Lix chaab’ilal li Dios nachal sa’ junpaat

Naab’al chihab’ chaq anajwan, li qaka’ch’in aj oob’ chihab’ kichal wik’in ut kixye we, “At yuwa’, wan xintaw chaq ru. Xink’e reetal naq chi seeb’ choq’ aawe jwal naab’al hoonal choq’ we.”

Naq li Qaawa’ malaj lix mooseb’ neke’xye k’a’aq re ru jo’ “moko k’iila kutan ta chik malaj “moko najt ta chik li kutan,” naru naraj naxye naq chixjunil li yu’amej malaj wan chik xkomon.¹ Kok’ aj sa’ jalan lix hoonal rik’in li qe laa’o. Li kuyuk a’an li aajel ru. Wi maak’a’ a’an, moko tooruuq ta chi chaab’ilo’k ut chixk’ut’b’al qapaab’aal chiru li Dios re yu’am ut kolb’a-ib’. A’b’anan li waatin anajwan a’an naq us ta naq wan qakuyum chiroyb’eninkil li Qaawa’, wankeb’ osob’tesink li neke’chal chaq sa’ junpaat.

Naq laj Alma ut lix tenamit ke’chape’ xb’aaneb’ laj Lamainta, ke’tijok re te’ach’ab’aaq. Ink’a’ ke’ach’ab’aak sa’ junpaat, a’b’anan naq kiwan xkuyumeb’ rik’in li ach’ab’aak, li Qaawa’ kixk’ut lix chaab’ilal rik’ineb’ li osob’tesink li ke’chal sa’ junpaat. A’an kixq’unob’resi xch’ooleb’ laj Lamanita sa’ junpaat re naq ink’a’ te’xkamsiheb’. Kixkawob’resi ajwi’ lix tenamit laj Alma ut kixseeb’ob’resi li riiqeb’.² Naq ke’kole’ rix, xkoheb’ aran Tzarahemla, b’ar wi’ ke’xseraq’i li ke’xk’ul chaq re jun ch’uut chi komon li ke’sach xch’ool chirab’inkil. Ke’sach xch’ool li tenamit aj Tzarahemla, ut “naq keʼxkʼoxla lix chaab’ilal li Dios nachal sa’ junpaatut lix wankil re x’ach’ab’ankil laj Alma ut ebʼ li riitzʼin ... chiru chaq li moosil, keʼxtaqsi lix yaabʼebʼ xkux ut keʼbʼantioxin chiru li Dios.”³

Lix chaab’ilal li Dios nachal sa’ junpaat choq’ re chixjunileb’ li neke’xtz’aaman re chi anchal xch’ooleb’ ut chi tiik rajomeb’ xch’ool. Nachal ajwi’ choq’ reheb’ li ani neke’patz’ok chi kaw, naq li ach’ab’aak chanchan naq jwal najt wan chaq ut li rahilal nanimam roq ut nakawu ajwi’.

Jo’kan kik’ulman chaq rik’in jun saajil profeet li kirahob’tesiik toj reetal naq kikam raj chaq sa’ jun q’ojyin ru ut kehil tz’alam, kixtz’aama sa’ xraqik: “At Dios, b’ar wankat laa’at? … Jo’ najtil chik taawanq chi ramb’il laa wuq’ … ? Relik chi yaal, at Qaawa’, jo najtil chik … ?”⁴ Re xsumenkil, li Qaawa’ ink’a’ kirach’ab’ laj Jose sa’ junpaat, a’b’an sa’ junpaat kixye tuqtuukilal re.⁵

Li Dios naxk’e ajwi’ li yo’onihom sa’ junpaat re ach’ab’aak.⁶ Maak’a’ naxye k’a’ru, maak’a’ naxye b’ar, rik’in li Kristo ut sa’ xk’ab’a’ li Kristo junelik wan li sahil yo’onink chiqu.⁷ Tz’aqal chiqu.

Jo’kan ajwi’, a’an xyeechi’i, “Lin rahom ink’a’ taanajto’q aawik’in.”⁸

Sa’ xb’een chixjunil, lix rahom li Dios sa’ junpaat nachal. Jo’ laj Pablo, ninye xnawom inch’ool chirix naq maak’a’ “naru taajacho’q qe rik’in li xrahom li Dios li wan rik’in li Kristo Jesus.”⁹ Us ta eb’ li qamaak naru neke’xke’ qayanq rik’in lix Musiq’ chiru b’ayaq hoonal, moko naru ta te’xk’e qayanq rik’in lix junelikil rahom re jun yuwa’b’ej li junpaat nachal.

A’an a’in junjunq chan ru “nokorosob’tesi wi’ a’an sa’ junpaat.”¹⁰ Anajwan re naq li na’leb’ a’in nach’ te’wanq, tinwotz eerik’in li ke’xk’ul wiib’ li komon b’ar wi’ lix yu’ameb’ neke’wan jo’ reetalil lix rahom li Dios nachal sa’ junpaat.

