Vakarautaka na Gauna vua na iVakabula

Kemuni na taciqu kei na ganequ lomani, ena rua na siga eda sa vakavulici vakavinaka mai vei ira na italai ni Turaga ka ra segata vagumatua me ra kila na veika e vinakata o Koya me ra tukuna.

Sa soli vei keda na noda ivakaro me baleta na ono na vula mai qo. Ia na taro ena gauna oqo, eda na duatani vakacava ena vuku ni veika eda sa rogoca ka vakila?

Sa vakaraitaka na matetaka na totolo ni kena rawa ni veisau na bula, ena so na gauna mai na veika eda sega ni rawa ni lewa. Ia, e levu na ka eda rawa ni lewa. Eda virikotora na veika me vakaliuci ka lewa na ivakarau eda vakayagataka kina noda igu, gauna, kei na veika e tu vei keda. Eda vakatulewataka na noda ivakarau vei ira na tani. Eda digia o koya me da gole kina me baleta na dina kei na idusidusi.

Na domo kei na idre ni vuravura e veirawai ka vuqa sara. Ia sa rui levu na domo era veicoriti, veicavilaki, ka rawa ni dreti keda tani mai na salatu ni veiyalayalati Me da levea na mosiniyalo ena yaco mai, au vakatakekere vei kemuni mo ni vorata na baca ni vuravura ena nomuni vakarautaka na gauna ni Turaga ena nomuni bula—e veisiga yadua.

Kevaka e lako mai na tabana ni itukutuku ni veimaliwai se so tale na tabana na itukutuku o ciqoma, sa na malumu sara na nomu rawa ni rogoca na vakasolokakana ni Yalo. Kevaka talega o sega ni vakasaqara tiko na Turaga ena masumasu kei na vuli kosipeli e veisiga, o sa laivi iko tiko me vakaveitaliataki iko na ivakavuvuli rogorogo vinaka beka ia e sega ni dina. O ira sara mada ga na Yalododonu era yalodina tiko e rawa ni vagolei tani mai na rorogo tudei ni mataivakatagi ni Papiloni.

Kemuni na taciqu kei na ganequ, au vakamasuti kemuni mo ni vakarautaka na gauna ni Turaga! Vakadeitaka na nomu yavu vakayalo me rawa ni vorata na veivakatovolei ni gauna ena nomu cakava na veika ena rawa kina ni tiko vata kei iko na Yalo Tabu e veigauna.

Kakua ni beca na dina tudei ni “sa tukuna na ka dina na Yalo … me vaka na kena ituvaki dina , kei na ituvaki dina ni veika ena qai yaco mai”¹ “Ena vakaraitaka vei kemudou na veika kece mo dou kitaka.”²

E sega ni dua na ka e sureta vakalevu cake na Yalo mai na nomu vakadeitaka na nomu rai vei Jisu Karisito. Tukuni Karisito, rekitaki Karisito, kanamagiti ena vosa i Karisito, ka toso ki liu ena tudei vei Karisito.³ Me ka marautaki na nomu Siga ni Vakacecegu ena nomu sokalou Vua, vakaivotavota ena sakaramede, ka vakatabuya na Nona siga.⁴

Me vaka au cavuta tiko vakabibi ena mataka nikua, yalovinaka vakarautaka na gauna ni Turaga ena Nona vale tabu. E sega na ka ena vaqaqacotaka na nomu yavu vakayalo me vaka na veiqaravi ena valetabu kei na sokalou ena valetabu.

Eda vakavinavinakataki ira kece era cakacaka tiko ena noda veivaletabu vovou. Era sa tara tiko e veiyasai vuravura taucoko. Nikua au marau meu kacivaka na noda ituvatuva me tara eso tale na valetabu ena veivanua sara ga oqo se voleka kina: Kaohsiung, Taiwan; Tacloban, Philippines; Monrovia, Liberia; Kananga, Democratic Republic e Congo; Antananarivo, Madagascar; Culiacán, Mexico; Vitória, Brazil; La Paz, Bolivia; Santiago West, Chile; Fort Worth, Texas; Cody, Wyoming; Rexburg North, Idaho; Heber Valley, Utah; kei na vakavoui ni Valetabu e Provo Utah ni sa vakatabui oti na Valetabu e Orem Utah.

Au lomani kemuni, na taciqu kei na ganequ. E kilai kemuni ka lomani kemuni na Turaga. O koya na nomu iVakabula ka Dauveivueti. Sai Koya e liutaka ka dusimaka Nona Lotu. Ena liutaki iko ka tuberi iko ena nomu bula kevaka ko na vakarautaka na Nona gauna ena nomu bula—e eisiga yadua.

Me sa tikoga kei kemuni na Kalou me yacova ni da qai sota tale, sa noqu masu ena yaca tabu i Jisu Karisito, emeni.