Li Tijonelil re Melkisedek ut eb’ li laaw

Laa’in tin’aatinaq chirix lix tijonelil li Dios, li ak xe’aatinak wi’ oxib’eb’ laj aatinanel li xe’xk’ut chiqu chan ru naq li tijonelil narosob’tesi xyu’ameb’ li saaj ixq, eb’ li ixq, ut eb’ li saaj winq.

Li tijonelil a’an jun choxahil wankilal li k’eeb’il qe re xb’aanunkil lix k’anjel li Dios choq’ re xchaab’ilal chixjunileb’ li ralal xk’ajol. Li tijonelil maawa’ li ani k’ojob’anb’ileb’ sa’ jun opiis re li tijonelil chi moko li ani neke’roksi lix wankilal. Eb’ li winq sa’ li tijonelil maawa’eb’ a’an li tijonelil. Tento naq ink’a’ taqaye naq eb’ li winq li k’ojob’anb’ileb’ a’aneb’ li tijonelil, naru naqaye naq a’aneb’ aj k’amol re li tijonelil.

Lix wankilal li tijonelil nak’anjelak sa’ li Iglees jo’ ajwi’ sa’ li junkab’al. A’b’an lix wankil li tijonelil, ut li wankilal li k’eeb’il xb’aan, jalan xk’anjel sa’ li Iglees rik’in xk’anjel sa’ li junkab’al. Chixjunil a’in nak’anjelak jo’ chanruheb’ li na’leb’ k’ojob’anb’il xb’aan li Qaawa’. Li rajb’al lix k’uub’anb’il na’leb’ li Dios, a’an xk’amb’al xb’eheb’ li ralal xk’ajol re te’xtaw li yu’am chi junelik. Aajel ru li junkab’al sa’ li k’uub’anb’il na’leb’ a’an. Li rajb’al li Iglees, a’an xk’eeb’al li tzol’leb’, li wankilal, ut li k’ojob’anb’il k’anjel li na’ajman ru re naq li komonil wank sa’ junkab’alej taaruuq chi kanaak chi junelik q’e kutan. Chi jo’kan, li junkab’al ut lix Iglees li Jesukristo neke’xk’am rib’ chirib’ileb’ rib’. Eb’ li osob’tesink re li tijonelil—jo’ lix tz’aqalil li evangelio, ut eb’ li k’ojob’anb’il k’anjel jo’ li kub’iha’, li k’ojob’aak choq’ komon, ut xk’ulb’al li maatan re li Santil Musiq’ej, li loq’laj tiqib’aak sa’ li santil ochoch, ut li junelik sumlaak—wankeb’ choq’ reheb’ li winq ut li ixq.¹

Li tijonelil noko’aatinak wi’, a’an li Tijonelil re Melkisedek, li kik’ojob’aak wi’chik sa’ xtiklajik lix k’ojlajik wi’chik li evangelio. Laj Jose Smith ut laj Oliver Cowdery ke’k’ojob’aak xb’aan laj Pedro, laj Santiago, ut laj Jwan, li ke’xch’olob’ rib’ “naq neke’k’amok re lix laawil li awa’b’ejihom, ut xlaawil lix k’ojlajik lix tz’aqalil ru li kutan” (Tzol’leb’ ut Sumwank 128:20). Eb’ li apostol a’in ke’xk’ul li wankilal a’an rik’in li Kolonel. Chixjunil chik li wankilal k’eeb’il malaj li opiis sa’ li tijonelil wankeb’ choq’ raqalil chiru li Tijonelil re Melkisedek (chi’ilmanq Tzol’leb’ ut Sumwank 107:5), xb’aan naq a’an “wan xk’ulub’il li awa’b’ejil, ut wan xwankil, ut k’eeb’il wankilal re, sa’ xb’een chixjunileb’ li opiis sa’ li iglees sa’ chixjunil li jar q’ehil wanjenaq wi’ li ruchich’och’ ” (Tzol’leb’ ut Sumwank 107:8).

Sa’ li Iglees, lix wankilal li xnimal ru tijonelil, li Tijonelil re Melkisedek, ut li xka’ch’inal ru tijonelil, malaj li Tijonelil re Aaron, k’anjelanb’il chi b’eresinb’il xb’aan jun aj jolominel re li tijonelil, jo’ jun obiisp malaj jun awa’b’ej, li naxk’am xlaawil li tijonelil a’an. Re xtawb’al ru chan ru nak’anjelaman lix wankilal li tijonelil sa’ li Iglees, tento taqataw ru k’a’ruheb’ lix laawil li tijonelil.