Chalen chaq sa’ xsaajilal, li xEmilie kixyal xq’e rik’in li ketok b’an chi moko b’isb’il ta. Lix yalb’al b’ayaq kixb’aanu naq kik’ame’ chixb’aanunkil a’an rajlal toj reetal naq kinumta chixb’aanunkil junelik chiru naab’al chihab’, us ta kiwan junjunq sut naq ki’usa b’ayaq. Li xEmilie kixmuq chi chaab’il lix ch’a’ajkilal, jwal wi’chik naq kik’ame’ ut kiwulak choq’ na’b’ej.

Lix tikib’ankil lix ach’ab’ankil moko kireek’a ta jo’ jun ach’ab’aak. Sa’ jun k’asal, li xEmilie yoo chixb’aanunkil jun x’exam re rilb’al ma ink’a’ wan junaq xyajel, sa’ jun k’asal chik ak yoo chi k’ame’k sa’ jun b’eleb’aal ch’iich’ sa’ jun b’anleb’aal. Kichal xxiw naq ki’ok chixk’oxlankil naq taajache’q xyanq rik’ineb’ lix kok’al, ut lix b’eelom, ut li rochoch.

Sa’ li q’ojyin a’an, xjunes sa’ jun kehil ut q’ojyin ru warib’aal, li xEmilie kixmutz rib’ sa’ xch’aat ut kiyaab’ak. Kilaj lix wankilal chi k’oxlak chi us toj reetal naq, chi chapb’il xb’aan xk’a’uxl, li xiw, ut li q’ojyinj sa’ lix warib’aal ut sa’ li raam, li xEmilie kixk’oxla chi tz’aqal naq taakamq sa’ li q’ojyin a’an. Xjunes.

Sa’ li nimla ch’a’ajkilal a’an, ink’a’ nanawman chan ru naq li xEmilie kixch’utub’ xmetz’ew re xsurisinkil rib’ chirix lix ch’aat re taawiq’laaq. Chi maak’a’ xb’alaq’ li xwan junxil sa’eb’ lix tij, li xEmilie kixkanab’ rib’ chi tz’aqal chiru li Qaawa’ naq kitz’aaman chi ajb’il ru, “At in Raarokil Dios, nawaj aawu. Tenq’ahin, b’aanu usilal. Ink’a’ nawaj kanaak injunes. B’aanu usilal, tenq’ahin chixnumsinkil li q’ojyin a’in.”

Ut sa’ junpaat, jo’ kixb’aanu chaq rik’in laj Pedro re najter kutan, li Jesus kixye’ li ruq’ ut kixchap li raam, li yoo chi sub’e’k.¹¹ Kiwulak rik’in xEmilie jun xchaq’al ru tuqtuukilal, jun xkawilal xch’ool, xmetz’ew, ut xrahom. Ki’el li ke sa’ lix warib’aal, kixnaw naq moko xjunes ta wan, ut xb’een sut chalen chaq naq kaalaju chihab’ wan re, kixnaw li xEmilie naq chaab’il taawanq chixjunil. Naq “kirajsi rib’ rik’in li Dios,”¹² kiwar li xEmilie sa’ tuqtuukilal. Ut chi joʼkan, “wi teejal eekʼaʼuxl ut inkʼaʼ teekawobʼresi lee raam, saʼ junpaat taaʼuxmanq choqʼ eere li nimla kʼuubʼanbʼil naʼlebʼ re lix tojbʼal-ix.”¹³

Jalam-uuch

Jun junkab’al chirix li santil ochoch

Lix k’irtesinkil ut lix ach’ab’ankil xEmilie ke’xk’am naab’al li hoonal; naab’al po re b’ane’k, kawresink-ib’, ut xtenq’ankil, chiru li hoonal a’an kichape’ ut wan naq kik’ame’ sa’ lix chaab’ilal li Dios li junpaat nachal. Ut lix chaab’ilal a’an kikana rik’in naq a’an ki’ok sa’ li santil ochoch rochb’een lix b’eelom ut lix kok’al re tz’ape’k sa’ junajil. Jo’eb’ li wankeb’ aran Tzarahemla, li xEmilie anajwan nasach xch’ool naq naxk’oxla lix chaab’ilal li Dios nachal sa’ junpaat ut lix wankilal re ach’ab’ank chiru li moosil.

Anajwan, tinye resil lix yu’am jun chik li chaab’il aj paab’anel. Sa’ li 27 xb’e li po diciembre re 2013, li xAlicia Schroeder kixk’uleb’ chi sa sa’ xch’ool li ramiiweb’, a’an laj Sean ut xSharla Chilcote, li ink’a’ naxyo’oniheb’ naq xe’wulak chire li rokeb’aal rochoch. Laj Sean, wan chaq ajwi’ choq’ x’obiisp li xAlicia, kixq’axtesi lix celular re ut kixye re chi q’un xkux: “Alicia, nakatqara. Tento taasume li b’oqok a’in.”

