Na Vakacegu i Karisito e Mudukatani na Veicacati

Kemuni , na taciqu kei na ganequ, ena gauna ni vakaukauwa yago, e vakalevutaki na cakacaka ni uto. Na uto e rawata na taubale ena rawa ni sotavi dredre me tutaka na sasaga ni cici i baba. Ia, na vakatovotovo bi sa rawa ni vakatakila na vu ni mate e sega ni kilai tu. Na veileqa e kune sa rawa ni qaravi ni bera ni vakatubu leqa levu sara ena bula e veisiga.

Na matedewa na COVID-19 e sa dua dina tu na vakatovotovo bi e vuravura! Na vakatovotovo e veilaroi na kena macala. Sa vakarautaki tu na icula ni tataqomaki ka momona.¹ Era solibula vaqaqa tu na kenadau vakavuniwai, qasenivuli, dauveiqaravi, kei na so tale—ka sa vaka tu oya. Sa vakaraitaka e vuqa na tamata na kauwai kei na yalovinaka—ka sa vaka tu oya. Ia, e matata tu na revurevu ni leqa oqo. Era sotava na dredre na tamata yadua—ka sa vaka tu oya. Mera vakayaloqaqataki ka vakavinavinakataki na tutaka tiko na vu ni veivakaduiduitaki oqo.

E sa dua talega na vakatovotovo bi vakayalo na mateveitauvi ena Lotu ni iVakabula kei ira na lewena. Sa veiwaki tale ga na kena macala. Sa vakalougatataki na noda bula ni veiqaravi ena “sala tabu ka cecere sara,” na ² kei na Lako Mai Mo Muri Au vuli kosipeli yavutaki e vale, tokoni vaka Lotu E vuqa era solia na veivuke veikauwaitaki kei na veivakacegui ena gauna dredre oqo ka vakayacora tikoga vakakina.³

Ia, so na gauna, e vakaraitaka na vakatovotovo bi vakayalo na ivalavala ni veileti kei na veivakaduiduitaki. Oqo e vakatututaka ni tiko na cakacaka meda cakava me veisautaka na lomada me duavata vaka tisaipeli dina ni iVakabula. Oqo e sega ni bolebole vou, ia sa dua sara na ka bibi.⁴

Ni a sikovi ira na Nifai na iVakabula, a vakatavulica, “Me kakua na veileti vakai kemudou. … Ko koya sa tiko vua na yalo ni veileti, sa sega ni noqu; ia sa nona ga na tevoro, ni sai koya na tama ni veileti, ka sa dau vakauqeta na yalodra na tamata me ra veileti ka veicudruvi.”⁵ Ni da veileti vakai keda ena cudru, sa dredre o Setani ka tagi na Kalou ni lomalagi.⁶

E rua na vuna e dredre kina o Setani ka tagi na Kalou. Matai, na veileti e vakamalumalumutaka na noda vakadinadina cokovata ki vuravura me baleti Jisu Karisito kei na veivueti e basika mai na Nona “cakacaka dodonu, … loloma cecere, kei na loloma soli wale.”⁷ A kaya o Koya: “E dua na vunau vou kau sa solia vei kemudou, Mo dou veilomani. A ka oqo era na kila kina na tamata kecega ni dou sa noqu tisaipeli, kevaka dou sa veilomani.”⁸ Na kena veibasai e dina talega—sa kila kecega na tamata eda sega ni Nona tisaipeli ni da sega ni vakaraitaka na veilomani. Na Nona cakacaka ni gauna oqo e sa vakatanitaki ena veileti se veicacati⁹ vei ira na Nona tisaipeli.¹⁰ Karua, na veileti e sega ni ka vakayalo vei keda vakayadua. E kauta tani na bula sautu, reki, kei na vakacegu, ka vakatanitaki na kena vakilai na Yalotabu.

Sa vakamacalataka o Jisu Karisito ni sa sega ni Nona ivunau “me vakayavalata na yalodra na tamata me ra veicudruvi vakaira; ia [sa Nona] ivakavuvuli me muduki tani sara na veika vakaoqo.”¹¹ Keu sa totolo ni vakacala se sausaumi na duidui ni nanuma eso ena cudru se vakalelewa, au sa “sega ni rawata” na vakatovotovo bi vakayalo. Na sega ni rawati ni vakatovotovo esega ni kena ibalebale niu sega ni nuitaki. Ia, e dusimaka ni sa gadrevi meu veisau. E vinaka me kilai.

