Chek’oxla lix chaab’ilal ut lix nimal ru li Dios

Chiru xnumik li hoonal, ut sa’eb’ li ch’a’ajkilal, eb’ li profeet neke’xwaklesi qach’ool chixjultikankil lix nimal ru li Dios ut chixk’oxlankil li k’a’ru naxb’aanu a’an choq’ qe chiqajunjunqal, jo’ junkab’al ut jo’ kristiaan. ¹ Li na’leb’ a’in natawman sa’eb’ li loq’laj hu, a’ut k’a’jo’ wi’chik sa’ lix Hu laj Mormon. Li perel re xjolomil li aatin naxch’olob’ naq jun reheb’ li rajom lix Hu laj Mormon a’an “xk’utb’al chiru li rela’ lix junkab’al laj Israel chanru xninqal li k’a’aq re ru kixb’aanu li Qaawa’ choq’ reheb’ lix yuwa’eb’.” ² Lix Hu laj Mormon naraqe’ rik’in lix tz’aam laj Moroni: “K’ehomaq reetal, nawaj relajinkil cheru, naq jo’q’e teeril li k’a’aq re ru a’in tz’iib’anb’il … naq chijultiko’q eere chanru ruxtaanal chaq li Qaawa’ choq’ reheb’ li ralal xk’ajoleb’ li winq, … ut chetz’il rix sa’ eech’ool.” ³

K’a’jo’ xnimal xyalb’aleb’ xq’e li profeet chixtz’aamankil naq taqak’oxla lix chaab’ilal li Dios. ⁴ Li qaChoxahil Yuwa’ naraj naq taajultiko’q qe lix chaab’ilal a’an ut lix chaab’ilal li Ralal raaro xb’aan, moko re ta naq te’saho’q xch’ool a’an, re b’an naq laa’o taqeek’a li sahilal nachal xb’aan xk’oxlankil a’an. Naq naqak’oxla lix chaab’ilal, li k’a’ru naqil ut li qana’leb’ naniman. Naq naqak’oxla li ruxtaan, na’ok li tuulanil ut li tijok sa’ qaam, ut jwal kaw wi’chik nakana xjalajik li qach’ool.

Junxil, jun li yaj li xinitenq’a sa’ b’anleb’aal xk’ut chiwu chan ru naq li b’antioxink naru tixjal qana’leb’. Sa’ 1987, laj Thomas Nielson xyajer sa’ li raam, ut tento taacho’e’q re naq tixk’ul jun li ak’ aamej. 63 chihab’ wan re, ut a’an aj Logan, Utah, re li Estados Unidos. Chirix naq kiraqe’ chaq xk’anjel jo’ aj pleet sa’ li Segunda Guerra Mundial, kisumla rik’in xDonna Wilkes sa’ li Santil Ochoch re Logan, Utah. Ki’ok chi trab’ajik jo’ jun aj kab’lanel jwal chaab’il. Moqon sa’ xyu’am, jwal sa naril trab’ajik rochb’een li rimam aj Jonathan naq lix escueel wan sa’ hilaal. Jwal sa’ ke’xk’am rib’ sa’ wiib’al, xb’aan naq laj Tom naril laj Jonathan jo’ li reeqaj.

Laj Tom kititz’ chiroyb’eninkil junaq aj sihol re li ak’ aamej. A’an jun li winq moko k’i ta xkuyum. K’aynaq chixk’ulb’al li k’a’ru naraj yal rik’in xyalb’al xq’e. Naq anchal t’iljenaq lix yu’am xmaak lix yajel, wan naq laj Tom naxpatz’ we chan ru tinseeb’a chaq jun li ak’ aamej choq’ re. Yal sa’ b’atz’unk, naxye we chan raj ru tinyamtesi ru li raam junaq kristaan.

Sa’ jun kutan, xqab’i resil li k’a’ru jwal sa a’b’an jwal ra ajwi’—A’an naq ak xyama ru jun li aamej choq’ re laj Tom. Lix nimal ut lix kik’el juntaq’eet rik’in li raam laj Tom, ut laj sihonel re a’an jun li saaj, 16 chihab’ xyu’am. Li aamej, a’an li re laj Jonathan, lix raarookil rimam laj Tom. Eq’la sa’ li kutan a’an, laj Jonathan xwan sa’ jun li b’eleb’aal ch’iich’ li xtene’ xb’aan jun li tren.

