Lix huhil b’atz’unk sa’ li tijonelil

Jo’ aj tzolonelex, naab’al ajwi’ eere nekechaab’ilob’resi lee seeb’al ut li k’a’ru nawulak cheru rik’ineb’ kok’ k’anjel naq nekex’el sa’ li eskweel malaj sa’ junaq na’ajej tojb’il, sa’ junaq ch’uut aj b’atz’unel malaj ch’uut chirix li eskweel, sa’ xyanqeb’ a’an wankeb’ li b’atz’unk.

Laa’in mas neke’wulak chiwu li jalan jalanq chi b’atz’unk chiru chixjunil lin yu’am, ut junelik nasaho’ inch’ool chirixeb’ li ani neke’xchaab’ilob’resi lix seeb’al toj reetal naq najt neke’wulak. Re wulak chi tz’aqal chaab’il sa’ xb’aanunkil k’a’ruhaq, rik’in ajwi’ naq ak wan aaseeb’al naq xatyo’la, toj na’ajman li ramok-ib’, li mayejak, ut naab’al hoor kawresink-ib’ ut xyalb’al xb’aanunkil. Eb’ laj b’atz’unel a’an junelik neke’rab’i xch’ilahomeb’ laj kawresinel reheb’ ut rik’in xtaql xch’ooleb’ neke’xkanab’ li k’a’ru neke’raj anajwan xb’aan k’a’ruhaq mas aajel wi’chik ru chalel.

Naqanaweb’ ru li komon sa’ li Iglees ut aj k’amol re li tijonelil li wulajenaqeb’ b’ar wi’ neke’raj sa’eb’ li jalan jalanq b’atz’unk. Wankeb’ naab’al li chaab’il eetalil, a’b’an, xb’aan naq maak’a’ qahoonal ka’ajwi’ tinye xk’ab’a’eb’ junjunq. Maare nekenaweb’ ru junjunqeb’ reheb’ laj b’atz’unel a’in: sa’ li beisbol, laj Jeremy Guthrie ut laj Bryce Harper; sa’ li b’olotz’ uq’, laj Jabari Parker ut laj Jimmer Fredette; sa’ li b’olotz’oq, laj Ricardo Rojas; sa’ li rugby, laj William Hopoate; ut sa’ li futbol americano, laj Taysom Hill ut laj Daniel Sorensen. Sa’ junjunqaleb’ a’an neke’tenq’an chi nim sa’eb’ li jalan jalanq chi b’atz’unk.

Yaal naq tz’aqal chaab’ileb’ jo’ aj b’atz’unel, a’b’an eb’ li komon a’in a’anaqeb’ raj li xb’een chixyeeb’al naq moko tz’aqaleb’ ta re ru jo’ aj b’atz’unel chi moko tz’aqaleb’ ta re ru jo’ kristiaan. Neke’xyal xq’e chi chaab’ilo’k jo’ aj b’atz’unel—ut chixyu’aminkil li evangelio ajwi’. Wi neke’xtich li roq, neke’wakli ut neke’xyal xq’e chi kuyuk toj sa’ roso’jik.

Sa’eb’ li b’atz’unk sa’ ch’uut, neke’k’uub’aman chan ru te’b’atz’unq sa’ junjunq li hoonal ut nak’uub’aman jun li hu re chan ru li b’atz’unk. Eb’ laj b’atz’unel neke’xtzol lix k’anjeleb’ sa’ li junjunq chi b’atz’unk. Eb’ li tz’aqal chaab’il aj b’atz’unel neke’xtzol li hu reheb’ li b’atz’unk chi us, toj reetal naq sa’ xhoonalil junaq li b’atz’unk, neke’xnaw chi tz’aqal, sa’ xk’a’uxleb’, b’ar te’xik ut k’a’ru te’xb’aanu.

Jalam-uuch

Jun winq rik’in jun hu reheb’ li b’atz’unk

Jalam-uuch xb’aan laj Dave Kaup/REUTERS/stock.adobe.com

Jalam-uuch

Hu reheb’ li b’atz’unk

Chi jo’kan ajwi’, laa’o, laj k’amol re li tijonelil, wan ajwi’ jun qach’uut (jun li molam) ut jun li hu reheb’ li b’atzunk (eb’ li loq’laj hu ut eb’ li raatin li profeet sa’eb’ li kutan a’in).

