
ບໍ່ມີຮູບຮ່າງໃດ ທີ່ເອີ້ນວ່າ “ການຊົດໃຊ້” ຊຶ່ງເຮົາສາມາດເອີ້ນຫາ ເພື່ອໃຫ້ຊ່ວຍເຫລືອ, ປິ່ນປົວ, ໃຫ້ອະໄພ, ຫລື ໃຫ້ພະລັງ. ພຣະເຢຊູຄຣິດ ເປັນແຫລ່ງດັ່ງກ່າວ. ຄຳສັບທີ່ສັກສິດ ດັ່ງເຊັ່ນ ການຊົດໃຊ້ ແລະ ການຟື້ນຄືນພຣະຊົນ ບັນຍາຍເຖິງສິ່ງທີ່ພຣະຜູ້ຊ່ວຍໃຫ້ລອດໄດ້ກະທຳ ຕາມແຜນຂອງພຣະບິດາ, ເພື່ອວ່າເຮົາຈະມີຊີວິດຢູ່ດ້ວຍຄວາມຫວັງ ໃນຊີວິດນີ້ ແລະ ໄດ້ຮັບຊີວິດນິລັນດອນ ໃນໂລກທີ່ຈະມາເຖິງ. ການເສຍສະລະຊົດໃຊ້ຂອງພຣະຜູ້ຊ່ວຍໃຫ້ລອດ—ການກະທຳທີ່ສຳຄັນທີ່ສຸດ ໃນປະຫວັດສາດຂອງມວນມະນຸດ—ແມ່ນເຂົ້າໃຈ ແລະ ຮູ້ບຸນຄຸນໄດ້ດີທີ່ສຸດ ເມື່ອເຮົາພົວພັນມັນໃສ່ກັບພຣະອົງໂດຍສະເພາະ ແລະ ຢ່າງແຈ່ມແຈ້ງ.
ພາລະກິດທີ່ສຳຄັນຂອງພຣະຜູ້ຊ່ວຍໃຫ້ລອດ ຖືກກ່າວເນັ້ນໜັກໂດຍສາດສະດາໂຈເຊັບ ສະມິດ, ຜູ້ໄດ້ປະກາດຢ່າງໜັກແໜ້ນວ່າ “ຫລັກທຳພື້ນຖານຂອງສາດສະໜາຂອງເຮົາຄື ປະຈັກພະຍານຂອງອັກຄະສາວົກ ແລະ ສາດສະດາ, ກ່ຽວກັບພຣະເຢຊູຄຣິດ, ວ່າພຣະອົງໄດ້ສິ້ນພຣະຊົນ, ໄດ້ຖືກຝັງ, ແລະ ໄດ້ຟື້ນພຣະຊົນໃນມື້ທີສາມ, ແລະ ໄດ້ສະເດັດຂຶ້ນສູ່ສະຫວັນ; ແລະ ເລື່ອງອື່ນທັງໝົດທີ່ກ່ຽວຂ້ອງກັບສາດສະໜາຂອງເຮົາ ລ້ວນເປັນພຽງແຕ່ສ່ວນປະກອບຂອງເລື່ອງດັ່ງກ່າວ.”13
ມັນແມ່ນຂໍ້ຄວາມນີ້ແຫລະ ຂອງສາດສະດາ ທີ່ດົນໃຈສາດສະດາ, ຜູ້ພະຍາກອນ, ແລະ ຜູ້ເປີດເຜີຍ 15 ຄົນ ໃຫ້ລະບຸ ແລະ ເຊັນ ປະຈັກພະຍານຂອງພວກເພິ່ນ ເພື່ອເປັນອະນຸສອນໃຫ້ແກ່ ວັນເກີດ ຄົບຮອບ 2,000 ປີ ຂອງພຣະຜູ້ເປັນເຈົ້າ. ປະຈັກພະຍານແຫ່ງປະຫວັດສາດນີ້ ມີຫົວຂໍ້ວ່າ “ພຣະຄຣິດທີ່ຊົງພຣະຊົນ.”14 ສະມາຊິກຈຳນວນຫລວງຫລາຍ ໄດ້ທ່ອງຈຳຄວາມຈິງໃນນັ້ນ. ບາງຄົນກໍບໍ່ຮູ້ຊ້ຳວ່າ ມັນມີຢູ່. ເມື່ອທ່ານສະແຫວງຫາທີ່ຈະຮຽນຮູ້ຫລາຍຂຶ້ນ ກ່ຽວກັບພຣະເຢຊູຄຣິດ, ຂ້າພະເຈົ້າຂໍເຊື້ອເຊີນທ່ານ ໃຫ້ສຶກສາ “ພຣະຄຣິດທີ່ຊົງພຣະຊົນ.”