Naq kiwula’ani laj Tom ut xDonna sa’ li b’anleb’aal, numtajenaq xrahileb’ xch’ool. Ch’a’aj xnawb’al k’a’ru neke’reek’a naq yookeb’ chixtz’ilb’al rix ma te’xkol xyu’am laj Tom rik’in li raam laj Jonathan. Ke’ok chixyeeb’al naq maajo’q’e te’raj roksinkil li aamej a’an, li yeechi’inb’il reheb’ xb’aan lix junkab’al laj Jonathan. A’b’an ke’xk’e ajwi’ reetal naq ak kamenaq li rulul laj Jonathan, ut moko xmaak ta lix tz’aameb’ choq’ re laj Tom. Ink’a’. Li raam laj Jonathan, a’an b’an jun li maatan choq’ re laj Tom xb’aan naq wan sa’ aajel ru. Ke’ril naq naru taayo’laaq li k’a’ru chaab’il sa’ li rahilal a’in, ut ke’xye naq te’xk’ul li aamej.

Us ki’el lix cho’b’al. Chirix a’an, kijala xyu’am laj Tom. Ink’a’ yal xb’aan xkawilal xtib’el chi moko xb’antioxihom. Kixye we naq wulaj wulaj naxk’oxla laj Jonathan, lix junkab’al, li maatan li kixk’ul, ut k’aru xchal wi’ li maatan a’an. Us ta toj wan lix se’ ut lix metz’ew li ak wan re, kiwil naq jwal tiik wi’chik lix k’a’uxl ut q’un wi’chik lix ch’ool.

B’antiox re lix cho’b’al, kixnumsi 13 chihab’ chik sa’ xyu’am chirix naq ak xkam raj. Chankeb’ lix komon naq sa’ li 13 chihab’ a’in, laj Tom kiru chixtochb’al xyu’ameb’ li ras riitz’in rik’in li rahok. Naab’aleb’ ke’usaak xb’aan xtenq’, ut neke’ril laj Tom jo’ reetalil li chaab’il kuyum.

Jo’ laj Tom, laa’o ajwi’ naqak’ul li maatan li junes naru naqak’ul rik’in li qaChoxahil Yuwa’ ut li Ralal, jo’ xtojb’al rix li maak xb’aan li mayej kixb’aanu li Jesukristo. ⁵ Ak xqak’ul qayu’am arin; taqak’ul ajwi’ sa’ li toj chal re, jo’ ajwi’ li qakolb’al chi junelik—wi ta a’an li taqaj—b’antiox re li qaChoxahil Yuwa’ ut li Jesukristo.

Naq naqak’ul qatenq’ankil xb’aaneb’ li maatan a’in, malaj ut naq yal neke’ok sa’ qak’a’uxl, taqak’e raj reetal xchaab’ilaleb’ aj k’ehol re. Naq naqak’e roxloq’inkileb’, ink’a’ junes b’antioxink yooko. Yooko aj b’an wi’ chi jalaak sa’ qaam.

K’a’jo’ naq kijale’ xch’ool laj Alma, alalb’ej. Naq laj Alma “yoo chi xik yalaq b’ar sa’ xpo’jik xch’ool rik’in li Dios,” ⁶ kixk’utb’esi rib’ jun li anjel chiru. “Rik’in xyaab’ li kaaq,” ⁷ li anjel kixq’us laj Alma xb’aan naq naxrahob’tesi li Iglees ut “xmaq’b’aleb’ xch’ool li tenamit.” ⁸ Li anjel kixye ajwi’: “Ayu, ut chijultiko’q aawe lix preexileb’ laa yuwa’ …; ut chijultiko’q aawe chanru xnimal ru li k’a’aq re ru kixb’aanu [li Dios] choq’ reheb’.” ⁹ Sa’ xyanq chixjunil li kiru raj chixyeeb’al, a’an a’in li kixye li anjel.

Laj Alma kixjal xk’a’uxl ut kijultiko’ re. Moqon, kixwotz lix q’usum li anjel rik’in laj Heleman, li ralal. Laj Alma kixye, “Nawaj raj naq taabʼaanu joʼ xinbʼaanu laaʼin, ut taajultikoʼq aawe xpreexilebʼ li qayuwaʼ; xbʼaan naq ebʼ aʼan keʼwan chi moosil, ut maajun kiru chi kolok rehebʼ, kaʼajwiʼ lix Dios laj Abraham, … laj Isaak, ut … laj Jakob, ut aʼan kixkolebʼ chi yaal saʼ xchʼaʼajkilalebʼ.” ¹⁰ Kixye ajwi’, “Laa’in ninkanab’ wib’ chiru.” ¹¹ Laj Alma kixtaw ru naq wi najultiko’ qe li qach’ab’ankil chiru li preexil, ut li qatenq’ankil sa’ “li jar paay chi yalok-ix ut chi rahilal naqanumsi,” naru too’ok chixnawb’al ru li Dios ut naq yaal li naxyeechi’i qe. ¹²

Moko k’iheb’ ta li te’k’uluq re li jalok ch’oolej tz’aqal jo’ chanru kixk’ul laj Alma, a’b’an toj naru naq nimaq li qajaljik laa’o. Li Kolonel kixye junxil:

“Tink’e eere jun ak’ ch’oolej ut ak’ musiq’ej; twisi eerik’in li xkawil eejolom … , ut tink’e eere jun q’unil ch‘oolej.