Lix b’eelom xAlicia, aj Mario, a’an li yoo chaq chi b’oqok. Wan chaq sa’ jun najtil na’ajej rochb’eeneb’ lix kok’al, sa’ jun li b’eek najt ke’xyo’oni chaq sa’ jun b’eleb’aal ch’iich’ ak re saqb’ach. Kiwan chaq jun nimla toch’e’k. Laj Mario jwal nim chaq xtoch’olal ut laj Kaleb, lix yum aj lajeeb’ chihab’, kamenaq. Naq laj Mario kixseraq’i re li xAlicia chirix lix kamik laj Kaleb, kichape’ xb’aan jun nimla rahil ch’oolejil ut jun rahilal li naab’al qe laa’o maajo’q’e taqanaw ru. Ut kit’ane’ xb’aan a’an. Chi chapb’il xb’aan jun nimla rahil ch’oolej, li xAlicia ink’a’ kiru chireek’asinkil rib’ chi moko chi aatinak.

Li Obiisp Chilcote ut li rixaqil ke’xxwaklesi ut ke’xq’alu. Ke’yab’aak ut ke’raho xch’ool sa’ komonil chiru jun hoonal. Chirix a’an, li Obiisp Chilcote kixyeechi’i jun rosob’tesinkil li xAlicia.

Li kik’ulman chirix a’an maak’a’ xch’olob’ankil wi ink’a’ natawman ru lix tojb’al rix li maak xb’aan li Jesukristo ut li xchaab’ilal li Dios nachal sa’ junpaat. Li Obiisp Chilcote kixk’e li ruq’ sa’ q’unil sa’ xb’een lix jolom xAlicia, ut rik’in xyaab’ xkux nasiksot, ki’ok chi aatinak. Li xAlicia kirab’i wiib’ li na’leb’ chanchan naq tz’aqal li Dios yoo chaq chi yehok re. Xb’een wa kirab’i lix k’ab’a’, xAlicia Susan Schroeder. Chirix a’an, kirab’i li obiisp chixtz’aamankil lix wankilal li Nimajwal Dios. Tz’aqal sa’ li hoonal a’an—naq kiyaab’asiik lix k’ab’a’ ut lix wankilal li Dios, xAlicia kinujak rik’in jun tuqtuukilal maak’a’ xch’olob’ankil, re rahok, re k’ojob’ank ch’oolej ut sahilal. Ut maajun wa neke’xkanab’.

Anajwan ut, li xAlicia, laj Mario ut lix junkab’al toj neke’yaab’ak chirix lix sachik laj Kaleb. Jwal ch’a’aj! Naq nin’aatinak rik’in, lix sa’ ru xAlicia neke’nujak chi yaab’ naq naxseraq’i we naq jwal naxra ut naraho’ xch’ool chirix li ralal. Toj nujenaqeb’ xsa’eb’ li ru naq naxye we chan ru naq li Nimla aj Ach’ab’anel naxk’e xkawil xch’ool chiru li junjunq chi rahilal kixk’ul, kixtikib’ rik’in xchaab’ilal li kichal sa’ junpaat chiru lix chamal xrahilal, ut toj wan a’an anajwan rik’in li yo’onihom naq te’ril rib’ wi’chik “sa’ jun kutan chalel.”

Ninnaw naq li k’a’ru naqak’ul chiru Ii qayu’am wan naq naxk’am chaq xsachik li ch’oolej ut li ch’a’ajkilal li naru naxch’a’ajkin xk’ulb’al malaj xk’eeb’al reetal li tenq’ li ke’xk’ul xEmilie ut xAlicia. Laa’in ajwi’ ink’ulum a’an sa’ inyu’am. Ninch’olob’ xyaalal naq sa’eb’ li hoonal a’an, ka’ajwi’ xk’eeb’al reetal naq xaqxooko a’an jun xq’unil ut xkawil reetalil li xchaab’ilal li Dios nachal sa’ junpaat. Jultikaq eere, li najter Israel ki’ach’ab’aak “xb’aan li Dios li kik’uulank reheb’ ”¹⁴ rajlal kutan.

Ninch’olob’ xyaalal naq li Jesukristo a’an Xnimal aj Ach’ab’anel, ut sa’ xk’ab’a’ a’an, ninyeechi’i eere naq, wi teesutq’isi eerib’ rik’in a’an chi anchal eech’ool ut rik’in tz’aqal ratawom eech’ool, a’an texrach’ab’ chiru chixjunil li taa’ajoq xk’osb’al malaj xjuk’b’al lee yu’am ut lee sahilal. Li ach’ab’aak a’an maare mas taab’ayq chiru li neke’raj raj laa’ex—maare chixjunil lee yu’am malaj wan ut chik xkomon. Jo’kan b’i’, re xk’ojob’ankil eech’ool, xkolb’al eerix, ut yo’onink, re eechapb’al ut xk’eeb’al xkawil eech’ool toj reetal naq taawulaq lix kutankil li ach’ab’aak, nekexinkanab’ sa’ ruq’ ut ninch’olob’ xyaalal li xchaab’ilal li Dios li nachal sa’ junpaat sa’ xk’ab’a’ li Jesukristo, amen.