Ma nekekawresiheb’ lee rochb’een sa’ li ch’uut?

Jo’ k’ihal eetzolom li hu reheb’ li b’atz’unk?

Ma neketaw ru chi us lee k’anjel?

Jalam-uuch

Jun molam re li tijonelil

Re xch’olob’ankil chi us li eetalil a’in, naqil naq eb’ li neke’kawresink reheb’ laj b’atz’unel neke’xnaw k’a’ru lix chaab’ilaleb’ ut lix q’unileb’ xmetz’ew li ch’uut, jo’ ajwi’ li reheb’ li neke’b’atz’un wi’. A’aneb’ neke’xk’uub’ chan ru naru te’nume’q chi uub’ej chiruheb’ li neke’b’atz’un wi’. Ut laa’ex?

Laa’ex nekenaw k’a’ruheb’ li aaleek nekextawman wi’, ut naru nekek’e reetal chan ru naq li xik’ na’ilok naru nekexrisi sa’ li b’e ut chixkub’sinkil eech’ool. Ma xekawresi chan ru tex’elq chi uub’ej ut ma xekawresi junaq li hu re xtzolb’al chan ru teenaw k’a’ru teeb’aanu naq teetaw eerib’ rik’in li ka’pak’alil?

Naq teetaweb’ jalan jalanq li aaleek sa’ lee wanjik—maare naq wanqex rik’ineb’ jalan chik kristiaan malaj naq wanqex eejunes chirilb’al junaq pantalla— teenaw chan ru teeq’axeb’ ru. Wi jun eeramiiw tixyeechi’i li ha’ nakaltesin eere malaj naq teeyal li droga, laa’ex nekenaw k’a’ru teeb’aanu. Ak kawresinb’ilex ut nekenaw k’a’ru teeb’anu rik’in a’an.

Rik’in jun k’uub’anb’il na’leb’, jun li hu reheb’ li b’atz’unk ut jun kawil k’a’uxl re xb’aanunkil lee k’anjel, teek’e reetal naq li aaleek maak’a’ xwankil sa’ eeb’een. Ak nekenaw chan ru texwanq ut k’a’ru teeb’aanu. Moko toj yooqex tachi xtz’ilb’al rix rajlal sut k’a’ru teeb’anu rik’ineb’ li aaleek.

Jun reheb’ li Kab’laju toje’ kixwotz jun seraq’ li naxk’utb’esi li na’leb’ a’an. Naq a’an chaq jun aj tij ut naxik sa’ li eskweel, sa’ jun kutan wan rik’ineb’ li ramiiw. Chirix naq ke’wa’ak, ke’b’eek b’ayaq sa’ b’eleb’aal ch’iich’ toj reetal naq jun reheb’ li ramiiw kixye naq te’xik rilb’al jun kaxmu. Li ch’a’ajkilal a’an naq a’an kixnaw naq a’an jun kaxmu li ink’a’ raj tento taaril. Us ta kireek’a naq chi minb’il taaril raj li kaxmu ut ki’ok xxiw, a’an ak naxnaw li k’a’ raj ru tento tixb’aanu. A’an jun li perel isinb’il chaq sa’ lix hu reheb’ li b’atz’unk re li tijonelil.

Chirix naq kimusiq’ak ut kixkawob’resi lix ch’ool, kixye: “Ink’a’ nawaj rilb’al li kaxmu a’an. Kanab’omaqin sa’ li wochoch,” ut a’an ke’xb’aanu. Jun li ch’ina k’uub’anb’il b’atz’unk kixk’am chi nume’k chi uub’ej! Naab’al chihab’ chik chirix a’an, jun reheb’ li ramiiw kiwan chaq sa’ li q’ojyin a’an kixch’olob’ chan ru naq lix b’aanuhom kikana choq’ xkawilal re naq tixnumsiheb’ li hoonal chanchaneb’ a’an rik’in kawil ch’oolej.