Ke’k’ehe’ lix laawil li awa’b’ejihom sa’ li Tijonelil re Melkisedek xb’aan laj Pedro, laj Santiago, ut laj Jwan, a’ut rik’in a’an ink’a’ kitz’aqlok ru lix k’ojob’ankil wi’chik chixjunil lix laawil li tijonelil. Ke’wan chik li laaw li ke’k’ojob’aak moqon. Chirix naq ki’osob’tesiman li xb’een santil ochoch re roso’jikeb’ li kutan sa’ Kirtland, Ohio, oxib’ li profeet—laj Moises, laj Eliyah, ut laj Elias—ke’xk’ojob’ wi’chik “lix laawil li jun k’ojlajik a’in,” jo’eb’ li laaw choq’ re xch’utub’ankil Israel ut choq’ re xk’anjeleb’ li santil ochoch re li Qaawa’ (chi’ilmanq Tzol’leb’ ut Sumwank 110, jo’ xye li Awa’b’ej Eyring anajwan.

Jun reheb’ lix k’anjeleb’ li laaw li mas nawb’il ru, a’an xb’aanunkil jun k’ojob’anb’il k’anjel re li tijonelil. Jun k’ojob’anb’il k’anjel a’an jun loq’laj b’aanuhom sa’ li nak’uub’aman wi’ li sumwank ut nayeechi’iman li osob’tesink. Sa’ li Iglees, chixjunileb’ li k’ojob’anb’il k’anjel neke’b’aanuman chi b’eresinb’il xb’aan laj jolominel re li tijonelil li naxk’am xlaawil li k’ojob’anb’il k’anjel a’an.

Chi kok’ aj xsa’, li k’ojob’anb’il k’anjel k’anjelanb’il xb’aan junaq li k’ojob’anb’il sa’ jun li opiis re li tijonelil, chi b’eresinb’il xb’aan li ani nak’amok re lix laawil li tijonelil. Qayehaq, eb’ laj k’amol reheb’ li jar opiis re li Tijonelil re Aaron neke’xk’anjela li k’ojob’anb’il k’anjel re li loq’laj wa’ak, chi b’eresinb’ileb’ xb’aan li obiisp, li naxk’am xlaawil li Tijonelil re Aaron. Nak’ulman ajwi’ a’in rik’ineb’ li k’ojob’anb’il k’anjel neke’k’anjelak wi’ li ixq sa’ li santil ochoch. Us ta ink’a’ k’ojob’anb’ileb’ li ixq sa’ jun opiis re li tijonelil, neke’xk’anjela li loq’laj k’ojob’anb’il k’anjel re li santil ochoch chi b’eresinb’ileb’ xb’aan xwankilal li awa’b’ej re li santil ochoch, li naxk’am xlaawileb’ li k’ojob’anb’il k’anjel re li santil ochoch.

Jun chik reetalil lix wankilal li tijonelil chi b’eresinb’il xb’aan li ani nak’amok re xlaawil, a’an lix k’utumeb’ li winq ut li ixq li b’oqb’ileb’ chixk’utb’al li evangelio, sa’ li tzoleb’aal sa’ li teep malaj sa’ mision. Naru na’ilman ajwi’ a’in rik’ineb’ li neke’jolomink sa’ li teep ut li neke’xk’anjela xwankilal li tijonelil sa’ lix b’oqb’il k’anjel, chi k’ojob’anb’ileb’ ut chi b’eresinb’ileb’ xb’aan laj jolominel re li tijonelil li nak’amok reheb’ li laaw sa’ li teep malaj li oqech. Chi jo’ka’in naq lix wankilal li tijonelil nak’anjelaman ut na’oksiman sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan.²

Na’oksiman ajwi’ lix wankil li tijonelil, ut nak’ule’ li rosob’tesihom, sa’eb’ lix junkab’aleb’ laj santil paab’anel sa’ roso’jikeb’ li kutan. Naq ninye junkab’al, yookin chi aatinak chirix jun li winq aj k’amol re li tijonelil ut jun li ixq li sumsuukeb’, ut eb’ lix kok’al. Wankeb’ ajwi’ li junkab’al b’ar wi’ maak’a’ junaq reheb’ li komon a’in, xb’aan li kamk malaj li jachok-ib’.