ເມື່ອເຮົາໃຊ້ເວລາໃນການຮຽນຮູ້ກ່ຽວກັບພຣະຜູ້ຊ່ວຍໃຫ້ລອດ ແລະ ການເສຍສະລະຊົດໃຊ້ຂອງພຣະອົງ, ເຮົາຈະຄິດຢາກມີສ່ວນຮ່ວມໃນການຮຽນຮູ້ຢ່າງອື່ນອີກ ທີ່ຊ່ວຍເຮົາໃຫ້ໄດ້ຮັບພະລັງຂອງພຣະອົງ. ເຮົາຈະເລືອກມີສັດທາໃນພຣະອົງ ແລະ ຕິດຕາມພຣະອົງ.
ສານຸສິດທີ່ແທ້ຈິງຂອງພຣະເຢຊູຄຣິດ ເຕັມໃຈທີ່ຈະຢືນຂຶ້ນ, ກ້າເວົ້າ, ແລະ ແຕກຕ່າງຈາກຄົນອື່ນ ຂອງໂລກ. ເຂົາເຈົ້າຈະບໍ່ຫວາດຫວັ່ນ, ອຸທິດຕົນ, ແລະ ກ້າຫານ. ຂ້າພະເຈົ້າໄດ້ຮູ້ຈັກສານຸສິດເຊັ່ນນັ້ນ ໃນລະຫວ່າງການໄປເຮັດໜ້າທີ່ມອບໝາຍຂອງຂ້າພະເຈົ້າ ຢູ່ປະເທດແມັກຊິໂກ, ຕອນຂ້າພະເຈົ້າໄປພົບກັບເຈົ້າໜ້າທີ່ຝ່າຍລັດຖະບານ, ຕະຫລອດທັງ ຜູ້ນຳສາດສະໜາຕ່າງໆ. ແຕ່ລະຄົນໄດ້ຂອບໃຈຂ້າພະເຈົ້າ ສຳລັບຄວາມກ້າຫານຂອງສະມາຊິກພວກເຮົາ ແລະ ສຳລັບຜົນງານທີ່ດີເລີດ ແລະ ການຮັກສາການແຕ່ງງານ ແລະ ຄອບຄົວ ຢູ່ໃນປະເທດຂອງເຂົາເຈົ້າ.
ບໍ່ມີສິ່ງໃດທີ່ງ່າຍ ຫລື ອັດຕະໂນມັດ ກ່ຽວກັບການກາຍເປັນສານຸສິດທີ່ມີພະລັງເຊັ່ນນີ້. ຄວາມຕັ້ງໃຈຂອງເຮົາຕ້ອງຍຶດໝັ້ນຢູ່ທີ່ພຣະຜູ້ຊ່ວຍໃຫ້ລອດ ແລະ ພຣະກິດຕິຄຸນຂອງພຣະອົງ. ມັນຮຽກຮ້ອງຄວາມພະຍາຍາມທາງຈິດໃຈ ໃນການຈົດຈໍ່ຢູ່ທີ່ພຣະອົງ ໃນ ທຸກ ຄວາມຄິດ.15 ແຕ່ເມື່ອເຮົາເຮັດເຊັ່ນນັ້ນ, ຄວາມສົງໄສ ແລະ ຄວາມຢ້ານກົວຂອງເຮົາ ຈະຜ່າຍໜີໄປ.16
ເມື່ອບໍ່ດົນມານີ້ ຂ້າພະເຈົ້າໄດ້ຮຽນຮູ້ເຖິງຄວາມກ້າຫານຂອງຍິງໜຸ່ມຄົນໜຶ່ງ ໃນຊັ້ນ ກຸນລະສະຕີ. ນາງໄດ້ຖືກເຊື້ອເຊີນໃຫ້ໄປຮ່ວມການແຂ່ງຂັນລະດັບລັດ ສຳລັບໂຮງຮຽນມັດທະຍົມຂອງນາງ ໃນຄ່ຳຄືນດຽວກັນນັ້ນ ທີ່ນາງໄດ້ສັນຍາວ່າ ຈະໄປຮ່ວມການປະຊຸມຂອງສະມາຄົມສະຕີສົງເຄາະປະຈຳສະເຕກ. ເມື່ອນາງຮູ້ເຖິງກິດຈະກຳທີ່ຕິດຂັດກັນ ແລະ ກໍໄດ້ອະທິບາຍໃຫ້ເຈົ້າໜ້າທີ່ຂອງການແຂ່ງຂັນໃຫ້ຊາບແລ້ວ ວ່ານາງຕ້ອງໄດ້ອອກຈາກບ່ອນແຂ່ງຂັນໄວ ເພື່ອໄປຮ່ວມການປະຊຸມທີ່ສຳຄັນ, ແລ້ວນາງໄດ້ຖືກບອກວ່າ ນາງຕ້ອງຖືກຕັດອອກຈາກການແຂ່ງຂັນ ຖ້ານາງກັບໄວ.
