Vakanuinui Tikoga

Na gauna au se gone lailai kina, au a vakasamataka meu sa dro tani mai vale. Ena ivakarau ni cauravou lailai, au vakila ni sega e lomani au.

A rogoci au o tinaqu ka kauwai ka vakadeitaki au. Au a lesu bula i vale.

O sa bau vakila beka ni ko sa dro tani tiko mai vale? Wasoma, na dro mai vale e tukuna na vakanuinui sa tasere se cavuka—na nuitaki keda tiko, vakai keda yadua, kei na Kalou. Ni sa bolei na vakanuinui, eda taroga meda vakanuinui tale vakacava.

Na noqu itukutuku nikua, eda sa lako tiko mai vale se lako tiko yani i vale, na Kalou ena tavaki keda.¹ Ki Vua eda na kunea na vakabauta kei na qaqa, vuku kei na kila meda vakanuinui tikoga. Vakakina, sa kerei keda meda veivakararamataki tiko, meda veivosoti vakalevu me lailai noda vakalewai keda ka vakai keda, me yaco Nona Lotu me vanua e vakilai sa noda vale, se isevu ni noda yaco mai se lesu tale.

Na vakanuinui sa cakacaka ni vakabauta. Na Kalou e vakabauti keda. Ia, na nuitaki ni tamata ena luluqa se kavoro ni:

• Dua na itokani, lewe ni bisinisi, se dua eda nuitaka e sega ni dina, vakararawataka, se beci keda.²

• E veidabui e dua na tamata vakawati.

• Ka rairai tawa namaki, ni dua eda lomana sara e mate, mavoa, se tauvimate.

• Eda sotava na taro vakosipeli tawa namaki, me vaka na ka e baleta na itukutuku makawa ni Lotu se lawa ni Lotu, ka dua e kaya ni noda lotu e vunia se sega ni tukuna na ka dina.

So tale na ka e rairai sega sara ni vakatabakidua ia sa ka bibi talega.

Eda rairai sega ni raici keda ena loma ni Lotu, eda vakila ni da duatani, vakalewai maivei ira eso.

Se, dina ni da cakava na ka kece e namaki, se bera tikoga ni ra vinaka mai. Dina ni da veisotari yadua tiko kei na Yalo Tabu, eda rairai sega ni vakila ni bula tiko na Kalou se ni dina na kosipeli.

E vuqa era vakila tiko ni sa gadrevi sara me lesuvi na nuitaki ni tamata kei na veimaliwai nikua.³

Ni da raica na vakanuinui, eda kila ni Kalou e Kalou ni ka dina ka “sega ni rawa ni lasu.”⁴ Eda kila ni ka dina sa kilai ni ka kecega nikua, nanoa, kei na kena ni mataka.⁵ Eda kila na ivakatakila tudei kei na veivakauqeti e tuva na dina tawaveisau ki na veituvaki me veisautaki.

Eda kila ni veiyalayalati kavoro e voroka na yalo. “Au cakava na veika lialia,” e kaya o koya. “E rawa beka ni ko vosoti au?” Rau veitauri liga beka na veiwatini, vakabauta me rau vakanuinui tikoga. Ena dua tale na ituvaki, e nanuma lesu o kaivesu, “Keu a maroroya beka na Vosa ni Vuku, au na sega ni tiko nikua.”

Eda kila na reki ena sala veiyalayalati ni Turaga, kei na kaci ni veiqaravi ena Nona Lotu sa veisureti me vakilai na veinuitaki ni Kalou kei na loloma vei keda yadua. Na lewe ni Lotu, kei ira na itabagone qase, era dau veiqaravi raraba ena Lotu kei na noda itikotiko raraba.

Ena vakauqeti o bisopi me kaciva e dua na veiwatini gone me veiqaravi ena isususu ni tabanalevu. Taumada, o tagane ena dabe toka vakatikitiki, wele ka vakayawaka. Toso na gauna, sa tekivu dredre vata kei ira na gone. E muri, rau sa vakavinavinaka na veiwatini. Taumada, rau a kaya, o yalewa a vinakati ira na gone, o tagane a sega. Nikua, na veiqaravi sa veisautaka ka duabautaki rau. Sa kauta talega na nodra reki na gone ki na nodrau vakawati kei na itikotiko.

Ena dua tale na siti, e dua na tina kei ira na luvena kei watina a kurabui ka uabaleti ia a ciqoma ni sa kacivi me veiqaravi vaka peresitedi ni iSoqosoqo ni Veivukei ni tabanalevu. Oti ga vakalailai, a bokoca na livaliva na cagi cevata, sa lala na sitoa ni kakana kei na itikotiko sa batabata sara. Baleta ga ni tiko na livaliva kei na katakata, sa dolava na vuvale gone oqo ena loloma na nodratou vale ki na veivuvale kei na so tale mera dro mai na cava.