Xinpatz’ reheb’ li wech aj k’anjel naq te’xye junjunqeb’ li k’uub’anb’il b’atz’unk li naru nekek’eheb’ sa’ lee hu. A’in junjunq reheb’ lix musiq’anb’il na’leb’:

• Tijonqex rajlal kutan re xk’ulb’al eesaqen ut jun xnawom eech’ool chirix li Jesukristo.

• Ab’ihomaq chi q’es eexik lix k’utumeb’ lee na’ eeyuwa’, lee obiisp, ut eb’ laj jolominel reheb’ li Saaj Winq ut li molam.

• Eelelinqex chiru li pornografia ut li k’a’ru tz’aj ru wankeb’ sa’ li internet.

• Jultikaq eere eb’ li yeechi’ihom eeb’aanuhom rik’in li Dios ut yalomaq eeq’e chiroxloq’inkileb’.

• Tzolomaqeb’ li seraq’ sa’eb’ li loq’laj hu chirix li xninqaleb’ ru profeet ut taaqehomaq lix chaab’ilaleb’.

• Osob’tesihomaqeb’ li ralal xk’ajol li qaChoxahil Yuwa’ rik’in lee k’anjel.

• Che’wanq eechaab’il amiiw li te’tenq’anq eere chi wulak jo’ li kristiaan nekeraj wi’ wulak.

• Chenawaq chi us roksinkil li aplicación FamilySearch ut k’anjelanqex sa’ li resilal lee junkab’al.

• K’oxlahomaqeb’ li na’ajej b’ar naru tex’eeleliq chiruheb’ li k’a’ru ink’a’ us.

• Rahomaqeb’ ut kawob’resihomaqeb’ lee komon sa’ lee molam re li tijonelil.

Xin’aatinak ajwi’ rik’ineb’ laj b’atz’unel li xerileb’ xjalam-uuch toje’ junpaat. Xwulak chiwu naq a’aneb’ ink’a’ naxik xch’ooleb’ chirix li neke’xb’aanu, jo’ tz’aqal aj b’atz’uneleb’, a’b’an aniheb’, jo’ ralal jun Choxahil Yuwa’b’ej aj rahonel ut jo’ aj k’amol re lix tijonelil li Dios.

Qab’ihaq li raatineb’:

• Laj Jimmer Fredette, jo’ aj tenq’anel naq yoo chixtzolbʼal xkʼeebʼal xkorbʼaat chirix, naxye: “Xintzol xkanab’ankil wib’ chiru lin nawom ut lin paab’aal chirix lix yaalalil li evangelio. A’an nab’eresin we re wank … jo’ jun aj k’amol re li tijonelil wan xk’ulub’ ut sa’ xb’een chixjunil—jo’ jun chaab’il eetalil.”

  Jalam-uuch

  Laj Jimmer Fredette jo’ aj tenq’anel

• Laj Bryce Harper, jo’ b’eelomej, naxtz’iib’a: “Xink’oxla naq rik’n naq nawb’il wu, naq b’ihomin, ut naq wan lin premio MVP, taasaho’q inch’ool. A’b’an, wan k’a’ruhaq li maak’a’ we. Jo’kan naq laa’in ... xinkawresi wib’ ut xin’ok sa’ li santil ochoch. Anajwan, wankin sa’ li b’e re sutq’iik rik’in lin Choxahil Yuwa’ rik’in jun lin junelikil junkab’al—a’an li sahil ch’oolejil q’axal nim sa’ chixjunil li ruchich’och’!”

  Jalam-uuch

  Laj Bryce Harper rochb’een li rixaqil

• Laj Daniel Sorensen, jo’ jun misioneer, naxye: “Jun chaab’il hu reheb’ li b’atz’unk a’an jun k’uub’anb’il na’leb’ li naroksi xseeb’aleb’ ut xmetz’eweb’ li junjunq komon sa’ li ch’uut. … Naq nintzol ut ninyal xb’aanunkil lix k’utum lix evangelio li Jesukristo, naru tinnaw chan ru naq tinwoksi inmetz’ew re k’anjelak sa’ li tijonelil.”

