Fa’ahereherehia e te Fatu

I te hō’ē mahana, e rave rahi matahiti i ma’iri, tē tāvini ra vau ’ei taure’are’a misiōnare i roto i te hō’ē ’āma’a iti i ni’a i te motu iti ra nō Amani Oshima, i Tāpōnē, ’ua ’oa’oa roa māua tō’u hoa i te fa’aro’ora’a ē e tere mai te peresideni Spencer W. Kimball nā Asia ’e ’ua tītau-manihini-hia te mau melo ato’a ’e te mau misiōnare i Tāpōnē ’ia haere mai i Tokyo nō te fa’aro’o i te peropheta i te ’āmuira’a ārea. Ha’amata a’era mātou te mau melo o te ’āma’a i te fa’anaho nō te ’āmuira’a, ’oia ho’i 12 hora pahī nā ni’a i te miti nō Taina Hiti’a o te rā i te fenua rahi nō Tāpōnē, ’e i muri iho 15 hora pere’o’o auahi nō te haere i Tokyo. Te vāhi ’ino rā, ’aita roa atu ïa. ’Ua tae mai te parau a tō mātou peresideni misiōni ē, nō te ātea roa ’e te maoro o te tere, e’ita māua e tae atu i te ’āmuira’a i Tokyo.

Tē pā’uma ra te mau melo o tō mātou ’āma’a iti nō te fano atu i Tokyo, e fa’aea noa mai māua. Mai te huru te mau mahana nō muri iho ’ei mau mahana maniania ’ore ’e te ta’ata ’ore. ’O māua ana’e i roto i te fare purera’a na’ina’i nō te purera’a ’ōro’a, tei ’ō ïa te Feiā Mo’a ’e te mau misiōnare nō Tāpōnē i te ’āmuira’a.

’Ua rahi atu ā tō’u mana’o hepohepo i te fa’aro’ora’a vau ma te ’oa’oa i te mau melo o te ’āma’a i te ho’ira’a mai mai te ’āmuira’a i muri ri’i mai, nō te fa’a’ite mai ē, ’ua fa’aara te Peresideni Kimball i te hō’ē hiero i Tokyo. ’Ua fa’ati’a noa mai rātou ma te ’ana’anatae rahi i te tupura’a tō rātou moemoeā. ’Ua fa’ati’a mai rātou nō te mau melo ’e te mau misiōnare, i te fa’aro’ora’a i te fa’aarara’a nō te hiero, tei ’oa’oa roa ’e ’ua pōpō roa.

’Ua ma’iri te mau matahiti, tē ha’amana’o noa nei rā vau i tō’u hepohepo nō te ’orera’a i haere i taua putuputura’a rahi ra.

I te mau ’āva’e i ma’iri, ’ua feruri au i teie ’ohipa, ’a fa’aruru ai te ta’ata i te hepohepo rahi ’e te ’oto—rahi atu ā ’e hōhonu atu ā i tō’u hepohepo ’ei taure’are’a misiōnare—tā te pararera’a ma’i pohe COVID-19 i fa’atae mai ’ati a’e i te ao nei.

I te ha’amatara’a o teie matahiti, ’a mara’a ’oi’oi ai te pararera’a ma’i pohe, ’ua fafau atu te Peresidenira’a Mātāmua ē « e riro te ’Ēkālesia ’e tōna mau melo i te fa’a’ite i te ha’apa’o maita’i ’e te fafaura’a ’ia riro ’ei tino huira’atira maita’i ’e ’ei ta’ata tupu maita’i » ¹ ’e e « hi’o maita’i roa » tātou. ² Nō reira ’ua ’ite tātou i te fa’ataimera’ahia te mau rurura’a a te ’Ēkālesia ’ati a’e i te ao nei, ’ua fa’aho’ihia hau i te ’āfara’a o te nu’u misiōnare a te ’Ēkālesia i tō rātou fenua ’āi’a, nā reira ato’a te ’ōpanira’ahia te mau hiero ato’a a te ’Ēkālesia. E rave rahi o ’outou tē fa’aineine ra i te haere i te hiero nō te mau ’ōro’a feiā ora—mai te mau tā’atira’a hiero. Vetahi o ’outou tei fa’aoti ’oi’oi a’e i tā ’outou tāvinira’a misiōnare ’aore rā ’ua ha’amāuruuru-poto-hia ’e ’ua tauihia te tonora’a.

