Na Vakabauta mo Kerea ka Qai Cakacakataka

Kemuni na taciqu kei na ganequ lomani, au vakavinavinakataka na madigi meu vosa vei kemuni ena soqoni ni bogi ni Vakarauwai oqo ni koniferedi raraba. Ena nona tuvalaka na koniferedi ena mataka oqo, a kaya o Peresitedi Russell M. Nelson na “ivakatakila savasava ni taro eso e lomamu ena yaco me vakaibalebale ka tawaguilecavi kina na koniferedi oqo Kevaka o se bera ni kerea na veisobuti ni Yalo Tabu me vukei iko ni rogoca na ka e gadreva na Turaga mo rogoca ena rua na siga oqo, au sureti iko mo kitaka vakakina.”¹ Au sa sasagataka na veivakalougatataki oya niu vakarautaka tu meu ciqoma na vakatakila ena noqu mai tiko oqo kei kemuni. Sa noqu masu bibi ni na rawa mo ni ciqoma na vakatakila oya mai vua na Kalou.

E sega ni se veisau na sala e ciqomi kina na vakatakila mai vua na Kalou mai na gauna i Atama kei Ivi. E sa tautauvata tu vei ira nai talai kacivi taucoko ni Turaga mai na ivakatekivu ki na gauna oqo. E sa tautauvata vei iko kei au. E dau vakayacori tu ena cakacakataki ni vakabauta.²

A veiganiti tu na vakabauta ni gone o Josefa Simici me taroga na Kalou, ni vakadinati ni na sauma na Kalou na nona gagadre eloma. A veisautaka na vuravura na kena isau ka yaco mai. E a vinakata me kila na lotu cava me lewena me savai kina ena ivalavala ca. Na saunitaro e ciqoma a vakauqeti koya me toraga tikoga na taro vinaka cake ka cakacakataka na tasoro tomani ni vakatakila ka se qai tekivu.³

Na ka o sotava sa rawa ni tautauvata tu ena koniferedi oqo. E tiko vei iko na taro eso o qara tu kina na kena isau. Sa veirauti na nomu vakabauta mo nuitaka ni ko na ciqoma na isaunitaro mai vua na Turaga ena vukudra na Nona italai.⁴ Ena sega ni nomu na madigi mo kerea vakadomoilevu na isaunitaro mai vei ira na vosa tiko , ia sa rawa ni o kerea na Tamamu lomani ena masu.

Au kila mai na ka au sotava ni na basika na isaunitaro me sotava na nomu gagadre kei na vakavakarau vakayalo. Ke o gadreva na isaunitaro e bibi tu ki na nomu bula vinaka tawamudu se eso tale, sa na rawa ni basika na isaunitaro. Ia oya mada ga, o rawa ni ciqoma—me vakataki Josefa Simici—na isaunitaro ni vosota tu.⁵

Ke sa muataki me vakamalumalumutaki na loma ena nomu vakabauti Jisu Karisito mai na revurevu ni Nona Veisorovaki, o na rawa ni vakila vakalevu cake na vakasolokakana ni Yalotabu me isau ni nomu masu. Na ka au sotakaya oya ni sa matata ka kilai tu ena noqu vakasama na domo malumu—ka matata sara—lailai niu vakila na vagagalu eloma kei na lomasoli ki na loma ni Turaga. Na veivakilai malumu oya sa rawa ni vakamacalataki vinaka me “Kakua ni yaco na noqu lewa, me yaco ga na nomuni lewa.”⁶

Na vakarau ni vakatakila oqo sa vuna o na rogca kina na nodra veivakavulici na vosa tiko ena koniferedi oqo ena ka sa vakatokai na vunau i Karisito.⁷ Sa basika vei keda vakatikina na vakatakila ki na ivakarau eda sa saga tu ni tugana kina na vunau i Karisito ki lomada ka vakayacora ena noda bula.

Ni nanuma mai na iVola i Momani nona vakatavulici keda o Nifai ni sa idola ni kena ciqomi na ivakatakila ni dina na vakabauti Jisu ka sa idola ni veivakadeitaki ni da sa muria tiko na veidusimaki ni iVakabula. A vola o Nifai na veivosa oqo ena vica na senituri ni bera ni sucu tu o Jisu Karisito:

“Era sa vosa na agilosi ena kaukauwa ni Yalo Tabu; o koya, e ra sa vosataka kina na vosa i Karisito. O koya, au sa kaya kina vei kemudou, dou [tugana] na vosa i Karisito; ia raica, na vosa i Karisito sa tukuna vei kemudou na veika kece mo dou kitaka.