ກຸນລະສະຕີ ຜູ້ນີ້ໄດ້ເຮັດສິ່ງໃດ? ນາງໄດ້ຮັກສາຄຳສັນຍາທີ່ວ່າ ຈະໄປຮ່ວມການປະຊຸມສະຕີສົງເຄາະ. ຕາມທີ່ສັນຍາ, ນາງໄດ້ຖືກຕັດອອກຈາກການແຂ່ງຂັນລະດັບລັດ. ເມື່ອນາງຖືກຖາມກ່ຽວກັບການຕັດສິນໃຈຂອງນາງ, ນາງໄດ້ຕອບພຽງວ່າ, “ສາດສະໜາຈັກສຳຄັນກວ່າ, ບໍ່ແມ່ນບໍ?”
ສັດທາໃນພຣະເຢຊູຄຣິດກະຕຸ້ນເຮົາໃຫ້ເຮັດສິ່ງທີ່ເຮົາອາດບໍ່ເຮັດດ້ວຍຕົວເອງ. ສັດທາທີ່ຊັກຊວນເຮົາໃຫ້ລົງມືປະຕິບັດ ຈະຊ່ວຍເຮົາໃຫ້ໄດ້ຮັບພະລັງຂອງພຣະອົງ.
ເຮົາຈະເພີ່ມພະລັງຂອງພຣະຜູ້ຊ່ວຍໃຫ້ລອດ ໃນຊີວິດຂອງເຮົານຳອີກ ເມື່ອເຮົາເຮັດພັນທະສັນຍາທີ່ສັກສິດ ແລະ ຮັກສາພັນທະສັນຍາເຫລົ່ານັ້ນ ດ້ວຍຄວາມຊັດເຈນ. ພັນທະສັນຍາຂອງເຮົາ ຜູກມັດເຮົາໄວ້ກັບພຣະອົງ ແລະ ມອບພະລັງແຫ່ງຄວາມເປັນພຣະເຈົ້າໃຫ້ແກ່ເຮົາ. ໃນການເປັນສານຸສິດທີ່ຊື່ສັດ, ເຮົາກັບໃຈ ແລະ ຕິດຕາມພຣະອົງລົງໃນນ້ຳແຫ່ງການບັບຕິສະມາ. ເຮົາເດີນໄປໃນທາງເສັ້ນແຫ່ງພັນທະສັນຍາ ເພື່ອຮັບເອົາພິທີການອື່ນໆທີ່ຈຳເປັນ.17 ແລະ ດ້ວຍພຣະຄຸນ, ແຜນຂອງພຣະເຈົ້າ ແມ່ນສຳລັບພອນເຫລົ່ານັ້ນ ຈະຖືກມອບໃຫ້ແກ່ບັນພະບຸລຸດ ຜູ້ໄດ້ລ່ວງລັບໄປແລ້ວ ປາດສະຈາກໂອກາດທີ່ຈະຮັບເອົາພິທີການ ໃນຊ່ວງຊີວິດມະຕະຂອງເຂົາ.18
ຊາຍ ແລະ ຍິງ ຜູ້ຮັກສາພັນທະສັນຍາ ຈະຊອກຫາທາງ ທີ່ຈະຮັກສາຕົວເອງຈາກຄວາມດ່າງພອຍຂອງໂລກ ເພື່ອວ່າ ຈະບໍ່ມີສິ່ງໃດກີດກັນເຂົາເຈົ້າໄດ້ ຈາກການໄດ້ຮັບພະລັງຂອງພຣະຜູ້ຊ່ວຍໃຫ້ລອດ. ເມື່ອບໍ່ດົນມານີ້ ພັນລະຍາ ແລະ ແມ່ ທີ່ຊື່ສັດຄົນໜຶ່ງ ໄດ້ຂຽນມາວ່າ: “ຕອນນີ້ເປັນເວລາທີ່ຫຍຸ້ງຍາກ ແລະ ອັນຕະລາຍຫລາຍ. ພວກເຮົາໄດ້ຮັບພອນຫລາຍ ທີ່ມີຄວາມຮູ້ເພີ່ມເຕີມເຖິງແຜນແຫ່ງຄວາມລອດ ແລະ ໄດ້ຮັບການນຳພາທີ່ດົນໃຈ ຈາກສາດສະດາ, ອັກຄະສາວົກ, ແລະ ຜູ້ນຳ ທີ່ຮັກແພງ ເພື່ອຊ່ວຍພວກເຮົາເດີນຜ່ານຜ່າມໍລະສຸມໄປໄດ້ ຢ່າງປອດໄພ. ພວກເຮົາໄດ້ຢຸດນິໄສເປີດວິດທະຍຸ ຟັງເພງໃນຕອນເຊົ້າ. ແຕ່ແທນນັ້ນ ພວກເຮົາໄດ້ຟັງກອງປະຊຸມໃຫຍ່ສາມັນໃນມືຖືທຸກເຊົ້າ ໃນຂະນະທີ່ພວກເຮົາຕຽມສຳລັບອີກມື້ໜຶ່ງ.”
