Riro mai iāna te huru
E mea nā roto noa i te tauturu hanahana a te Fa’aora tātou pā’āto’a e nehenehe ai e haere i mua nō te riro mai iāna te huru.
Noa atu ē e pīahi tuatāpapa māite i te orara’a ’e te tāvinira’a a Iesu Mesia, e au te a’ora’a a te Fa’aora ’ia riro tō tātou huru « mai tō’u nei ïa » 1 ’ei mea fa’ahō’ū’ū ’e mai te huru e’ita e haere. Penei a’e mai iā’u ato’a ’outou—tei ’ite roa ho’i i tā ’outou mau hape ’e te manuia ’ore, ’e ’ua feruri atu ra e mea ’ōhie a’e paha ’ia haere i te ’ē’a ’aita e ta’umara’a ’e e mea haere marū noa. E fa’a’ōhie tātou i te feruri ē, « e’ita e haere te reira ha’api’ira’a, ’ua rahi roa » ’e ’ua mā’iti atu ra i te tere e mea iti roa te pāto’ira’a, ’e inā, ’ua iti ato’a te paura’a te mau tārori tauira’a tītauhia.
’Āre’a rā, nāhea pa’i mai te peu e ’ere te rirora’a « mai [tōna ra] » i te aura’a parau noa, i tō tātou ato’a nei vaira’a tāhuti nei ? ’E mai te peu e nehenehe e tāpae i te tahi fāito i roto i teie nei orara’a, ’e e tītaura’a mau ho’i nō te pārahi-fa’ahou-ra’a iāna ra ? ’E mai te peu te rirora’a « mai tō’u nei », ’o te mea mau iho ā tā te Fa’aora i mana’o ? Nāhea pa’i ïa ? E aha te fāito tauto’ora’a ’ua ineine tātou i te tu’u nō te tītau manihini i tōna mana semeio i roto i tō tātou orara’a, ’ia ti’a ia tātou ’ia taui roa i tō tātou nei nātura ?
’Ua ha’api’i Elder Neal A. Maxwell : « ’Ia feruri tātou i te fa’auera’a a Iesu ’ia riro mai iāna te huru, e ’ite tātou i tō tātou nei vaira’a e ’ere paha i te vaira’a ta’ata ’ino mau, ’aita, e vaira’a ta’ata ’ā’au piti rā, ’aita e ’ana’anatae rahi nei i tāna ’ohipa—e ’ohipa ato’a ho’i nō tātou ! Tē fa’ahiahia nei tātou iāna, ’aita ato’a rā e pe’e roa i tōna hi’ora’a ». 2 ’Ua parau ato’a te tahi taure’are’a ’orometua, ’o Charles M. Sheldon, i te tahi mana’o mai teie : « E mea au roa nō tātou nei te keresetiano i te ’ohipa ’ōhie ’e te au, ’e ’aita atu ra tātou e rave i te mau mea pa’ari ’e te teimaha mai te satauro ». 3
’A mea rā ho’i, tei raro a’e tātou pā’āto’a i te arata’ira’a ’ia riro mai iāna te huru, mai tā Iesu Mesia i riro mai te Metua te huru. 4 ’A nu’u ai tātou i mua, e riro mai tātou ’ei ta’ata hope a’e, ’e te oti a’e ’e te tupu hope a’e. 5 ’Aita taua ha’api’ira’a ra i fa’atumuhia i ni’a i te mau ha’api’ira’a tumu a te tahi māmāiā, nō ’ō mai rā i te ’Orometua iho. E mea nā roto i te reira hi’ora’a e ora ai i te orara’a, e feruri ai i te mau ’āparaura’a ’e e poihere ai i te mau tā’amura’a. ’Oia mau, ’aita e rāve’a ’ē nō te fa’aora i te pēpē o te mau tā’amura’a fati ’aore rā te pēpē o te sōtaiete ’āmahamaha, maori rā te pe’e-hope-ra’a tātou tāta’itahi i te hi’ora’a o te Ari’i nō te hau. 6
Hi’o ana’e nāhea i te ha’amata i teie tere feruri maita’i ’e te fa’aoti pāpū ’e te mana’o pāpū, nō te riro mai iāna te huru, maoti te noa’ara’a te mau hīro’a iho o Iesu Mesia.
