Aatin saʼ xtiklajik

Ex was wiitz’in, naq nekexqak’ul sa’ li jolomil ch’utub’aj-ib’ re abril 2020 re Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, jo’ ak nekenaw, xaqxookin cheru sa’ jun li sala yamyo!

Sa’ li jolomil ch’utub’aj-ib’ xnume’, naq xinye naq “chaab’ilaq” ut “maajo’q’e raj taasachq sa’ eech’ool” li ch’utub’aj-ib’ re li abril a’in, ink’a’ xinnaw naq ka’ajwi’ chiru lajeeb’ chi kristiaan yooqin chi aatinak, ut xb’aan a’an naq maajo’q’e taasachq sa’ inch’ool laa’in! A’b’an xnawb’al naq yookex chi tz’aqonk chi najt, jo’ ajwi’ rab’inkil lix ch’ina-usal li b’ich xe’xb’icha laj b’ichanel, “It Is Well with My Soul,” k’a’jo’ naq naxk’ojob’ li waam.

Jo’ ak nekenaw, moko naru ta naq te’xch’utub’ rib’ li komon chirilb’al li ch’utub’aj-ib’ a’in, xb’aan naq naqaj xb’aanunkil li jo’ k’ihal naru chiqu re xramb’al xjek’inkil li yajel COVID-19. K’a’jo’ xnimal lix rahob’tesihom li yajel a’in chiru chixjunil li ruchich’och’. Yoo ajwi’ chixk’eeb’al chi xaqliik li qach’utam sa’ Iglees, lix k’anjeleb’ li misioneer, ut li k’anjel sa’eb’ li santil ochoch chiru jun k’amok.

Us ta toch’b’ilo anajwan xb’aan jun li yajel, toj wankeb’ k’iila paay chi ch’a’ajkilal naru taqak’ul sa’ li qayu’am. Naru te’qak’ul li ch’a’ajkilal jo’ li rahilal, li nimla sachk, malaj xyot’ik li qaam.

Chan raj ru taqakuyeb’ li ch’a’ajkilal a’an? Li Qaawa’ naxye qe naq “wi kawresinb’ilex ink’a’ texxuwaq.”¹ Yaal naq naru taqak’uula li tzakemq, li ha’, ut li tumin. A’b’an, aajel ajwi’ ru xnujob’resinkil li qamusiq’ejil k’uuleb’aal rik’in li paab’aal, li yaal, ut li xnawom ch’oolej.

Li xnimal ru rajom li qayu’am, a’an xkawresinkil qib’ chixk’ulb’al laj Yo’ob’tesihom qe. Naqab’aanu a’in naq naqayal qaq’e rajlal kutan chi wulak jo’ chanru li qaKolonel, Jesukristo.² Ut naqab’aanu a’an naq rajlal kutan naqajal qak’a’uxl ut nokosantob’resiik, nokok’irtesiik, ut nokokawob’resiik xb’aan lix wankil li Kolonel. Chi jo’kan naq naru taqeek’a li tuqtuukilal ut sahil ch’oolejil, us ta wanko sa’ xq’ehil li ch’a’ajkilal. Xb’aan a’in naq li Qaawa’ naxtz’aama qe naq tooxaqliiq sa’eb’ li na’ajej sant ut naq “ink’a’ too’eek’asiiq.”³

Sa’ li chihab’ a’in naqanima wiib’ cient chihab’ chaq xk’utb’al rib’ li Dios Yuwa’b’ej ut li Jesukristo, lix raarookil Alal, chiru laj Jose Smith. Sa’ li k’utb’esinb’il matk’ a’an, li Dios Yuwa’b’ej kixk’ut chi ruq’ li Jesukristo ut kixye: “A’in li Walal Raaro Inb’aan. Chawab’i a’an!”⁴

Li tijom kik’eeman re laj Jose a’an qe ajwi’ laa’o. Laa’o tento taqasik’, chi anchal qametz’ew, rab’inkil li Jesukristo, li na’aatinak qik’in rik’in lix wankil ut lix k’anjel li Santil Musiq’ej.

Li rajb’al chixjunileb’ li jolomil ch’utub’aj-ib’, a’an qatenq’ankil chirab’inkil a’an. Ak xootijok, ut nakatqab’oq chi tijok, re xtz’aamankil naq lix Musiq’ li Qaawa’ taawanq qik’in sa’ naab’alil re naq naru taawab’i li aatin naraj li Kolonel naq taawab’i laa’at—li aatin li tixk’e chi tuqlaak laa waam. Li aatin li tixk’irtesi laa yot’b’il ch’ool. Li aatin li tixkutanob’resi laa k’a’uxl. Li aatin li tatxtenq’a chixnawb’al k’a’ru tento taab’aanu re xik chi uub’ej sa’eb’ li kutan re choqink ut ch’a’ajkilal.

Naqatz’aama naq li ch’utub’aj-ib’ a’in chaab’ilaq ut maajo’q’e taasachq sa’ aach’ool xb’aan li aatin taawab’i, li chaab’il esil li taak’utmanq, ut li k’anjel b’oqb’ilaqat wi’ chi tz’aqonk.

Sa’ xraqik li ch’utam re domingo eq’la, taqab’aanu jun ch’utlajik re tiik ruhil k’a’uxlej chiru chixjunil li ruchich’och’ ut tink’am eeb’e sa’ li loq’laj Japok-e re Hosanna. Naqatz’aama naq chi sa taak’ul a’in sa’ musiq’ej naq chiru chixjunil li ruchich’och’ toob’antioxinq sa’ junajil chiru li Dios Yuwa’b’ej ut lix Raarookil Alal rik’in xnimankileb’ ru chi jo’ka’in.

Choq’ re li loq’laj k’anjel a’in, naqoksi jun li saqi sut. A’b’an wi maak’a’ laa we, naru taawoksi laa wuq’. Sa’ xraqik li Japok-e re Hosanna, taqab’icha sa’ komonil li b’ich “Lix Musiq’ li Dios.”⁵

Ex was wiitz’in, ch’ina-usaq li ch’utub’aj-ib’ a’in. Chaab’ilaq li chihab’ a’in naq naqajayali qib’ rik’in li Kolonel ut lix evangelio li k’ojob’anb’il wi’chik. Li jalaak li q’axalaq nim ru sa’ li ch’utub’aj-ib’ a’in, a’an naq taajalaaq li qach’ool ut naq taqatikib’ xsik’b’al ru rab’inkil li Kolonel chiru chixjunil li qayu’am.

K’ulb’ilex sa’ li jolomil ch’utub’aj-ib’ re abril 2020! Ninnaw naq li qaChoxahil Yuwa’ ut li Jesukristo, li Ralal, junelik nokohe’xk’oxla. Wanqeb’ qik’in sa’eb’ li wiib’ kutan a’in naq yooqo chixyalb’al qaq’e chi nach’ok rik’ineb’ ut roxloq’inkileb’. Sa’ lix loq’laj k’ab’a’ li Jesukristo, amen.