I roto i terā tau, ’ua ’ōpani te mau fa’aterera’a hau ’e te mau fa’atere ha’api’ira’a i te mau fare ha’api’ira’a—tei fa’ahuru ’ē roa i te hōro’ara’a parau tū’ite ’e tei fa’ahepo i te fa’a’orera’a tata’ura’a ha’uti ’e te tahi atu mau ’āru’i ’e te mau ’ohipa sōtiare, nō te hīro’a tumu ’e nō te ha’api’ira’a. E rave rahi o ’outou tei fa’aineine nō te mau ’āru’i ’aita i fa’atupuhia, te mau hīmenera’a ’aita i fa’aro’ohia ’e te mau tata’ura’a mā’ona ’aita i ha’utihia.

Te mea pa’ari fa’ahou atu, ’o te mana’o ïa o te mau ’utuāfare tei pohe tei herehia i roto i teie tau ’ōro’a hunara’a ’aore rā te putuputura’a mai tā rātou i hina’aro.

’Ei ha’apotora’a, e rave rahi roa o ’outou tei fa’aruru i te hepohepo māuiui rahi mau, te ’oto ’e te fiu o te ’ā’au. Nō reira, nāhea tātou i te ora mai, nāhea i te fa’a’oroma’i ’e nāhea i te haere i mua i te taime e au ē, ’ua pāparari te mau mea ?

I te ha’amatara’a te peropheta Nephi i te ’ō’oti i ni’a i te mau ’api na’ina’i, e ta’ata pa’ari ’oia. I te hi’ora’a ’oia i tōna orara’a ’e tāna tāvinira’a, ’ua fa’a’ite mai ’oia i te hō’ē mana’o faufa’a rahi, i roto i te ’īrava mātāmua nō te Buka a Moromona. ’Ua riro teie ’īrava ’ei parau tumu faufa’a rahi e feruri nō tātou i teie nei tau. Teie taua mau parau mātau ra : « I fānau vau, ’o Nephi, i nā metua maitata’i », tāna i pāpa’i, « ’e i ’ite au i te mau ’ati e rave rahi i tō’u pu’e mahana, ’āre’a rā i fa’ahereherehia vau e te Fatu i tō’u ato’a mau mahana ». ³

’Ei feiā tuatāpapa i te Buka a Moromona, ’ua mātau tātou i te mau ’ati tā Nephi e parau ra. Teie rā, i muri iho i te fāri’ira’a i te parau nō tōna mau ’ati i tōna pu’e mahana, tē hōro’a nei Nephi i tāna hi’ora’a ’evanelia nō te fa’ahereherehia ’oia e te Fatu i tōna ato’a mau mahana. ’Aita te mau taime ’ati ’e te hepohepo i taui i te mata ha’apa’o a te Fatu ’a hi’o ai ’oia i ni’a ia tātou ’e a ha’amaita’i ai ia tātou.

’Aita i maoro a’enei, ’ua ruru māua Lesa nā roto i te rorouira ’e fātata e 600 misiōnare i Auterāria, nō te rahira’a o rātou, tei raro a’e ïa i te mau ’ōpanipanira’a nō te COVID-19, e rave rahi tē ’ohipa ra nā roto mai i tō rātou fare. ’Ua hi’o ’āmui mātou i te mau ta’ata i roto i te Faufa’a ’Āpī, te Buka a Moromona ’e Te Parau Ha’api’ira’a ’e te mau Parau Fafau, tei ha’amaita’ihia e te Fatu nō te fa’atupura’a i te mea rahi i roto i te ’ati. Nō rātou pā’āto’a, ’ua paraparau-rahi-hia te mau mea tei noa’a ia rātou i te rave ma te tauturu a te Fatu, hau atu i te mea e’ita i noa’a ia rātou nō tō rātou tau ’ōpanipanira’a ’e te mau ’ōpanira’a.

