Chalqex rik’in li Kristo—Li wank jo’ jun aj Santil Paab’anel sa’ Roso’jikeb’ li Kutan

B’antiox aawe, Elder Soares, laa nimla ch’olob’ahom chirix lix Hu laj Mormon. Toje’, xk’eeman we li usilal re xchapb’al rik’in li wuq’ jun perel hu b’ar wi’ kitz’iib’aman xb’een wa lix Hu laj Mormon. Sa’ li perel hu a’in, xb’een wa sa’ li k’ojlajik a’in, kitz’iib’aman li raatin laj Nefi: “Tinxik ut tinbʼaanu li kʼaʼaq re ru xtaqla li Qaawaʼ, xbʼaan naq ninnaw naq li Qaawa’ maajun taqlahom naxkʼe rehebʼ li ralal xkʼajolebʼ li winq, chi inkʼaʼ ta tixkʼuubʼ jun li bʼe choqʼ rehebʼ re naq teʼxbʼaanu li kʼaʼru naxtaqlahebʼ wiʼ.”¹

Jalam-uuch

perel hu tz’iib’anb’il chi uq’ej re lix Hu laj Mormon

Naq xinchap li perel hu, xinnujak rik’in jun xnimal b’antioxihom xb’aan lix b’aanuhom laj Jose Smith, li wan re 23 chihab’, naq kixjaltesi ru lix Hu laj Mormon “rik’in lix maatan ut lix wankilal li Dios.”² Jo’kan ajwi’ xweek’a xb’antioxinkil li aatin yeeb’il xb’aan li saaj aj Nefi, li taqlanb’il chixb’aanunkil jun k’anjel jwal ch’a’aj re xtawb’aleb’ li perel ch’iich’ bronce rik’in laj Laban.

Laj Nefi kixnaw naq wi tixk’e xch’ool chirix li Qaawa’, taa’elq chi uub’ej re xb’aanunkil li taqlanb’il wi’ xb’aan li Qaawa’. A’an kikana chi jayalinb’il rik’in li Kolonel chiru chixjunil lix yu’am, us ta kixnumsi li aaleek, li yale’k-ix re tz’ejwalej, ut li rahob’tesiik xb’aaneb’ li ras.

Laj Nefi kixnaw ani kiru chixkanab’ankil wi’ rib’.³ Ut chirix naq kixye, “Aay, q’axal rahil winqin! Relik chi yaal, naraho’ lin ch’ool sa’ xk’ab’a’ lin tz’ejwalej,”⁴ laj Nefi kixye, “Lin Dios xxaqab’ank we; kixk’am inb’e chiru lin ch’a’ajkilal sa’ li yamyookil ch’och’; ut a’an kixkol inyu’am naq kinwan chaq chiru xha’il li nimla chamal ha’.“⁵

Jo’ aj taaqenel re li Kristo, moko isinb’ileb’ ta li ch’a’ajkilal ut li yale’k-ix sa’ li qayu’am. Rajlal na’ajman qe xb’aanunkil li k’a’ru ch’a’aj, li ink’a’ raj tooruuq chixb’aanunkil qajunes. Naq naqak’ulub’a lix b’oqom li Kolonel, “chalqex wik’in,”⁶ a’an tooxtenq’a, tixk’ojob’ qach’ool, ut tixk’e li tuqtuukilal li taqaj ru, jo’ kixb’aanu choq’ re laj Nefi ut laj Jose. Sa’ ajwi’ li yale’k-ix q’axal ch’a’aj, naru naqeek’a lix rahom a’an chiqaq’alunkil naq naqakanab’ qib’ chiru ut naqak’ulub’a li rajom. Naru naqeek’a li sahil ch’oolej k’uulanb’il choq’ reheb’ lix tzolom li tiikeb’ chi paab’ank, xb’aan naq li Kristo, “a’an li sahil ch’oolejil.”⁷

Sa’ 2014, naq nokok’anjelak sa’ jun li mision, jo’ junkab’al xqanumsiheb’ ch’a’ajkilal moko oyb’eninb’ileb’ ta. Naq yoo chaq chixb’eresinkil rib’ sa’ xb’een jun monopatín sa’ jun li tzuul, li qalal iitz’inb’ej kit’ane’ ut kixte xjolom ut ka’ch’in chik ma kikam. Naq yoo chi nimank lix ch’a’ajkilal, eb’ laj b’anonel sa’ junpaat ke’roksi sa’ li b’anleb’aal re naq taacho’e’q.

Naq qajunes wanko, xqawiq’ib’ qib’ chi ch’och’ jo’ junkab’al ut xqahoy li qaam chiru li Dios. Sa’ li hoonal a’in re sachok na’leb’ ut rahilal, koonujob’resiik rik’in lix rahom ut lix tuqtuukilal li qaChoxahil Yuwa’.

