Aatin re xraqb’al li jolomil ch’utub’aj-ib’

Ex raarookil was wiitz’in, naq nokowulak sa’ xraqik li nimla jolomil ch’utub’aj-ib’ a’in, ninb’antioxi re li Qaawa’ xb’aan lix musiq’ahom ut lix kolb’al qix. Li aatin xe’qab’i xoohe’xtzol ut xe’xwaklesi qach’ool.

Moko yeeb’ileb’ ta re li xe’aatinak k’a’ru te’aatinaq wi’. Sa’ junjunqal b’an xe’tijok re xk’ulb’al li k’utb’esinb’il na’leb’ sa’ xkawresinkil li raatineb’. Choq’ we, nink’oxla naq k’a’jo’ xchaq’al ru naq li xe’yeeman chanchan ta wi’ naq tz’aqal neke’xk’uli rib’. Naq teetzoleb’, yalomaq eeq’e chixtzolb’al li k’a’ru naraj xk’utb’al li Qaawa’ cheru rik’ineb’ lix moos.

K’a’jo’ xloq’al ru li b’ich xqab’i. Nim li qab’antioxihom choq’ reheb’ laj wajb’ li xe’xjunaji lix seeb’al re xb’oqb’al lix Musiq’ li Qaawa’ sa’ li junjunq chi ch’utam. Ut a’an xrosob’tesiheb’ li tij ut eb’ li xe’wan sa’ li junjunq chi ch’utam. Relik chi yaal, li jolomil ch’utub’aj-ib’ xwan wi’chik jo’ jun musiq’ejil tzakemq choq’ qe chiqajunilo laa’o.

Naqoyb’eni ut naqatz’aama naq li rochoch li junjunq chi komon taajalmanq sa’ jun tz’aqal santil na’ajej re paab’aal, b’ar wi’ taaruuq chi wank lix Musiq’ li Qaawa’. Us ta li wech’ok-ib’ nokoxsuti chiqajunilo, li rochoch jun komon naru chi wulak jo’ jun choxahil na’ajej, b’ar wi’ li tzolok, li tijok, ut li paab’aal neke’ru chixjunajinkil rib’ rik’in rahok. Nokoru chi wulak chi wank jo’ xtzolom li Qaawa’ naq naqakol rix ut noko’aatinak sa’ xk’ab’a’ b’ar wi’ wanqo.

Li rajom li Dios a’anaq raj li qajom ajwi’ laa’o. A’an naraj naq eb’ li ralal xk’ajol te’xsik’ ru sutq’iik rik’in a’an, chi kawresinb’ileb’, chi k’ulub’ejeb’, chi tiqib’anb’ileb’, chi tz’apb’ileb’ sa’ junajil, ut chi tiikeb’ chiruheb’ li sumwank b’aanunb’il sa’eb’ li santil ochoch.

Anajwan wankeb’ 162 santil ochoch osob’tesinb’ileb’. Eb’ li jwal najter kab’lankileb’ a’aneb’ eetalil re li paab’aal ut li k’utb’esinb’il matk’ reheb’ li qaraarookil xb’eenil aj paab’anel. Li junjunq chi santil ochoch kab’lanb’il xb’aaneb’ kiruhan xb’aan lix nimal ru xmayejeb’ ut xyalb’aleb’ xq’e. Li junjunq a’an waklesinb’il jo’ jun q’ol nim xtz’aq sa’ lix koroonil li ke’ru chixb’aanunkil li xb’eenil aj paab’anel.

Wan li qaloq’laj teneb’ankil chirilb’aleb’. Jo’kan naq eb’ li santil ochoch reheb’ lix b’eenil aj paab’anel, te’xtikib’ moqon x’ak’obresinkil ut xchab’ilob’resinkil ut, wan chik naq maare te’uxmanq xjalb’al chi nim. Jo’ chanru naru, taayalmanq xkanab’ankil jo’ chanru ak wan chaq li junjunq chi santil ochoch, re naq ink’a’ taasachq lix ch’ina-usal ut lix seeb’aleb’ li kristiaan ke’wan chaq junxil.