ຢ່າງໜຶ່ງອີກທີ່ຊ່ວຍດຶງດູດເອົາພະລັງຂອງພຣະຜູ້ຊ່ວຍໃຫ້ລອດ ແມ່ນການຢື້ຂຶ້ນຫາພຣະອົງໃນສັດທາ. ການຢື້ຂຶ້ນດັ່ງກ່າວ ຮຽກຮ້ອງຄວາມພາກພຽນ ແລະ ຄວາມຕັ້ງໃຈ.
ທ່ານຈື່ເລື່ອງລາວຢູ່ໃນພຣະຄຳພີໄດ້ບໍ ກ່ຽວກັບຜູ້ຍິງທີ່ເປັນພະຍາດເລືອດຕົກ ເປັນເວລາ 12 ປີ ຊຶ່ງເປັນບັນຫາທີ່ເຮັດໃຫ້ອ່ອນເພຍ?19 ນາງມີສັດທາອັນແຮງກ້າໃນພຣະຜູ້ຊ່ວຍໃຫ້ລອດ, ໄດ້ຄິດໃນໃຈວ່າ, “ຖ້າເຮົາໄດ້ບາຍພຽງແຕ່ເຄື່ອງນຸ່ງຂອງເພິ່ນເທົ່ານັ້ນ, ເຮົາກໍຈະດີພະຍາດ.”20
ຜູ້ຍິງທີ່ຊື່ສັດ ແລະ ຕັ້ງໃຈ ຄົນນີ້ ຕ້ອງໄດ້ຢື້ມືອອກໄປຈົນສຸດຄວາມສາມາດ ເພື່ອຈະໄດ້ຮັບພະລັງຂອງພຣະອົງ. ການຢື້ທາງຮ່າງກາຍຂອງນາງ ເປັນສັນຍາລັກຂອງການຢື້ທາງວິນຍານຂອງນາງ.
ຫລາຍຄົນໃນພວກເຮົາໄດ້ຮ້ອງອອກມາຈາກສ່ວນເລິກຂອງໃຈ, ໃນຖ້ອຍຄຳອີກຢ່າງໜຶ່ງຂອງຜູ້ຍິງຄົນນີ້ ທີ່ວ່າ: “ຖ້າຫາກພຽງແຕ່ເຮົາຢື້ໃຫ້ໄກພໍທາງວິນຍານ ເພື່ອດຶງດູດເອົາພະລັງຂອງພຣະຜູ້ຊ່ວຍໃຫ້ລອດ ເຂົ້າມາສູ່ຊີວິດຂອງເຮົາ, ແລ້ວເຮົາຈະຮູ້ຈັກວິທີທີ່ຈະປະເຊີນໜ້າກັບສະພາບການອັນເຈັບປວດໃຈຂອງເຮົາໄດ້. ເຮົາຄົງຈະຮູ້ວ່າ ເຮົາຄວນເຮັດສິ່ງໃດ. ແລະ ເຮົາຈະມີພະລັງທີ່ຈະເຮັດມັນໄດ້.”
