Tāmatahia, ha’apāpūhia ’e fa’a’ana’anahia

E au mau taea’e ’e e au mau tuahine, tē ’oa’oa nei au ʼia paraparau atu ia ʼoutou i teie mahana. Tō’u hina’aro ’o te hōro’ara’a atu ïa i te fa’aitoitora’a i te taime e mea fifi ’e te pāpū ’ore mau te orara’a ’ia hi’ohia atu. Nō te tahi pae o ’outou, teie taua taime ra. ’Aita ana’e, e tae mai taua huru taime ra.

E ’ere i te hō’ē hi’ora’a pōiri. E hi’ora’a mau—e mana’o maita’i—maoti te ’ōpuara’a a te Atua i roto i te poietera’a o teie ao. Taua ’ōpuara’a ra ’o te hōro’ara’a ïa i tāna mau tamari’i i te rāve’a nō te ha’apāpū ia rātou iho ē, ’ua ti’a ia rātou ’e ’ua hina’aro rātou e mā’iti i te maita’i i te taime fifi. Nā roto i te reira, e tauihia tō rātou nātura, ’e e hau atu tō rātou rirora’a mai iāna te huru. ’Ua ’ite ’oia ē, e tītau te reira i te fa’aro’o ’āueue ’ore i roto iāna.

Te tuha’a rahi o te mau mea tā’u i ’ite, nō roto mai ïa i tō’u ’utuāfare. I te va’ura’a o tō’u matahiti, ’ua ani tō’u metua vahine pa’ari i tō’u taea’e ’e iā’u ’ia hutihuti i te aihere nā muri iho iāna i muri i te ’āua o tō mātou ’utuāfare. I teienei e ’ohipa ’ōhie roa ’ia hi’ohia, terā rā, tē ora ra mātou i New Jersey. E mea pinepine te ua. E ’araea teiaha te repo. E tupu vitiviti a’e te aihere i te mā’a tupu.

Tē ha’amana’o nei au i tō’u ’ino’ino ’ia mutu ana’e te mau aihere i roto i tō’u rima, ’a mau ai tō rātou mau a’a i roto i te vari paruparu me’ume’u. E’ita e maoro e rā roa tō’u māmā ’e tō’u taea’e i mua roa i roto i tā rāua aroa. Pūai noa atu tō’u tāmatara’a, ātea noa atu vau i muri.

« E mea teimaha roa te reira ! » Tā’u ïa i tuō.

’Āhani i te fa’a’itera’a mai i te here, ’ua ata tō’u māmā ’e ’ua parau mai ē, « E Hal, e mea teimaha iho ā. Mai te reira iho ā. E tāmatara’a te orara’a nei ».

I taua taime ra, ’ua ’ite a’era vau ē, e parau mau tāna, ’e e tāmau noa te reira i te vai ’ei parau mau i roto i tō’u orara’a.

E rave rahi matahiti i muri a’e, tō’u māramaramara’a i te tumu o te ’ata here a māmā, i te taime ’a tai’o ai au i te paraura’a te Metua i te ao ra ’e tāna Tamaiti here i tā rāua ’ōpuara’a i roto i te hāmanira’a i teie ao ’e te hōro’ara’a i te mau tamari’i vārua i te rāve’a nō te orara’a tāhuti :

« ’E e tāmata tātou ia rātou i reira, ’ia ’ite tātou ē, e ha’apaʻo ānei rātou i te mau mea ato’a tā te Fatu tō rātou Atua e fa’aue ia rātou ra ;

« ’E ’o rātou o te ha’apa’o i tō rātou ’āi’a mātāmua, e fa’arahihia tā rātou ; ’e ’o tē ’ore e ha’apa’o i tō rātou ’āi’a mātāmua, e ’ore ïa e fāri’i i te hanahana i roto i te bāsileia tei reira rātou ’o tei ha’apa’o i tō rātou ’āi’a mātāmua ; ’e ’o rātou tē ha’apa’o i te piti o tō rātou ’āi’a, e fa’arahihia tō rātou hanahana a muri, ’e a muri noa atu ». ¹

’Ua fāri’i ’outou ’e ’o vau nei i te reira anira’a ’ia tāmatahia ’e ’ia ha’apāpū ē, e mā’iti tātou i te ha’apa’o i te mau fa’auera’a a te Atua i te taime ’aita tātou i mua fa’ahou i te aro o tō tātou Metua i te ao ra.

