“Ko sa Lomani Au Vakalevu ka Vakalailai ko Iratou Oqo?”

Ena Noveba ni 2019, keirau a sikova kina na Vanua Tabu kei noqu itokani. Ni keirau tiko mai kea, keirau a raicalesu ka vulica na ivolanikalou me baleta na bula nei Jisu Karisito. Ena dua na mataka keirau a duri tu ena baravi ni vuaira ni Wasa ko Kalili ena dua na vanua ka rawa beka ni vanua ka sota kina ko Jisu kei iratou na Nona tisaipeli ni oti na Nona Tucaketale.

Ni oti na Tucaketale i Jisu, me vaka eda wilika ena Joni Wase e 21, e ratou a qoli ena bogi taucoko o Pita kei na so tale na tisaipeli ia e ratou a talelala.¹ Ni sa mataka, e ratou a raica e dua na tamata ni tucake tu mai matasawa ka tukuna me ratou balata na lawa e yasa kadua ni waqa. E ratou a kurabui ni a vakasinaiti me vaka na caka mana na lawa.²

E ratou a qai siqema totolo sara ni tamata oya sa ikoya na Turaga, ka ratou vakusakusa yani me ratou kidavaki Koya.

Ni ratou dreta yani na lawa ki baravi, ka sinai tu ena ika, e a kaya yani ko Jisu, “Dou mai katalau.”³ E vola ko Joni “ni ra sa katalau oti, sa kaya vei Saimoni Pita ko Jisu, Saimoni, na luvei Jona, ko sa lomani au vakalevu ka vakalailai ko iratou oqo?”⁴

Ni‘u a duri tu ena baravi vata oya, au a vakila ni taro ni iVakabula e dua vei ira na taro bibi duadua ena tarogi au kina ena dua na siga. Au rawa saraga ni rogoca na domona ni na taroga vei au, “Rusell, ko sa lomani au vakalevu ka vakalailai ko iratou oqo?”

Ko bau vakataroga tu beka se na cava e vakaibalebale taka o Jisu ni tarogi Pita ena, “Ko sa lomani au vakalevu ka vakalailai ko iratou oqo?”

Ni va‘golei mai na taro oqo ki vei keda ena noda gauna, e rawa ni na tarogi keda tiko na Turaga se vakacava tiko na noda lomaocaoca kei na levu ni idre vinaka se ca ka veisugusugutaka tiko na noda rai kei na noda gauna. Ena rawa ni na tarogi keda yadudua tiko se da lomani Koya vakalevu cake ka vakalailai na veika vaka vuravura. Na taro ‘qo e rawa ni baleta na veika e da vakaliuca ena noda bula, o cei eda vakamuria, ka da qarava vakacava na noda veimaliwai kei ira na noda matavuvale kei ira eda tiko veivolekati. Se e na rairai taroga tiko o Koya se cava e kauta dina mai vei keda na reki kei na marau.

E kauta beka mai vei keda na veika ni vuravura ‘qo na reki, marau, kei na vakacegu e dulaka na iVakabula vei ira na Nona tisaipeli ka dulaka talega mai o Koya vei keda? O Koya ga ena rawa ni kauta mai vei keda na reki dina, marau, kei na vakacegu mai na noda lomani Koya ka muria tiko na Nona ivakavuvuli.

Au na sauma rawa vakacava na taro “Ko sa lomani au vakalevu ka vakalailai ko iratou oqo?”

Ni da sa kunea na sau taucoko ni taro ‘qo, eda na rawa ni matavuvale vinaka cake, veiwekani, lewe ni vanua, lewe ni lotu, kei na luve tagane kei na luve yalewa ni Kalou.

Me yacova mai na noqu yabaki ni bula ena gauna qo, au sa tiko rawa ena vuqa sara na lotu ni veibulu. Au kila e levu vei kemuni e sa na raica rawa na ka au sa raica. Ni marautaki tiko na bula nei dua na lewe ni matavuvale se dua na itokani ka sa takali, ena dredre vua e dua ka vosa ena vukuna me tukuna na levu ni nona vale, na iwiliwili ni nona motoka, se na levu ni nona ilavo ena nona akaude ni baqe. Era na sega ni tukuna na veika e vakaraitaki ena ivola tukutuku ni veitalanoa. Ena levu na veibulu au tiko kina, era vakanamata ki na nona veimaliwai taucoko o koya era lomana, na nona veiqaravi vei ira na tani, na nona lesoni ni bula kei na veika e sotava, kei na nona lomani Jisu Karisito.