ເມື່ອທ່ານຢື້ຂຶ້ນຫາພະລັງຂອງພຣະຜູ້ເປັນເຈົ້າ ໃນຊີວິດຂອງທ່ານ ດ້ວຍຄວາມຕັ້ງໃຈດຽວກັນນີ້ ຄືກັນກັບຄົນທີ່ກຳລັງຈະຈົມນ້ຳ ທີ່ຢື້ຂຶ້ນເພື່ອຫາຍໃຈ, ພະລັງຈາກພຣະເຢຊູຄຣິດ ຈະເປັນຂອງທ່ານ. ເມື່ອພຣະຜູ້ຊ່ວຍໃຫ້ລອດຮູ້ວ່າ ທ່ານຢາກຢື້ຂຶ້ນຫາພຣະອົງແທ້ໆ—ເມື່ອພຣະອົງຮູ້ສຶກວ່າ ຄວາມປາດຖະໜາອັນແທ້ຈິງແຫ່ງໃຈຂອງທ່ານ ແມ່ນທີ່ຈະດຶງດູດເອົາພະລັງຂອງພຣະອົງ ເຂົ້າມາສູ່ຊີວິດຂອງທ່ານ—ແລ້ວ ທ່ານຈະຖືກນຳພາໄປ ໂດຍພຣະວິນຍານ ເພື່ອໃຫ້ຮູ້ຄັກແນ່ ເຖິງສິ່ງທີ່ທ່ານຄວນເຮັດ.21
ເມື່ອການຢື້ທາງວິນຍານຂອງທ່ານ ອອກໄປໄກກວ່າທີ່ທ່ານເຄີຍເຮັດຜ່ານມາ, ແລ້ວພະລັງຂອງພຣະອົງຈະໄຫລມາສູ່ທ່ານ.22 ແລະ ແລ້ວທ່ານຈະເຂົ້າໃຈຢ່າງເລິກຊຶ້ງ ເຖິງຄວາມໝາຍຂອງຄຳ ທີ່ເຮົາຮ້ອງຢູ່ໃນເພງສວດ ຊື່ “The Spirit of God” ແປວ່າ ພຣະວິນຍານຂອງພຣະເຈົ້າ ທີ່ວ່າ:
ພຣະຜູ້ເປັນເຈົ້າຂະຫຍາຍຄວາມເຂົ້າໃຈຂອງໄພ່ພົນ. …
ຄວາມຮູ້ ແລະ ພະລັງຂອງພຣະຜູ້ເປັນເຈົ້າແຜ່ໄປ;
ມ່ານປົກຄຸມພິພົບເລີ່ມເຄື່ອນຄາຍ.23
ພຣະກິດຕິຄຸນຂອງພຣະເຢຊູຄຣິດ ເຕັມໄປດ້ວຍພະລັງຂອງພຣະອົງ, ຊຶ່ງມີໃຫ້ທິດາ ແລະ ບຸດຂອງພຣະເຈົ້າທຸກຄົນ ທີ່ສະແຫວງຫາມັນຢ່າງພາກພຽນ. ມັນແມ່ນປະຈັກພະຍານຂອງຂ້າພະເຈົ້າທີ່ວ່າ ເມື່ອເຮົາດຶງດູດເອົາພະລັງຂອງພຣະອົງ ເຂົ້າມາສູ່ຊີວິດຂອງເຮົາ, ພຣະອົງ ພ້ອມດ້ວຍຕົວເຮົາເອງ ຈະປິຕິຍິນດີ.24
ໂດຍທີ່ເປັນພະຍານພິເສດຄົນໜຶ່ງຂອງພຣະອົງ, ຂ້າພະເຈົ້າປະກາດວ່າ ພຣະເຈົ້າຊົງພຣະຊົນຢູ່! ພຣະເຢຊູຄື ພຣະຄຣິດ! ສາດສະໜາຈັກຂອງພຣະອົງໄດ້ຖືກຟື້ນຟູຄືນມາໃໝ່ສູ່ໂລກແລ້ວ! ສາດສະດາຂອງພຣະເຈົ້າມີຢູ່ເທິງໂລກ ໃນທຸກວັນນີ້ ຄື ປະທານທອມມັສ ແອັສ ມອນສັນ, ຜູ້ຂ້າພະເຈົ້າສະໜັບສະໜູນ ດ້ວຍສຸດໃຈ. ຂ້າພະເຈົ້າເປັນພະຍານດ້ວຍການສະແດງຄວາມຮັກ ແລະ ການມອບພອນໃຫ້ແກ່ທ່ານ ແຕ່ລະຄົນ, ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.