Ni oti na veisiko ni iVakabula ki na vanua vaka-Amerika, era sa duavata na tamata; “e sa sega na veileti ena vanua taucoko.”¹² O nanuma li ni ra sa duavata na tamata baleta ni ra sa tautauvata kece, se baleta ni sega ni duidui tu na nodra vakasama? Au vakatitiqataka!” Ia, sa yali na veileti kei na veicacati baleta ni ra sa vakabibitaka na nodra itutu vakatisaipeli ni iVakabula. Na nodra duidui sa seavu ni vakatauvatani kina nodra loloma veiwasei ni iVakabula, ka ra sa duavata me “nodra na matanitu ni Kalou.”¹³ Na kena vatuka oya ni “sa sega beka ni dua na matatamata mamarau cake … sa bulia na liga ni Kalou.”¹⁴

Na duavata sa gadreva na sasaga.¹⁵ Sa taraicake ni da vakabulabulataka na loloma ni Kalou ki lomada¹⁶ ka da vakanamata kina noda icavacava tawamudu.¹⁷ Eda sa duavata ena noda ivakatakilakila matau oqo vaka luve ni Kalou¹⁸ kei na noda tutaka na dina ni kosipeli vakalesuimai. Noda lomana na Kalou kei na noda bula vakatisaipeli i Jisu Karisito sa vakavureya na kauwai dina ki na so tale. Eda vakabibitaka na vakasakiti ni nodra itovo ni bula, rai, kei na taledi.¹⁹ Ke da sega ni rawa ni biuta na noda bula vakatisaipeli kivei Jisu Karisito mai na veika eda taleitaka ka nanuma, sa dodonu meda railesuva na veika eda vakabibitaka ka veisau.

Eda na rairai kaya tu, “Sa rawa ni da duavata vakaidina—kevaka walega o na duavata kei au!” Dua na ivakarau vinaka cake oya me tarogi, “Na cava au rawa ni cakava meu veivakaduavatataki kina? Au rawa ni sauma vakacava meu vukea kina na tamata oqo me sudra voleka vei Karisito? Na cava au rawa ni cakava me vakalailaitaka na veileti ka tara e dua na vanua me dauloloma ka veikauwaitaki vaka-Lotu?”

Ni sa tara na noda bula na loloma i Karisito,²⁰ eda kidava na duidui eso ena yalomalua, vosota, kei na yalovinaka.²¹ E lailai na noda lomaleqataka na veika eda vakila tu ka levu cake me baleti ira na wekada. Eda “qara meda tautauvata ka duavata.”²² Eda sega ni tutaka na “veiba vakatitiqataki,” lewai ira eda sega ni duavata kaya, se saga ni vakavuna na nodra sikalutu.²³ Ia, eda nanuma ni oira eda sega ni duavata era na cakava na veika kece me vinaka kina na nodra bula.

A cakacaka tu vakalawa na watiqu me sivia e 20 na yabaki. Ni loya, sa dau cakacaka vata kei ira eso okoya ka tutaka vakamatata tu na veisaqasaqa. Ia e vulica me kua ni duavata ka me kua ni ca se cudru. E rawa ni kaya vua na loya ni veisaqa, “Au raica tu ni daru na sega ni duavata ena ka oqo. Au taleitaki iko. Au doka na nomu nanuma. Au nuitaka ni o rawa ni cakava talega vakakina vei au.” Oqo sa vakatara wasoma na veidokadokai kei na veitokani se vacava na duidui eso.

O ira mada ga na meca eliu sa rawa ni duavata ena nodra bula vakatisaipeli ni iVakabula.²⁴ Ena 2006, au a tiko ena vakatabui ni Valetabu e Helsinki Finland me vakacaucautaki kina o tamaqu kei rau na tubuqu ka saumaki liu kina Lotu e Finiladi. Na kai Finiladi, oka kina o tamaqu, era tatadrataka tu ena vuqa na yabaki me dua na valetabu e Finiladi. Ena gauna oya, na tikina ni valetabu e wavoliti Finiladi, Estonia, Latvia, Lithuania, Belarus, kei Rusia.

Donuya na kena vakatabui, au vulica e dua na ka veivakurabuitaki. Na matai ni siga ni veiqaravi raraba sa vakarautaki tu me baleti ira na lewenilotu ni Rusia mera vakayacora na cakacaka vakalotu ni valetabu. Sa ka dredre me vakamacalataki na kena vakasakiti na ka oqo. A vuqa tu na nodrau veivaluvaluti o Rusia kei Finiladi ena veitabayabaki. O tamaqu a sega walega ni nuitaki ka taleitaki Rusia ia o ira taucoko na kai Rusia. A vakamatatataka tu o koya na nona nanuma, ka sa matau tu na nona nanuma ena veicacati ni kai Finiladi kivei Rusia. A nanuma dei tu o koya na serekali balavu e ni veivaluvaluti i Finiladi kei Rusia ena ika19 ni senituri. Na veika e kila mai nai Karua ni Valu Levu ni veimecaki tale tu o Finiladi kei Rusia, e sega ni veisautaka na nona nanuma.