Kakua ni tauri au cala. Au sega ni tukuna tiko ni cala ke tiko na nomu vale vinaka se motoka vinaka se ni ca na kena vakayagataki na ivola tukutuku ni veitalanoa. Na ka au tukuna tiko ni kena itinitini ga, na veika oqori e sega soti na betena me vakatauvatani kei na noda lomana na iVakabula.

Ni da lomana ka muri Koya, eda vakabauti Koya. Eda veivutuni. Eda muria na nona i vakaraitaki ka papitaiso ka ciqoma na Yalo Tabu. Eda vosota me yacova na ivakataotioti ka tu ga ena sala ni veiyalayalati. Eda vosoti ira na lewe ni matavuvale kei ira na tu voleka ena noda sereka na cudru ka tu vei keda. Eda gu ena sasaga ni maroroya na ivakaro ni Kalou. Eda segata me da talairawarawa. Eda vakayacora ka maroroya na veiyalayalati. Eda dokai ira na tamada kei na tinada. Eda vakatikitikitaka na idre kei vuravura. Eda vakavakarautaki keda ki na Nona iKarua ni Lesu Mai.

Ena “Ko Karisito ka Bula Tiko: Na nodra iVakadinadina na iApositolo,” e da wilika ni ko: “[Jisu] ena lesu mai ena dua na siga. … E na veiliutaki o Koya ka na yaco me nodra Tui na Tui ka nodra Turaga na Turaga, ka na tekiduru na duru vakayadua ga ka vakatutusa na yame kecega ka qaravi Koya. Eda na tu vakayadua ka lewai mai Vua ena veika eda vakayacora kei na gagadre ni lomada.”⁵

Me vaka ni‘u dua vei ira na iApositolo ka sainitaka na ivolatukutuku “Ko Karisito Ka Bula Tiko”, au rawa ni tukuna ni‘u kila ni ko Jisu esa ikoya “na rarama, na bula, kei na inuinui kei vuravura”⁶ka solia vei au na gagadre levu cake me‘u lomani Koya vakalevu cake e veisiga.

Au vakadinadinataka ni bula tiko na Tamada Vakalomalagi kei Jisu Karisito. Au vakadinadinataka ni Rau lomani keda. Na ivolanikalou e vakatavulica “Ni sa lomani ira na kai vuravura vakaoqo na Kalou, me solia kina na Luvena e duabau ga sa vakatubura, me kakua ni rusa ko ira yadua era sa vakabauti koya, me ra rawata ga na bula tawamudu.”⁷ E vakatavulica talega na ivolanikalou ni o Jisu “sa rui lomana vakalevu na vuravura me solia kina na nona bula, me ra yaco rawa kina ko ira era vakabauta me ra luve ni Kalou.”⁸

Na Tamada Vakalomalagi e sa rui lomani keda vakalevu ka vakarautaka kina o Koya na ituvatuva ni bula ka kena usutu na iVakabula. Ia o Jisu e lomani keda vakalevu sara ka mani vakavuna kina, ni taroga ko Tamada Vakalomalagi ena Matabose Levu mai Lomalagi, “Ko cei me‘u tala?” Ko Jisu, ka ulumatua vei ira kece na luvena vakayalo ko Tamada, a sauma, “Koi au oqo, Ni talai au.”⁹ A kaya o Koya vei Tamana, “I Tamaqu, me yaco na lomamuni, ka me nomuni tikoga na vakarokoroko ka sega ni mudu.”¹⁰ E a yalorawarawa o Jisu me noda iVakabula kei na Dauveivueti ka me rawa ni da ucui Rau ka lesu tale kina ki na Nodrau i serau.