Noa atu te anira’a here nō roto mai i tō tātou Metua i te ao ra, ’ua ’ume mai ’o Lucifero hō’ē i ni’a i te toru o te mau tamari’i vārua ’ia pe’e iāna ’e ’ia pāto’i i te fa’anahonahora’a a te Metua nō tō tātou tupura’a i te rahi ’e te ’oa’oa mure ’ore. Nō te ’ōrurehau o Sātane, ’ua hurihia ’oia i rāpae ’e te mau ta’ata tei pe’e iāna. I teienei, tē tāmata nei ’oia i te ’ume i te rahira’a e noa’a iāna ’ia fāriu ’ē i te Atua i roto i teie orara’a tāhuti nei.

’O tātou tei fāri’i i te fa’anahonahora’a, ’ua nā reira ïa tātou maoti tō tātou fa’aro’o ia Iesu Mesia, tei pūpū iāna ’ia riro ’ei Fa’aora ’e ’ei tāra’ehara nō tātou. ’Ua ti’aturi pāpū tātou ē, noa atu te mau paruparu tino nei e roa’a ia tātou, ’e noa atu te mau pūai o te ’ino e tae mai i ni’a ia tātou, e rahi roa a’e te mau pūai o te maita’i.

’Ua ’ite ’e ’ua here te Metua i te ao ra ’e ’o Iesu Mesia ia tātou. Tē hina’aro nei rāua ’ia ho’i fa’ahou ’outou ia rāua ra ’e ’ia riro mai ia rāua te huru. Tō ’outou manuia, ’o tō rāua ïa manuia. ’Ua ’ite ’outou i taua here ra i te ha’apāpūra’ahia mai e te Vārua Maita’i ’a tai’o ai ’outou aore rā ’a fa’aro’o ai ’outou i teie mau parau : « Inaha, ’o teie ho’i tā’u ’ohipa ’e tō’u hanahana ho’i—’ia fa’atupu i te tāhuti ’ore ’e te ora mure ’ore o te ta’ata nei ». ²

E mana tō te Atua nō te fa’a’ōhie a’e i tō tātou haere’a. ’Ua fa’a’amu ’oia i te mau tamari’i ’Īsera’ela i te māna i roto i tō rātou tere e tae atu ai i te fenua i parauhia ra. I roto i tōna orara’a i te tāhuti nei, ’ua fa’aora te Fatu i te feiā ma’i, ’ua fa’ati’a fa’ahou i tei pohe, ’e ’ua tāmarū i te moana. I muri a’e i tōna ti’afa’ahoura’a, ’ua ’īriti ’oia i « te fare tāpe’ara’a i te feiā tei ru’uru’uhia ». ³

’Oia ïa, ’ua mamae te peropheta Iosepha Semita, hō’ē o tāna mau peropheta rahi a’e, i roto i te fare tāpe’ara’a, ’e ’ua ha’api’ihia i te ha’api’ira’a tā tātou pā’āto’a e fana’o nei ’e tā tātou e tītau i roto i tō tātou mau tāmatara’a « ’e mai te mea e hurihia atu ’oe i roto i te ’ārua, ’e ’aore rā i roto i te mau rima o te feiā taparahi ta’ata, ’e e tu’uhia atu te utu’a pohe i ni’a ia ’oe na ; mai te mea e hurihia atu ’oe i roto i te moana ra ; mai te mea e tāpo’ipo’i mai te ’are tūpa’ipa’i ia ’oe na ; mai te mea e riro mai te mau vero pūai ’ei ’enemi nō ’oe na ; mai te mea e ha’aputuputu mai te mau ra’i i te pōuri, ’e e ’āmui mai te mau mea ri’i tumu nō te fa’aapiapi i te ’ē’a ; ’e tei hau roa atu ho’i, mai te mea e hāmama mai nā ta’a nō hade iho i te vaha i hāmama-roa-hia i te tītaura’a ia ’oe na, ’a ’ite mai ’oe, e ta’u tamaiti nei ē, e noa’a ia ’oe te ’ite i te ’ohipa nā roto i teie mau mea ato’a nei, ’e e riro ho’i ’ei maita’i nō ’oe na ». ⁴

E ui māere paha ’outou ma te tano ē, nō te aha te hō’ē Atua here ’e te pūai hope e fāri’i ai i teie huru tāmatara’a tāhuti teimaha rahi i ni’a ia tātou. Te tumu nō te mea ’ua ’ite ’oia ē, e ti’a ia tātou ’ia tupu i te rahi i roto i te mā ’e te tino maita’i ’ia ti’a ia tātou ’ia ora i pīha’i iho iāna i roto i te ’utuāfare ē ’a muri noa atu. Nō te fa’atupu i te reira, ’ua hōro’a mai te Metua i te ao ra ia tātou i te hō’ē Fa’aora ’e i te mana nō te mā’iti nō tātou iho, nā roto i te fa’aro’o ’ia ha’apa’o i tāna mau fa’auera’a, ’e ’ia tātarahapa ’e ’ia haere atu iāna ra.