Rave i te fa’aotira’a ’e pūpū iāna
Ma’a matahiti i ma’iri, ’ua ti’a māua ta’u vahine i te ha’amatara’a o te ’ē’a ta’umara’a o te mou’a teitei roa a’e nō Tāpōnē, te mou’a Fuji. ’A ha’amata ai māua i te pa’uma, ’ua hi’o atu māua i te tupua’i mou’a i te ātea, ’e ’ua uiui a’era te mana’o ē, e tāpae ānei māua i reira.
’A haere noa ai māua i mua, ’ua ha’amata ato’a te rohirohi, te uaua māuiui ’e te fifi nō te vāhi teitei. I roto i tō māua upo’o, e mea faufa’a roa ’ia ha’apa’o noa māua i te tu’ura’a ’āvae nō muri iho. E parau māua, « E mea ātea ā paha te tupua’i mou’a, e nehenehe rā tā’u e tu’u i te ta’ahira’a ’āvae nō muri iho. » Ē i te hope’a ’ua riro mai teie ’ohipa fa’ahō’ū’ū ’ei ’ohipa roa’a i te rave—hō’ē ta’ahira’a i muri i te tahi.
Te ta’ahira’a mātāmua i ni’a i teie ’ē’a nō te riro mai ia Iesu Mesia te huru ’o te fa’atupura’a ïa i te hina’aro ’ia nā reira. E mea maita’i ’ia māramarama i te a’ora’a e riro mai iāna te huru, tītauhia rā ’ia ’āpiti i te reira i te hia’ai e taui ia tātou iho, hō’ē ta’ahira’a i te taime hō’ē, ’ia hemo atu te ta’ata tino nei. 7 Nō te fa’atupu i terā hia’ai, e mea tītauhia ’ia ’ite ’o vai Iesu Mesia. E mea tītauhia ’ia ’ite i te hō’ē tuha’a o tōna hīro’a, 8 ’e ’ia ’imi ho’i i tōna mau hīro’a i roto i te mau pāpa’ira’a mo’a, te mau purera’a ’e te tahi atu mau vāhi mo’a. ’A ha’amata ai tātou i te mātau rahi atu ā iāna, e ’ite tātou i tōna mau hīro’a ’ia ’anapanapa i roto ia vetahi ’ē. E fa’aitoito te reira ia tātou i ni’a i tō tātou tere, inaha, mai te mea e noa’a ia vetahi tōna hīro’a, e nehenehe ïa e noa’a mai te tahi fāito ia tātou.
Mai te mea e’ita tātou e ha’avare ia tātou iho, e muhumuhu mai te Māramarama o te Mesia 9 i roto ia tātou ē, tē vai ra te ātea i rotopū i te vāhi tei reira tātou ’e te hīro’a o te Fa’aora tei hina’arohia. 10 E mea faufa’a tumu taua ha’avare ’ore ra nō te haere i mua, nō te riro mai iāna te huru. ’Oia mau ho’i, e hīro’a ato’a te ha’avare ’ore nōna.
I teienei rā, e nehenehe te feiā itoito i roto ia tātou e ani i te hō’ē melo o te ’utuāfare ti’aturihia, te hoa fa’aipoipo, te hoa ’aore rā te ti’a fa’atere i te pae vārua, e aha te hīro’a o Iesu Mesia tei tītauhia nō tātou—’e penei a’e e tītauhia ’ia tāpe’a i te pa’ari i te pāhonora’a e tae mai ! I te tahi taime e hi’o tātou ’ia tātou ma te mau hi’o ha’afefe ’o tē fa’aporia ia tātou ’aore rā e fa’apārarai, e ’ere rā tō tātou hōho’a mau.