Ink’a’ xqanaw k’a’ru taak’ulmanq chi moko wi taqil wi’chik chi yo’yo li qalal. A’b’an, xqanaw naq lix yu’am wan sa’ ruq’ li Dios, ut naq li k’a’ru taak’ulmanq, wi naqil jo’ li maak’a’ roso’jik, taa’elq chi us choq’ re lix chaab’ilal a’an ut choq’ qe. Rik’in li maatan re li Santil Musiq’ej, ak kawresinb’ilo re xk’ulub’ankil yalaq k’a’ru taak’ulmanq.

Jwal ch’a’aj li k’a’ru xqak’ul! Kiwan a’an wiib’ po sa’ li b’anleb’aal naq yooko ajwi’ chixjolominkileb’ numenaq kaahib’ cient chi misioneer. Li qalal kixsach naab’al li k’a’ru naxjultika. Lix k’irajik kiraj ru ajwi’ naab’al li k’anjel, re aatinak ut chan ru tixch’olani rib’. Eb’ li ch’a’ajkilal toj wan, a’b’an chiru xnumik li kutan qilom chaq jun sachb’a-ch’oolej.

Naqataw ru naq moko chixjunil ta li ch’a’ajkilal li taqak’ul taatuqub’aaq jo’ naqaj. A’b’anan, naq naqajayali qib’ rik’in li Kristo, taqeek’a li tuqtuukilal ut taqileb’ lix sachb’a-ch’oolej li Dios, a’ yaal k’a’ruheb’, jo’q’e ut chan ru taaraj a’an.

Taawanq li hoonal b’ar wi’ ink’a’ taqataw ru chan ru taqak’ul li chaab’ilal sa’ junaq qanumsihom ut maare tooruuq chixyeeb’al jo’ laj Nefi: “Naraho’ lin ch’ool sa’ xk’ab’a’ lin tz’ejwalej.”⁸ Taawanq li kutan naq li junaq chi yo’onihom li taawanq qe a’anaq li Jesukristo. K’a’jo’ xnimal qosob’tesinkil naq wan qayo’onihom ut qapaab’aal chirix a’an. Li Kristo junelik tixb’aanu li naxyeechi’i. Lix hilob’aal ak ch’olch’o chik ru choq’ re chixjunileb’ li neke’chal rik’in a’an.⁹

Eb’ li qajolominel neke’raj naq chiqajunilo taqeek’a li tuqtuukilal ut li k’ojob’ank ch’oolej li naxk’am chaq xkanab’ankil qib’ chiru ut xjayalinkil qib’ rik’in li Kolonel Jesukristo.

Li qayoyookil profeet, li Awa’b’ej Russell M. Nelson, yoo chixyeeb’al qe k’a’ru li rajom li Qaawa’ choq’ re li ruchich’och’ ut choq’ reheb’ li komon sa’ lix Iglees li Kristo: “Li esilal naqak’ut chiru li ruchich’och’ saqen ru maak’a’ xb’alaq’, naqab’oq chixjunileb’ li ralal xk’ajol li Dios arin sa’ ruchich’och’ ut li ak kamenaq naq che’chalq rik’in li Kolonel, naq che’xk’uleb’ li osob’tesink re li santil ochoch, naq che’saho’q chi junelik, ut naq che’wanq chi k’ulub’ejaqeb’ re xk’ulb’al li junelik yu’am.”¹⁰

Sa’ li b’oqok a’in chi “chalk rik’in li Kristo” wan li na’leb’ tz’aqal choq’ reheb’ laj Santil Paab’anel sa’ Roso’jikeb’ li Kutan.¹¹ Jo’ komon re lix Iglees li Kolonel, ak xqab’aanuheb’ li sumwank rik’in a’an ut okenaqo choq’ musiq’ejil ralal ut lix rab’in a’an.¹² Jo’kan ajwi’ osob’tesinb’ilo chi k’anjelak rik’in li Qaawa’ sa’ xb’oqb’aleb’ li qas qiitz’in chi chalk rik’in a’an.

Naq nokok’anjelak rik’in li Kristo, tento naq taqayal tz’aqal qaq’e chi sa’ li qochoch. Te’wanq hoonal re ch’a’ajkilal te’xnumsi li qakomon ut li qamiiw. Eb’ li xyaab’ kuxej re li ruchich’och’, ut maare li rajomeb’ ajwi’ li qakomon, tixk’eheb’ chi wiib’ank xch’ooleb’ chirix li yaal. Tento naq taqab’aanu chixjunil li tooruuq re xtenq’ankileb’ chireek’ankil lix rahom li Kolonel jo’ ajwi’ li qarahom laa’o. Jultik we jun raqal chi loq’laj hu li wan anajwan sa’ li qab’ich “Li rahok cherib’il eerib’,” li naxk’ut chiqu, “Jo’kan te’xnaw naq laa’ex intzolom, wi wan rahok cherib’il eerib’.”¹³

Naq naqaraheb’ li neke’wiib’an xch’ool chirix li yaal, li xik’ na’ilok re chixjunil li sahil ch’oolej maare tixyal xq’e re naq taqeek’a naq naqaq’axtesiheb’ li naqaraheb’ wi laa’o toj yooko chixyu’aminkil lix tz’aqalil li evangelio ut chixk’utb’al lix yaalalil.