’Ua tai’o mātou nō Paulo ’e Sila, tei ha’amauhia tō rāua ’āvae i roto i te rā’au, ’e ’ua pure, ’ua hīmene, ’ua ha’api’i i te ta’ata, ’ua fa’a’ite pāpū—’e ’ua bāpetizo roa i te tīa’i mau ’āuri. ⁴

’E fa’ahou ā nō Paulo i Roma, tei ’ōpanihia i roto i tōna fare e piti matahiti, i te roara’a o terā taime, ’ua tāmau ’oia i te « ha’api’i… ’e fa’a’ite… i te bāsileia o te Atua », ⁵ « ha’api’i mai ra i te mau parau o te Fatu ra ’o Iesu Mesia ». ⁶

Nō Nephi ’e Lehi, nā tamaiti a Helamana, i muri iho i te hāmani-’ino-ra’a ’e te maura’a i te fare tāpe’ara’a, ’ua ha’a’atihia rāua i te auahi pāruru ’a fa’aro’ohia ai te reo o te Fatu, « ’o te reo iti ïa ’e te marū roa… ’e ’ua puta te vārua mau iho ā [o te feiā haru] ». ⁷

Nō Alama ’e Amuleka i Amoniha, tei ’ite ē « e rave rahi tei fa’aro’o i tāna mau parau, ’e tei ha’amata i te tātarahapa, ’e i te ’imi i te parau i pāpa’ihia ra », ⁸ noa atu ā ’ua fa’ao’ō’ohia i muri iho, ’e ’aita e mā’a, ’aita e pape, ’aita e ’ahu, ’ua ru’uru’uhia ’e ’ua ’ōpanihia i roto i te fare tāpe’ara’a. ⁹

’E i te hope’a, nō Iosepha Semita tei māuiui rahi i roto i te fare tāpe’ara’a nō Liberty, tei mana’o ē ’ua vaiihohia ’oia ’e ’ua fa’aru’ehia, ’ei reira ’oia i fa’aro’o ai i te mau parau a te Fatu ē : « E riro ho’i ’ei maita’i nō ’oe na » ¹⁰ ’e « e vai noa te Atua i pīha’i iho ia ’oe na ē a muri ē a muri noa atu ». ¹¹

’Ua māramarama maita’i rātou tāta’itahi i te mea tā Nephi i ’ite : ’oia ho’i tō rātou ’itera’a i te mau ’ati e rave rahi tō rātou pu’e mahana, ’ua fa’ahereherehia rātou e te Fatu.

E nehenehe ato’a tātou e fa’aau i te reira ’ei melo tāta’itahi ’e ’ei ’ēkālesia, i te huru tātou i fa’ahereherehia e te Fatu i roto i te mau tau fifi tā tātou i fa’aruru a’enei i nā ’āva’e e rave rahi i ma’iri. ’A fa’ahiti ai au i teie mau hi’ora’a, ’ia ha’apūai te reira i tō ’outou ’itera’a pāpū nō te ti’ara’a hi’o o tō tātou peropheta ora, tei fa’aineine ia tātou i te mau fa’atanora’a hou te hō’ē noa a’e tāpa’o nō te pararera’a ma’i pohe, ’ua ti’a atu ra ia tātou ’ia fa’a’oroma’i i te mau fifi i tae mai.

’A tahi, te fa’atumu-rahi-atu-ā-ra’a-hia i ni’a i te ’utuāfare, turuhia e te ’Ēkālesia.

Piti matahiti i ma’iri, ’ua parau te Peresideni Nelson : « ’Ua mātau tātou i te feruri i te ‘’ēkālesia’ ’ei ’ohipa e tupu i roto i tō tātou mau fare purera’a, turuhia e te mau mea e tupu nei i te ’utuāfare. Tītauhia te tahi tauira’a i teie hōho’a… Te hō’ē ’Ēkālesia tei fa’atumuhia i ni’a i te ’utuāfare, turuhia e te mau mea e tupu i roto i tō tātou [mau fare purera’a] ». ¹² ’Auē ïa fa’atanora’a tohu ! ’Ua fa’a’ohipahia te ha’api’ira’a ’evanelia fa’atumuhia i ni’a i te ’utuāfare nō te ’ōpanira’ahia te mau fare purera’a nō te hō’ē tau. Noa atu ā tē ha’amata ra te ao nei i te ’ite i te hō’ē fāito au ’e tē ho’i ra tātou i roto i te mau fare purera’a, e tāpe’a noa tātou i tā tātou fa’anahora’a tuatāpapara’a ’evanelia fa’atumuhia i ni’a i te ’utuāfare, tei fa’ananeahia i te taime nō te pararera’a ma’i pohe.

Te piti o te hi’ora’a nō te fa’ahereherehia tātou e te Fatu, ’o te heheura’a ïa nō te aupurura’a i te huru teitei a’e ’e te mo’a a’e.