  Jalam-uuch

  Laj Daniel Sorensen jo’ misioneer

• Laj Jeremy Guthrie, jo’ awa’b’ej re mision, xwotz: “Jo’ jun aj tenq’anel re kab’laju chihab’ ... kiweek’a li Musiq’ej chixch’olob’ankil xyaalal chiwu, “Li yuʼam aʼin aʼan xqʼehil re naq teʼxkawresi ribʼ li winq chixkʼulbʼal li Dios.”² Li k’uub’anb’il na’leb’ re li b’atz’unk, a’an li paab’aal chirix li Dios li naxk’am sa’ li k’anjelak ut li jalb’a-k’a’uxlej rik’in li Kolonel. ... Li hu reheb’ li b’atz’unk natawman sa’eb’ li loq’laj hu ut rik’neb’ li yo’yookil profeet.”

  Jalam-uuch

  Laj Jeremy Guthrie jo’ awa’b’ej re mision

• Laj Jabari Parker, naq toje’ kik’ojob’aak sa’ li opiis re jun xb’eenil, naxye: “Moko ninru ta xk’oxlankil chan raj wu jo’ kristiaan wi ink’a’ raj xinsik’ ru xkub’sinkil inha’ sa’ insaajilal. … Ninb’antioxi naq wan li Dios sa’ inyu’am re inb’eresinkil rajlal kutan.”

  Jalam-uuch

  Laj Jabari Parker naq xk’ojob’aak li tijonelil

• Laj Ricardo Rojas, jo’ awa’b’ej re uq’ej, xye: “Rik’in lix tijonelil li Dios, naru tootenq’anq sa’ lix k’anjel. B’oqb’ilo “chixyalb’al qaq’e ut chi wank chi kaw qach’ool”³ sa’ xkolb’al rix li yaal.” A’in natenq’an re chi elk chi uub’ej sa’ li b’atz’unk jo’ ajwi’ sa’ xk’anjel jo’ aj k’amol re li tijonelil.

  Jalam-uuch

  Laj Ricardo Rojas jo’ awa’b’ej re uq’ej

• Laj Taysom Hill, jo’ jun misioneer, nareek’a naq lix evangelio li Jesukristo a’an chanchan jun lix hu reheb’ li b’atz’unk sa’ xyu’am. A’an xwotz, “Xpaab’ankil lix k’uub’anb’il na’leb’ li Dios ut xb’aanunkil li jo’ k’ihal naru chiwu sa’ ink’anjel sa’ li na’leb’ a’an, a’an xk’eehom we li tuqtuukilal ut li sahil ch’oolejil chi numtajenaq sa’ inyu’am, rik’in xnawb’al naq sa xch’ool li Dios rik’in lix yalb’al inq’e.”

  Jalam-uuch

  Laj Taysom Hill jo’ misioneer

• Laj William Hopoate, arin rik’in kaahib’ tasal tenamit re xjunkab’al yoo chirosob’tesinkil lix k’uula’al, naxye naq li evangelio naxtenq’a a’an “chixtz’ilb’al rix lix na’leb’ li xik’ neke’ilok re ut chixk’ulb’al li musiq’ejil wankilal re xkolb’al rix chiruheb’ li lochb’il tzimaj ut re k’anjelak chi chaab’il chiruheb’ li ras riitz’in.”

  Jalam-uuch

  Laj William Hopoate naq kirosob’tesi lix k’uula’al

Ut laa’ex? Ma nekek’e reetal b’ar nekexchal chaq li taqenaq ut sant jo’ ralal xk’ajol li Dios ut aj k’amol re lix santil tijonelil a’an? Rik’in li junelik nawom a’an sa’ eek’a’uxl, yoob’ahomaq jun eek’uub’anb’il na’leb’ ut jun li hu reheb’ li b’atz’unk re li tijonelil li taab’eresinq eere chiruheb’ li hoonal re aaleek ut ch’a’ajkilal. K’oxlahomaqeb’ k’uub’anb’il na’leb’ re nume’k chi uub’ej ut re’ xkolb’al eerib’.

Eb’ li k’uub’anb’il na’leb’ re nume’k chi uub’ej neke’xkawob’resi lix nawom qach’ool ut neke’xk’iresi li qajom re kanaak sa’ li laatz’ ut ka’ch’in ruhil b’e. Junjunq reheb’ li na’leb’ a’an li tijok rajlal, xtzolb’aleb’ li loq’laj hu, xik sa’ li iglees ut li santil ochoch, xtojb’al li lajetqil, ut xtaaqenkil li na’leb’ natawman sa’ li ch’ina hu Choq’ re Xkawilaleb’ li Saaj.

