Sotavi na Mate ni Vakasama

E dina ni keitou marautaka vakavuvale na veivakalougatataki sautu ni marau ena salatu ni veiyalayalati, keitou sotava talega na vei ulunivanua cecere sara. Au gadreva meu wasea eso na ka keitou sotava me baleta na mate ni vakasama. Oqo e oka kina na yaluma vakavuniwai, druma ni yalo, veimuayaki ni loma, ADHD—ka so na gauna era waki vata kece. Au wasea na veika sotavi mosimosi oqo ena nodra veivakadonui era oka kina.

Ena noqu veiqaravi, au sotava e drau vakacaca na tamata yadua kei na matavuvale ka tautauvata na ka era sotava. Ena so na gauna au dau taroga na mate veivakalolomataki solega tu na vanua ka tukuni ena ivolanikalou e rawa ni oka kina na mate ni vakasama.¹ E ka ni vuravura raraba, e tara na vanua lelevu kei na umatamata, ka tarai ira kece—na gone, qase, vutuniyau, kei na dravudravua. Na lewe ni Lotu e sega ni vagalalataki mai kina.

Na gauna oqo, na noda ivakavuvuli e vakavulica meda saga meda vakataki Jisu Karisito ka vakataucokotaki Vua. Era lagata na luveda, “I’m trying to be like Jesus.”² Eda diva meda vinaka sara me vaka nirau vinaka sara na Tamada Vakalomalagi kei Jisu Karisito.³ Baleta na vakaleqai ni vakasama e rawa ni vakacacana na noda vinaka, vakawasoma e ka tabu. E yaco gona, me levu na lecaika, levu na rarawa galuvaki, ka levu na taqaya. E levu, era nanuma ni ra sega ni sotava na itagede ni rai, era dau nanuma cala ni sega na nodra tikina ena Lotu.

Me valuti na veivakacalai oya, a bibi kina me nanumi ni “na iVakabula e lomani ira yadudua na luvei Tamada. E kila vakamatata tu o Koya na mosi kei na dredre era sotava na lewe levu ni ra bula kaya tu na duidui mataqali bolebole ni leqa ni vakasama. ‘Ena lako yani ko Koya, ena vakila na mosi kei na veivakararawataki kei na veivakatovolei kecega; … ni na colata ko koya na nodra mosi kei na nodra tauvimate na nona tamata’ Alama 7:11; vakabibitaki; raica talega na Iperiu 4:15–16; 2 Nifai 9:21). Baleta ni sa vosota na veidredre kecega, e kila o Koya ‘na sereki ira na bobula’ (Luke 4:18; raica talega na Aisea 49:13–16).”⁴ Vakawasoma na bolebole e tukuna ni gadrevi me kuri na yaragi kei na veitokoni ka sega ni leqa ni itovo.

Meu wasea mada eso na noqu rai ena dredre eso a lako curuma na neitou matavuvale.

Taumada, e levu na tamata era lolosi vata kei keitou; ka ra sega ni vakalewai keitou. Ena vuku ni ravuravu ni taqaya ca, na lomaleqa, kei na yaluma, a suka kina ivale na luvei keirau tagane mai na nona kaulotu ni oti ga e va na macawa. Ni keirau nona itubutubu, e dredre vei keirau me keirau sotava na nuinuicala kei na rarawa baleta ni keirau a masuta vakalevu na nona vinaka. Me vaka na itubutubu kecega, eda vinakata me ra toso vinaka ka bula marau na luveda. Na kaulotu me dua na isausau bibi vua na neirau cauravou. Keirau vakananuma talega na ka era rawa ni nanuma na tamata.

Keirau lecava, na lesu mai ni neirau cauravou e vu ni rarawa tawayalani dina vua. Raica ni lomana okoya na Turaga ka vinakata me veiqaravi, ia ka sega ni rawa baleta na ka e sega ni kilamatata. A kunei koya kusarawa ena vanua ni tawa vakanuiui levu, ni valuta tiko na ora ni yalo titobu. E vakila ni sega ni ciqomi ka nunu tu vakayalo. E yaco me curumi koya na vakasama ni mate.

Ni tiko ena ituvaki veilecayaki oqo, e vakabauta na luvei keirau ni sa vo ga me vakamatei koya. E taura na Yalo Tabu kei ira na ivavakoso agilosi ena yasa ruarua ni ilati me ra vakabulai koya.

Ni vala tiko ena ivalu baleta nona bula ena gauna bibi dina oqo, na neitou vuvale, iliuliu ni tabanalevu, lewenilotu kei na itokani me veitokoni ka veiqaravi vei keitou.

Au sega ni se vakila na sovaraki ni loloma me vaka oya. Au sega ni se vakila na kaukauwa ena kena ivalavala ka vakaibalebale voleka vei au nodra vakacegui ira na gadreva na vakacegu. Keitou vakavinavinakataka vakavuvale na vei sovaraki oya.

Au sega ni vakamacalataka rawa na cakamana tawawiliki ka salavata na veika oqori. Na vakavinavinaka, ni bula na neirau cauravou, e taura e dua na gauna balavu kei na veiqaravi lelevu vakavuniwai, qarainibula ka vakayalo vei koya me bula ka me kila ni lomani, yaga ka gadrevi.

Au raica ni sega ni vaka oya na leqa kece me vakai keitou. Au rarawa vata kei ira era vakayalia ira era daulomana ka biu tu mai ena yalo ni lolosi kei na taro tawa saumi rawa.