Li na’leb’ naq lix wankil li tijonelil ka’ajwi’ naru chi k’anjelamank chi b’eresinb’il xb’aan li ani nak’amok re lix laawil li k’anjel a’an, k’a’jo’ x’aajelil ru sa’ li Iglees, a’an maawa’ li na’uxman sa’ li junkab’al. Jun li yuwa’b’ej najolomin ut naxk’anjela li tijonelil sa’ lix junkb’al rik’in lix wankil li tijonelil li wank rik’in. Ink’a’ na’ajman ru naq tixk’ul xb’eresinkil malaj xliceens rik’in junaq li nak’amok re lix laawil li tijonelil re xb’aanunkil lix k’anjel sa’ lix junkab’al. Sa’ xyanqeb’ lix k’anjel wan xk’eeb’aleb’ xna’leb’ li komon sa’ lix junkab’al, xb’eresinkil li ch’utam re li junkab’al, rosob’tesinkil li rixaqil ut eb’ lix kok’al, malaj xk’eeb’al li osob’tesink re xk’irtesinkileb’ li ani wankeb’ sa’ lix junkab’al, malaj anihaq chik.³ Eb’ laj jolominel sa’ li Iglees neke’xtzoleb’ li komon sa’ li junkab’al, a’b’an ink’a’ neke’xb’eresi xk’anjelankil lix wankilal li tijonelil sa’ li junkab’al.

Yaal ajwi’ a’in naq maak’a’ li yuwa’b’ej ut li na’b’ej naxjolomi li junkab’al. A’an najolomin sa’ li rochoch, ut wan xwankil chixk’amb’al lix wankilal ut li rosob’tesihom li tijonelil sa’ lix junkab’al, rik’in naq xk’ul xtiqib’ankil ut xtz’ape’ sa’ junajil sa’ li santil ochoch. Us ta maak’a’ xliceens chixk’eeb’aleb’ li osob’tesink rik’in li tijonelil, li ka’ajwi’ naru tixk’e anihaq li k’ojob’anb’il sa’ jun opiis re li tijonelil, toj naru chixb’aanunkil chixjunil chik li k’anjel re xjolominkil li junkab’al. Sa’ xb’aanunkil, a’an naxk’anjela lix wankilal li tijonelil choq’ re lix chaab’ilaleb’ lix kok’al li naxjolomiheb’ jo’ aj jolominel re li junkab’al.⁴

Wi eb’ li yuwa’b’ej te’xnimob’resi ru lix tijonelil sa’ tz’aqal lix junkab’al, k’a’jo’ wi’chik naq tixk’am chi uub’ej lix k’anjel li Iglees chiru yalaq chik k’a’ru te’ruuq chixb’aanunkil. Eb’ li yuwa’b’ej li neke’k’amok re li tijonelil tento te’xk’anjela li wankilal k’eeb’il reheb’ “rik’in li q’unb’esink ch’oolej, rik’in li najtil oyb’enink, rik’in li q’unal ch’oolej ut li tuulanil, ut rik’in li rahok chi moko pak’b’il ta” (Tzol’leb’ ut Sumwank 121:41). Li taqenaqil eetalil a’an chirix xk’anjelankil lix wankil li tijonelil, q’axal aajel ru sa’ li junkab’al. Eb’ li neke’k’amok re li tijonelil tento ajwi’ te’xpaab’eb’ li taqlahom re taawanq rik’ineb’ lix wankil li tijonelil re rosob’tesinkileb’ li komon sa’ lix junkab’al. Tento ajwi’ naq te’xwaklesi li rahok chirib’ileb’ rib’ sa’ lix junkab’al, re naq eb’ li komon sa’ li junkab’al te’raj xpatz’b’al re naq taarosob’tesiheb’. Ut eb’ li na’b’ej ut yuwa’b’ej tento raj naq te’xwaklesi xch’ooleb’ li wankeb’ sa’ li junkab’al re te’xk’ul rosob’tesihom li tijonelil.⁵

Sa’ li ch’utub’aj-ib’ a’in, li wan jo’ qamuheb’aal chiru li ch’a’ajkilal re jun li rahil yajel, ak xe’k’utman chiqu xninqal ru ut junelikil na’leb’. Ninpatz’ naq chiqajunjunqalo “junajaq ru” lix sa’ li qu re taqak’ul li junelikil yaal a’in re naq li qaxaqalil “nujenaqaq chi saqen” (3 Nefi 13:22).

Sa’ li raatin choq’ reheb’ li ch’utch’uukil tenamit li tz’iib’anb’il sa’ li Santil Hu ut sa’ lix Hu laj Mormon, li Kolonel kixk’ut naq li tz’ejwalej naru naq nujenaqaq chi saqen malaj chi q’ojyin. Yaal ajwi’ naq naqaj naq nujenaqo chi saqen, ut li qaKolonel kixk’ut chiqu chan ru taqab’aanu a’an. Tento taqab’i li aatin chirix li yaalil na’leb’ re junelik q’e kutan. Re xk’utb’al a’in, a’an ki’aatinak chirix xsa’ li uhej, sa’ wi’ naqak’ul li saqen sa’ li qajunxaqalil. Wi “junaj ru lix sa’ qu”—sa’ jalan chik aatin, wi k’eek’o qach’ool chixk’ulb’al li junelikil saqen ut nawom—a’an kixye, “chixjunil aaxaqalil nujenaqaq chi saqen” (Mateo 6:22; 3 Nefi 13:22). “Wi b’an ink’a’ us lix sa’ qu”—wi naqasik’ li maa’usilal ut naqoksi a’an sa’ li qajunxaqalil—a’an kixye, “chixjunil aaxaqalil nujenaqaq chi q’ojyin” (raqal 23). Sa’ jalan chik aatin, naqak’ul li q’ojyin malaj li saqen sa’ li qajunxaqalil a’ yaal chan ru naqil—malaj naqak’ul—li junelikil yaal li k’utb’il chiqu.