I te matahiti 2018, ’ua hōhora te peresideni Nelson i te aupurura’a ’ei fa’atanora’a « i roto i tā tātou aupurura’a ia vetahi ’ē ». ¹³ I te pararera’a ma’i pohe, ’ua ’itehia mai e rave rahi rāve’a nō te fa’a’oe’oe i tō tātou ’aravihi aupurura’a. ’Ua toro atu te mau taea’e aupuru ’e te mau tuahine aupuru, te feiā ’āpī tamāhine ’e tamāroa, ’e te tahi ato’a, i te rima, nō te fārerei, nō te ’āparau, nō te ’atu’atu i te ’āua, hāmani i te mā’a, fa’atae i te mau poro’i nā roto i te rāve’a ’āpī, ’e tae noa atu te ’ōro’a mo’a nō te ha’amaita’i i te feiā i roto i te ’ati. ’Ua aupuru ato’a te ’Ēkālesia i te ta’ata i roto i te pararera’a ma’i pohe ma te ’ōperera’a i te mau tauiha’a i te mau pū mā’a, te mau ha’apūra’a feiā fare ’ore, ’e te mau pū tauturu feiā tomo fenua, ’e i roto ato’a i te mau ’ōpuara’a e au i te vaira’a fifi roa o te ao i te pae nō te pohe po’ia. ’Ua pāhono te mau tuahine o te Sōtaiete Tauturu ’e tō rātou ’utuāfare i te ’ōpuara’a e hāmani e tau mirioni pāruru vaha ’e ihu nō te mau tuati ma’i.

Te hō’ē hi’ora’a hope’a nō te ha’amaita’ihia tātou i roto i te ’ati, ’o te itera’a ïa i te ’oa’oa fāito teitei roa nō te ho’ira’a mai te mau ’ōro’a o te hiero.

E ’ā’amu tē fa’ahōho’a maita’i i te reira. I te fāri’ira’a te tuahine Kaitlyn Palmer i tāna pi’ira’a misiōni i te ’āva’e ’Ēperēra i ma’iri, ’ua ’ana’anatae roa ’oia i te pi’ira’ahia ’oia ’ei misiōnare, e mea faufa’a rahi ato’a rā ’e te ta’a ’ē iāna ’ia haere i te hiero nō te fāri’i i te ’ōro’a hiero ’e nō te rave i te mau fafaura’a mo’a. ’Aita i maoro roa i muri iho i te tārenara’ahia tōna ’ōro’a hiero, ’ua tae mai te fa’aarara’a ē, e ’ōpanihia te mau hiero ato’a nō te hō’ē tau, nō teie pararera’a ma’i pohe. I muri iho i te fāri’ira’a ’oia i teie parau ’āpī ’oto rahi, tae fa’ahou mai nei te parau ē, e nā ni’a noa i te natirara tāna ha’api’ipi’ira’a misiōnare (PHM), i tōna iho fare. Noa atu ā teie mau hepohepora’a, ’ua fa’atumu Kaitlyn i ni’a i te tāpe’a-teitei-ra’a i tōna mana’o.

I terā mau ’āva’e, ’aita te tuahine Palmer i ha’amo’e noa atu i tōna tīa’ira’a e haere i te hiero. ’Ua ha’apae tōna ’utuāfare ’e ’ua pure ’ia matara mai te mau hiero hou ’oia ’a reva ai. Pinepine Kaitlyn i te ha’amata i tāna ha’api’ipi’ira’a misiōnare i te fare ma teie parau : « I teie nei mahana ānei te mahana e fāri’i ai mātou i te hō’ē semeio ’e e matara fa’ahou ā te mau hiero ? »

I te 10 nō ’Ātete, ’ua fa’aara te Peresidenira’a Mātāmua e matara te hiero o Kaitlyn nō te mau ’ōro’a feiā ora i te mahana iho tōna manureva e fa’aru’e ai nō tāna misiōni, i te ’ā’ahiata roa. E’ita e roa’ahia e haere i te hiero ’e e rave i te manureva. ’Aita tōna ’utuāfare i ti’aturi rahi roa, ’ua tāniuniu rā rātou i te peresideni hiero ia Michael Vellinga nō te hi’o ē, ’aita ānei e rāve’a nō te fa’atupu i terā semeio tā rātou i pure noa na. ’Ua pāhonohia tā rātou ha’apaera’a mā’a ’e te mau pure !

