E ani, e ’imi, ’e e pātōtō

’A haere ai te Fa’aora i te fenua Amerika i muri a’e i tōna ti’afa’ahoura’a, ’ua fa’ahiti fa’ahou ’oia i te hō’ē anira’a tāna i hōro’a i tāna mau pipi i Galilea. ’Ua parau ’oia :

« E ani, e hōro’ahia mai tā ’outou ; e ’imi, e ’itea ïa ia ’outou ; e pātōtō atu, e ’īritihia mai te ’ōpani ia ’outou.

« ’O tei ani ra ho’i, ’ua noa’a ïa ; ’e ’o tei ’imi ra, ’ua ’itea ïa ; ’e te fēiā ato’a i pātōtō ra, ’ua ’īritihia ïa te ’ōpani » (3 Nephi 14:7–8; hi’o ato’a Mataio 7:7–8).

’Ua hōro’a ato’a mai tō tātou peropheta, te peresideni Russell M. Nelson, i te hō’ē anira’a mai te reira i tō tātou nei ’anotau. ’Ua parau ’oia : « E pure nā roto i te i’oa o Iesu Mesia nō ni’a i tō ’outou mau māna’ona’ora’a, tō ’outou mau mata’u ’e tō ’outou mau paruparu—’oia ïa, te hia’ai mau o tō ’outou ’ā’au. ’Ei reira e fa’aro’o ai ! E pāpa’i i te mau mana’o e tae mai i roto i tō ’outou ferurira’a. E pāpa’i i tō ’outou mau mana’o ’e e pe’e i te reira nā roto i te ’ohipa tei fa’auruhia ’outou ’ia rave. Mai te mea ē e tāmau noa ’outou i teie ’ohipa i terā mahana ’e terā mahana, i terā ’āva’e ’e terā ’āva’e, i terā matahiti ’e terā matahiti, ’e tupu ïa ’outou i te rahi i roto i te parau tumu o te heheura’a’ ». ²

’Ua parau fa’ahou te peresideni Nelson, « i te mau mahana i muri nei, e’ita tātou e ora mai i te pae vārua mai te peu ’aita te fa’aurura’a arata’i ’e te fa’atere ’e te tāmāhanahana ’e te tāmau a te Vārua Maita’i ». ³

Nō te aha e mea faufa’a rahi te heheura’a nō tō tātou ora pae vārua ? Nō te mea e nehenehe te ao nei e riro ’ei mea ’āno’ino’i ’e te māniania, te ’ī i te ’ino’ino ’e te mau peu fa’anevaneva. Nā te ’āparaura’a i tō tātou Metua i te Ao ra e fa’ati’a ia tātou ’ia fa’ata’a i te mea mau ’e i te mea hape, i te mea faufa’a nō te fa’anahonahora’a a te Fatu nō tātou ’e i te mea e ’ere i te mea faufa’a. E nehenehe ato’a te ao nei e riro ’ei mea ’eta’eta ’e te māuiui i te ’ā’au. Terā rā, ’a ’īriti ai tātou i tō tātou ’ā’au i roto i te pure, e ’ite tātou i te tāmāhanahana nō ō mai i te Metua i te Ao ra, ’e te ha’apāpūra’a ē, tē here nei ’e tē ha’afaufa’a nei ’oia ia tātou.

’Ua parau te Fatu ē, « ’o tei ani ra ho’i, ’ua noa’a ïa ». E au ra ē e ohipa ’ōhie te anira’a, e mea pūai ato’a rā i te mea ē, e fa’a’ite te reira i tō tātou mau hina’aro ’e tō tātou fa’aro’o. Terā rā, e rave te reira i te taime maoro ’e te fa’a’oroma’i nō te ha’api’i mai ’ia hāro’aro’a i te reo o te Fatu. E ha’apa’o māite tātou i te mau mana’o ’e te mau ferurira’a e tae mai i roto i tō tātou ’ā’au, ’e e pāpa’i tātou i te reira, mai tā tō tātou peropheta i parau mai ia tātou ’ia rave. Te pāpa’ira’a i tō tātou mau mana’o, e tuha’a faufa’a roa ïa nō te fāri’ira’a. E tauturu te reira ia tātou ’ia ha’amana’o fa’ahou, ’ia hi’o fa’ahou, ’e ’ia ’ite fa’ahou i te mea tā te Fatu e ha’api’i ia tātou.