Na vakanuinui sa ka dina ni da cakava na ka dredre ena vakabauta. Na veiqaravi kei na solibula e vakalevutaka na igu ka savata na yalo. Na nuitaka na Kalou ka vakaikeda ena kauta mai na kalougata mai lagi.

Ni sa bula mai na kenisa, a laucoqa o tagane yalodina ena motoka. Ia a sega ni vakalomalomani koya, ka kerea ena masu, “Na cava au rawa ni vulica mai na ka oqo?” Ni qaravi tiko e valenibula, e vakila ni uqeti me raica e dua na nasi a lomaleqataki watina tiko kei na luvena. E dua e tauvimate sa kunea na isaunitaro ni nuitaka na Kalou ka dodoliga yani vei ira eso.

Na tacida e ovici tu ena iyaloyalo vakasisila e wawa e tautuba ni valenivolavola ni nona peresitedi ni iteki, a masulaka tiko o peresitedi ni iteki me vukea vakacava. A yaco mai na veiuqeti makare: “Dolava na katuba me curu mai o tacina.” Ena vakabauta ka nuitaka na veivuke ni Kalou, a dolava na katuba o iliuliu ni matabete ka mokoti tacida. Rau a vakila na loloma veivakavoui kei na nuitaka na Kalou ka vakairau. Ni vaqaqacotaki, o tacida sa na tekivu me veivutuni ka veisau.

Ni veika eda dui sotava sa noda ga, na ivakavuvuli ni kosipeli kei na Yalo Tabu ena veivuke meda kila, na sala kei na gauna ni veinuitaki tale vakaikeda. Ni sa kavoro se veretaki na veinuitaki, na rarawa kei na veilecayaki sa ka dina; ka gadrevi sara na kila me yaco na vakabauta kei na qaqa me tudonu na vakanuitaki tiko ni veimaliwai vakatamata.

Ia, ena vuku ni Kalou kei na ivakatakila vei keda, e vakadeitaka o Peresitedi Russell M. Nelson, “E sega ni gadrevi mo taroga tiko o cei mo nuitaka dina.”⁶ Me da sa nuitaka ga na Kalou. Na Turaga e kilai keda vinaka ka lomani keda cake mai na noda kila se lomani keda. Na Nona loloma tawayalani ka kila vinaka na ka sa oti, nikua, kei na mataka na Nona veiyalayalati kei na yalayala e tudei ka dina.

Nuitaka na ka e tukuna na ivolanikalou “ni [sa] toso na gauna.”⁷ Ena kalougata ni Kalou, toso ni gauna, kei na tomani ni vakabauta kei na talairawarawa, eda na kunea na iwali kei na vakacegu.

E veivakacegui na Turaga:

“Sa ia na tagi e na bogi, ia sa yaco ena mataka na marau.”⁸

“Mo biuta vei Jiova na nomu icolacola bibi ena tokoni iko ko koya.”⁹

“Sa vakacegui vuravura ko lomalagi ni sa rawata.”¹⁰

Nuitaka na Kalou¹¹ kei na Nona cakamana. O keda kei na noda veimaliwai e dau veisau. Mai na Veisorovaki i Karisito na Turaga, eda sa biuta laivi na noda bula kocokoco ka yaco meda luve ni Kalou, yalomalua, yalomalumu,¹² sinai ena vakabauta kei na veinuitaki donu. Ni da veivutuni, ka da vakatusa ka biuta noda ivalavala ca, na Turaga e kaya ni sa sega tale vakadua ni nanuma.¹³ Sega ni sa guilecava o Koya: ia, ena sala totoka sara, e vaka me digitaka me kua ni nanuma tale, vakakina oi keda.