“Tink’e lin musiq’ eere. …

“… Laa’exaq lin tenamit ut laa’inaq lee Dios.” ¹³

Li Kolonel waklijenaq chi yo’yo kixye reheb’ laj Nefita chan ru taatiklaaq li jalaak. A’an kixye resil jun na’leb’ aajel ru sa’ lix k’uub’anb’il na’leb’ li qaChoxahil Yuwa’ naq kixye:

“Ut lin Yuwa’ kinixtaqla chaq re tintaqsiiq chiru li krus; ut chirix naq kintaqsiik chiru li krus, re tinjilosiheb’ chaq chixjunil li winq wik’in. …

“Ut choq’ re li ajom a’in kintaqsiik; jo’kan ut, jo’ chanru lix wankilal li Yuwa’b’ej, tinjilosiheb’ chaq chixjunil li winq wik’in.” ¹⁴

K’a’ru na’ajman re toojilosiiq rik’in li Kolonel? K’oxlahomaq lix k’eeb’al rib’ li Jesukristo rub’el rajom lix Yuwa’, lix q’axb’al ru li kamk, lix k’ulb’al laa maak ut laa majelal sa’ xb’een, lix k’ulb’al xwankilal li Yuwa’b’ej re xb’aanunkil laa wuuchil, ut laa kolb’al xb’aan. ¹⁵ Ma ink’a’ ta b’i’ tz’aqaleb’ chixjunil li k’a’aq re ru a’in re aajilosinkil rik’in a’an? Tz’aqaleb’ choq’ we. Li Jesukristo “xaqxo chi teeto lix tel, ut naraj ut naroyb’eni qak’irtesinkil, xkuyb’al qamaak, qach’ajb’ilob’resinkil, xk’eeb’al qakawilal, xsaqob’resinkil qu, ut qasantob’resinkil.” ¹⁶

Li yaalil na’leb’ a’in te’xk’e raj qe jun li ak’ aamej, ut toohe’xtenq’a raj chixsik’b’al ru li qaChoxahil Yuwa’ ut li Jesukristo. A’b’an us ta ak’ li aamej, toj naru ajwi’ chi elk “rik’in li Dios raab’il qab’aan.” ¹⁷ Re xramb’al ru li b’e a’an, tento taqak’oxla wulaj wulaj li maatan ak xqak’ul, ut k’a’ru xchal wi’. Li rey aj Benjamin kixye: “Nawaj raj naq chijultiko’q eere, ut junelik chikanaaq sa’ eech’ool, lix nimal ru li Dios … ut lix chaab’ilal a’an ut xnajtil li royb’enihom choq’ eere laa’ex.” ¹⁸ Wi naqabʼaanu chi joʼkan, naru taqakʼulebʼ li choxahil osobʼtesink aʼan.

Xk’oxlankil lix chaab’ilal ut li ruxtaan li Dios naxtenq’a li qaseeb’al sa’ musiq’ej. Aran ut, li qaseeb’al sa’ musiq’ej nokoxtenq’a chixnawb’al li yaal chirix chixjunil li k’a’aq re ru. ¹⁹ Naru ajwi’ taqanaw naq yaal lix Hu laj Mormon; naq li Jesus, a’an li Kristo, laj Kolol qe ut laj Tojol qix; ut naq lix evangelio ak xk’ojob’aak wi’chik sa’ qakutankil anajwan. ²⁰

Naq naqak’oxla lix nimal ru li qaChoxahil Yuwa’ ut li Jesukristo, ut li k’a’ru xb’aanuhomeb’ choq’ qe, moko taqakanab’ ta xraab’aleb’, jo’ naq laj Tom moko kixkanab’ ta xraab’al li raam laj Jonathan. Chi sa xch’ool ut rik’in oxloq’, laj Tom kixk’oxla wulaj wulaj li rahilal kinajtob’resin roq lix yu’am. Us ta jwal sa li qach’ool xb’aan li kolb’a-ib’, tento taqak’e reetal naq kitojman chaq lix tz’aq chi jwal ra. ²¹ Naru li oxloq’ink rochb’een li saho’k wi naqak’e reetal li qasachb’al chi maak’a’ li Jesukristo, jo’ ajwi’ li maatan naqak’ul naq wan li Kristo qik’in. ²² Chi yaal, li oxloq’ink a’in tooxk’e chi saho’k rik’in li “junelik yu’am sa’ li ruchich’och’ a’in,” toj reetal naq taqak’ul “li junelik yu’am, a’ li loq’alil ajwi’ li ink’a’ nakam” sa’ li ruchich’och’ chalel. ²³