I te hora 2 i te ’ā’ahiata, ma’a hora nā mua a’e tōna revara’a, ’ua fāri’ihia te tuahine Palmer ’e tōna ’utuāfare, ma te roimata, i te ’ūputa o te hiero, e te peresideni hiero, tei fāri’i ia rātou : « ’Ia ora na ’e te ’utuāfare Palmer. Maeva i te hiero ! » ’A rave ’ai ’oia i tōna ’ōro’a hiero, ’ua fa’aitoitohia rātou ’ia ha’aviti inaha tē tīa’i ra te ’utuāfare nō muri iho i te ’ūputa o te hiero. Mai reira ’ua haere ’āfaro rātou i te taura’a manureva, ’ua hora iho ā nō tōna manureva ’ia reva atu i tāna misiōni.

E au ē, e mea au a’e te mau ’ōro’a o te hiero tei ’erehia e rave rahi ’āva’e, e mea au a’e i tei mana’ohia a’enei, ’a matara tātuha’a ai te reira ’ati a’e i te ao nei.

Nō te ’ōpani, ’a fa’aro’o mai na i te mau parau fa’aitoito ’e te ’ana’anatae ’e te fa’ateitei a te peropheta Iosepha Semita. E’ita roa te ta’ata e mana’o ē, ’ua pāpa’i ’oia i te reira i roto i te ’ati ’e te mo’emo’e, ma te fa’ahepohia ’e te ’ōpanihia i tōna fare i Nauvoo, i te tāpunira’a i te feiā e ’imi ti’a ’ore ra i te haru iāna.

« I teienei, e aha tā tātou e fa’aro’o i roto i te ’evanelia tā tātou i fāri’i ? Te hō’ē reo nō te ’oa’oa ! Te hō’ē reo nō te aroha mai te ra’i mai ra ; ’e te hō’ē reo nō te parau mau nō roto mai i te fenua nei ; te parau ’oa’oa nō te feiā i pohe ra ; tē hō’ē reo ’oa’oa nō te feiā ora nei ’e nō tei pohe ho’i ; te hō’ē mau parau pōpou nō te ’oa’oa rahi…

« E ’ere ānei i te mea ti’a ia tātou ’ia haere ā i roto i te hō’ē ’ohipa rahi roa mai teie te huru ? ’A haere i mua ’e ’eiaha rā ’ia haere i muri. ’A rohi… ’a haere ā ē tae noa atu i te taime e upo’oti’a ai ra ! ’A tu’u atu na ’ia ’oa’oa tō ’outou mau ’ā’au, ’e ’ia ’oa’oa rahi roa. ’Ia tupu mai te reo hīmene nō te fenua nei ». ¹⁴

Te mau taea’e ’e te mau tuahine, tē ti’aturi nei au ē, ’ia tae i te hō’ē mahana, e hi’o ’outou tāta’itahi i muri i te mau ’āru’i i fa’a’orehia ’e te ’oto, te mau hepohepo ’e te mo’emo’e e au i te mau tau fifi tā tātou e fa’aruru nei, ’e e ’ite tātou i i te mau ha’amaita’ira’a ta’a ’ē mau tei nā ni’a i te reira, nā reira ato’a te fa’aro’o ’e te ’itera’a pāpū rahi atu ā. Tē ti’aturi nei au ē, i teie nei orara’a ’e i te orara’a nō muri mai, e ha’amo’ahia tō tātou mau ’ati, tō tātou Amoniha, tō tātou fare tāpe’ara’a nō Liberty, nō tō tātou maita’i. ¹⁵ Tē pure nei au ē, mai ia Nephi te huru, e fā’i tātou i te mau ’ati i tō tātou nei pu’e mahana ’a ’ite ato’a ai ē, ’ua fa’ahereherehia tātou e te Fatu.

Tē ’ōpani nei au ma tō’u ’itera’a pāpū nō Iesu Mesia, ’oia tei nā roto ho’i i te ’ati ’e i roto i tāna tāra’ehara tā’ōti’a ’ore, ’ua pou i raro i te mau mea ato’a. ¹⁶ ’Ua taa iāna tō tātou ’oto, te māuiui ’e te tapineva. ’O ’oia tō tātou Fa’aora, tō tātou Tāra’ehara, tō tātou tīa’ira’a, tō tātou tāmāhanahanara’a ’e tō tātou Ora. Tē parau pāpū nei au nō te reira i tōna i’oa mo’a, ’o Iesu Mesia, ’āmene.