Na Bula Kilikili e Sega ni Yali Kina na Cala

Au a vakauta e dua na itukutuku vei luvequ yalewa kei na watina ena noqu vakayagataka na vakauitukutuku volai ena noqu talevoni. Au kaya vaqo, “Kemudrau. Au lomani kemudrau dina.” Erau ciqoma, “Au sevaki kemudrau. E dodonu me lomani kemudrau.” Sega beka ni kurabuitaki na rawarawa ni kena dau tauri cala e dua na itukutuku vinaka ka vinaka na kena inaki? Oqo na ka e dau yaco ena so na gauna ena itukutuku ni veivutuni kei na bula kilikili ni Kalou.

Eso era dau taura cala na itukutuku ni sega ni yaga na veivutuni kei na veisau. Na itukutuku ni Kalou sai koya e gadrevi.¹ Ia e sega beka ni lomani keda na Kalou, dina ga ni tu noda malumalumu? O io! Sa uasivi sara na Nona lomani iko. Au lomani ira na makubuqu, nodra malumalumu kei na veika kece, ia sega ni kena ibalebale oya niu sega ni vinakata me ra vinaka cake ka yacova na vanua e dodonu me ra yacova. E lomani keda na Kalou ena keda ituvaki oqo, ia sa rui levu sara Nona lomani keda me laivi keda tu vaqo.² Me da toso yani vua na Turaga sai koya na inaki ni bula oqo.³ Na veisau sai koya na inaki ni Veisorovaki i Karisito. E sega walega ni rawa ni veivakaturi cake tale, veisavai, veivakacegui, ka vakabulai keda na Karisito, ia ena loma ni veika kece oqo, sa rawa Vua me veisautaki keda me da yaco me vakataki Koya vakalevu cake.⁴

Eso era dau ciqoma cala na itukutuku, ni veivutuni e ka ni dua ga na gauna. Na itukutuku ni Kalou sai koya, me vaka sa vakavuvulitaka o Peresitedi Russell M. Nelson, “Na veivutuni … e dua na ivakarau.”⁵ Na veivutuni ka vakabulai mai kina e rawa ni taura na gauna,⁶ o koya na noda biuta laivi na ca⁷ ka sega tale ni tiko “e dua na gagadre me kitaka na ca, ia me kitaka tikoga na veika vinaka”⁸ e sasaga ni bula taucoko.⁹

Na bula e vaka na kena kosovi na lomanivanua. Eda na sega ni yaco rawa ena dua ga na taqe benisini. Me na vakatawani tiko e veigauna na taqe. Na vakayagataka na sakaramede e vaka na noda kele yani ena dua na igunugunu ni benisini. Ni da veivutuni ka vakavouya na noda veiyalayalati, eda yalataka kina ni da sa tuvakarau me da muria na ivakaro, ka rau na vakalougatataki keda ena Yalo Tabu na Kalou kei Karisito.¹⁰ Kena ivakalekaleka, eda yalataka ni da na toso tikoga ki liu, ka rau yalataka na Kalou kei Karisito ni rau na vakatawana tiko na taqe.

Eso era dau taura cala na itukutuku ni ra sega ni kilikili me ra vakaitavi vakataucoko ena kosipeli baleta ni ra sega ni galala mai na itovo ca. Na itukutuku ni Kalou sai koya ni bula kilikili e sega ni sega kina na cala.¹¹ Na bula kilikili sai koya na dina kei na tovolea. Sa dodonu me da dina vua na Kalou, vei ira na iliuliu ni matabete, kei ira tale eso era lomani keda,¹² sa dodonu me da segata tiko me da muria na ivakaro ni Kalou ka sega ni soro baleta ga ni da tarabe vakalailai.¹³ E kaya o Elder Bruce C. Hafen na tarai cake ni itovo ni bula Vakarisito e “gadrevi kina vakalevu cake na vosota mai na sega ni cala.”¹⁴ E kaya na Turaga na isolisoli ni Yalo, “sa soli me yaga vei ira sa lomani au ka muria na noqu ivakaro kece sara, io vei koya sa segata sara me vakayacora.”¹⁵