Na ivolanikalou ruarua ‘qo e vakavulica me da lesu tale ki na Nodrau i serau e dodonu me da vakabauta. E dodonu me da vakabauti Jisu kei na ituvatuva ni marau ni Kalou. Na vakabauta sa ikoya na loloma kei na muria na iVakabula ka maroroya na nona ivakaro, ena gauna mada ga ni veivakatovolei se na veiba.

Na vuravura nikua sa levu na kena yavavala. E levu na i nuinui cala, dui lomaloma, rarawa, kei na veivakawelei.

O Peresitedi Dallin H. Oaks, e na nona vosa e na 2017, e a vakaraitaka na veika oqo: “Oqo na gauna dredre, e levu kina na lomaocaoca: na i valu kei na irogorogo ni ivalu, na kena rawa ni dewa na mate vei tauvi levu, dravuisiga, ualuvu, kei na katakata ni vuravura.”¹¹

Me da kakua ni vakayalia na noda lomana ka vakanuinuitaki Jisu, kevaka madaga eda sotava tiko na veibolei e veiluvuci. Na Tamada Vakalomalagi kei Jisu e Rau na sega ni guilecavi keda. E Rau lomani keda.

E na Okotova sa oti, a vakavulici keda o Peresitedi Rusell M. Nelson ena bibi ni noda vakaliuci Tamada Vakalomagi kei Jisu Karisito. E vakavulica vei keda o Peresitedi Nelson ni dua na ibalebale ni vosa na Isireli sa ikoya me “qaqa tikoga na Kalou”¹²

A tarogi keda yaduadua e na vei taro oqo: “O sa tu vakarau beka mo laiva me qaqa tikoga na Kalou ena nomu bula? O sa tu vakarau beka mo laiva na Kalou me dau veivakayarayarataki bibi duadua ena nomu bula? Ko na vakatara beka na Nona vosa, na Nona ivakaro, kei na Nona veiyalayalati me veivakayarayarataki ena veika o vakayacora e veisiga? Ko na vakatara beka na Domona me liu duadua mai vei ira kece na kena vo? O sa tu vakarau beka mo laiva na veika cava ga e gadreva o Koya mo cakava, me bibi duadua mai vei ira na nomu veisasaga kecega? O sa tu vakarau beka mo laiva me sa duavata na lomamu kei na Lomana?”¹³

Me da dau nanuma tikoga ni noda marau dina e vakatau tikoga ena noda veiwekani kei na Kalou, kei Jisu Karisito, kei ira tale eso.

E dua na sala ni kena vakaraitaki na noda loloma sa ikoya na semati ni matavuvale, itokani, kei ira na wekada me da cakava eso na veika lalai me da veiqaravi vakavinaka cake kina vakai keda. Cakava na veika ena vakavuna me vuravura vinaka cake na vuravura qo.

Na cava o rawa ni cakava ena nomu bula me vakaraitaka ni ko lomana taumada na Turaga?

Ni da vakanamata ki na nodra lomani o ira eda tu veitikivi kaya me vaka na Nona lomani ira, sa na tekivu me da na lomani ira vakaidina o ira era tu wavoliti keda.¹⁴

Au taro tale, o na sauma vakacava na taro ni iVakabula “Ko sa lomani au vakalevu ka vakalailai ko iratou oqo?”

Ni ko vakasamataka na taro qo me vaka au a cakava, au masuta ni o na sauma me vaka a vakayacora o Pita ena dua na gauna makawa, “Io, Turaga; ko ni sa kila ni‘u sa lomani kemuni,”¹⁵ ka mo qai vakaraitaka ena nomu lomana ka qarava na Kalou kei ira era tu wavoliti iko.

Au vakadinadinataka ni da sa vakalougatataki ni tu vei keda na kosipeli i Jisu Karisito me dusimaki keda ena ivakarau ni noda bula kei na noda veimaliwai vakaikeda Ena Vukuna, eda na kunea ni luve yalewa kei na tagane yadudua ni Kalou e ka talei Vua

Au vakadinadinataka ni o Jisu Karisito e noda iVakabula lomani. E sa Luvena Lomani Duabau ga na Kalou O Koya. Au wasea na ivakadinadina oqo ena yalo e vakarokoroko ena yaca tabu, sai Jisu Karisito, emeni.