’Aita i maoro a’e nei, ’ua parau mai te hō’ē ta’ata iā’u, « tē ti’aturi nei au ē, e parau mau te heheura’a a te ta’ata iho. Tē ti’aturi nei au ē, e fa’a’ite mai te Vārua Maita’i iā’u i te mau mea ato’a tē ti’a iā’u ’ia rave. ⁴ E mea ’ōhie ’ia ti’aturi, ’ia ’ite ana’e au i tō’u ’ōuma ’ia ahu ma te mana’o tapetepete ’ore. ⁵ Nāhea rā e nehenehe ai iā’u ’ia fāri’i i te Vārua Maita’i ’ia paraparau mai iā’u mai te reira te huru i te mau taime ato’a ? »

I tei herehia e au, ’e ’ia ’outou pā’āto’a na, tē parau atu nei au ē, tē hina’aro ato’a nei au ’ia ’ite tāmau i taua mau mana’o pūai ra nō ō mai i te Vārua ra, ’e ’ia ’ite māramarama i te mau taime ato’a i te ’ē’a e pe’e. ’Aita rā e ’itehia iā’u. Terā rā, te mea tā tātou e ’ite pinepine a’e, ’o te reo iti ha’iha’i ïa o te Fatu i te muhumuhura’a mai i tō tātou vārua ’e te ’ā’au, « ’oe. ’A tāmau noa ; ’a rave ma te maita’i e mara’a ia ’oe. E tauturu atu vau ia ’oe ». ’Aita e tītauhia ia tātou i te mau taime ato’a ’ia ’ite i te mau mea ato’a, ’aore rā, ’ia hi’o i te mau mea ato’a.

Tē ha’apāpū fa’ahou mai nei te reo iti marū ’e te ha’iha’i, tē fa’aitoito mai nei, ’e te tāmāhanahana mai nei—’e e rave rahi taime, ’o te reira noa tā tātou e hina’aro nō te reira mahana. Tē vai mau ra te Vārua Maita’i, ’e e mea mau tōna mau mana’o—tei rahi ’e tei iti.

’Ua fafau ā te Fatu ē, « e ’o tei ’imi ra, ’ua ’itea ïa ». Te aura’a o te ’imira’a, ’o te tauto’ora’a ïa i te pae ferurira’a ’e i te pae vārua—te ferurira’a, te tāmatara’a, ’e te tuatāpapara’a. E ’imi tātou nō te mea tē ti’aturi nei tātou i te mau parau fafau a te Fatu. « ’O tē ha’amori i te Atua ra, e fa’aro’o ’oia, ’e e Atua, e tīa’i, ’e ’o ’oia te fa’autu’a i te feiā i ’imi pāpū iāna ra ».Hebera 11:6). ’Ia ’imi ana’e tātou, tē fa’a’ite ra ïa tātou ma te ha’eha’a ē, e rave rahi ā tā tātou e ha’api’i mai, ’e e fa’arahi te Fatu i tō tātou hāro’aro’ara’a, ma te fa’aineine ia tātou nō te fāri’i hau atu ā. « Inaha ho’i, te na ’ō mai ra te Fatu te Atua, e hōro’a vau i te mau fa’aue i te mau tamari’i a te ta’ata, ’e ’ua nā ni’a iho i te fa’aue, ’ua a’o, ’e ’ua nā ni’a iho i te a’o, te tahi vāhi iti i’ō nei, ’e mai reira ho’i ’ei ’ō te tahi vāhi iti… nō te mea e hōroa atu ā vau iāna i tei fāri’i mai ra » (2 Nephi 28:30).