I te pū o te fa’anahora’a nō te ’oa’oa a te Metua, tō tātou ïa rirora’a hau atu mai tāna tamaiti here ’o Iesu Mesia. I roto i te mau mea ato’a, te hi’ora’a ’o te Fa’aora tō tātou arata’i maita’i a’e. ’Aita ’oia i fa’a’erehia i te tītaura’a ’ia ha’apāpū iāna iho. ’Ua fa’a’oroma’i ’oia nō te mau tamari’i ato’a a te Metua i te ao ra, ma te ’aufau i te ho’o nō tā tātou mau hara ato’a. ’Ua fāri’i ’oia i te māuiui nō te mau ta’ata ato’a tei haere mai ’e ’o tē haere mai i te tāhuti nei.

’Ia uiui ana’e ’outou ē, e aha te rahira’a māuiui e mara’a ia ’outou ’ia fa’a’oroma’i maita’i, ’a ha’amana’o iāna. ’Ua māuiui ’oia i te mea tā ’outou e māuiui nei, ’ia ti’a iāna ’ia ’ite ē, nāhea ’ia amo ia ’outou. E’ita paha ’oia e ’īriti i te teimaha, e hōro’a mai rā ’oia ia ’outou i te pūai, te tāmāhanahana, ’e te ti’aturira’a. ’Ua ’ite ’oia i te ’ē’a. ’Ua inu ’oia i te ’āu’a maramara. ’Ua fa’aruru ’oia i te mamae nō te tā’āto’ara’a.

Tē fa’a’amuhia nei ’outou ’e tē tāmāhahanahia nei nā te hō’ē Fa’aora here, tei ’ite nāhea ’ia fa’aora ia ’outou i roto i te mau huru tāmatara’a ato’a tā ’outou e fārerei nei. ’Ua ha’api’i ’o Alama :

« ’E e haere atu ’oia ma te fa’a’oroma’i i te māuiui, ’e te ’ati, ’e te mau huru fa’ahemara’a ato’a ra ; ’e e nā reira ’oia ’ia fa’ati’ahia te parau tei nā ’ō mai ra ē, e rave ’oia i te māuiui ’e te mau ma’i o tāna mau ta’ata iāna iho.

« ’E e fa’a’oroma’i ’oia i tōna pohera’a, i tātara ai ’oia i te mau tāpe’a o te pohe i ru’uru’uhia ai tōna ra mau ta’ata ; ’e e rave ’oia i tō rātou paruparu i ni’a iāna iho ’ia fa’a’īhia tōna ra ’ā’au i te aroha i au i te tino, ’ia ’ite ’oia nā roto i te tino i te rāve’a e fa’aora ai i tōna mau ta’ata i tō rātou paruparura’a ra ». ⁵

Hō’ē rāve’a e fa’aora ai ’oia ia ’outou ’oia ho’i, e ani manihini ’oia ia ’outou ’ia ha’amana’o tāmau noa iāna ’e ’ia haere mai iāna ra. ’Ua fa’aitoito mai ’oia ia tātou :

« E haere mai ’outou iā’u nei, e te feiā ato’a i ha’a rahi ’e tei teiaha i te hōpoi’a, e nā’u ’outou e fa’aora.

« ’A rave mai i ta’u zugo i ni’a ia ’outou, ’e ’ia ha’api’ihia ’outou e au, tē marū nei ho’i au ’e tē ha’eha’a o te ’ā’au : ’e e noa’a ho’i te ora i tō ’outou vārua ». ⁶

Te rāve’a nō te haere iāna ra ’o te ’oa’oara’a ïa i tāna mau parau, ’o te fa’a’itera’a i te fa’aro’o i roto i te tātarahapa, ’ia mā’iti ’ia bāpetizohia ’e ’ia ha’amauhia nā tōna tāvini ha’amanahia, ’e i muri iho, e ha’apa’o i tā ’outou mau fafaura’a i te Atua. E tono mai ’oia i te Vārua Maita’i ’ei hoa nō ’outou, ’ei tāmāhanahana, ’e ’ei arata’i.