Ak xpuk’tesiman li esil chirix li Santil Ochoch re Saint George, Utah. Sa’ li viernes 19 abril re 2019 taayeemanq resil li ak’ob’resink taab’aanumanq sa’ li Santil Ochoch re Lago Salado, sa’ lix sutam ut li na’ajej li wan chixk’atq nimla kab’l oficina re li Iglees.

Chiruheb’ li chihab’ chalel te’ak’ob’resiiq ajwi’ li Santil Ochoch re Manti ut Logan, Utah. Taayeemanq resil li k’uub’anb’il na’leb’ a’in naq ak kawresinb’ilaqeb’.

Li k’anjel a’in naraj xyeeb’al naq te’tz’apmanq li junjunq chi santil ochoch chiruheb’ li kutan tixk’am li k’anjel a’in. Eb’ li komon sa’ li Iglees te’ruuq chi wulak chi loq’onink ut chi k’anjelak sa’eb’ li santil ochoch li wankeb’ nach’ chiruheb’. Naq te’raqe’q li junjunq chi k’anjel, taa’osob’tesimanq wi’ichik li junjunq chi santil ochoch yiib’anb’il najter.

Ex was wiitz’in, naqak’oxla naq jun li santil ochoch a’an li kab’l jwal loq’ re li Iglees. Naq naqaye resil xkab’lankil junaq chik ak’ santil ochoch, li kab’l a’an na’ok jo’ xkomon lix santil esilal li qa’Iglees. Anajwan, ab’ihomaq chi ch’anch’o ut rik’in oxloq’. Wi ninye resil junaq santil ochoch sa’ junaq na’ajej nekera laa’ex, nintz’aama eere naq, ka’ajwi’, teekub’si lee jolom re xyeechi’inkil jun li tij re b’antioxink sa’ hasb’ ut sa’ lee raam. Ink’a’ naqaj naq teejap eere re naq ink’a’ taqisi xloq’alil li na’uxman arin sa’ li jolomil ch’utub’aj-ib’ a’in ut xloq’alileb’ lix santil ochoch li Qaawa’.

Anajwan nasaho’ qach’ool chixyeeb’al eere li k’a’ru yooko chaq chixk’uub’ankil chirix xkab’lankileb’ jun siir chik li santil ochoch sa’eb’ li n’a’ajej a’in:

Pago Pago, Samoa Americana; Ciudad de Okinawa, Okinawa; Neiafu, Tonga; Valle de Tooele, Utah; Moses Lake, Washington; San Pedro Sula, Honduras; Antofagasta, Chile; Budapest, Hungría.

B’antiox eere ex raarookil was wiitz’in.

Naq noko’aatinak chirixeb’ li santil ochoch, eb’ li najter jo’ eb’ li ak’, chiqak’utaq chiqajunilo, rik’in li qab’aanuhom, naq laa’o tz’aqal xtzolom li Qaawa’ Jesukristo. Chiqa’ak’ob’resi li qayu’am rik’in li qapaab’aal ut xkanab’ankil qib’ chiru a’an. Chiqataw li wankilal re lix tojb’al rix li maak rik’in xjalb’al qak’a’uxl rajlal kutan. Ut chiqaq’axtesi li qayu’am choq’ re k’anjelak chiru li Dios ut chiruheb’ li ralal xk’ajol, sa’ xka’pak’alil li tz’apleb’ t’ikr.

Ninkanab’ lin rahom ut li wosob’tesihom, ut ninye eere naq li k’utb’esinb’il na’leb’ toj wan arin, sa’ lix Iglees li Qaawa’. Ut naq toj taawanq roj reetal “li rajom li Dios taatz’aqob’resiiq ru, ut li Nimla Jehova tixye naq choyb’il li k’anjel.”¹

Chi jo’kan nekexwosob’tesi ut ninch’olob’ xyaalal naq yo’yo li Dios! Li Jesus a’an li Kristo! A’an a’in lix Iglees. Laa’o lix tenamit. Sa’ lix loq’laj k’ab’a’ li Jesukristo, amen.