A vola vaqo e dua na cauravou au na vakatoka me o Damon, “Niu tubu cake tiko a dredre noqu dro tani mai na iyaloyalo vakasisila. Au dau madualaka niu sega ni rawa ni vakavinakataki au mai kina.” Ena veigauna kece e tarabe kina o Damon, sa dau kaukauwa cake na mosi ni veivutuni ka nanuma kina ni sa sega ni ganiti koya e dua na loloma soliwale, na veivosoti, se ikuri ni veivosoti mai vua na Kalou. E kaya o koya, “Au nanuma ni sa dodonu meu yalodruka tu ga e veigauna. Au nanuma ni sa rairai cudruvi au beka na Kalou baleta ni sega ni lomaqu meu cakacaka vakaukauwa meu vakamalumalumutaka ka biuta laivi yani vakadua. Au na rawata me dua na macawa se so na gauna dua sara na vula, ia ni oti ga au na lesuva tale kau nanuma, ‘Sa na sega ga ni rawa, na cava na betena meu tovolea tikoga kina?’”

Ena dua na gauna vaqori a kaya o Damon vua na nona iliuliu vakabete, “Ena vinaka beka meu sa kua mada ni mai lotu tiko. Au sa oca mai ena bula veivakaisini oqo.”

A sauma na nona iliuliu, “O sega ni dauveivakaisini baleta ni tiko e dua na nomu itovoca o vinakata tiko mo lako tani mai kina. O na dauveivakaisini kevaka o vunitaka, lasu ena vuku ni itovo oqori, se ni o tovolea mo nanuma ni nona leqa na Lotu baleta ni sa rui cecere na itagede e lavaka. Ni o tukuna tiko na ka dina baleta nomu ivalavala ka cavuta tiko na ikalawa mo toso ki liu e sega ni veivakaisini. Sai koya na bula vakatisaipeli.”¹⁶ A qai cavuta na iliuliu oqo na ivakavuvuli nei Elder Richard G. Scott, “E duatani na Nona raica na Turaga na malumalumu mai na Nona raica na veisaqasaqa. … Ni vosa na Turaga me baleta na malumalumu, e veigauna ena yalololoma cecere.”¹⁷

Na rai oqori a solia na inuinui vei Damon. Sa qai kila ni sega ni kaya tiko na Kalou mai cake, “Ya se baci lutu tale o Damon.” Ia rairai ena tukuna beka, “Raica na yawa ni vanua sa lakova rawa mai o Damon.” A qai mudu nona dau vakacuva ulu tu ena madua na cauravou oqo se me rai vakababa ena vaqara iulubale me vakadonuya nona ivalavala. A rai cake ki na veivuke vakalou ka kunea.¹⁸

E kaya o Damon, “Na gauna duadua ga au a gole kina vua na Kalou e liu oya ena noqu kere veivosoti, ia ena gauna oqo au sa kerea talega na loloma soliwale—na Nona ‘mana veivakaukauwataki.’[Bible Dictionary, “Grace”]. Au se sega vakadua ni bau cakava ena dua na gauna e liu. Ena gauna oqo sa lailai sara noqu dau cati au tu ena veika au dau cakava ka levu cake noqu lomani Jisu ena veika sa cakava vei au.”

Ni da vakasamataka na balavu ni nona sasaga tiko o Damon, ena sega ni veivuke ka sega ni vakaibalebale me ra tukuna vakatotolo na itubutubu kei na iliuliu era vukei koya tiko na “kakua tale vakadua” se ena vakatulewa kaukauwa, virikotora eso na vakatatabu me rawa kina na “bula kilikili.” Ia, era tekivu ena veisausau lalai, ka rawarawa ni sauci. Era nadakuya na nanamaki ni biuta laivi kece vakadua ka vakanamata ki na toso vakalalai e veigauna, rawa kina me tara cake o Damon na bula qaqa eso mai na druka.¹⁹ Me vakataki ira na tamata bobula nei Limiai, a vulica o koya ni rawa ni yaco na “sautu tale tiko mai vakamalua.”²⁰