E nehenehe te mau hoa ti’aturihia ’e te ’utuāfare e tauturu ia tātou ’ia hi’o pāpū a’e ia tātou, e nehenehe ato’a rā tā rātou hi’ora’a e hape ri’i, noa atu ā tō rātou here ’e te tauturu ia tātou. Nō reira, e mea faufa’a tumu ’ia ani i tō tātou Metua here i te Ao ra i te mea tītauhia nō tātou ’e te vāhi e rōtahi atu i tā tātou mau tauto’ora’a. E mata maita’i roa tōna, ’e e fa’a’ite mai ’oia i tō tātou mau paruparu. 11 E ’apo mai paha ’outou ē, tītauhia te fa’a’oroma’i rahi atu ā, te ha’eha’a, te aroha, te here, te tīa’ira’a, te itoito ’aore rā te ha’apa’o, ’o te tahi ri’i noa. 12
’Aita i maoro a’enei, ’ua tupu te tahi ’ohipa fa’arahi pae vārua nō’u i te parau-’āfaro-ra’a mai te tahi ti’a fa’atere here o te ’Ēkālesia ē e fa’a’ohipa i te hō’ē fāito rahi atu ā nō te hō’ē hīro’a. ’Ua tāpū ’ē ’oia ma te here i te hōho’a hapehape. I terā pō, ’ua fa’a’ite au i teie ’ohipa i tā’u vahine. E aroha rahi tāna i fa’a’ite mai noa atu ā tōna ’āfaro i taua mana’o ra. ’Ua ha’apāpū mai te Vārua Maita’i ē, nō ’ō mai teie parau a’o tā rāua i te Metua here i te Ao ra.
E tauturu ato’a paha ’ia rave ma te ha’avare ’ore i te ’ohipa ri’i nō ni’a i te hīro’a o te Mesia i te pene 6 nō te ’Ia Poro Haere i Ta’u Nei ’Evanelia. 13
’Ia oti taua hi’opo’ara’a ha’avare ’ore ra, ’e ’ua fa’aoti ’outou e ha’amata i te ta’uma i terā mou’a, e tītauhia ’ia tātarahapa. ’Ua ha’api’i te peresideni Russell M. Nelson ma te here ē : « ’Ia mā’iti tātou ’ia tātarahapa, tē mā’iti nei ïa tātou ’ia taui ! Tē fa’ati’a nei tātou i te Fa’aora ’ia taui ia tātou i roto i tō tātou hōho’a maita’i roa a’e. Tē mā’iti nei tātou ’ia tupu i te rahi i te pae vārua ’e e fāri’i i te ’oa’oa—te ’oa’oa nō te fa’aorara’a i roto iāna. ’Ia mā’iti tātou ’ia tātarahapa, tē mā’iti nei ïa tātou ’ia riro mai ia Iesu Mesia te huru ». 14
E tītau te rirora’a mai ia Iesu Mesia, ’ia taui i tō tātou ’ā’au ’e te ferurira’a, ’oia mau, ’o tō tātou iho ta’ata mau, ’e maoti noa te maita’i fa’aora o Iesu Mesia e noa’a ai te reira. 15
Hi’o ’e rave i te ’ohipa
I teienei ’ua fa’aoti ’outou e taui ’e e tātarahapa ’e ’ua ’imi i te arata’ira’a nā roto i te pure ’e te ferurira’a ha’avare ’ore, ’e penei a’e ’ua ’āpo’o ’e vetahi ’ē, e tītauhia ’ia mā’iti i te hō’ē hīro’a ’o tē riro mai ’ei rōtahira’a pāpū nō ’outou. Tītauhia ’ia fafau ia ’outou iho ’ia rave i te tauto’ora’a pāpū mau. E’ita te reira mau hīro’a i te mea māmā ’e te noa’a tā’ue noa mai, nā roto rā i tōna maita’i e tae marū noa mai te reira ’a tauto’o noa ai.
’Ua riro te mau hīro’a huru Mesia ’ei tao’a hōro’a nō ’ō mai i te Metua i te Ao ra nō te ha’amaita’i ia tātou ’e te feiā ’ati a’e ia tātou. ’E nō reira, e tītau tā tātou mau tauto’ora’a ’ia noa’a mai teie mau hīro’a i te tāparura’a o te ’ā’au i te tauturu o te ra’i. Mai te mea e ’imi tātou i teie mau tao’a nō te tāvini maita’i a’e ia vetahi ’ē, e ha’amaita’i mai ’oia i tā tātou mau tauto’ora’a. Mai te mea e tītau pipiri tātou i te hō’ē tao’a nō ’ō mai i te Atua, ’o te hepohepo ïa ’e te ’ino’ino te hope’a.
’Ia rōtahi pūai ’outou i ni’a i terā hīro’a tei tītauhia, ’e ’a nu’u ai i mua i te noa’ara’a terā hīro’a, e ha’amata te tahi atu mau hīro’a i te ho’i mai ia ’outou. E ti’a ānei ho’i i te ta’ata e rōtahi pūai i ni’a i te aroha e ’ore e fa’arahi i te here ’e te ha’eha’a ? E ti’a ānei ho’i i te ta’ata e rōtahi i ni’a i te ha’apa’o e ’ore e noa’a te itoito rahi a’e ’e te tīa’ira’a ? E riro tā ’outou mau tauto’ora’a pāpū ’ia noa’a mai te hō’ē hīro’a ’ei nanumiti e fa’ati’a i te mau poti ato’a i te uāhu.