Mai te mea e ora ’outou ma te ti’amā nō te fāri’i i te hōro’a ’o te Vārua Maita’i, e nehenehe te Fatu e arata’i ia ’outou i te vāhi hau, noa atu ē, e’ita ’outou e ’ite i te ’ē’a. Nō’u nei, pinepine ’oia i te fa’a’ite i te ta’ahira’a e rave i muri iho ’aore rā, e piti. E mea varavara roa tōna hōro’ara’a mai iā’u i te hō’ē ’itera’a nō te tau ātea i muri nei, noa atu rā te varavara o te reira mau ’itera’a, ’ua arata’i te reira i te mea tā’u e mā’iti e rave i roto i te orara’a i te mau mahana ato’a.

’Ua parau te Fatu ē :

« E ’ore roa e ti’a ia ’outou ’ia ’ite nā roto i tō ’outou mata ta’ata noa nei, nō teie taime nei, i te ’ōpuara’a nō tō ’outou Atua nō ni’a i terā ra mau mea ’o te tupu a muri atu ra, ’e te hanahana ho’i ’o tē tae mai i muri a’e i te mau ’ati e rave rahi ra.

« Nō te mea i muri mai i te mau ’ati e rave rahi ra e tae mai ïa te mau ha’amaita’ira’a ». ⁷

Te ha’amaita’ira’a rahi a’e o tē tae mai ’ia fa’a’ite ana’e tātou i te ha’apa’o maita’i i tā tātou mau fafaura’a i roto i tō tātou mau tāmatara’a, ’o te hō’ē ïa tauira’a i roto i tō tātou huru. Nā roto i te mā’itira’a tātou ’ia ha’apa’o i tā tātou mau fafaura’a, e nehenehe te mana ’o Iesu Mesia ’e te mau ha’amaita’ira’a o tāna tāra’ehara e ’ohipa i roto ia tātou. E nehenehe tō tātou ’ā’au e tāmarūhia nō te here, nō te fa’a’ore i te hapa, ’e nō te ani manihini ia vetahi ’ē ’ia haere mai i te Fa’aora ra. E tupu i te rahi tō tātou ti’aturi i te Fatu. E topa tō tātou mau mata’u.

I teienei, noa atu teie mau ha’amaita’ira’a tei fafauhia nā roto i te ’ati, ’eiaha tātou e ’imi i te ’ati. I roto i te ’itera’a tāhuti nei, e taime rahi tō tātou nō te ha’apāpū ia tātou iho, ’ia tāmata-’eta’eta-hia nō te riro hau atu mai te Fa’aora ’e tō tātou Metua i te ao ra.

Ta’a ’ē atu i te reira, e ’ite tātou i te ’ati o vetahi ’ē, ’e e tāmata tātou i te tauturu. E mea fifi mau te reira mai te mea tē tāmata-ato’a-hia ra tātou iho. E ’ite rā tātou ē, ’ia amo ana’e tātou i te hōpoi’a a vetahi ’ē, noa atu e mea na’ina’i, e ha’apa’arihia tō tātou tua, ’e e ’ite tātou i te hō’ē māramarama i roto i te pōiri.

I roto i teie, ’o te Fatu tō tātou hi’ora’a. I ni’a i te tātauro nō Goratota, i muri a’e i te māuiui rahi tāna i fāri’i, ’o tei ha’apohe ho’i iāna ’āhiri ē, e ’ere ’oia i te tamaiti fānau nā te Atua, ’ua hi’o atura ’oia i tōna feiā hāmani ’ino, ’e ’ua parau atura i tōna metua, « e tā’u Metua, e fa’a’ore mai i tā rātou hara, ’aore ho’i rātou i ’ite i tā rātou e rave nei ». ⁸ ’A mamae ai ’oia nō te mau ta’ata ato’a e ora a muri a’e, hi’o mai ra ’oia nā ni’a mai i te tātauro, ia Ioane ’e i tōna metua vahine e ’oto ra ’e ’ua aupuru mai ra iāna i roto i tōna ’ati :

« E ’ia hi’o ihora Iesu i tāna metua vahine ’e te pipi here nāna ra i te ti’a-noa-ra’a i pīha’i iho, ’ua parau ihora ’oia i tāna metua vahine, e teie nei vahine, ’a hi’o na i tō tamaiti !