E vakasalataka o Elder D. Todd Christofferson: “Me da qarava e dua na ka vakaitamera, ena gadrevi beka me da qarava vakalalai e veisiga. … Me da vakacuruma na itovo ni bula vou ka vinaka sara vei keda se me vakadrukai na itovonibula ca se veivakabobulataki e vakalevu ni kena ibalebale me dua na sasaga nikua tarava mai e dua tale ni mataka oti qai dua tale, me vuqa na veisiga, se na veivula, se mani veiyabaki sara. Ia e rawa ni da cakava baleta ni rawa ni da kerekere vua na Kalou … baleta na veivuke eda gadreva e veisiga.”²¹

Ia, kemuni na taciqu kei na ganequ, na matetaka na COVID-19 e sega sara ga ni rawarawa vua e dua vei keda, ia na sogosogo e sala vata mai kei na vakatabui ni veilakoyaki sa qai dredre ga kina vakalevu na bula vei ira era sasaga dro tiko mai na itovoca eso. Nanuma tiko ni rawa na veisau, na veivutuni e dua na ivakarau, na bula kilikili e sega ni sega kina na cala. E bibi duadua, me da nanuma tiko ni rau sa tuvakarau na Kalou kei Karisito me rau vukei keda eke ena gauna sara ga oqo.²²

Eso era taura cala na itukutuku ni sa wawa tu me veivuke na Kalou me yacova ni sa oti noda veivutuni. Na itukutuku ni Kalou sai koya ni na vukei keda ni da sa veivutuni. Na Nona loloma soliwale sa vakarautaki tu vei keda “se evei ga na vanua eda sa toka kina ena salatu ni talairawarawa.”²³ E kaya vaqo o Elder Dieter F. Uchtdorf: “Na Kalou e sega ni gadreva na tamata e sega na nona cala. E vakasaqara o Koya o ira era sa vakarau tu e ‘yalodra kei na nodra vakasama’[Vunau kei na Veiyalayalati 64:34], ka na vakayacora o Koya me ra ‘uasivi sara ena vukui Karisito’ [Moronai 10:32–33].”²⁴

Sa lewevuqa era sa vakamavoataki ena kavoro kei na leqa ni isema vakamatavuvale ka dredre kina me ra vakabauta na yalololoma kei na nona vosota vakadede na Kalou. E dredre me ra raica na Kalou ena Kena ituvaki dina—e dua na Tamada dauloloma ka dau sotavi keda ena noda leqa²⁵ ka kila na ivakarau me “solia kina na veika vinaka vei ira era kerea Vua.”²⁶ Na Nona loloma soliwale e sega ni dua ga na icovi vei ira era bula kilikili. Sai koya na “veivuke vakalou” e solia o Koya ka na vukei keda me da bula kilikili kaya. E sega ni dua walega na icovi vei ira na bula dodonu. Sai koya na “edaumeni ni kaukauwa” e solia o Koya ka na vukei keda me da bula dodonu.²⁷ E sega ni da lako tikoga yani vua na Kalou kei Karisito. Eda lako tiko vata keiRau.²⁸

Ena Lotu rararba, era cavuqaqataka na itabagone na iToko ni Goneyalewa kei na Matabete i Eroni. Mai Niu Siladi ki Sipeni ki Iciopea ki Japani, era kaya na goneyalewa, “Au doka na isolisoli ni veivutuni.” Mai Chile ki Guatemala ki Moroni, e Utah, era kaya na cauravou, “Niu segata meu veiqaravi, cakacakataka na vakabauta, veivutuni, ka vinaka cake ena veisiga yadua, au sa na vakadonui meu ciqoma na veivakalougatataki ni valetabu kei na reki tudei ni kosipeli.”

Au yalataka na veivakalougatataki kece oqori kei na reki e kauta mai e dina ka rawa ni noda kevaka eda muria kece na ivunau kei “sa segata sara me vakayacora.”²⁹ Ni o sa vakila ni sa rui sivia na nomu druka ka sega ni via tovolea tale, nanuma na Veisorovaki i Karisito kei na kena loloma soliwale e dina ka mana na kena kaukauwa.³⁰ “Sa dodo tu yani vei kemuni na liga ni noqu loloma cecere.”³¹ O lomani tiko—nikua, ena 20 na yabaki, ka tawamudu. Ena yacai Jisu Karisito, emeni.