Naq naqak’oxla lix chaab’ilal li qaChoxahil Yuwa’ ut li Jesukristo, k’ojk’o nakana qach’ool chirixeb’. Najala li k’a’ru naqatz’aama, xb’aan naq ak naqanaw naq laa’o li ralal xk’ajol li Dios. Ink’a’ naqaj xjalb’al rajom li Dios. Naqaj b’an li rajom a’an, ut xk’ulb’al li ak naraj xk’eeb’al qe, wi ta yal taqatz’aama. ²⁴ Naqaj xtuulanil ut xsaqal ru li qach’ool, ut xkawilal qapaab’aal, jo’ chanru li Kristo. ²⁵ Aran, qak’ulub’aq xkomon chik li qosob’tesinkil.

Wi naqak’e reetal naq chixjunil li k’a’ru us nachal rik’in li Kristo, taqawotz li qapaab’al rik’ineb’ li qas qiitz’in chi jwal us wi’chik. ²⁶ Taawanq xkawilal qach’ool chixk’ulb’al li k’a’ru anchal ink’a’ naru xkuyb’al. ²⁷ Chi jwal kaw wi’chik taqapaab’ li qasumwank rik’in li Kolonel. ²⁸ Toonujob’resiiq rik’in xrahom li Dios, taqaj xtenq’ankil yalaq ani, xk’iresinkileb’ li kok’al sa’ rahok ut tiikilal, xk’ulb’al rajlal li risinkil li qamaak, ut saho’k sa’ qach’ool junelik. ²⁹ A’an a’in li nachal xb’aan xk’oxlankil lix chaab’ilal ut li ruxtaan li Dios.

Jo’kan naq li Kolonel kixye: “Ut maak’a’ li rahob’tesinb’il wi’ li Dios xb’aan li winq, malaj maa’ani aj-ik’in lochlo lix josq’il, ka’ajwi’ b’an rik’ineb’ li ani ink’a’ neke’ril li ruq’ a’an sa’ chixjunil li k’a’aq re ru.” ³⁰ Ink’a’ nink’oxla naq li Dios najosq’o’ wi naqasach a’an sa’ qach’ool. Nink’oxla b’an naq naraho’ xch’ool chi us. Naxnaw naq ak xqaram qib’ chixk’oxlankil a’an ut chi nach’ok rik’in. Ut aran ak xqaram ajwi’ ru a’an chi nach’ok qik’in ut chiqosob’tesinkil. ³¹

Nekexinb’oq chixk’oxlankil wulaj wulaj li xnimal ru li qaChoxahil Yuwa’ ut li Jesukristo, ut li k’a’ru xb’aanuhomeb’ choq’ eere. Chib’ak’e’q laa ch’ool rik’ineb’ a’an xb’aan xk’oxlankil xchaab’ilaleb’. ³² K’oxla li ruxtaan, ut tixk’e laa seeb’al sa’ musiq’ej, ut tatk’iiq jo’ chanchan li Kristo. Xk’oxlankil li rustaan, texxtenq’a “chi paab’ank toj sa’ roso’jik” toj reetal naq “texk’ule’q chaq sa’ choxa” re naq “chi jo’kan texruuq chi wank rik’in li Dios sa’ sahil ch’oolejil li maajo’q’e na’oso’.” ³³

Naq yoo chi aatinak chirix li Ralal Raaro Xb’aan, li qaChoxahil Yuwa’ kixye, “Chawab’i a’an!” ³⁴ Naq laa’at nakawab’i a’an, k’e reetal, rik’in li oxloq’ink rochb’een li saho’k, naq li Kolonel sa naril xk’ojob’ankil chi ak’il li k’a’ru ink’a’ naru taak’ojob’ wi’chik laa’at, xk’irtesinkil li k’a’ru ink’a’ naru taak’irtesi, xtuqub’ankil li k’a’ru tz’aqal po’ol, ³⁵ xq’ajkamunkil li ani majewanb’il, ³⁶ ut xyiib’ankil chi junajwa li aamej rahob’tesinb’il. ³⁷

Sa’ xk’oxlankileb’ li maatan naxk’e li qaChoxahil Yuwa’ ut li Jesukristo, laa’in xin’ok chixnawb’al naq q’axal nim lix rahom ut li ruxtaan choq’ reheb’ chixjunileb’ li ralal xk’ahol li Dios. ³⁸ Xnawb’al a’in ak xinxjal, ut tatxjal ajwi’ laa’t. Sa’ xk’ab’a’ li Jesukristo, amen.