“Ia, oqo ni’u sa tukuna oti na veivosa oqo, kevaka e sega ni macala vei kemudou, sa baleta ga ni dou sa sega ni kerekere, se tukituki; o koya, dou sa sega ni kau mai kina ki na rarama ia dou na rusa ga ena butobuto.

“Ia raica, au sa kaya tale vei kemudou kevaka dou sa curu ena sala, ka ciqoma na Yalo Tabu, ena vakaraitaka vei kemudou na veika kece mo dou kitaka.

“Raica, oqo na ivakavuvuli i Karisito, ia ena sega tale ni soli e dua na ivakavuvuli me yacova ni sa vakaraitaki Koya vakayago vei kemudou. Ia ni sa vakaraitaki Koya vakayago vei kemudou, mo dou muria sara ka kitaka na veika ena tukuna vei kemudou.”⁸

Na Turaga ena tukuna vei iko kei au eso mai vei ira na Nona italai nikua kei na veisiga eliu. Ena tukuna vei keda na cava soti meda kitaka.⁹ Na iVakabula ena sega ni kailavaki vakaro vei iko kei au. Ena Nona vakatavulici Ilaija:

“A sa kaya ko koya, Mo curu yani, ka laki tu ena dela ni ulunivanua ena mata i Jiova. Ka raica, sa lako voli ko Jiova, a sa dua na cagi levu ka kaukauwa sa sea na veiulunivanua, a sa vorolaka na veiuluvatu ena mata i Jiova, ia sa segai ena cagi ko Jiova: ni sa oti na cagi, sa qai tavuki na vanua; ia sa segai ena tavuki ni vanua ko Jiova:

“Sa oti na tavuki ni vanua, sa qai dua na bukawaqa; ka sa segai ena bukawaqa ko Jiova: ia sa oti na bukawaqa, sa qai rogo mai e dua na domo lailai e vinaka.”¹⁰

Na rogoci ni domo oya ena basika mai ena noda vakabauti Koya. Ena vakabauta veiganiti, eda na kerea na veidusimaki me inaki ni lako ka kitaka na cava ga sa kerea o Koya.¹¹ Eda sa na tara na vakabauta ni kila na cava ga sa kerea o Koya ena vakalougatataki ira na tani ka rawa ni da vakasavasavataki ena ka oqo ena vuku ni Nona lomani keda.

Ni sa na muataki keda na noda vakabauti Jisu Karisito ni vakataroga na Tamada, na vakabauta oya ena kauta talega mai na tatara malumu ni iVakabula me da rogoca kina na Nona veidusimaki ka vakarau ka nanamaki tu meda talairawarawa. Eda na qai lagata na qaqa ni serenilotu ena reki, ni dredre tu mada ga na itavi: “Sweet is the work, my God, my King.”¹²

Na levu ga ni kena tiko ena noda bula kei na lomada na vunau i Karisito, na levu ni noda vakila na loloma kei na veinanumi levu me baleti ira ka sega ni tiko vei ira na veivakalougatataki ni vakabauti Jisu Karisito se sa sotavi dredre tiko ni rawata. Sa ka dredre me muri na ivunau ni Turaga ni sega na vakabauta kei na vakanuinui ki Vua. Ni vakayalia eso na nodra vakabauta na iVakabula, sa rawa ni ra vorata na Nona ivakasala, ni vakatokai na vinaka me ca kei na ca me vinaka.¹³ Me levei na cala oqo, sa ka bibi me veidonui tu na vakatakila eda ciqoma kei na ivakavuvuli ni Turaga kei ira na Nona parofita.

Kemuni na taciqu kei na ganequ, ena vakabauta eda na talairawarawa kina ki na vunau ni Turaga. Ena vakabauti Jisu Karisito eda na qaravi ira kina na tani ena Vukuna. Ena vakabauta eda sa vakatavulica kina na Nona kosipeli ka dolea vei ira na tamata ka sega ni vakila tu na domo ni Yalotabu se na cakitaka na dina taucoko ni tukutuku. Ia ni da cakacakataka na noda vakabauti Karisito—ka muria na Nona parofita bula—ena vakalevutaki na vakabauta e vuravura. Ena vuku ni tekinoloji, de dua ena rogoca ka kila na vosa ni Kalou e levu na luve ni Kalou ena mua ni macawa oqo mai na rua tale na siga eso vakaitukutuku.