Dua na yabaki ni bera na vakatabui ni Valetabu e Helsinki Finland, a sota na komiti ni valetabu, era lewena vakatabakidua na lewenilotu e Finiladi, mera veivosakitaka na ituvatuva ni veivakatabui. Donuya na soqoni, a tukuna e dua ni ra na gole tiko mai ena vica na siga na Lewenilotu ni Rusia mera tiko ena veivakatabui ka nuitaka tu ni ciqoma na nodra veivakalougatataki ni valetabu ni bera na lesu ki vale A vakatututaka na jemeni ni komiti, o Brother Sven Eklund, mera na wawa toka vakalailai na kai Finiladi, me rawa ni matai ni lewenilotu o ira na kai Rusia ni vakayacora na nodra cakacaka vakalotu ni valetabu ena Valetabu. A vakadonuya taucoko na lewe ni komiti. Era a lokuyarataka na Yalododonu Yalodina Edaidai ni Finiladi na nodra veivakalougatataki ni valetabu me vukei ira na Yalododonu ni Rusia.

A vola e muri na Peresitedi ni Wasewase ka tiko ena soqoni ni komiti ni valetabu oya, o Elder Dennis B. Neuenschwander: “Au a sega tu ni bau dokai ira na kai Finiladi me vakataki au ena gauna oya. Na itukutuku makawa dredre i Finiladi kei na nona itokani ena tokalau, kei na nodra marautaka na kena sa tara tu e dua ena nodra qele e sa vakatikitikitaki taucoko. Na nodra vakatarai na kai Rusia ni curuma vakailiu na valetabu [e sa] dua na itukutuku ni loloma kei na solibula.”²⁵

Niu tukuna vei tamaqu na yalololoma oqo, sa malumu na lomana ka tagi, e dua na irairai duatani sara ni kai Finiladi dauvosota oya. Mai na gauna oya me yacova nona mate ni oti e tolu na yabaki, a sega tale ni tukuna o koya e dua na ka ca me baleti Rusia. Vakauqeti tu mai na nodra ivakaraitaki na kai nona ni Finiladi, a digitaka o tamaqu me vakabibitaka na nona bula vakatisaipeli mai na ka tale eso. Era sa sega tu ni kai Finiladi; era sa sega tu ni kai Rusia; a sega ni kauta tani na ilawalawa yadua na nodrau ivakarau ni bula, itukutuku makawa, se veika a sotavi me tamusuka na veicacati. Era sega ni gadreva tu. Ia, era sa digitaka ni cakava na nodra bula vakatisaipeli i Jisu Karisito me nodra sasaga tudei.²⁶

Ke rawa ni ra cakava, sa vakakina o keda. Eda rawa ni kauta mai na ka eda vakademena, ivakarau ni bula, kei na veika e sotavi ki na Lotu i Jisu Karisito. E sega ni vakatikitiki tani o Samuela mai na ka e vakademena vaka e dua na Leimani,²⁷se me vakatikitiki tani o Momani ni vaka edua na Nifai.²⁸ Ia era biuta vakailiu yadua na nodra bula vakatisaipeli ni iVakabula.

Kevaka eda sa sega ni duavata, eda sa sega ni Nona.²⁹ Au sa sureta me na vakabibitaki na noda lomana na Kalou kei na bula vakatisaipeli ni iVakabula mai na ka tale eso.³⁰ Me da taura matua na veiyalayalati sa dei tu ena noda bula vakatisaipeli—na veiyalayalati meda duavata.

Me da muria na nodra ivakaraitaki na Yalododonu e vuravura taucoko ka sa rawaka tu vaka tisaipeli i Karisito. Sa rawa ni da vakanuinui vei Jisu Karisito, ka sa “vu ni noda veivinakati tale, ka … sa basuka na bai sa ia kina na tawase; ni sa vakaotia ena nona [veisorovaki] na ka eda a veicati kina.”³¹ Na noda ivakadinadinataki Jisu Karisito ki vuravura ena vaqaqacotaki, ka da na bulabula tikoga vakayalo.³² Au vakadinadinataka ena gauna eda na “vakanadakuya na veileti” ka yaco “meda duavata kei na Turaga ena loloma ka vakabauti Koya” Nona vakacegu ena noda tikoga.³³ Ena yacai Jisu Karisito, emeni.