’Ua parau ihora ho’i ’oia i taua pipi here ra, ’a hi’o na i tō metua vahine ! ’E i reira ra ’oia i te arata’ira’ahia atu e taua pipi ra i tōna iho ’utuāfare ». ⁹

Nā roto i tāna mau ’ohipa i taua mahana hau roa a’e i te mo’a, ’ua hōro’a ’oia i tōna ora nā roto i tōna iho hina’aro nō tātou tāta’itahi, ma te pupu i te tauturu ’eiaha i roto noa i teie orara’a, i roto ato’a rā i te ora mure ’ore a muri a’e.

’Ua ’ite au i te mau ta’ata ’ia fa’ateitei i ni’a roa ma te fa’a’ite i te ha’apa’o maita’i i roto i te mau tāmatara’a ri’ari’a. Tē vai nei te mau hi’ora’a i roto i te ’Ēkālesia tā’āto’a i teie mahana. Tē topa turi nei te ta’ata i raro nō tō rātou mau ’ati. Nō tō rātou fa’aro’o tāmau māite ’e te tauto’ora’a, tē rahi nei tō rātou rirora’a mai te Fa’aora ’e tō tātou Metua i te ao ra te huru.

’Ua ha’api’i mai au i te tahi atu ha’api’ira’a mai roto mai i tō’u metua vahine. ’Ei tamāhine, ’ua ro’ohia ’oia i te ma’i pe’e arapo’a, ’e ’ua fa’atata roa ’oia i te pohe. I muri a’e, ’ua ro’ohia ’oia i te ira tuiroro. ’Ua pohe tōna metua tāne i tōna ’āpīra’a, ’e nō reira, ’ua tauturu tō’u māmā ’e tōna taea’e i te pāturura’a i tō rāua māmā.

I tōna orara’a tā’āto’a, ’ua ’ite ’oia i te mau fifi o te mau tāmatara’a o te ma’i. I roto i nā 10 matahiti hope’a o tōna orara’a, ’ua tāpūhia ’oia e rave rahi taime. Terā rā i roto i te mau mea ato’a, ’ua ha’apāpū ’oia i tōna ha’apa’o maita’i i te Fatu, noa atu ’ua tārava noa i ni’a i te ro’i. Hō’ē noa hōho’a i ni’a i te papa’i o tōna piha ta’otorora’a, tō te Fa’aora. Tāna mau parau hope’a iā’u i ni’a i tōna ro’i pohera’a, ’o teie ïa : « E Hal e au ra e ma’i hūpē tō ’oe. E ti’a ia ’oe e ha’apa’o maita’i ia ’oe ».

I tōna hunara’a, ’o Elder Spencer W. Kimball te ta’ata a’o hope’a. I muri a’e i tōna paraura’a i te tahi mau mea nō ni’a i tōna mau tāmatara’a ’e tōna ha’apa’o maita’i, ’ua parau pāpū ’oia i teie : « Tē māere nei paha te tahi pae o ’outou ē, nō te aha ’o Mildred i māuiui ai mai teie te rahi ’e te maoro. E fa’a’ite atu vau nō te aha. Nō te mea ’ua hina’aro te Fatu e fa’a’ana’ana hau ri’i ā iāna ».

Tē fa’a’ite nei au i tō’u māuruuru nō te mau melo fa’aro’o e rave rahi o te ’Ēkālesia a Iesu Mesia ’o tē amo nei i te mau hōpoi’a ma te fa’aro’o pāpū, ’e ’o tē tauturu nei ia vetahi ’ē ’ia amo i tā rātou, ’a ’imi ai te Fatu ’ia fa’a’ana’ana hau ri’i atu ā ia rātou. Tē fa’a’ite ato’a nei au i te here ’e i te fa’ahiahia i te feiā ’atu’atu ’e te feiā fa’atere ’ati a’e te ao nei ’o tē tāvini nei ia vetahi ’ē ’a fārerei ai rātou ’e tō rātou ’utuāfare i te reira huru fa’a’ana’anara’a.

Tē fa’a’ite pāpū nei au ē, e mau tamari’i pā’ātoa tātou nā tō tātou Metua i te ao ra ’o tei here ia tātou. Tē ’ite nei au i te here o te peresideni Russell M. Nelson nō te mau ta’ata ato’a. ’O ’oia te peropheta a te Fatu i te ao nei i teie mahana. ’O tā’u ïa e fa’a’ite pāpū nei i te i’oa mo’a ’o te Fatu Iesu Mesia, ’āmene.