Nuitaka na veiuqeti ni Kalou mo kila-ka vakavuku. Eda rawa ni da veivosoti ena gauna kei na sala donu ni kaya na Turaga ni dodonu,¹⁴ meda sa “vuku vaka na gata, ka yalovinaka vaka na ruve.”¹⁵

So na gauna ni sa kavoro na yaloda ka malumu, sa dola dina vei keda na veivakacegui kei na veidusimaki ni Yalo Tabu.¹⁶ Na veivakacacani kei na veivosoti e rau tekivu ni kilai e dua na cala. E dau wasoma na veivakacacani mai na ka sa oti. Na veivosoti e rairai veivagalalataki ni siga ni mataka. “Ni sa sega ni tala mai na Luvena ki vuravura na Kalou me cudruvi ira na kai vuravura; me bula ga ko ira na kai vuravura e na vukuna.”¹⁷

E taroga o Apositolo Paula “O cei me na tawasei keda mai na loloma i Karisito? A sauma, “Se na mate, se na bula, …na ka cecere, se na ka titobu, … me tawasei keda mai na loloma ni Kalou, sa yaco ena vukui Karisito Jisu na noda Turaga.”¹⁸ Ia, e dua e rawa ni tawasei keda mai vua na Kalou kei Jisu Karisito—na dua o ya sai keda, vakaikeda. Ni kaya o Aisea, “Nomudou caka cala ga sa tawasei kemudou mai vua.”¹⁹

Ena loloma kei na lawa vakalou, sa noda vakatabakidua na digidigi kei na kena revurevu. Ia na loloma veisorovaki ni iVakabula sa “tawayalani ka tawamudu.”²⁰ Ni da sa vakarau meda lako mai vale, ni gauna eda “se yawa sara,” kina²¹ sa tu vakarau na Kalou ena yalololoma me kidavaki keda, solia reki na Nona vinaka taucoko.²²

E kaya o Peresitedi J. Reuben Clark, “Au vakabauta ni Tamada Vakalomalagi e gadreva me vakabula kece na luvena, … ni nona lewa kei na loloma ena solia mai na isau taucoko ni noda ivalavala, kei na ka kece e rawata ni solia, ka kena veibasai, au vakabauta ni na tauca vei keda na itotogi lailai duadua sa rawa vua me na vakatauca.”²³

Ena kauveilatai, na vakamamasu yalololoma ni iVakabula vei Tamana a sega ni tawa vakailavaki “Tamaqu, kakua ni cudruvi ira,” ia a kaya “Tamaqu, kakua ni cudruvi ira; ni ra sa sega ni kila na ka era sa kitaka.”²⁴ Na noda digidigi kei na galala sa vakaibalebale baleta eda na soli itukutuku vua na Kalou vata kivei keda baleta o keda o cei, ena ka eda kila ka cakava. Vinaka vakalevu, eda sa nuitaka na Kalou ena nona lewa kei na loloma uasivi me lewai donu na noda inaki kei na ivalavala.

Eda sa tinia ni da a tekivuna—ena yalololoma ni Kalou ni da lako mai vale ki Vua ka vakaikeda.

O nanuma beka na italanoa vakaibalebale i Jisu Karisito baleta na tama e rua na luvena tagane?²⁵ Dua na luvena a biuta na vale ka vakalusia nona iyau. Ni sa qai kilai yalona, na luvena tagane oqo sa saga me lesu mai vale. Na luvena kadua, e nanuma ni sa muria tiko na ivunau “Raica, e vuqa na yabaki oqo,”²⁶ a sega ni via kidavaki tacina mai vale.

Taciqu kei na ganequ, mo yalovinaka mo muria na kerekere i Jisu meda dolava na yaloda, noda kila, yalololoma, ka yalomalua, ka raici keda ena rua na ilesilesi oqo?

Me vaka na imatai ni luvetagane se yalewa, eda na lako tani ka sasaga lesu mai vale. Sa wawa na Kalou me kidavaki keda.

Me vaka na luvena tagane se yalewa kadua, sa yalololoma vei keda na Kalou meda reki vata ni da lesu yadua Vua. Sa veisureti meda cakava noda ivavakoso, kuoramu, kalasi, kei na itaviqaravi me dola, dodonu, ka veitaqomaki—me noda vale vata. Ena yalovinaka, kila-ka, kei na veidokai raraba, eda vakasaqara ena yalomalua na Turaga ka masu ka kidavaka Nona kalougata ni kosipeli vakalesui mai vei keda kece.

Noda ilakolako ni bula sa dui noda, ia sa rawa meda lesu vua na Kalou na Tamada kei na Luvena Lomani ni da nuitaka na Kalou, ka vakaikeda, yadua.²⁷ E kaya o Jisu, “Kakua ni yalolailai, vakadinata ga.”²⁸ Ni a cakava o Parofita Josefa, ena qaqa meda nuitaka na veimaroroi ni Tamada Vakalomalagi.²⁹ Kemuni na taciqu kei na ganequ, noqui tokani lomani, Yalovinaka raica tikoga na vakabauta kei na inuinui—na cakamana e yalataka o Koya nikua. Ena yaca tabu savasava i Jisu Karisito, emeni.