Li qaseeb’al chixtenq’ankil li qas qiitz’in chi chalk malaj chi sutq’iik rik’in li Kristo, taanimanq a’ yaal naq k’eek’o qach’ool chi kanaak sa’ lix b’ehil li sumwank.

Wi li qajom a’an xkolb’aleb’ li naqaraheb’, tento naq tooxaqliiq chi kaw rik’in li Kristo ut taqak’ulub’a lix Iglees ut lix tz’aqalil lix evangelio.

Sa’ rilb’al wi’chik li raatin laj Nefi, naqanaw naq k’eek’o xch’ool laj Nefi chixkanab’ankil rib’ chiru li Qaawa’ xb’aan naq k’eek’ookeb’ ajwi’ xch’ool lix na’ xyuwa’ chixkanab’ankil rib’ chiru li Qaawa’, ut chixpaab’ankileb’ lix sumwank. A’in nak’utman chi chaab’il sa’ lix k’utb’esinb’il matk’ laj Lehi chirix li che’ re li yu’am. Chirix naq kixyal li ki’il ut sahil ru li che’, laj Lehi “kixb’eresi li rilob’aal chixsutam, re naq maare tixtaw ajwi’ lix junkab’al.”¹⁴ A’an kiril li xSariah, laj Sam, ut laj Nefi xaqxookeb’ “jo’ chanchan naq ink’a’ neke’xnaw b’ar te’xik.”¹⁵ Toja’ naq kixye laj Lehi, “Kinb’oqeb’ chi wuq’; ut kinye ajwi’ reheb’ chi kaw xyaab’ inkux naq te’chalq wik’in, ut te’xyal ru li che’.”¹⁶ Teek’e reetal naq laj Lehi ink’a’ kixkanab’ li che’ re li yu’am. A’an kikana sa’ musiq’ejil rik’in li Qaawa’ ut kixb’oq lix junkab’al chi wulak b’ar wi’ wan a’an re te’xyal li ru li che’.

Laj tza taaraj xq’unb’esinkil qach’ool chi elk chaq sa’ li sahil ch’oolejil re li evangelio, rik’in naq naxjach ru lix k’utum li Kristo rik’in lix Iglees. A’an taaraj naq taqapaab’ naq naru tookanaaq junelik sa’ lix b’ehil li sumwank qajunes qib’, malaj rik’in ka’ajwi’ li qamusiq’ejil, chi ink’a’ naqaj ru lix Iglees.

Sa’ roso’jikeb’ li kutan a’in, lix Iglees li Kristo kik’ojob’aak wi’chik re xtenq’ankileb’ li ralal xk’ajol li Kristo re li sumwank re naq te’kanaaq sa’ lix b’ehil li sumwank.

Sa’ li Tzol’leb’ ut Sumwank naqil, “K’ehomaq reetal, a’in lin tzol’leb’—ani naxjal xk’a’uxl ut nachal wik’in, a’an ajwi’ lin iglees.”¹⁷

Rik’in lix Iglees li Kristo, kawresinb’ilo xb’aan li k’a’ru naqanumsi sa’ komonil jo’ aj santil paab’anel. Naqab’i lix yaab’ xkux a’an rik’in xtz’uumaleb’ re lix profeet, aj ilol na’leb’, ut aj k’utb’esinel. Jwal aajel chik ru, sa’ lix Iglees nak’eeman qe chixjunil li aajel ruhil osob’tesink re lix tojb’al rix li maak xb’aan li Kristo, li ka’ajwi’ naru taqak’ul naq nokotz’aqon sa’eb’ li loq’laj k’ojob’anb’il k’anjel.

Lix Iglees li Jesukristo reheb’ laj Santil Paab’anel sa’ Roso’jikeb’ li Kutan a’an lix Iglees li Kristo sa’ li ruchich’och’, li k’ojob’anb’il wi’chik sa’ roso’jikeb’ li kutan a’in re rosob’tesinkil chixjunileb’ li ralal xk’ajol li Dios.

Ninch’olob’ xyaalal naq wi nokochal rik’in li Kristo ut nokowan jo’ aj Santil Paab’anel sa’ Roso’jikeb’ li Kutan, too’osob’tesiiq rik’in xkomon chik lix rahom, lix sahil lix ch’ool, ut lix tuqtuukilal. Jo’ laj Nefi, naru taqab’aanu li k’a’ru ch’a’aj, ut naru taqatenq’aheb’ li qas qiitz’in chixb’aanunkil ajwi’ a’an, xb’aan naq naqanaw ani naru naqakanab’ wi’ qib’.¹⁸ Li Kristo a’an li qasaqen, li qayu’am, ut li qakolb’al.¹⁹ Sa’ xk’ab’a’ li Jesukristo, amen.