I te hope’a ra, ’ua parau a’era te Fatu, « ’e te fēiā ato’a i pātōtō ra, ’ua ’īritihia ïa te ’ōpani ». E pātōtō, ’oia ho’i, e ha’a ma te fa’aro’o. ’Ia pe’e ana’e tātou iāna ma te itoito, e ’īriti te Fatu i te ’ē’a i mua ia tātou. Tē vai ra hō’ē hīmene nehenehe roa e ha’api’i nei ia tātou ’ia « ti’a i ni’a ’e ’ia rave i te tahi atu ’ohipa, ’eiaha rā i te moemoeā i tō [tātou] fare i ni’a ra. E mea ’oa’oa ’ia rave i te maita’i, e ’oa’oa fāito ’ore, e ha’amaita’ira’a nō te ’ohipa ’e te here ». ⁶ ’Aita i maoro a’enei, tē fa’ata’a ra ’o Elder Gerrit W. Gong, nō te Tino Ahuru Ma Piti ’āpōsetolo ē, pinepine te heheura’a i te tae mai i te taime tē rave ra tātou i te maita’i. Tē parau ra ’oia ē : ’Ia tāmata ana’e tātou e toro i te rima nō te tāvini i te feiā ’ati a’e ia tātou, tē feruri nei au ē, e hōro’a mai te Fatu ia tātou i te hō’ē fāito hau atu ’o tōna here nō rātou ’e nō tātou ato’a ïa. Tē feruri nei au ē, e fa’aro’o tātou i tōna reo—e ’ite tātou iāna i roto i te hō’ē rāve’a ta’a ’ē—’ia pure ana’e tātou nō te tauturu i te feiā ’ati a’e ia tātou nō te mea, terā te hō’ē o te mau pure tāna e mea hina’aro roa a’e e pāhono ». ⁷

’Ua hōro’a mai terā mana’o ’ōhie roa i roto i te Mai, pe’e mai ’ia feruri i tō’u mau ha’amaita’ira’a, i te hō’ē vārua marū ’e i te tahi mau ’itera’a vārua mana’o-’ore-hia. ’A tāmau noa ai au i te tai’o nō ni’a ia Alama ’e tāna ’ohipara’a i Amoniha, ’ua ’ite a’era vau ē, tē hōro’a nei ’o Alama i te hō’ē hi’ora’a maita’i nō te aura’a o te mau parau, e ani, e ’imi, ’e e pātōtō. Tē tai’o nei tātou ē, « tē ’ohipa hua ra Alama i te Vārua i te tōra’a i te Atua nā roto i te pure u’ana, ’ia nini’i mai ’oia i tōna Vārua i ni’a iho i te feiā ». Terā rā, ’aita taua pure ra i pāhonohia mai tāna i hina’aro, ’e ’ua tīahihia Alama i rāpae i te ’oire. « ’E te teiaha noa ra Alama i tē mihi ra », ’ua fātata ’oia i te fa’aru’e, ’a hōro’a mai ai te hō’ē melahi i teie poro’i : « E ao tō ’oe e Alama ; e tenā na, ’a fa’ateitei i tō upo’o na i ni’a, e ’oa’oa, e mea ti’a roa ho’i ’ia ’oa’oa ’oe ». Parau atura te melahi iāna ’ia ho’i i Amoniha ’e ’ia tāmata fa’ahou, « ’e ’ua ho’i ’oi’oi ihora » ’o Alama. ⁸

E aha tā tātou e ha’api’i mai nā roto ia Alama nō ni’a i te anira’a, te ’imira’a, ’e te pātōtōra’a ? Tē ha’api’i mai nei tātou ē, e tītau te pure i te ’ohipa pae vārua, ’e e’ita te reira ’e arata’i atu i te mau taime ato’a i te mea tā tātou e tīa’i ra. Terā rā, ’ia tupu ana’e te mana’o paruparu i roto ia tātou ’aore rā ’ia teiaha tātou i te mihi, e hōro’a mai te Fatu ia tātou i te tāmāhanahana ’e te pūai nā roto i te mau rāve’a rau. E’ita paha ’oia e pāhono mai i tā tātou mau uira’a ato’a, ’aore rā, e tātara i tō tātou mau fifi ato’a i terā iho taime ; e fa’aitoito rā ’oia ia tātou ’ia tāmata noa. I reira, mai te mea ’e fa’atano tātou i tā tātou fa’anahora’a i ni’a i tāna fa’anahora’a, ’e ’īriti ’oia i te ’ē’a nō tātou, mai tāna i nā reira nō Alama.