Tento taqataaqe lix b’oqom li Kolonel naq toosik’oq ut toopatz’oq re xtawb’al ru li junelikil yaal. A’an naxk’ut naq wan xch’ool li qaYuwa’ sa’ Choxa chixk’utb’al chiru chixjunileb’ li yaal neke’xsik’ (chi’ilmanq 3 Nefi 14:8). Wi naqaj a’in, ut wi junaj ru lix sa’ qu re xk’ulb’aleb’, li Kolonel naxye naq li junelikil yaal “taateemanq” chiqu (chi’ilmanq 3 Nefi 14:7–8).

Chi junpak’al chik, laj Satanas naraj xsachb’al qana’leb’ ut qajalb’ehinkil chirix li k’a’ru aajel ru, jo’ chan ru nak’anjelak lix tijonelil li Dios. Li Kolonel kixye naq te’wanq “li bʼalaqʼil profeet, li nekeʼchal eerikʼin saʼ raqʼ li karneer, aʼbʼan saʼ xchʼoolebʼ, aʼanebʼ xojbʼ aj tiʼonel” (3 Nefi 14:15). A’an kixye li aatin a’in re qatenq’ankil chixsik’b’al ru b’ar wan li yaal sa’ xyanqeb’ li jar paay chi k’utum li taaruuq raj chixsachb’al qana’leb’: “Teenaweb’ ru rik’in li neke’uuchin wi’,” chan (3 Nefi 14:16). “Jun chaab’il che’ ink’a’ naru naruuchini li ink’a’ us, chi moko junaq che’ moko chaab’il ta taaruuchini li chaab’il” (raqal 18). Jo’kan ut, tento naq taqak’e reetal “k’a’ru te’ruuchini” li jar na’leb’ neke’k’utman, jo’eb’ ajwi’ li ani li neke’k’utuk reheb’. Chi jo’ka’in naq naru xsumenkil chi chaab’il li wech’ok chirix li Iglees, lix tzol’leb’, lix k’anjel, ut eb’ laj jolominel re. B’aanuhomaq li kixye li Kolonel. K’ehomaq reetal li ruuchinihom—li k’a’ru nachal rik’in.

Naq naqak’oxlaheb’ li ruuchinihom li evangelio ut lix Iglees li Jesukristo li k’ojob’anb’il wi’chik, nasaho’ li qach’ool chirix lix k’iijik li Iglees, chiru xyu’ameb’ ajwi’ li komon li toj yo’yookeb’, ut chan ru naq lix k’ihaleb’ li waqlaju millon chi komon moko wankeb’ ta chik sa’ li tenamit Estados Unidos. Rik’in lix k’iijik, ak xqeek’a chi nimank lix wankilal li Iglees chixtenq’ankileb’ lix komon. Nokotenq’an sa’ xpaab’ankileb’ li taqlahom, xb’aanunkil li qateneb’ankil chixjultikankil li evangelio li k’ojob’anb’il wi’chik, xch’utub’ankil Israel, ut xkab’lankileb’ li santil ochoch chiru li ruchich’och’.

B’eresinb’ilo xb’aan jun li profeet, li Awa’b’ej Russell M. Nelson, li ak taqlanb’il xb’aan li Qaawa’ chixb’aanunkileb’ k’iila chaab’il k’anjel chiruheb’ li wiib’ chihab’ wanjenaq wi’ jo’ awa’b’ej. Anajwan taqab’i li raatin li Awa’b’ej Nelson, li tixk’ut chiqu chan ru naq tooxik chi uub’ej sa’ lix Iglees li Jesukristo li k’ojob’anb’il wi’chik sa’eb’ li kutan a’in jwal ch’a’ajeb’.

Ninch’olob’ xyaalal li k’a’aq re ru a’in, ut ninjunaji wib’ eerik’in sa’ tijok choq’ re li qaprofeet li taqab’i anajwan, sa’ xk’ab’a’ li Jesukristo, amen.