Sa’ eb’ li k’uub’anb’il na’leb’ re kolok-ib’ tento te’wanq xk’uub’ankil chi rub’elaj chan ru teenumsiheb’ li aaleek. Naq tex’aaleeq chixmuxb’al ru lee chaab’il na’leb’, teenaw chi rub’elaj k’a’ru tento teeb’aanu.

Choq’ re a’an aajelaq ru choq’ eere jun li hu reheb’ li b’atz’unk.

Ma ink’a’ nekeraj tijok hoon? A’an xhoonal roksinkil li k’uub’anb’il na’leb’ ak k’uub’anb’il ru eeb’aan.

Ma nekereek’a naq yoo chi q’unak lix nawom eech’ool? Ak wan jun eek’uub’anb’il na’leb’ choq’ re a’an. Laa’ex nekenaw k’a’ru tento teeb’aanu.

Laa’ex aj k’amol re lix santil tijonelil li Dios. Lee teneb’ankil re xchapb’al eerib’ chi kaw chiru li b’arb’ookil ch’iich’ texxk’am chi wulak jo’ li junelikil yo’lajenaq li tento texwulaq wi’.

A’an naxnaw aawu ut nakatxra. A’an texrosob’tesi ut tixb’eresi lee yokb’.

Maare teek’oxla naq moko wan ta eewankil, naq maak’a’ eechaab’ilal re wulak choq’ chaab’il aj b’atz’unel. A’b’an a’an moko yaal ta. Ma ink’a’ nekenaw naq li Dios kixye, “Li k’a’ru q’un xmetz’ew re li ruchich’och’ taachalq ut tixt’an chaq li k’a’ru nim xwankil ut kaw xmetz’ew”?⁴

Jo’kan ut, ma nekereek’a naq q’un eemetz’ew? Sahil ch’oolejil choq’ eere, wankex sa’ li ch’uut aj b’atz’unel!

Ma nekereek’a naq moko jwal aajel ta eeru? naq moko chaab’ilex ta? Naru naq laa’aqex tz’aqal li naraj li Dios re k’anjelak.

Jalam-uuch

Laj David ut laj Goliat

K’a’jo’ xchaab’ilal li eetalil naq laj David ki’ok sa’ li na’ajej re pleetik rik’in laj Goliat, jun aj pleet xiwajel. Rik’in xkanab’ankil rib’ sa’ ruq’ li Qaawa’ ut jun xk’uub’anb’il na’leb’, laj David moko ka’ajwi’ ta kixkol rib’ a’an, kixkoleb’ aj b’an wi’ rixeb’ lix teep aj pleet re Israel!⁵ Chenawaq naq li Dios taawanq eerik’in naq taakawuq eech’ool chi wank sa’ xch’och’ li Qaawa’. “Wi li Dios na’okenk chiqix, ani taaruuq taawanq sa’ xiik’ilal qik’in?”⁶

A’an naru tixteheb’ li okeb’aal ut naru tooxtenq’a chixtawb’al li metz’ew ut li seeb’al li maajun wa xqak’oxla naq wan qik’in.⁷

Ab’ihomaqeb’ li neke’kawresin eere, jo’ lee na’ eeyuwa’, li obiisp, ut eb’ laj jolominel reheb’ li Saaj Winq. Tzolomaq li hu reheb’ li b’atz’unk. Ilomaqeb’ ru li loq’laj hu. Tzolomaq li raatineb’ li profeet reheb’ li kutan a’in. Yoob’ahomaq lee hu reheb’ li b’atz’unk re chan ru teek’utb’esi naq laa’ex xtzolom li Kristo.

Chenawaq rub’elaj chan ru li b’atz’unk teeroksi re xkawob’resinkil lee musiq’ ut xq’axb’ehinkileb’ li ra’al li xik’ na’ilok.

B’aanuhomaq a’an ut li Dios texroksi sa’ lix k’anjel.