Na noqu rai tarava sai koya ni rawa ni dredre vei ira na itubutubu me ra raica na dredre ni luvedra, ia sa dodonu me da vakavulici keda. Eda na kila vakacava na duidui ni dredre ka semati ki na tubu walega kei na ivakatakilakila ni tauvimate? Ni da itubutubu, sa noda na veimaroroi tabu me da vukei ira na luveda me ra lakova na bolebole ni bula; ia, e vica ga vei keda e kenadau ni vuniwai ni vakasama. E dina ga eda gadreva me da qarauni ira na luveda ena nodra vukei me ra vulica me rauti ira na nodra igu yalodina ni ra tovolea me ra sotava na nanamaki matau. Eda sa kila yadudua mai na noda malumalumu vakai keda ni tubu vakayalo e ikalawa ni toso.

Eda kilamatata oqo ni “sega na iwali-raraba rawarawa ni bula vinaka ni lomada kei na vakasama. Eda na sotava na lomaocaoca kei na yavavala baleta ni da bula tiko ena dua na vuravura lutu kei na yago lutu. Me kena ikuri, e levu na vuna ka rawa ni mua ki na dikevi ni tauvimate ni vakasama. Se cava na vinaka ni noda vakasama se lomada, na vakanamata kina tubu e bulabula cake mai na noda vakacakulea tiko na noda malumalumu.”⁵

Vei au kei na watiqu, e dua na ka e dau vukei keirau voli ga oya me tu voleka vua na Turaga. Ena railesu, keirau raica na veivakavulici malua ni Turaga vei keirau ena loma ni veigauna ni veilecayaki vakaitamera. Na Nona rarama e dusimaki keirau ena ikalawa yadudua e loma ni gauna butobuto. A vukea na Turaga me keirau raica ni talei ni yalo yadudua e bibi sara ena ituvatuva tawamudu mai na itavi vakavuravura cava ga se na rawaka.

Oqo tale, na noda vakatavulici keda baleta na tauvimate ni vakasama e vakarautaki keda ka vukei keda kei ira era kunedredre tiko. Na veitalanoa vakai keda e tadola ka rarama ena vukea na ulutaga bibi oqo me ciqoma na kauwai e ganita. E dina ga, ni itukutuku e liu vua na vakayarayarataki kei na ivakatakila. Na vei bolebole tawarairai tubu-wasoma oqori e rawa ni yaco vei keda kece, ia ni da sotavi ira tiko, era vaka ni ra sega ni cabeti rawa.

E dua na ka e gadrevi taumada meda kila oya ni sega dina sara ni da tiko taudua. Au sureti iko mo vulica na ulutaga ni bulabula ni vakasama ena iwasewase ni Veivuke ni Bula ni Gospel Library app. Na vuli ena mua me levu noda kilamatata, veiciqomi vakalevu, yalololoma vakalevu, loloma vakalevu. E rawa ni vakalailaitaka na leqa levu, ka vukea tiko meda tubu ka tara cake na vakanamata bulabula kei na veimaliwai bulabula.

Me iotioti ni noqu rai: e dodonu meda dau veiwanonovi tiko vakai keda. Meda veilomani vakai keda ka vakalelewa vakalailai—vakabibi ni sega ni sotavi vakatotolo na noda vakanamata. E dodonu meda vukei ira na luveda kei na itabagone mera vakila na loloma i Jisu Karisito e nodra bula, ni dredre mada ga ni ra vakila na loloma baleti ira ga. E vakasalataki ira na itubutubu o Elder Orson F. Whitney, ka lewena ni Kuoramu ni iApositolo Le Tinikarua, na sala mera vukei kina na luvedra era sotava na dredre: “Masulaki ira na … luvemuni.”⁶

Au dau vakananuma wasoma na cava na kena ibalebale na maroroi ira ena vakabauta Au vakabauta ni oka kina na cakacaka rawarawa ni loloma, yalomalua, yaloloma, kei na vakarokoroko. E kena ibalebale me vakatara mera tubu ena nodra ikalawa vakai ira kei na soli ni ivakadinadina me vukea mera vakila na loloma ni iVakabula. E gadreva meda vakasamataki ira vakalevu cake ka vakalailai baleti keda se oira na tani. Oya e kena ibalebale meda vosa vakallailai ka vakarorogo vakalevu cake sara. Meda lomani ira, vakaukauwataki ira, ka laveti ira wasoma ena nodra igu mera rawaka ka yalodina Vua na Kalou. Me itinitini, meda kitaka na noda kaukauwa taucoko meda tu volekati ira—me vaka ga noda tu voleka Vua na Kalou.

Vei kemuni kece ka tarai vakavoleka mai na tauvimate ni vakasama, takukuva matua na nomu veiyalayalati, kevaka mada ga ko sega ni vakila na loloma ni Kalou ena gauna oqo. Cakava na ka kece o rawata ka qai “tudei … me raica na veivakabulai ni Kalou, ka meda raica na ligana ni sa vakaraitaki mai.”⁷

Au vakadinadinataka ni o Jisu Karisito sa noda iVakabula. E kilai keda. E lomani keda o Koya, ka na waraki keda. Ena neitou dredre vakamatavuvale, sa yaco kina meu kila ni sa voleka sara. Sa dei tu na Nona yalayala:

Ni da kila na dei ni noda yavu, sa rawa kina ni da kaya ena marau:

Ena yacai Jisu Karisito, emeni.