Pāpa’i ’e tāmau noa
E mea faufa’a rahi nō’u ’a tāmata ai i te riro mai iāna te huru ’ia pāpa’i i te mau ’ohipa i tupu ’e te mea tā’u i ’apo mai. ’A tuatāpapa ai au i te hō’ē o tōna mau hīro’a i te hōhonu o tō’u ferurira’a, e riro mai te mau ’īrava pāpa’ira’a mo’a ’ei ’īrava ’āpī ’a ’ite ai au i te mau hi’ora’a nō teie hīro’a i roto i tāna mau ha’api’ira’a, tāna tāvinira’a ’e tāna mau pipi. E mea rōtahi atu ā tō’u mata i ni’a i te hi’ora’a i terā hīro’a i roto ia vetahi ’ē. ’Ua hi’o vau i te mau ta’ata fa’ahiahia i roto ’e i rāpae i te ’Ēkālesia e hīro’a tō rātou ’o tē pe’e i tōna. E mau hi’ora’a pūai rātou nō te huru teie mau hīro’a e nehenehe e ’itehia i roto i te mau ta’ata tāhuti nei maoti tōna aroha here.
Nō te ’ite i te nu’ura’a mau i mua, tītauhia ’ia rave i te tauto’ora’a tāmau. Mai te pa’umara’a i te mou’a e tītau i te fa’aineinera’a nā mua, ’e te fa’a’oroma’ira’a ’e te fa’aitoitora’a i te taime pa’umara’a, mea nā reira ato’a teie tere i te tītau i te tauto’ora’a pāpū ’e te fa’atusiara’a. I tītau noa ana te keresetianora’a mau, te tūtavara’a ’ia riro mai tō tātou ’Orometua te huru, i tā tātou mau tauto’ora’a maita’i roa a’e. 16
I teienei, te tahi parau fa’aara. ’Aita te fa’auera’a e riro mai iāna te huru i ’ōpuahia nō te fa’atupu i te mana’o fa’ahapa ’e te ti’amā ’ore ’e te here ’ore. Te orara’a tāhuti nei tā’āto’a, nō te haerera’a ïa i mua, nō te tāmatara’a, nō te hi’ara’a ’e nō te manuiara’a. ’Ua hina’aro roa māua ta’u vahine e tāpiri noa i tō māua mata ’e nā roto i te tahi manamana e tāpae i ni’a i te tupua’i mou’a, e ’ere rā te reira te orara’a.
’Ua nava’i tō ’outou maita’i, ’ua herehia ’outou, ’aita rā i oti tō ’outou haerera’a i mua. Tē vai ra te ’ohipa e rave i roto i teie orara’a ’e i muri iho. E mea nā roto noa i tāna tauturu tātou pā’āto’a e nehenehe ai e haere i mua nō te riro mai iāna te huru.
I teie mau tau e au ē « e ’ārepurepu noa te mau mea ato’a ra ; [’e mai te huru ē] e tae mai te mata’u rahi i ni’a i te mau nūna’a ta’ata ato’a », 17 te rā’au noa, te rā’au fa’aora noa, ’o te tūtavara’a ïa ’ia riro mai te Fa’aora te huru, 18 te Tāra’ehara 19 o te mau ta’ata ato’a, te Māramarama o teie nei ao, 20 ’e tae noa atu te ’imira’a iāna tei parau ē : « ’O vau te ’ē’a ». 21
’Ua ’ite au ē, e ti’a ’ia riro mai iāna ra te huru nā roto i tāna tauturu ’e tōna pūai, hō’ē ta’ahira’a i muri i te tahi. ’Āhani ’aita, e’ita ’oia e hōro’a mai i teie fa’auera’a. 22 ’Ua ’ite au i te reira—te tahi tumu, nō te mea ïa, tē ’ite ra vau i tōna hīro’a i roto ia ’outou e rave rahi roa. Tē fa’a’ite pāpū nei au nō te reira, i te i’oa o Iesu Mesia, ’āmene.