Anajwan ut, wankeb’ junjunq li neke’xnajtob’resi rib’ rik’in li evangelio ut neke’xik. Junjunqeb’ chik neke’kana chi chunchu ut neke’ril li b’atz’unk chi najt. Junjunq moko neke’raj ta ok chi b’atz’unk, us ta laj kawresinel kiraj raj xtaqlankileb’ chi b’atz’unk. Nink’e eeb’oqb’al chixkolb’aleb’, chixtenq’ankileb’, ut chixraab’aleb’ jo’ lee rech aj b’atz’unel!

Wankeb’ chik li neke’raj ok chi b’atz’unk—ut neke’xb’aanu. Li jwal aajel ru moko a’an ta chan ru lix seeb’aleb’, a’b’an li rajomeb’ chi ok sa’ li b’atz’unk. Ink’a’ neke’oyb’enin toj reetal naq patz’b’ileb’, xb’aan naq neke’xnaw ru li raqal naxye, “Wi wan eerajom chi k’anjelak chiru li Dios, b’oqb’ilex sa’ li k’anjel.”⁸

Laa’ex naru nekex’ok jo’ komon sa’ li ch’uut aj b’atz’unel.

Nekeb’aanu a’in naq neketzol ut nekeroksiheb’ li na’leb’ wankeb’ sa’ lee hu reheb’ li b’atz’unk re li tijonelil.

Chiru li b’e, teetich lee roq ut texsachq—ut maare naab’al sut. Moko tz’aqal ta eere eeru; li sachk a’an xkomon li b’e re xchaab’ilob’resinkil lee k’a’uxl ut k’anjelak chi us, rik’in jun chaab’il eek’ahom. Ut li Kolonel ut lix tojb’al rix li maak li kixb’aanu neke’xkawresi chan ru xq’axb’aleb’ ru li qasachik rik’in li jalb’a-k’a’uxlej maak’a’ xb’alaq’.

Eb’ laj ninqi b’atz’unel neke’roksi k’iila cient hoor re xchaab’ilob’resinkil b’ayaq li neke’xnaw. Jo’ aj k’amol re li tijonelil, aajel ru ajwi’ li k’a’uxleb’aal a’an choq’ eere. Wi nekexsach, jalomaq eek’a’uxl,ut tzolonqex chirix a’an. Yalomaq xb’aanunkil chi us re naq sa’ li jun sut chik, chaab’ilaqex chik. A’ yaal eere laa’ex. Ma teetzol li hu reheb’ li b’atz’unk?

Nin’elajnk eere: Kanab’omaq eerib’ sa’ ruq’ li Qaawa’. Oksihomaq chixjunil lix kolb’a-ix t’ikr li Dios,⁹ ut okanqex chi b’atz’unk.

Maare maak’a’eb’ mas li neke’b’atz’un tz’aqal sa’ li ninqi kawil b’atz’unk, a’b’an wi noko’aatinak chirix li tzolomil, wankeb’ naab’aleb’ li neke’xsik’ ru xtaaqenkil li Kristo.

Relik chi yaal, a’an lee k’anjel sa’ li yu’am a’in—xtzolb’al lix b’e li Qaawa’, ok sa’ li b’e re tzolomil, ut xyalb’al eeq’e chi wank jo’ chanru lix k’uub’anb’il na’leb’ li Dios. Li Dios taachapoq eere ut texrosob’tesi naq teesik’ a’an. Naru teeb’aanu a’in xb’aan naq chaab’ilex aj b’atz’unel sa’ rilob’aal a’an.

Nintz’aama naq chek’ulub’a lee teneb’ankil re wank chi k’ulub’ej choq’ re li santil tijonelil wan eerik’in ut naq teeyal eeq’e chixb’aanunkil lee santil k’anjel rajlal kutan. Nekexwosob’tesi rik’in li seeb’al ut li ajom re xb’aanunkil. Ninwotz lix nawom inch’ool chirix lix wankil li tijonelil li wan eerik’in, chirixeb’ li yo’yookil profeet, ut chirix li Jesukristo ut lix k’anjel jo’ qaKolonel ut aj Tojol qix. Sa’ xk’ab’a’ li Jesukristo, amen.