Ena vakabauta levu ni sai koya oqo na Lotu kei na matanitu ni Turaga e vuravura, e levu na lewenilotu e saumi katini ka cau me vukei ira na vakaleqai, dina ga ni ra vakatovolei tu vakai ira na lewenilotu oqori. Ena vakabauta ni ra sa kacivi mai vei Jisu Karisito, sa raica na sala eso na daukaulotu e vuravura raraba mera ra-wa na bolebole e vakavuna na mate veitauvi, ena yaloqaqa kei na lomavinaka. Mai na ikuri ni nodra sasaga, sa qaqaco sara na nodra vakabauta.

Na veisaqa kei na veivakatovolei e sa itatarabe balavu tu ni tubu ni vakabauta. O ya sa ka dina tu ga, vakabibi mai na ivakatekivu ni Veivakalesuimai kei na yavutaki ni Lotu ni Turaga.¹⁴

Na ka a tukuna o Peresitedi George Q. Cannon ena gauna eliu sa dina tu nikua ka na vakakina me yacova na basika ni iVakabula me liutaka Nona Lotu kei na Nona tamata: “Na talairawara ki na Kosipeli sa vakavolekataka na veiwekani ni [tamata] kivua na Turaga. Sa yavutaka na isema voleka mai na tamata e vuravura kei na noda Dauveibuli Levu mai lomalagi. Sa kauta mai ki na nanuma ni tamata na vakilai ni yalodei momona kivua sa Cecere Sara kei na Nona lomasoli me rogoca ka sauma na nodra vakamamasu na vakararavi Vua. Ena gauna ni veivakatovolei kei na dredre na yalodei oqo sa tawasaumi rawa. Na rawa ni basika na leqa ki na dua se ira na tamata, na veivakarerei na draki ca ka vaka me vagalalataki na vakanuinui ni tamata kece, ia, na vanua era sa tutaki ira kina na [tamata] ena madigi eso e kauta mai na talairawarawa ki na Kosipeli, sa dei tu na nodra itutu; sa toka na yavadra ena vatu e sega ni yavalati rawa.”¹⁵

Sa noqu ivakadinadina ni vatu eda duri tu kina e sa noda vakadinadina ni sa Karisito o Jisu, ni oqo na Nona Lotu ka liutaka tu o Koya, ka sa Nona parofita bula tiko nikua o Peresitedi Russell M. Nelson.

Sa qara ka ciqoma o Peresitedi Nelson na veidusimaki mai vua na Turaga. Vei au sa dua na ivakaraitaki o koya ena qarai ni veidusimaki oya ena sasaga ni muria tu. Na sasaga vata oya ni talairawarawa tu ki na veidusimaki ni Turaga e sa tiko ena lomadra taucoko sa vosa se na qai vosa, masu, se lagasere ena koniferedi raraba oqo ni Nona Lotu.

Sa noqu masu ni na vakila na loloma ni Turaga o ira ka sarasara se vakarorogo ki na koniferedi oqo e vuravura taucoko. Sa sauma na noqu masu na Tamada Vakalomalagi me rawa niu vakila e dua na tiki lailai ni loloma ni iVakabula kivei iko kei na Nona lomana na Tamana Vakalomalagi, ka sa Tamada Vakalomalagi.

Au vakadinadinataka ni bula tiko o Jisu Karisito. Sa noda iVakabula ka Dauveivueti o Koya. Oqo na Nona Lotu. Sa kena iliuliu o Koya. A rairai vakatamata o Koya kei na Tamana Vakalomalagi vei Josefa Simici ena loma ni dua na veikau e Niu Oka. A vakalesui mai na kosipeli i Jisu Karisito kei na Nona matabete mai vei ira na italai vakalomalagi.¹⁶ Au kila ni sa dina oqo ena kaukauwa ni Yalo Tabu.

Sa noqu masu ni na vaka tu kina na nomu vakadinadina. Sa noqu masu ni ko na kerea vua na Tamada Vakalomalagi na vakabauta o gadreva vei Jisu Karisito me caka ka maroroi na veiyalayalati ena vakatara na Yalo Tabu me nomu itokani tudei. Au sa laiva vei kemuni na noqu loloma kei na ivakadinadina deivaki ena yaca i Jisu Karisito, emeni.